ລັດຖະບານໃນທົ່ວໂລກແມ່ນກຳລັງພະຍາຍາມທີ່ຈະເອົາບາດກ້າວ ເພື່ອແກ້ໄຂການລະບາດຂອງໄວຣັສໂຄໂຣນາສາຍພັນໃໝ່ ທີ່ກຳລັງຂະຫຍາຍຕົວຢ່າງຕໍ່ເນື່ອງ, ເຊິ່ງນັບຕັ້ງແຕ່ເດືອນທັນວາທີ່ຜ່ານມາ ໄດ້ຕິດແປດໃສ່ປະຊາຊົນຫຼາຍ ກວ່າ 118,000 ຄົນ ແລະ ເສຍຊີວິດປະມານ 4,300 ຄົນໃນ 114 ປະເທດ.
ໄວຣັສດັ່ງກ່າວ, ເຊິ່ງຮູ້ຈັກກັນຢ່າງເປັນທາງການວ່າ COVID-19 ນັ້ນ, ໄດ້ກຳເນີດຂຶ້ນທຳອິດໃນປະເທດ ຈີນ, ບ່ອນທີ່ບັນດາເຈົ້າໜ້າທີ່ສາທາລະນະສຸກໄດ້ລາຍງານ 24 ກໍລະນີໃໝ່ໃນວັນພຸດມື້ນີ້.
ໃນຂະນະທີ່ການເພີ່ມຂຶ້ນຂອງກໍລະນີໃໝ່ນັ້ນ ໄດ້ສະແດງໃຫ້ເຫັນການຫຼຸດລົງຢ່າງຕໍ່ເນື່ອງຈາກຈຸດສູງສຸດຂອງການລະບາດໃນ ຈີນ, ເຊິ່ງລັດຖະບານຂອງປະເທດດັ່ງກ່າວໄດ້ກຳນົດໃຫ້ເມືອງຕ່າງໆຖືກປິດບໍ່ໃຫ້ເຂົ້າອອກ ເພື່ອປ້ອງກັນການແຜ່ລະບາດລະຫວ່າງຊຸມຊົນນັ້ນ ໃນເວລານີ້ແມ່ນກຳລັງຮັບມືກັບຕົວເລກທີ່ເພີ່ມຂຶ້ນຂອງກໍລະນີຕ່າງໆທີ່ເດີນທາງມາຮອດຈາກປະເທດອື່ນ.
ນັ້ນໄດ້ກໍ່ໃຫ້ບັນດາເຈົ້າໜ້າທີ່ໃນ ປັກກິ່ງ ຕ້ອງສັ່ງໃຫ້ທຸກຄົນທີ່ເດີນທາງມາຮອດກັກຕົວເພື່ອກວດໂຣກ 14 ວັນ.
ປະເທດ ອີຕາລີ ໄດ້ປະຕິບັດຕາມການຄວບຄຸມຂອງ ຈີນ ຫຼັງຈາກໄດ້ກາຍເປັນສູນກາງແຫ່ງທີສອງ ຂອງການແຜ່ລະບາດ ດ້ວຍການລາຍງານຫຼາຍກວ່າ 10,000 ກໍລະນີໃນປັດຈຸບັນນີ້ ແລະ ກໍລະນີຕ່າງໆໃນຫຼາຍປະເທດທີ່ເຊື່ອມໂຍງກັບຜູ້ທີ່ໄດ້ເດີນທາງຈາກປະເທດ ອິຕາລີ. ປະຊາຊົນ ອີຕາລີ ແມ່ນໄດ້ຢູ່ພາຍໃຕ້ການກັກຕົວທົ່ວປະເທດເປັນວັນທີສອງໃນວັນພຸດມື້ນີ້ ເຊິ່ງປະຊາຊົນພຽງແຕ່ສາມາດເຄື່ອນໄຫວໄປມາໄດ້ ສຳລັບເຫດຜົນສຸກເສີນທາງສຸຂະພາບ ແລະ ວຽກງານເທົ່ານັ້ນ.
ບັນດາເຈົ້າໜ້າທີ່ໃນ ສະຫະລັດ ໄດ້ສະແດງໃຫ້ເຫັນຄວາມເປັນຫ່ວງຫຼາຍກວ່າເກົ່າ ໃນຂະນະທີ່ຕົວເລກຂອງກໍລະນີການຕິດເຊື້ອໄດ້ເພີ່ມຂຶ້ນກາຍ 1,000 ຄົນ.
ມັນໄດ້ມີການແຜ່ລະບາດຢູ່ຫຼາຍຈຸດໃນລັດ ວໍຊິງຕັນ ທາງພາກຕາເວັນຕົກຂອງປະເທດ, ບ່ອນທີ່ຜູ້ປົກຄອງລັດຄາດວ່າ ຈະປະກາດການຫ້າມບໍ່ໃຫ້ເຕົ້າໂຮມກັນ ຫຼາຍກວ່າ 250 ຄົນ, ແລະ ຢູ່ທີ່ອີກຟາກນຶ່ງຂອງປະເທດ ໃນລັດ ນິວຢອກ ບ່ອນທີ່ຜູ້ປົກຄອງລັດ ແມ່ນກຳລັງຈັດເຂດໂດດດ່ຽວ ໃນທົ່ວຊຸມຊົນທີ່ມີລາຍງານຫຼາຍກວ່າ 100 ກໍລະນີ.
ຄົນສ່ວນຫຼາຍທີ່ໄດ້ຕິດໄວຣັສໂຄໂຣນາສາຍພັນໃໝ່ ຈະມີອາກາດເບົາໆ ຫຼື ປານກາງ, ແຕ່ບາງຄົນ, ສ່ວນໃຫຍ່ແມ່ນຜູ້ທີ່ມີອາຍຸສູງ ແລະ ຜູ້ທີ່ມີບັນຫາສຸຂະພາບຢູ່ແລ້ວ, ແມ່ນມີຄວາມສ່ຽງສຳລັບການເຈັບປ່ວຍທີ່ຮ້າຍແຮງ.
ອົງການອະນາໄມໂລກ ໄດ້ແນະນຳໃຫ້ປະຊາຊົນລ້າງມືຂອງເຂົາເຈົ້າ, ຫຼີກລ່ຽງການບາຍໜ້າ, ໃຫ້ຢູ່ຫ່າງໆຈາກຄົນຜູ້ທີ່ໄອ ຫຼື ຈາມ, ແລະ ຢູ່ບ້ານຖ້າຮູ້ສຶກບໍ່ສະບາຍ.
