ອີຕາລີຈະເປັນເຈົ້າພາບຈັດກອງປະຊຸມສາກົນ ກ່ຽວກັບລີເບຍ ໃນເດືອນໜ້ານີ້ ທີ່ແນ
ໃສ່ເພື່ອສ້າງຄວາມທຸ່ນທ່ຽງໃນປະເທດດັ່ງກ່າວ ທີ່ພວມປະສົບກັບບັນຫາໃນການມີ
2 ລັດຖະບານ.
ລັດຖະມົນຕີຕ່າງປະເທດອີຕາລີ ທ່ານເອນໂຊ ມົວເວໂຣ ມີລາເນຊີ ໄດ້ປະກາດວ່າ
ການປະຊຸມນີ້ ຈະຈັດຂຶ້ນໃນວັນທີ 12 ຫາ 13 ເດືອນພະຈິກ ທີ່ນະຄອນຫຼວງຊາເລີໂນ
ຂອງຊິຊິລີ.
ທ່ານກ່າວວ່າ “ພວກເຮົາຕ້ອງການຢາກໃຫ້ມີການແກ້ໄຂຮ່ວມກັນ ເຖິງແມ່ນວ່າຈະມີ
ຄວາມເຫັນທີ່ແຕກຕ່າງກັນ ຢູ່ອ້ອມໂຕະກໍຕາມ” ແລະກ່າວເພີ້ມອີກວ່າເປົ້າໝາຍກໍຄື
ສັນຕິພາບ ແລະ ການເມືອງ ແບບມີທຸກພັກຝ່າຍເຂົ້າຮ່ວມ ກ່ອນໜ້າການເລືອກຕັ້ງ
ທີ່ອາດມີຂຶ້ນນັ້ນ.
ໃນຖານະທີ່ເປັນພາກສ່ວນນຶ່ງ ຂອງແຜນການຝຣັ່ງສຳລັບປະເທດ ເຈົ້າໜ້າທີ່ອະວຸໂສ
ລີເບຍເຫັນພ້ອມໃນເດືອນພຶດສະພາ ຢູ່ກອງປະຊຸມທີ່ນະຄອນປາຣີເພື່ອໃຫ້ ຈັດການ
ເລືອກຕັ້ງ ໃນວັນທີ 10 ທັນວາ ຈະມາເຖິງນີ້.
ແຕ່ທ່ານມີລາເນີຊີ ພ້ອມດ້ວຍບັນດາເຈົ້າໜ້າທີ່ສະຫະພາບຢູໂຣບຄົນອື່ນໆ ແລະສະ
ຫະລັດ ໄດ້ສະແດງຄວາມສົງໄສວ່າ ປະເທດດັ່ງກ່າວຈະພ້ອມແລ້ວໃນເວລານັ້ນ.
ທ່ານໄດ້ປະກາດວ່າ “ບໍ່ມີເສັ້ນຕາຍທີ່ຈະກົດດັນຕໍ່ຊາວລີເບຍ ຫຼືການກຳນົດທີ່ໄດ້ຕັ້ງໄວ້.
ລັດຖະບານປະທານາທິບໍດີທຣຳໄດ້ໃຫ້ການອະນຸມັດ ຕໍ່ກອງປະຊຸມຊິຊີລີ.
ລີເບຍໄດ້ປະສົບກັບຄວາມວຸ້ນວາຍທາງເມືອງ ແລະສັງຄົມ ຢ່າງບໍ່ຢຸດເຊົາ ນັບແຕ່ຈອມ
ຜະເດັດການທີ່ປົກຄອງປະເທດມາເປັນເວລາດົນນານ ທ່ານມົວມາ ກາດາຟີ ໄດ້ຖືກໂຄນ
ລົ້ມ ແລະສັງຫານໃນປີ 2011.
ລັດຖະບານທີ່ເປັນຄູ່ແຂ່ງ ຄືລັດຖະບານຂອງກຸ່ມພັນທະມິດທະຫານ ຢູ່ໃນພາກຕາເວັນ
ອອກຂອງປະເທດ ແລະລັດຖະບານທີ່ສະຫະປະຊາຊາດ ໜູນຫຼັງຢູ່ຕຣີໂປລີ ຕ່າງກໍໄດ້
ຊອກສະແຫວງຫາອຳນາດ ພ້ອມດ້ວຍພວກທະຫານບ້ານທີ່ຕິດອາວຸດ.
ລັດຖະບານທັງສອງຝ່າຍ ຍັງຊອກຫາຊ່ອງທາງທີ່ຈະເຂົ້າຄວບຄຸມບໍ່ນ້ຳມັນທີ່ຮັ່ງມີຂອງ
ລີເບຍ.
