ລັດຖະມົນຕີການຕ່າງປະເທດສະຫະລັດ ທ່ານ John Kerry ກ່າວວ່າ ການປ່ຽນແປງຂອງດິນຟ້າອາກາດແມ່ນມີຄວາມສຳຄັນເທົ່າໆກັນກັບການຕໍ່ສູ້ຕ້ານກຸ່ມລັດອິສລາມແລະພວກ ຫົວຮຸນແຮງຈັດອື່ນໆ.
ໃນການຖະແຫຼງທີ່ກອງປະຊຸມນາໆຊາດຢູ່ນະຄອນວຽນນາ ປະເທດອອສເຕຣຍທີ່ໄດ້ແນໃສ່ ການຫລຸດຜ່ອນການປ່ອຍແກັສເຮືອນແກ້ວນັ້ນ ທ່ານ Kerry ກ່າວວ່າ ການປ່ຽນແປງຂອງດິນຟ້າອາກາດ ແມ່ນເປັນໄພອັນຕະລາຍ ດັ່ງດຽວກັນກັບ ຖ້າຫາກບໍ່ແມ່ນຫລາຍໄປກວ່າການຂົ່ມຂູ່ ຈາກລັດທິຫົວຮຸນແຮງຈັດ ເຊັ່ນກຸ່ມລັດອິສລາມ ແລະກຸ່ມຫົວຮຸນແຮງຈັດ ອື່ນໆ.
ທ່ານກ່າວວ່າ ການດຳເນີນຄວາມພະຍາຍາມເພື່ອຫລຸດຜ່ອນການປ່ອຍແກັສເຮືອນແກ້ວ ສາມາດໃນຄວາມຈິງແລ້ວຊ່ອຍຊີວິດຢູ່ເທິງໂລກໜ່ວຍນີ້.
ລັດຖະມົນຕີກະຊວງປ້ອງກັນປະເທດ ແລະກະຊວງການຕ່າງປະເທດ ຈາກ 40 ກວ່າປະເທດ ໄດ້ເຕົ້າໂຮມກັນທີ່ນະຄອນຫຼວງວໍຊິງຕັນໃນອາທິດນີ້ເພື່ອທົບທວນແລະຕົກລົງກັນກ່ຽວກັບການເອົາບາດກ້າວໃນຂັ້ນຕໍ່ໄປຕໍ່ກຸ່ມລັດອິສລາມ ຢູ່ໃນທີ່ໝັ້ນແຫ່ງສຸດທ້າຍຂອງພວກເຂົາ.
ທ່ານ Kerry ກ່າວວ່າ ໃນມື້ວານນີ້ພວກເຮົາໄດ້ພົບປະກັນຢູ່ວໍຊິງຕັນກັບລັດຖະມົນຕີປ້ອງກັນປະເທດ ແລະລັດຖະມົນຕີການຕ່າງປະເທດ ຂອງ 45 ປະເທດ ໃນຂະນະທີ່ພວກເຮົາດຳເນີນງານຮ່ວມກັນ ເພື່ອທ້າທາຍຕໍ່ກຸ່ມ Daesh ກຸ່ມ ISIL ແລະລັດທິກໍ່ການຮ້າຍ. ມັນເປັນການຍາກທີ່ບາງຄົນຈະເຂົ້າໃຈ ແຕ່ສິ່ງທີ່ພວກເຮົາ ເຈົ້າທ່ານກຳລັງເຮັດຢູ່ໃນເວລານີ້ ແມ່ນມີຄວາມສຳຄັນເທົ່າໆກັນຍ້ອນວ່າມັນມີຄວາມສາມາດໃນຄວາມຈິງແລ້ວຊ່ອຍຊີວິດ ຢູ່ເທິງໂລກໜ່ວຍນີ້.
ທ່ານ Kerry ກ່າວວ່າ ການຫລຸດຜ່ອນການປ່ອຍແກັສເຮືອນແກ້ວແມ່ນນຶ່ງໃນບາດກ້າວ ຮ່ວມກັນທີ່ສຳຄັນສຸດທີ່ຈະເອົາເພື່ອຊ່ອຍປົກປ້ອງອະນາຄົດສຳລັບມະນຸດເຮົາຢູ່ໃນທຸກຫົນແຫ່ງຂອງໂລກ.
ທ່ານ Kerry ໄດ້ປາກົດໂຕເປັນເວລາສັ້ນໆຢູ່ທີ່ກອງປະຊຸມ ທີ່ມີເຈົ້າໜ້າທີ່ເຂົ້າຮ່ວມຈາກ 200 ກວ່າປະເທດ ເພື່ອດັດແປງແກ້ໄຂ ຂໍ້ຕົກລົງ Montreal ຊຶ່ງເປັນສົນທິສັນຍາຂອງໂລກສະບັບປີ 1987 ທີ່ຈະຫຼຸດຜ່ອນ ການປ່ອຍທາດຄາບອນຈາກ aerosol ແລະສານ ທຳຄວາມເຢັນ ທີ່ເຮັດໃຫ້ເຂດໂອໂຊນຂອງໂລກບາງລົງນັ້ນ.
