ລັດຖະບານລາວກຳລັງປະເຊີນກັບບັນຫາຂາດແຄນງົບປະມານໃນການຈັດຕັ້ງປະຕິບັດ
ແຜນການເພື່ອຍຸຕິການຕິດເຊື້ອ HIV-AIDS ໃຫ້ໄດ້ຢ່າງສິ້ນເຊີງຕາມເປົ້າ ໝາຍທີ່ວາງ
ໄວ້ພາຍໃນປີ 2030 ເປັນຢ່າງຊ້າ ຊຶ່ງຊົງລິດ ໂພນເງິນ ມີລາຍງານຈາກບາງກອກ.
ທ່ານພູທອນ ສຸດທະຈັກ ຫົວໜ້າສູນຕ້ານໂຣກເອດສ໌ແຫ່ງຊາດ ຖະແຫຼງຍອມຮັບວ່າ ການ
ຈັດຕັ້ງປະຕິບັດແຜນການ ເພື່ອຍຸຕິການຕິດເຊື້ອໄວຣັສ HIV-AIDS ໃຫ້ໄດ້ຢ່າງສິ້ນເຊີງ
ຕາມເປົ້າໝາຍທີ່ວາງໄວ້ ພາຍໃນປີ 2030 ເປັນຢ່າງຊ້ານັ້ນ ຍັງຕ້ອງປະເຊີນກັບບັນຫາ
ແລະອຸບປະສັກໃນຫຼາຍໆດ້ານໂດຍສະເພາະແມ່ນການຂາດແຄນງົບປະມານແລະການ
ໄດ້ຮັບຄວາມຊ່ວຍເຫຼືອຈາກທຸກພາກສ່ວນນັ້ນ ຖືເປັນບັນຫາອຸບປະສັກທີ່ສຳຄັນທີ່ສຸດ
ໃນປັດຈຸບັນນີ້ ດັ່ງທີ່ທ່ານພູທອນ ໄດ້ໃຫ້ການຢືນຢັນວ່າ:
ຄັນເຮົາຊິເຮັດໄດ້ແນວນີ້ນະຈະມີແຕ່ກະຊວງສາທາເຮັດ ກະຊວງດຽວນີ້ກະບໍ່ສຳເລັດ
ເພາະສະນັ້ນ ທຸກໆຄົນໃນສັງຄົມຊຸມຊົນແລ້ວກະທຸກກະຊວງ ທຸກພາກສ່ວນ ຈົ່ງຮວມ
ແຮງຮວມໃຈກັນສະກັດກັ້ນ ແລະຕ້ານ HIV ແລ້ວກະພະຍາດ AIDS ນີ້ຮ່ວມກັນ ແຕ່ວ່າ
ໃນໄລຍະທີ່ຜ່ານມານີ້ ກະເຫັນວ່າຫຼາຍພາກສ່ວນເພີ່ນກະຍັງຖືວ່າວຽກງານຕ້ານ AIDS
ນີ້ແມ່ນວຽກງານຂອງກະຊວງສາທາ ແຕ່ໂຕຈິງແລ້ວມັນບໍ່ແມ່ນ ມັນຈະຕ້ອງໄດ້ຊ່ວຍກັນ
ຄັນເຮົາບໍ່ຊ່ວຍກັນໃຫ້ພາກສ່ວນໃດ ພາກສ່ວນນຶ່ງເຮັດນີ້ ເຮົາຈະບໍ່ສາມາດສະກັດກັ້ນ
ແລະຕ້ານ HIV ນີ້.”
ສ່ວນທ່ານຂັນທະໂນວຽງ ໄຊຍະບຸນທະວົງ ຮອງຫົວໜ້າສູນຕ້ານໂຣກ AIDS ແຫ່ງຊາດ
ຖະແຫຼງວ່າການດຳເນີນວຽກງານປ້ອງກັນການແຜ່ລະບາດຂອງເຊື້ອໂຣກ HIV-AIDS
ໃນລາວກຳລັງປະເຊີນບັນຫາຂາດແຄນງົບປະມານຢ່າງໜັກ ເນື່ອງຈາກວ່າ ຕ່າງປະເທດ
ໄດ້ໃຫ້ການຊ່ວຍເຫຼືອ ລົດລົງເລື້ອຍໆ ຄືລົດລົງຈາກສັດສ່ວນ 70 ເປີເຊັນ ມາເປັນ 30
ເປີເຊັນ ຂອງງົບປະມານທັງໝົດໃນແຕ່ລະປີ ຈຶ່ງເຮັດໃຫ້ລັດຖະບານລາວ ຕ້ອງໃຫ້ການ
ສະໝັບສະໜູນດ້ານງົບປະມານເຂົ້າໃນວຽກງານຕ້ານ HIV-AIDS ຫຼາຍຂຶ້ນ ຫາກບໍ່
ສະນັ້ນແລ້ວກໍຈະກະທົບຕໍ່ເປົ້າໝາຍທີ່ວາງໄວ້ຢ່າງຫລີກຫລ່ຽງບໍ່ໄດ້ ດັ່ງທີ່ທ່ານຂັນທະ
ໂນວຽງ ຢືນຢັນວ່າ.
“ສິ່ງສຳຄັນໃນປັດຈຸບັນ ກະໝາຍຄວາມວ່າ ງົບປະມານໃນພາກລັດຈະຕ້ອງໄດ້ມີ
ການລະດົມຄົນຊ່ວຍປະກອບສ່ວນເຂົ້າຕື່ມ ການຊ່ວຍເຫຼືອຂອງສາກົນຫັ້ນມັນຄ່ອຍ
ຫລຸດລົງໆ ໃນຜ່ານມານີ້ການຊ່ວຍເຫຼືອສາກົນກວມເຖິງ 70 ເປີເຊັນ ຈັ່ງເຊັ່ນດຽວນີ້
ມັນຊິປິ້ນກັນ ສາກົນມັນຫລຸດລົງ ລັດເຮົາຈະຕ້ອງໄດ້ເຮັດຂຶ້ນ ຄັນບໍ່ຊັ້ນວຽກງານ
HIV-AIDS ນີ້ ກະນອນຢູ່ໃນວຽກງານການບໍລິການສາທາລະນະສຸກ ຄັນເວົ້າລວມ
ແລ້ວພວກເຮົາຍັງບໍ່ທັນບັນລຸໂຕນັ້ນ.”
ໂດຍນັບແຕ່ປີ 1990 ເປັນຕົ້ນມາ ທາງການລາວໄດ້ກວດພົບຜູ້ຕິດເຊື້ອ HIV ຈຳນວນ
13,000 ກວ່າຄົນ ຈາກການຊຸ່ມກວດເລືອດພົລລະເມືອງລາວ
140,000 ກວ່າຄົນໃນທົ່ວປະເທດ ໃນນີ້ກໍເປັນຜູ້ຕິດເຊື້ອເພດຊາຍ 7,300 ກວ່າຄົນ
ເພດຍິງ 5,700 ກວ່າຄົນ ແລະມີຜູ້ທີ່ເສຍຊີວິດຍ້ອນໂຣກ AIDS ຫຼາຍກວ່າສອງພັນຄົນ
ແຕ່ຈາກສະພາບໂຕຈີງກໍເຊື່ອວ່າມີຜູ້ຕິດເຊື້ອ HIV-AIDS ໃນລາວຫຼາຍກວ່າທີ່ປາກົດ
ໃນສະຖິຕິດັ່ງກ່າວ ເພາະວ່າສະພາວະການຕິດເຊື້ອ HIV-AIDS ໃນກຸ່ມປະຊາກອນ
ລາວທີ່ອາຍຸ 15 ຫາ 49 ປີ້ນັ້ນເຖິງແມ່ນວ່າຈະມີອັດຕາສະເຫຼ່ຍພຽງ 0.3 ເປີເຊັນ ແລະ
ເປັນການຕິດເຊື້ອຕ່ຳທີ່ສຸດໃນອາຊຽນກໍຕາມ ຫາກແຕ່ກໍເປັນການຕິດເຊື້ອທີ່ເພີ້ມຂຶ້ນ
ຈາກລະດັບ 0.16 ເປີເຊັນໃນປີ 2003 ຊຶ່ງເພີ້ມຂຶ້ນເກືອບນຶ່ງເທົ່າໂຕ.
ໂດຍອີງຕາມລາຍງານຂອງອົງການຄວບຄຸມໂຣກ AIDS ແຫ່ງສະຫະປະຊາຊາດ ລະບຸ
ວ່າ ໃນປັດຈຸບັນມີປະຊາຊົນລາວຕິດເຊື້ອ HIV ຫຼາຍກວ່າ 13,000 ຄົນ ໃນນີ້ 88 ເປີ
ເຊັນ ຕິດເຊື້ອຈາກການມີເພດສຳພັນ ແລະກຸ່ມທີ່ມີຄວາມສ່ຽງສູງສຸດ ກໍຄືກຸ່ມຮັກຮ່ວມ
ເພດດຽວກັນ ຕິດຕາມດ້ວຍກຸ່ມຂາຍບໍລິການທາງເພດ ທີ່ມີຫຼາຍກວ່າ 15,340 ຄົນ ໃນ
ນີ້ 70 ເປີເຊັນ ໄດ້ເຂົ້າຮັບການກວດເລືອດເປັນປະຈຳ ໃນຂະນະດຽວກັນກໍມີຜູ້ຊາຍກວ່າ 58,320 ຄົນ ທີ່ຮັກຮ່ວມເພດດຽວກັນ ສ່ວນອີກ 50,000 ກວ່າຄົນຢູ່ໃນກຸ່ມທີ່ຊົມໃຊ້ຢາ
ເສບຕິດເປັນປະຈຳ ພາຍໃຕ້ສະພາບການດັ່ງກ່າວນີ້ກໍຍັງເຮັດໃຫ້ທາງການລາວຈະ
ຕ້ອງເພີ້ມປະສິດທິພາບຂອງການບໍລິຫານ ປິ່ນປົວຜູ້ຕິດເຊື້ອ HIV ໃຫ້ທົ່ວເຖິງ ແລະ
ພຽງພໍກັບບັນຫາໂຕຈິງ ເພາະວ່າໃນປັດຈຸບັນນີ້ມີຜູ້ຕິເຊື້ອ HIV ພຽງແຕ່ 50 ເປີເຊັນ
ເທົ່ານັ້ນ ທີ່ມີໂອກາດໄດ້ຮັບຢາຕ້ານ ໂຣກ AIDS ຈາກທາງການລາວ.
ທັງນີ້ໂດຍນະຄອນວຽງຈັນເປັນເຂດທີ່ມີຜູ້ຕິດເຊື້ອ HIV-AIDS ຫຼາຍທີ່ສຸດໃນລາວ ຄຶດ
ເປັນ 40.5 ເປີເຊັນ ຕິດຕາມດ້ວຍ ສະຫວັນນະເຂດ ຈຳປາສັກ ຫຼວງພະບາງ ຄຳມ່ວນ
ແລະແຂວງວຽງຈັນ ຕາມລຳດັບ ໂດຍໃນປີ 2014 ຫາ 2018 ມີຜູ້ເສຍຊີວິດຍ້ອນໂຣກ
AIDS ໂດຍສະເຫຼ່ຍ 500 ຄົນຕໍ່ປີ ແລະຫລຸດລົງມາເປັນ 300 ກວ່າຄົນໃນປີ 2019 ຊຶ່ງ
ຖ້າຫາກລັດຖະບານລາວສາມາດຂະຫຍາຍໂອກາດໃຫ້ຜູ້ຕິດເຊື້ອ HIV ໄດ້ຮັບຢາຕ້ານ
AIDS ເພີ້ມຂຶ້ນກໍຍອມຈະເຮັດໃຫ້ອັດຕາການເສຍຊີວິດຈາກໂຣກ AIDS ຫລຸດລົງ
ດ້ວຍເຊັ່ນກັນ.
