ທາງການລາວ ຈະສ້າງຕັ້ງເຂດເສດຖະກິດພິເສດ ແລະເຂດ
ເສດຖະກິດສະເພາະ ໃຫ້ໄດ້ເຖິງ 58 ແຫ່ງ ພາຍໃນປີ 2020
ເພື່ອຮອງຮັບການລົງທຶນຈາກຕ່າງປະເທດ ໂດຍສະເພາະ
ແມ່ນການລົງທຶນຂອງນັກທຸລະກິດຈີນ.
ທ່ານສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳຂົງເຂດເສດຖະກິດ
ການຜະລິດ ແລະຈະລາຈອນ ຖະແຫລງຢືນຢັນ ໃນພິທີເປີດງານສະແດງສິນຄ້າ ຈີນ-
ອາຊຽນຄັ້ງທີ 12 ຢູ່ເມືອງໜານໜິງ ແຂວງກວາງສີ ປະເທດຈີນ ເມື່ອບໍ່ນານນີ້ ວ່າ
ລັດຖະບານລາວໄດ້ປັບປຸງນະໂຍບາຍ ແລະບັນດານິຕິກຳຕ່າງໆ ເພື່ອອຳນວຍຄວາມ
ສະດວກ ແລະສົ່ງເສີມ ບັນດາບໍລິສັດ ເອກະຊົນຈາກຈີນ ແລະຕ່າງປະເທດໃຫ້ເຂົ້າມາ
ລົງທຶນໃນລາວ ໃຫ້ຫຼາຍຂຶ້ນຢ່າງຕໍ່ເນື່ອງ.
ໂດຍສະເພາະແມ່ນການກຳນົດ ລະບຽບຢ່າງລະອຽດ ທີ່ກ່ຽວກັບການສ້າງຕັ້ງເຂດ ເສດຖະກິດພິເສດ ແລະເຂດເສດຖະກິດສະເພາະ ທີ່ລັດຖະບານລາວໄດ້ວາງເປົ້າໝາຍ
ທີ່ຈະສ້າງຕັ້ງໃຫ້ໄດ້ 58 ແຫ່ງ ທົ່ວປະເທດ ພາຍໃນປີ 2020 ຊຶ່ງໃນປັດຈຸບັນ ລັດຖະບານ
ລາວ ກໍໄດ້ສ້າງຕັ້ງເຂດເສດຖະກິດສະເພາະໄດ້ແລ້ວ 9 ແຫ່ງ ແລະສ້າງຕັ້ງເຂດເສດຖະກິດ
ພິເສດໄດ້ 2 ແຫ່ງ ຈຶ່ງຍັງເຫຼືອອີກເຖິງ 47 ແຫ່ງ ທີ່ຈະຕ້ອງສ້າງຕັ້ງຂຶ້ນຕໍ່ໄປ ໃນລະຍະ 5 ປີ
ຕໍ່ໜ້ານັ້ນເອງ.
ທາງດ້ານກະຊວງແຜນການ ແລະການລົງທຶນ ກໍລາຍງານວ່າ
ມີບໍລິສັດຕ່າງຊາດ 220 ລາຍ ທີ່ໄດ້ລົງທຶນຢູ່ໃນເຂດເສດຖະກິດ
ພິເສດ ແລະເຂດເສດຖະກິດສະເພາະ ທີ່ມີຢູ່ທັງ 11 ແຫ່ງໃນ
ລາວ ແລະມີມູນຄ່າການລົງທຶນລວມກັນ ຫຼາຍກວ່າ 6,000
ລ້ານໂດລາ ໂດຍເຂດທີ່ມີມູນຄ່າລົງທຶນຫຼາຍທີ່ສຸດ ກໍຄືເຂດ
ເສດຖະກິດພິເສດ ສາມຫລ່ຽມຄຳ ຢູ່ເມືອງຕົ້ນເຜິ້ງ ແຂວງ
ບໍ່ແກ້ວ ຊຶ່ງໃນປັດຈຸບັນໄດ້ລົງທຶນໄປແລ້ວ 500 ກວ່າລ້ານ
ໂດລາ ຈາກແຜນການລົງທຶນລວມ 2,250 ລ້ານໂດລາ ທີ່
ເປັນການລົງທຶນທັງ 100 ເປີເຊັນ ຂອງບໍລິສັດເອກະຊົນຈີນ.
ສ່ວນເຂດເສດຖະກິດສະເພາະ ບໍ່ເຕັນແດນງາມ ຊຶ່ງຕັ້ງຢູ່ຊາຍແດນ ລະຫວ່າງລາວກັບ
ຈີນ ໃນເຂດແຂວງຫລວງນ້ຳທານັ້ນ ກໍເປັນອີກເຂດໜຶ່ງທີ່ເປັນການລົງທຶນ ຂອງກຸ່ມບໍລິສັດ
ຈາກຈີນ ທີ່ເນັ້ນໜັກການລົງທຶນ ພັດທະນາການຄ້າ ສູນການເງິນ-ການທະນາຄານ
ສູນຂໍ້ມູນ ຂ່າວສານດ້ານການທ່ອງທ່ຽວ ແລະບໍລິການ ບ້ານວັດທະນະທຳ ສາງສິນຄ້າ
ອ່າງເກັບນ້ຳທຳມະຊາດ ສວນປ່າທຳມະຊາດ ແລະສະໜາມກລັອຟ.
ແຕ່ຢ່າງໃດກໍຕາມ ທາງການລາວ ກໍໄດ້ວາງແຜນການ ທີ່ຈະສ້າງຕັ້ງເຂດເສດຖະກິດ ໃຫ້
ໄດ້ບໍ່ນ້ອຍກວ່າ 20 ແຫ່ງພາຍໃນປີ 2015 ໂດຍເຂດທຳອິດ ກໍແມ່ນເຂດເສດຖະກິດພິເສດ
ສະຫວັນ-ເຊໂນ ໃນແຂວງສະຫວັນນະເຂດ ທີ່ສ້າງຕັ້ງຂຶ້ນໃນປີ 2003 ຕິດຕາມດ້ວຍ ເຂດ
ເສດຖະກິດສະເພາະ ບໍ່ເຕັນແດນງາມດັ່ງກ່າວ.
ໂດຍການສ້າງຕັ້ງເຂດເສດຖະກິດພິເສດ ແລະເຂດເສດຖະກິດສະເພາະຈຶ້ນໃນລາວນັ້ນ
ກໍມີເປົ້າໝາຍເພື່ອໃຫ້ເປັນພາກສ່ວນສຳຄັນ ໃນການພັດທະນາເສດຖະກິດ ຂອງລາວ
ໃຫ້ຈະເລີນກ້າວໜ້າ ທັງສ້າງວຽກເຮັດງານທຳ ໃຫ້ແກ່ຄົນລາວອີກດ້ວຍ ດັ່ງທີ່ທ່ານນາງ
ບົວທາ ຂັດຕິຍະ ຮອງປະທານຄະນະກຳມະການແຫ່ງຊາດລາວ ເພື່ອຄຸ້ມຄອງເຂດ
ເສດຖະກິດພິເສດ ແລະເຂດເສດຖະກິດສະເພາະ ໄດ້ຖະແຫລງຢືນຢັນວ່າ:
“ວຽກງານການພັດທະນາເຂດເສດຖະກິດພິເສດ ເປັນວຽກງານໃໝ່ ທີ່ຕັ້ງຂຶ້ນ
ແຕ່ປີ 2000 ທີ່ລັດຖະບານ ສປປ ລາວ ມີຈຸດເປົ້າໝາຍເຮັດໃຫ້ວຽກງານດັ່ງກ່າວ
ເປັນຫົວຈັກໃຫ້ແກ່ກາພັດທະນາ ແລະກໍ່ສ້າງ ປະກອບສ່ວນວຽກເຮັດງານທຳ
ໃຫ້ແກ່ປະເທດຊາດ ປະກອບສ່ວນໃຫ້ແກ່ການພັດທະນາເສດຖະກິດ ແລະ
ສັງຄົມແຫ່ງຊາດ ໃນແຕ່ລະໄລຍະ ການພັດທະນານີ້ ຈະແຈ້ງຂຶ້ນ ກໍຍ້ອນການ
ຈັດຕັ້ງພາກລັດຖະບານໄດ້ເອົາໃຈໃສ່ຄົ້ນຄວ້າ ຫາວິທີແກ້ໄຂບັນຫາ.”
ໂດຍຫຼ້າສຸດ ຄະນະກຳມະການຄຸ້ມຄອງ ເຂດເສດຖະກິດພິເສດ ແລະເຂດເສດຖະກິດ
ສະເພາະ ໄດ້ອະນຸມັດໃຫ້ສ້າງຕັ້ງເຂດເສດຖະກິດສະເພາະ ທີ່ໃຊ້ຊື່ວ່າ ເຂດເສດຖະກິດ
ອຸດສາຫະກຳປາກເຊ-ຍີ່ປຸ່ນ SME ໂດຍມີເນື້ອທີ່ສຳປະທານ 195 ເຮັກຕາ ຢູ່ໃນເຂດ
ເມືອງ ອຸທຸມພອນ ແລະເມືອງບາຈຽງຈະເລີນສຸກ ແຂວງຈຳປາສັກ ຊຶ່ງລົງທຶນໂດຍ
ບໍລິສັດເອກະຊົນ ຍີ່ປຸ່ນໃນມູນຄ່າ 62 ລ້ານໂດລາ ແລະເມື່ອອາຍຸສຳປະທານ 50 ປີ
ດ້ວຍເປົ້າໝາຍທີ່ຈະໃຫ້ສົ່ງເສີມອຸດສາຫະກຳການຜະລິດສິນຄ້າ ແລະບໍລິການຕ່າງໆ
ທີ່ແນໃສ່ການສົ່ງອອກເປັນຫລັກ.
ສ່ວນນະຄອນຫຼວງວຽງຈັນ ກໍມີຢູ່ເຖິງ 5 ເຂດຄື ນິຄົມອຸດສາຫະກຳ ແລະການຄ້າວຽງຈັນ-
ໂນນທອງ ເຂດເສດຖະກິດສະເພາະ ດົງໂພສີ ເຂດເສດຖະກິດສະເພາະ ລ່ອງແຖ້ງ-
ວຽງຈັນ ເຂດພັດທະນາກວມລວມຢູ່ທີ່ເມືອງໄຊເສດຖາ ເຂດເສດຖະກິດສະເພາະ ບຶງ
ທາດຫລວງ ທີ່ລົງທຶນໂດຍບໍລິສັດຈາກຈີນ ເຊັ່ນກັນ ນອກຈາກນີ້ ກໍຍັງມີເຂດເສດຖະກິດ
ພິເສດ ສະຫວັນ-ເຊໂນ ເຂດເສດຖະກິດສະເພາະ ທ່າແຂກ ແລະເຂດເສດຖະກິດສະເພາະ
ພູຂຽວຢູ່ໃນແຂວງຄຳມ່ວນ.
