ທາງການລາວ ຄາດວ່າ ຈະມີນັກທ່ອງທ່ຽວຕ່າງປະເທດເຂົ້າມາລາວຫຼາຍກວ່າ 5 ລ້ານຄົນ ໃນປີ 2024 ແຕ່ບັນຫາໃຫຍ່ທີ່ສຸດ ກໍຄືລັດຖະບານບໍ່ມີງົບປະມານເພື່ອສ້ອມແປງພື້ນຖານໂຄງລ່າງທີ່ເປ່ເພຢ່າງໜັກ.
ສະມາຊິກ ສະພາ ແຫ່ງຊາດລາວ ເປີດເຜີຍວ່າ ລັດຖະບານລາວໄດ້ເພີ່ມຕົວເລກຄາດໝາຍນັກທ່ອງທ່ຽວຕ່າງປະເທດທີ່ຈະເຂົ້າມາທ່ອງທ່ຽວລາວໃນປີທ່ອງທ່ຽວລາວ 2024 ຈາກເດີມ 4 ລ້ານ ຄົນ ເປັນເກີນກວ່າ 5 ລ້ານຄົນ, ໂດຍໃນນັ້ນ ຄາດວ່າ 70 ເປີເຊັນ ຈະເດີນທາງຜ່ານ ຂົວມິດຕະພາບລາວ-ໄທ ແຫ່ງທີ່ 1 ແລະ ຈໍານວນນັກທ່ອງທ່ຽວທີ່ຈະມາທ່ອງທ່ຽວລາວຫລາຍທີ່ສຸດ ຍັງຄົງເປັນນັກທ່ອງທ່ຽວຈາກໄທແລະບັນດາປະເທດໃນອາຊຽນດ້ວຍກັນ ຕິດຕາມດ້ວຍນັກທ່ອງທ່ຽວຈີນທີ່ສາມາດເດີນທາງມາລາວໄດ້ ທັງໂດຍທາງລົດຍົນ, ລົດໄຟ, ແລະເຮືອບິນ ແຕ່ບັນຫາກໍຄື ເມື່ອນັກທ່ອງທ່ຽວຕ່າງປະເທດເຂົ້າມາໃນລາວແລ້ວ ພວກເຂົາກະຕ້ອງປະສົບກັບຄວາມບໍ່ສະດວກໃນການເດີນທາງໃນລາວ ທັງນີ້ ກໍຍ້ອນວ່າ ເສັ້ນທາງສ່ວນໃຫຍ່ຢູ່ໃນສະພາບເປ່ເພຢ່າງໜັກໜ່ວງ ຍ້ອນການບັນທຸກນ້ຳໜັກເກີນ ຂອງລົດຂົນສົ່ງແຮ່ທາດຈາກລາວ ໄປຈີນ. ໃນຂະນະທີ່ ລັດຖະບານລາວ ກໍມີງົບປະມານຈໍາກັດ ສະນັ້ນ, ເສັ້ນທາງຫຼາຍສາຍໃນລາວຈຶ່ງບໍ່ເອື້ອອໍານວຍໃຫ້ແກ່ການທ່ອງທ່ຽວເລີຍ. ດັ່ງທີ່ສະມາຊິກສະພາແຫ່ງຊາດລາວ ໄດ້ຢືນຢັນວ່າ:
“ບັນຫາເຄັ່ງຮ້ອນເຮົາຫຼາຍອັນເດ້ດຽວນີ້ນິ ກະທົບຈາກການຂຸດຄົ້ນແຮ່ທາດແດ່ ບັນຫາເສັ້ນທາງ ຖະໜົນຫົນທາງ, ປະຊາຊົນກະໄປຍາກ-ມາຍາກ. ແລະດຽວນີ້ ພວກເຮົາເວົ້າວ່າ ວຽກງານທ່ອງທ່ຽວເຮົານີ້ ເປັນແຫຼ່ງລາຍຮັບອັນໜຶ່ງທີ່ເປັນພື້ນຖານຂອງປະເທດຊາດພວກເຮາ ແຕ່ວ່າ ເວ້າເລື່ອງບັນຫາການພັດທະນາພື້ນຖານໂຄງລ່າງຂອງໄທເຮົານີ້ ກະຍັງບໍ່ທັນເປັນຂະບວນດີ. ໂດຍສະເພາະແມ່ນບັນຫາຖະໜົນຫົນທາງດຽວນີ້ໄປຍາກ-ມາຍາກ ອັນນີ້ ປະຊາຊົນກະຕັ້ງບັນຫາວ່າ ເສັ້ນທາງໄທເຮານີ້ຄືບໍ່ມີການສ້ອມແປງ. ສ້ອມແປງກະສ້ອມແປງເລັກໆນ້ອຍໆ ລັກສະນະວ່າ ຕາບນັ້ນ ຕາບນີ້ໄປ ບໍ່ຮອດ 2 ເດືອນເພແລ້ວ."
ພາຍໃຕ້ສະພາວະການຂາດແຄນງົບປະມານດັ່ງກ່າວ ຈຶ່ງເຮັດໃຫ້ລັດຖະບານລາວ ຕ້ອງເພິ່ງພາການຊ່ວຍເຫຼືອຈາກຕ່າງປະເທດເປັນດ້ານຫລັກ. ແຕ່ວ່າຕ່າງປະເທດ ກໍໄດ້ຈຳກັດການຊ່ວຍເຫລືອທີ່ໃຫ້ແກ່ລັດຖະບານລາວ ເພາະວ່າ ບໍ່ເຊື່ອໃນຄວາມໂປ່ງໃສໃນການໃຊ້ງົບປະມານຂອງລັດຖະບານລາວ ຈຶ່ງເຮັດໃຫ້ລັດຖະບານລາວ ປະສົບກັບການຂາດແຄນງົບປະມານຢ່າງຮ້າຍແຮງໃນປັດຈຸບັນ. ດັ່ງທີ່ ທ່ານນາງສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ ວັດທະນະທຳແລະທ່ອງທ່ຽວ ຢືນຢັນວ່າ:
“ຕໍ່ການພັດທະນາເສັ້ນທາງເຂົ້າແຫລ່ງທ່ອງທ່ຽວຕ່າງໆໃນທົ່ວປະເທດນີ້ ພວກເຮາກະເຫັນບັນຫາ. ທີ່ຜ່ານມາ ກະໄດ້ສະໜອງງົບທີ່ເກີນແຜນ 200 ຕື້ ເພື່ອສະໜັບສະໜູນໃນວຽກງານວັດທະນະທໍາ-ສັງຄົມ. ຂະແໜງຖະແຫຼງຂ່າວ-ວັດທະນະທຳ-ທ່ອງທ່ຽວ ກະໄດ້ 25 ຕື້ ແລະໃນນັ້ນ ພວກເຮົາກະໄດ້ເອົາໄປສຸມໃສ່ພັດທະນາເສັ້ນທາງເຂ້າແຫຼ່ງທ່ອງທ່ຽວ 2 ແຫ່ງ ສຳລັບງົບປະມານທີ່ລັດຖະບານຈະສະໜອງໃຫ້ນັ້ນ ກະແມ່ນຫຍຸ້ງຍາກແທ້ໆ. ບໍ່ສະເພາະແຕ່ເສັ້ນທາງເຂົ້າແຫຼ່ງທ່ອງທ່ຽວເທົ່ານັ້ນເນ້າະ ກໍຄືເສັ້ນທາງໃນທົ່ວປະເທດ. ເບື້ອງກະຊວງຂອງພວກເຮົາຈະໄດ້ເອົາໃຈໃສ່ຊອກຫາງົບປະມານເຂົ້າມາສຸມໃສ່ໃນການພັດທະນາ.”
ທັງນີ້ໂດຍລັດຖະບານລາວ ໄດ້ວາງເປົ້າໝາຍການສົ່ງເສີມການທ່ອງທ່ຽວພາຍໃນປະເທດ ແລະດຶງດູດນັກທ່ອງທ່ຽວຕ່າງປະເທດໃຫ້ໄດ້ 5 ລ້ານເທື່ອຄົນເພື່ອສ້າງລາຍຮັບດ້ານການບໍລິການໃຫ້ໄດ້ 1 ຕື້ໂດລາສະຫະລັດ ໃນປີ 2024, ແຕ່ວ່າ ຈະບໍ່ສາມາດບັນລຸເປົ້າໝາຍດັ່ງກ່າວໄດ້ເລີຍ. ຖ້າຫາກວ່າ ບໍ່ມີງົບປະມານທີ່ຈະນຳໃຊ້ເພື່ອພັດທະນາ ແລະປັບປຸງສິ່ງອຳນວຍຄວາມສະດວກຕ່າງໆທີ່ຊຸດໂຊມລົງຢ່າງໜັກໜ່ວງໃນປະຈຸບັນນີ້. ໂດຍສະເພາະເສັ້ນທາງຄົມມະນາຄົມຂົນສົ່ງ ແລະລະບົບພື້ນຖານໂຄງລ່າງເຊື່ອມຕໍ່ແຫຼ່ງທ່ອງທ່ຽວຕ່າງໆ ກໍແມ່ນບັນດາຂະແໜງການທີ່ຕ້ອງໄດ້ປັບປຸງຢ່າງຮີບດ່ວນທີ່ສຸດ. ແຕ່ວ່າ ກໍຍັງບໍ່ປາກົດວ່າ ມີການສະໜັບສະໜູນດ້ານງົບປະມານຈາກລັດຖະບານແຕ່ຍ່າງໃດ. ທັງຍັງຂາດການໂຄສະນາປີທ່ອງທ່ຽວຢູ່ຕ່າງປະເທດອີກດ້ວຍ.
ນອກຈາກນັ້ນ, ບັນດາຫົວໜ້າທຸລະກິດໃນຂະແໜງບໍລິການ ແລະ ການທ່ອງທ່ຽວໃນລາວ ກໍາລັງປະເຊີນກັບການຂາດແຄນແຮງງານຢ່າງໜັກໜ່ວງໃນເວລານີ້. ເຊິ່ງເປັນຍ້ອນວິກິດການທາງເສດຖະກິດທີ່ເຮັດໃຫ້ເກີດບັນຫາເງິນເຟີ້ສູງ ສິນຄ້າລາຄາແພງ ແລະຄ່າເງິນກີບໄດ້ຫຼຸດລົງຢ່າງຫຼວງຫຼາຍ. ໃນຂະນະທີ່ອັດຕາຄ່າຈ້າງຂັ້ນຕໍ່າຂອງແຮງງານໃນລາວຍັງຢູ່ໃນອັດຕາ 1.6 ລ້ານກີບຕໍ່ເດືອນ. ແຕ່ການທີ່ຄົນລາວຄົນໜຶ່ງຈະຢູ່ລອດໄດ້ນັ້ນ ຈະຕ້ອງມີລາຍໄດ້ບໍ່ຕໍ່າກວ່າ 3.5 ລ້ານກີບຕໍ່ເດືອນ.
ດັ່ງນັ້ນ, ຈຶ່ງເຮັດໃຫ້ແຮງງານລາວສ່ວນໃຫຍ່ພາກັນໄປເຮັດວຽກຢູ່ໄທທີ່ໄດ້ຮັບຄ່າຈ້າງສູງກວ່າຍູ່ລາວເຖິງ 5 ເທົ່າ. ທັງນີ້ ໂດຍສະພາການຄ້າແລະອຸດສາຫະກຳແຫ່ງຊາດລາວ ຄາດຄະເນວ່າ ຂະແໜງການບໍລິການ ແລະທ່ອງທ່ຽວໃນລາວ ໃນປະຈຸບັນ ພວມປະສົບກັບບັນຫາຂາດແຄນແຮງງານຫຼາຍກວ່າ 1 ລ້ານຄົນ. ເຊິ່ງຍັງບໍ່ລວມເຖິງການຂາດແຄນແຮງງານໃນຂະແໜງການຜະລິດຕ່າງໆໃນລາວແຕ່ຢ່າງໃດ.
ຟໍຣັມສະແດງຄວາມຄິດເຫັນ