ກະຊວງອຸດສາຫະກໍາແລະການຄ້າລາຍງານວ່າຄະນະຜູ້ຕາງ
ໜ້າຂອງລັດຖະບານລາວພາຍໃຕ້ການນໍາພາຂອງທ່ານນາມ
ວິຍະເກດ ລັດຖະມົນຕີກະຊວງອຸດສາຫະກໍາ ແລະການຄ້າ ມີກໍາ
ໜົດທໍາການເຈລະຈາຮອບທີ 10 ຮ່ວມກັບຄະນະຜູ້ຕາງໜ້າຖາ
ວອນປະຈໍາອົງການການຄ້າໂລກຫລື WTO ໃນເດືອນກັນຍາທີ່
ຈະມາເຖິງນີ້ ໂດຍຄະນະລັດຖະບານລາວກໍໄດ້ມີມະຕິຮັບຮອງ
ເອົາລາຍງານຂັ້ນສຸດທ້າຍກ່ຽວກັບການກະກຽມເພື່ອການເຂົ້າ
ໄປເປັນປະເທດສະມາຊິກຂອງ WTO ຢ່າງເປັນທາງການແລ້ວ
ເມື່ອບໍ່ນານມານີ້.
ທັງນີ້ໂດຍຄະນະຜູ້ຕາງໜ້າຂອງລັດຖະບານລາວມີຄວາມເຊື່ອ
ໝັ້ນວ່າຄະນະຜູ້ຕາງໜ້າຖາວອນປະຈໍາ WTO ຈະລົງມະຕິຮັບ
ຮອງໃຫ້ ສປປ.ລາວ ເປັນສະມາຊິກຂອງ WTO ພາຍໃນເດືອນ
ຕຸລາ ຫຼືກ່ອນທີ່ລັດຖະບານລາວຈະເປັນເຈົ້າພາບຈັດກອງປະຊຸມ
ສຸດຍອດລະຫວ່າງຜູ້ນໍາລັດຖະບານເອເຊຍກັບຢູໂຣບ ASEM ຄັ້ງທີ່ 9 ຊຶ່ງກໍານົດຈະມີຂຶ້ນຢ່າງເປັນທາງການໃນວັນທີ່ 5-6 ເດືອນພະຈິກປີນີ້ຢູ່ນະຄອນວຽງຈັນ.
ສາເຫດທີ່ເຮັດໃຫ້ຄະນະຜູ້ຕາງໜ້າຂອງລັດຖະບານລາວມີຄວາມເຊື່ອໝັ້ນດັ່ງກ່າວ ກໍເພາະ
ວ່າ ຄະນະຜູ້ແທນຂອງລັດຖະບານຢູເຄຣນປະຈໍາ WTO ໄດ້ບັນລຸຂໍ້ຕົກລົງ ແລະໄດ້ມີ
ການລົງນາມໃນສັນຍາການຄ້າແບບທະວິພາຄີຮ່ວມກັບຄະນະຜູ້ແທນຂອງລັດຖະບານ
ລາວຢ່າງເປັນທາງການເມື່ອບໍ່ນານມານີ້ ຊຶ່ງການບັນລຸຂໍ້ຕົກລົງດັ່ງກ່າວ ກໍໝາຍຄວາມວ່າ
ທາງການລາວໄດ້ຮັບສຽງສະໜັບສະໜຸນເພື່ອໃຫ້ເຂົ້າ ໄປເປັນປະເທດສະມາຊິກຂອງ WTO ຢ່າງຄົບຖ້ວນແລ້ວໃນເວລານີ້ ຈຶ່ງລໍຖ້າພຽງ ແຕ່ການລົງມະຕິຈາກບັນດາປະເທດສະມາຊິກເພື່ອຮັບຮອງໃຫ້ລາວເຂົ້າໄປເປັນປະ ເທດສະມາຊິກຂອງ WTO ຢ່າງເປັນທາງການເທົ່ານັ້ນ.
ກ່ອນໜ້ານີ້ ຄະນະຜູ້ແທນຂອງທາງການລາວພາຍໃຕ້ການນໍາຂອງທ່ານນາມ ວີຍະເກດ ກໍໄດ້ສິ້ນສຸດການເຈລະຈາຄັ້ງທີ່ 9 ຮ່ວມກັບຄະນະຜູ້ຕາງໜ້າຖາ ວອນປະຈໍາ WTO ເມື່ອເດືອນກໍລະກົດປີນີ້ ຊຶ່ງຖືວ່າມີຜົນຄືບໜ້າເປັນຢ່າງດີ ແລະທີ່ສໍາຄັນກໍຄື ການທີ່ສາມາດບັນລຸຂໍ້ຕົກລົງແລະກໍໄດ້ລົງນາມໃນສັນຍາການຄ້າແບບ ທະວິພາຄີຮ່ວມກັບຄະນະຜູ້ແທນຂອງລັດຖະບານສະຫະລັດອາເມຣິກາຢ່າງເປັນ ທາງການນັບຕັ້ງແຕ່ເດືອນມີນາເປັນຕົ້ນມາແລ້ວ.
ຍິ່ງໄປກວ່ານັ້ນ ການທີ່ຄະນະຜູ້ແທນຂອງສະຫະລັດກໍຍັງໄດ້ຢືນຢັນທີ່ຈະໃຫ້ການສະໜັບ
ສະໜຸນໃຫ້ປະເທດລາວໄດ້ເຂົ້າໄປເປັນສະມາຊິກຂອງ WTO ໃຫ້ໄວທີ່ສຸດດ້ວຍນັ້ນ ຈຶ່ງເຮັດ
ໃຫ້ສາມາດຄາດໝາຍໄດ້ວ່າລາວຈະຖືກຮັບຮອງໃຫ້ເຂົ້າໄປເປັນ ສະມາຊິກຂອງ
WTO ຢ່າງເປັນທາງການໃນເດືອນຕຸລາປີນີ້.
ໂດຍທີ່ຜ່ານມາ ທງການລາວກໍໄດ້ປະຕິບັດເງື່ອນໄຂສໍາຄັນຕ່າງໆ ຕາມກໍາໜົດຂອງ WTO ຢ່າງຄົບຖ້ວນແລ້ວ ຊຶ່ງໃນນີ້ກໍລວມເຖິງການພັດທະນາປັບປຸງລະບົບກົດໝາຍແລະການບັງຄັບໃຊ້ກົດໝາຍຕ່າງໆໃຫ້ໄດ້ຕາມມາດຕະຖານຂອງ WTO ດ້ວຍ ຕົວຢ່າງກໍຄືສະພາແຫ່ງຊາດລາວຊຸດທີ່ 7 ໄດ້ຮັບຮອງກົດໝາຍວ່າດ້ວຍຊັບ ສິນທາງປັນຍາສະບັບດັດແກ້ໃໝ່ ແລະໃນໄລຍະຕໍ່ໄປນີ້ ທາງການລາວກໍມີໜ້າທີ່ ທີ່ຈະຕ້ອງບັງຄັບໃຊ້ກົດໝາຍໃນພາກຕົວຈິງ ດັ່ງທີ່ທ່ານ ນາມ ວິຍະເກດ ໄດ້ຊີ້ ແຈງວ່າ:
“ບັນຫາເລື່ອງຊັບສິນທາງປັນຍາ ເປັນຂໍ້ສົນໃຈທີ່ສຸດຂອງບັນດາປະເທດສະມາ ຊິກອົງການການຄ້າໂລກ ສະນັ້ນການທີ່ພວກເຮົາມີກົດໝາຍແລ້ວ ພວກເຮົາກໍຍັງຕ້ອງການມີດໍາລັດເພື່ອເຮັດແນວໃດໃຫ້ມັນເປັນທີ່ຮອງຮັບໄດ້ໂດຍສະເພາະແມ່ນການເຊື່ອມໂຍງກັບສາກົນນັ້ນເຂົາກໍຍັງເຫັນວ່າມີບາງຈຸດທີ່ພວກເຮົາຄວນຈະໄດ້ປັບປຸງຕື່ມ ຊຶ່ງບາງຈຸດດັ່ງກ່າວນັ້ນ ໃນກົດໝາຍຂອງພວກເຮົາກະໄດ້ເວົ້າຢູ່ ແຕ່ມັນບໍ່ທັນລະອຽດ ຊຶ່ງພວກເຂົາເຈົ້າຢາກໃຫ້ພວກເຮົາຊີ້ແຈງ ແລະຄວນຈະປັບປຸງໃຫ້ມັນລະອຽດ.”
ທາງການລາວໄດ້ຍື່ນຄໍາຮ້ອງເພື່ອຂໍເຂົ້າໄປເປັນປະເທດສະມາຊິກຂອງ WTO ນັບຈາກປີ
1997 ເປັນຕົ້ນມາ ແລະຈົນເຖິງການເຈລະຈາ ຮອບທີ່ 9 ໃນເດືອນ ກໍລະກົດທີ່ຜ່ານມານີ້ ກໍ
ປາກົດວ່າຄະນະຜູ້ແທນຂອງລັດຖະບານລາວ ໄດ້ຕອບຄໍາຖາມແລະຂໍ້ສົງໃສຕ່າງໆຂອງບັນ
ດາປະເທດສະມາຊິກໃນ WTO ທັງ 155 ປະ ເທດໄປແລ້ວຫຼາຍກວ່າ 1,300 ກໍລະນີ ຊຶ່ງ
ທາງການລາວກໍເຊື່ອໝັ້ນວ່າ ສາມາດເຮັດໃຫ້ປະເທດສະມາຊິກມີຄວາມເຂົ້າໃຈກ່ຽວກັບ
ສະພາບການຕ່າງໆໃນລາວໄດ້ເປັນຢ່າງດີ.
