ລາຍຮັບຂອງລັດຖະບານ ລາວ ຈາກຄ່າສຳປະທານການຂຸດຄົ້ນແຮ່ທາດ ແລະ ການຊົມ ໃຊ້ລະບົບໂທລະຄົມມະນາຄົມຫຼຸດລົງຢ່າງຕໍ່ເນື່ອງ ໂດຍສະເພາະບໍ່ຄຳຂະໜາດໃຫຍ່ 2 ແຫ່ງຍັງປະເຊີນກັບການຂາດທຶນອີກດ້ວຍ.
ທ່ານ ສົມດີ ດວງດີ ຮອງນາຍົກລັດຖະມົນຕີ ແລະ ລັດຖະມົນຕີວ່າການກະຊວງການເງິນ ຖະແຫຼງລາຍງານຕໍ່ກອງປະຊຸມສະໄໝສາມັນຄັ້ງທີ 3 ຂອງສະພາແຫ່ງຊາດ ລາວ ຊຸດທີ
8 ທີ່ໄດ້ດຳເນີນກອງປະຊຸມຢ່າງເປັນທາງການລະຫວ່າງວັນທີ 25 ເມສາ ຫາ 18 ພຶດສະ
ພາ 2017 ນີ້ວ່າລາຍຮັບຂອງລັດຖະບານ ລາວ ທີ່ຫຼຸດລົງຫຼາຍທີ່ສຸດໃນປັດຈຸບັນຄື ລາຍ
ຮັບຈາກຄ່າສຳປະທານໃນທຸລະກິດໂທລະຄົມມະນາຄົມ ແລະ ການຂຸດຄົ້ນແຮ່ທາດ ໂດຍ
ສະເພາະແຮ່ຄຳຢູ່ພູເບ້ຍ ແລະ ບ້ານຫ້ວຍຊາຍໃນແຂວງໄຊສົມບູນ ຍັງຕ້ອງປະເຊີນກັບ ສະພາວະຂາດທຶນ ຄິດເປັນມູນຄ່າລວມກັນບໍ່ນ້ອຍກວ່າ 200 ຕື້ກີບອີກດ້ວຍ ຊຶ່ງໝາຍ ຄວາມວ່າລັດຖະບານ ລາວ ຈະບໍ່ມີລາຍຮັບຈາກເໝືອງແຮ່ຄຳຂະໜາດໃຫຍ່ທັງ 2 ແຫ່ງ ດັ່ງກ່າວນີ້ເລີຍ.
ສ່ວນລາຍຮັບຈາກຄ່າສຳປະທານໃນທຸລະກິດໂທລະຄົມມະນາຄົມທີ່ຫຼຸດລົງນັ້ນກໍເພາະວ່າ ໄດ້ມີການໃຊ້ບໍລິການໂທລະຄົມມະນາຄົມຫຼຸດລົງໂດຍປະຊາຊົນ ລາວ ແລະ ບັນດາຫົວ
ໜ່ວຍທຸລະກິດຕ່າງໆ ໄດ້ພາກັນຫັນໄປຊົມໃຊ້ລະບົບທີ່ບໍ່ຕ້ອງເສຍຄ່າບໍລິການກໍຄືລະບົບ ອອນລາຍ ແລະ ອິນເຕີແນັດ ເພື່ອສື່ສານລະຫວ່າງ ກັນຫຼາຍຂຶ້ນຈຶ່ງສົ່ງຜົນເຮັດໃຫ້ລາຍ
ຮັບຂອງລັດຖະບານ ລາວ ຫຼຸດລົງດ້ວຍ ດັ່ງທີ່ທ່ານ ສົມດີ ໄດ້ໃຫ້ການຊີ້ແຈງວ່າ.
"ມີລາຍຮັບບາງປະເພດທີ່ມີຂໍ້ຫຍຸ້ງຍາກ ບໍ່ທັນສາມາດປະຕິບັດໄດ້ຕາມຄາດໝາຍເທົ່າ
ທີ່ຄວນ ເປັນຕົ້ນລາຍຮັບຈາກຊັບພະຍາກອນທຳມະຊາດ ຄືວ່າອາກອນກຳໄລຈາກຄຳ
ປີນີ້ທັງ 2 ບໍ່ໃຫຍ່ຖືວ່າບໍ່ມີກຳໄລແຫຼະ ສິຂາດໄປ 200 ຕື້ ນອກຈາກນັ້ນກໍມີລາຍຮັບອັນ
ໃຫຍ່ອື່ນໆ ຊຶ່ງເປັນລາຍຮັບຈາກໂທລະຄົມ ອັນນີ້ກໍຫຼຸດລົງຫຼາຍຈາກອາກອນຂອງໂທ
ລະສັບຕ່າງໆ ຍ້ອນວ່າຄົນນີ້ຫັນໄປນຳໃຊ້ອອນລາຍ ນຳໃຊ້ອິນເຕີແນັດ ທີ່ບໍ່ໄດ້ເສຍ
ເງິນ ກະເລີຍເຮັດໃຫ້ການເສຍພັນທະຫຼຸດລົງຫຼາຍພໍສົມຄວນ."
ສຳລັບໃນແຜນການປະຈຳປີ 2015-2016 ທີ່ຜ່ານມາ ລັດຖະບານ ລາວ ສາມາດຈັດເກັບ
ລາຍຮັບໄດ້ໃນມູນຄ່າລວມທັງໝົດ 22,555.59 ຕື້ກີບ ຊຶ່ງຄິດເປັນ 95.17 ເປີເຊັນຂອງ
ແຜນການປີ 2015-2016 ທີ່ສິ້ນສຸດແຜນການເມື່ອທ້າຍເດືອນກັນຍາປີ 2016 ຜ່ານມາ ໂດຍເປັນລາຍຮັບພາຍໃນ 20,041.19 ຕື້ກີບ ທີ່ໄດ້ຈາກສ່ວຍສາອາກອນ 9,711 ຕື້ກີບ,
ພາສີ 6,366 ຕື້ກີບ, ພັນທະຈາກລັດວິສາຫະກິດ 1,968 ຕື້ກີບ, ຊັບສິນຂອງລັດ 1,975
ຕື້ກີບ ແລະ ອື່ນໆອີກ 2,119 ຕື້ກີບ.
ໂດຍທ່ານ ສົມດີ ກໍຍອມຮັບວ່າການຈັດເກັບລາຍຮັບໄດ້ຕໍ່າກວ່າເປົ້າໝາຍດັ່ງກ່າວມີສາ
ເຫດທີ່ສຳຄັນມາຈາກລະ ດັບປະສິດທິພາບຕໍ່າໃນການຈັດເກັບລາຍຮັບໃນຫຼາຍພາກ
ສ່ວນ ໂດຍສະເພາະແມ່ນພາກສ່ວນທີ່ຮັບຜິດຊອບການຈັດເກັບພາສີອາກອນການຄ້າ
ແລະ ຊັບສິນຂອງລັດນັ້ນ ຊຶ່ງກໍເຮັດໃຫ້ການຈັດເກັບລາຍຮັບພາຍໃນໄດ້ຕໍ່າກວ່າເປົ້າ
ໝາຍທີ່ວາງໄວ້ຫຼາຍກວ່າ 1,100 ຕື້ກີບ.
ການຈັດເກັບລາຍຮັບໄດ້ຕໍ່າກວ່າແຜນການດັ່ງກ່າວຍັງເຮັດໃຫ້ລັດຖະບານ ລາວ ຕ້ອງ
ປັບຫຼຸດເປົ້າໝາຍຂອງການຈັດເກັບລາຍຮັບຕະຫຼອດແຜນການລົງຈາກເດີມ 26,159 ຕື້
ກີບເປັນ 23,700 ກວ່າຕື້ກີບ ທັງຍັງຕ້ອງປັບຫຼຸດລາຍຈ່າຍລົງຈາກ 31,946 ຕື້ກີບ ເປັນ
31,118 ຕື້ກີບ ໂດຍຫຼຸດລົງເຖິງ 828 ຕື້ກີບ ເມື່ອເຖິງຊ່ວງ 6 ເດືອນທຳອິດຂອງແຜນການ
ປີ ທັງເຮັດໃຫ້ລັດຖະບານ ລາວ ຕ້ອງປະເຊີນບັນຫາຂາດດຸນງົບປະມານເພີ່ມຂຶ້ນຈາກ
5,787 ຕື້ກີບເປັນ 7,418 ຕື້ກີບ ຄິດເປັນ 6.43 ເປີເຊັນຂອງ GDP ເຮັດໃຫ້ການລົງທຶນ
ຂອງລັດຫຼຸດລົງເກີນກວ່າ 500 ຕື້ກີບ ຈຶ່ງສົ່ງຜົນກະທົບຕໍ່ການຈັດຕັ້ງປະຕິບັດແຜນການ
ຢ່າງຫຼີກລ່ຽງບໍ່ໄດ້ເຊັ່ນກັນ.
ພາຍໃຕ້ສະພາບການດັ່ງກ່າວນີ້ ລັດຖະບານ ລາວ ຈຶ່ງໄດ້ຕັດສິນໃຈນຳໃຊ້ລະບົບການ
ຈັດເກັບລາຍຮັບສ່ວຍອາກອນແບບປະຕູດຽວ (One Stop Service) ໃນທຸກພາກສ່ວນ
ທີ່ກ່ຽວຂ້ອງກັບການຈັດເກັບລາຍຮັບເຂົ້າງົບປະມານຂອງລັດຖະບານໃນທົ່ວປະເທດໃຫ້
ໄວທີ່ສຸດ ໂດຍສະເພາະພາກການຄ້າຂາອອກ ແລະ ຂາເຂົ້າລວມເຖິງພາກສ່ວນທີ່ຮັບຜິດ
ຊອບການນຳເຂົ້າຍານພາຫະນະຈາກຕ່າງປະເທດດ້ວຍນັ້ນ.
ທັງນີ້ໂດຍລັດຖະບານ ລາວ ໄດ້ວາງເປົ້າໝາຍຈະຈັດເກັບລາຍຮັບໃນຊ່ວງປີ 2016-
2020 ໃຫ້ເພີ່ມຂຶ້ນ 50 ເປີເຊັນທຽບໃສ່ຊ່ວງປີ 2011-2015 ຊຶ່ງກໍຈະເຮັດໃຫ້ລັດຖະບານ
ລາວ ມີລາຍຮັບລວມ 149,000 ຕື້ກີບ ຄິດເປັນ 19-20 ເປີເຊັນຂອງຍອດຜະລິດຕະພັນ
ລວມ (GDP) ໃນຕະຫຼອດ 5 ປີດັ່ງກ່າວ ໂດຍແບ່ງເປັນລາຍຮັບພາຍໃນ 131,800 ຕື້ກີບ
ຫຼື ເພີ່ມຂຶ້ນເຖິງ 72 ເປີເຊັນທຽບໃສ່ຊ່ວງປີ 2011-2015.
