ລິ້ງ ສຳຫລັບເຂົ້າຫາ

ວັນອັງຄານ, ໑໙ ມີນາ ໒໐໒໔

ລາວ ຫລຸດຜ່ອນບັນຫາຂາດແຄນທຶນສຳຮອງເງິນຕາຕ່າງປະເທດ ດ້ວຍການອະນຸຍາດສຳປະທານ ການຂຸດຄົ້ນແຮ່ທາດ


ເງິນກີບ ແລະເງິນຈາກປະເທດອື່ນໆ
ເງິນກີບ ແລະເງິນຈາກປະເທດອື່ນໆ

ລັດຖະບານລາວ ຫລຸດຜ່ອນບັນຫາຂາດແຄນທຶນສຳຮອງເງິນຕາຕ່າງປະເທດຢ່າງໜັກດ້ວຍການອະນຸຍາດສຳປະທານການຂຸດຄົ້ນແຮ່ທາດເຖິງ 50 ແຫ່ງທີ່ເຮັດໃຫ້ລັດຖະບານ ມີລາຍຮັບເກີນກວ່າ 100 ລ້ານໂດລາ ຊົງຣິດ ໂພນເງິນ ມີລາຍງານ ຈາກບາງກອກ.

ທ່ານດາວວົງ ພອນແກ້ວ ລັດຖະມົນຕີກະຊວງພະລັງງານແລະບໍ່ແຮ່ ຖະແຫລງວ່າ ມາດຕະການນຶ່ງທີ່ໄດ້ມີການຈັດຕັ້ງປະຕິບັດ ເພື່ອຫລຸດຜ່ອນບັນຫາຂາດແຄນທຶນສຳຮອງເງິນຕາຕ່າງປະເທດຂອງລັດຖະບານລາວ ໃນໄລຍະທີ່ຜ່ານມາ ກໍຄືການອະນຸຍາດສຳປະທານ ການຂຸດຄົ້ນແຮ່ທາດຈຳນວນເຖິງ 50 ແຫ່ງ ໃຫ້ກັບບໍລິສັດເອກະຊົນລາວ ແລະຕ່າງຊາດ ຊຶ່ງຖືເປັນມາດຕະການທົດລອງເພື່ອສ້າງລາຍຮັບຢ່າງຮີບດ່ວນໃຫ້ກັບລັດຖະບານລາວ ໃນທ່າມກາງສະພາວະການຂາດແຄນດ້ານເງິນຕາຕ່າງປະເທດຢ່າງໜັກໜ່ວງ ທັງຍັງຄາດຫວັງດ້ວຍວ່າ ລັດຖະ ບານລາວຈະມີລາຍຮັບຈາກການອະນຸຍາດສຳປະທານການຂຸດຄົ້ນແຮ່ທາດເພີ້ມຂຶ້ນຢ່າງຕໍ່ເນື່ອງອີກດ້ວຍ ເພາະວ່າລາຄາແຮ່ທາດໃນຕະຫຼາດຕ່າງປະເທດນັ້ນ ກໍຍັງມີທ່າອ່ຽງເພີ້ມຂຶ້ນນັບມື້ນັ້ນເອງດັ່ງທີ່ທ່ານດາວວົງ ໄດ້ໃຫ້ການຢືນຢັນວ່າ:

“ປັດຈຸບັນກະມີ 50 ບໍລິສັດທີ່ໄດ້ເຮັດການທົດລອງ ທີ່ໄດ້ເລີ້ມມາແຕ່ເດືອນ 6 ປີກາຍ ຊຶ່ງເຮົາຈະເຫັນວ່າມີຜົນສຳເລັດດ້ານດີໃນຫຼາຍອັນ ຈຸດປະສົງເປົ້າໝາຍໃນການເຮັດຂຸດຄົ້ນແຮ່ທາດແບບທົດລອງນີ້ ກະແມ່ນເພື່ອສ້າງລາຍຮັບໃຫ້ກັບລັດຖະບານ ເພື່ອເຮັດໃຫ້ມີງົບປະມານໄປໃຊ້ໜີ້ ແລ້ວກະເພື່ອບໍ່ໃຫ້ເສດຖະກິດຂອງພວກເຮົາກ້າວໄປສູ່ວິກິດຫັ້ນແຫລະ ກະຖືວ່າ ຂະແໜງການແຮ່ທາດນີ້ ກໍເປັນທ່າແຮງອັນນຶ່ງທີ່ຈະຊ່ອຍໃຫ້ການສ້າງລາຍຮັບຄ້ອນຂ້າງໄວ ພ້ອມກັນນັ້ນ ກໍເປັນກາລະໂອກາດນຶ່ງ ເນື່ອງຈາກວ່າ ໃນໄລຍະດັ່ງກ່າວ ລາຄາແຮ່ທາດໜີ້ ກະມີທ່າອ່ຽງສູງຂຶ້ນ ເຮັດໃຫ້ການສົ່ງອອກມີຜົນດີຕໍ່ພວກເຮົາ.”

ສ່ວນທ່ານພັນຄຳ ວິພາວັນ ນາຍົກລັດຖະມົນຕີ ຖະແຫລງຢືນຢັນວ່າ ບັນຫາດ້ານເສດຖະກິດ ແລະການເງິນທີ່ລາວ ກຳລັງປະເຊີນໃນປັດຈຸບັນ ຖືເປັນສະພາບການທີ່ມີຄວາມຫຍຸ້ງຍາກຢ່າງທີ່ສຸດ ໂດຍສະເພາະແມ່ນບັນຫາດ້ານການເງິນ ເຊັ່ນພາລະໜີ້ສິນສາທາລະນະຂອງລັດຖະບານທີ່ເພີ້ມຂຶ້ນ ການຂາດດຸນດ້ານເງິນຕາ ບັນຫາໜີ້ດ້ອຍຄ່າໃນລະບົບທະນາຄານ (NPL) ທີ່ເພີ້ມຂຶ້ນ ແລະອັດຕາແລກປ່ຽນເງິນທີ່ແຕກຕ່າງກັນເພີ້ມຂຶ້ນ ລະຫວ່າງທະນາຄານກັບຕະຫຼາດທີ່ເຮັດໃຫ້ລັດຖະບານລາວ ຕ້ອງກຳນົດໃຫ້ບັນຫາເຫຼົ່ານີ້ ເປັນວາລະແຫ່ງຊາດດ້ານເສດຖະກິດ ທີ່ຈະຕ້ອງດຳເນີນມາດຕະການແກ້ໄຂໃຫ້ໄດ້ຢ່າງແທ້ຈິງພາຍໃນປີ 2023.

ໂດຍລັດຖະບານລາວ ໄດ້ວາງເປົ້າໝາຍຂອງວາລະແຫ່ງຊາດທາງດ້ານເສດຖະ ກິດການເງິນໄວ້ໃນ 4 ດ້ານດ້ວຍກັນ ກໍຄືການລົດພາລະໜີ້ສາທາລະນະ ຂອງລັດຖະບານໃຫ້ຢູ່ທີ່ລະດັບ 64.2 ເປີເຊັນຂອງຍອດຜະລິດຕະພັນລວມ (GDP) ພາຍໃນປີ 2023 ໃນນີ້ແບ່ງເປັນໜີ້ຕ່າງປະເທດ 55.3 ເປີເຊັນ ແລະໜີ້ພາຍໃນ 8.9 ເປີເຊັນຂອງ GDP ການເພີ້ມທຶນສຳຮອງເງິນຕາຕ່າງປະເທດ ເພື່ອຮັບປະກັນການນຳເຂົ້າສິນຄ້າຕ່າງປະເທດ ໃຫ້ໄດ້ 3 ເດືອນ ການຄວບຄຸມອັດ ຕາແລກປ່ຽນເງິນຕາລະຫວ່າງທະນາຄານກັບຕະຫຼາດ ໃຫ້ແຕກຕ່າງກັນ ບໍ່ເກີນ 2 ເປີເຊັນຂອງມູນໜີ້ທັງໝົດ.

ໂດຍລັດຖະບານລາວ ປະເຊີນກັບການຂາດດຸນຊຳລະບັນຊີເງິນຕາຕ່າງປະເທດໃນລະດັບສູງກວ່າ 10 ເປີເຊັນ ຂອງຜະລິດຕະພັນລວມພາຍໃນ (GDP) ໃນປັດຈຸບັນ ຊຶ່ງເຮັດໃຫ້ທຶນສຳຮອງເງິນຕາຕ່າງປະເທດຂອງລາວ ລົດລົງຈາກ 1,263 ລ້ານໂດລາ ໃນທ້າຍປີ 2021 ເຫຼືອພຽງແຕ່ 1,068 ລ້ານໂດລາ ຫຼືເທົ່າກັບການນຳເຂົ້າສິນຄ້າໄດ້ພຽງ 1 ເດືອນເຄິ່ງເທົ່ານັ້ນໃນໄຕມາດທີ 1 ຂອງ ປີ 2022 ເຮັດໃຫ້ລັດຖະບານລາວ ຕ້ອງກູ້ຢືມຈາກຕ່າງປະເທດເພີ້ມຂຶ້ນ ເພື່ອນຳມາໃຊ້ດຸ່ນດ່ຽງການຂາດດຸນຊຳລະບັນຊີເງິນຕາຕ່າງປະເທດດັ່ງກ່າວ ແລະການທີ່ມີລາຍຈ່າຍສູງກວ່າລາຍຮັບ ກໍຈະເຮັດໃຫ້ລັດຖະບານລາວ ມີໜີ້ເພີ້ມຂຶ້ນ ຈາກ 15,500 ລ້ານໂດລາຫຼືຄິດເປັນ 70 ເປີເຊັນຂອງ GDP ປີ 2021 ເປັນສູງກວ່າ 75 ເປີເຊັນຂອງ GDP ປີ 2022 ນີ້ ເພາະວ່າ ລັດຖະບານລາວ ຍັງຈະຕ້ອງກູ້ຢືມ 1,275 ລ້ານໂດ​ລາ ສຳລັບຊຳລະໜີ້ຕ່າງປະເທດໃນປີ 2022 ນີ້ ໂດຍບໍ່ລວມໜີ້ພາຍໃນປເທດ ມູນຄ່າ 15,000 ຕື້ກີບ ທີ່ຈະຕ້ອງຊຳລະຄືນໃນປີ 2022 ເຊັ່ນດຽວກັນ ໂດຍໜີ້ສິນດັ່ງກ່າວສ່ວນໃຫຍ່ກໍແມ່ນມູນໜີ້ທີ່ເກີດຈາກໂຄງ ການພັດທະນາຕ່າງໆ ທີ່ລັດຖະບານລາວອະນຸຍາດໃຫ້ພາກເອກະຊົນເປັນຜູ້ລົງ ທຶນໃຫ້ກ່ອນ ແລ້ວຈຶ່ງຊຳລະຄືນໃຫ້ ໃນພາຍຫຼັງ ຊຶ່ງສ່ວນໃຫຍ່ ກໍຍັງເປັນໂຄງ ການພັດທະນນາທີ່ບໍ່ໄດ້ມາດຕະຖານຕາມແຜນການອີກດ້ວຍ ເພາະວ່າ ມີການທຸຈະລິດເກີດຂຶ້ນໃນທຸກຂັ້ນຕອນນັ້ນເອງ.

XS
SM
MD
LG