ລັດຖະບານເຄີດ ໃນອີຣັກ ກ່າວວ່າ ຕົນມີຫຼັກຖານທີ່ສະແດງ
ໃຫ້ເຫັນ ວ່າ ພວກຫົວຮຸນແຮງລັດອິສລາມ ໃຊ້ອາວຸດເຄມີຕໍ່
ກຳລັງປ້ອງກັນຂອງຊາວເຄີດ.
ສະພາຄວາມໝັ້ນຄົງປະຈຳເຂດເຄີດດິສຖານ ໄດ້ເປີດເຜີຍ
ຖະແຫຼງການສະບັບນຶ່ງໃນວັນເສົາວານນີ້ ທີ່ກ່າວຫາວ່າ ໄດ້
ມີການໃຊ້ແກສ chlorine ໃນການໂຈມຕີສະຫລະຊີບເມື່ອ
ເດືອນມັງກອນຜ່ານມາ ໃນພາກເໜືອຂອງອີຣັກ.
ຖະແຫຼງການກ່າວຕື່ມວ່າ ການວິໄຈໃນຫ້ອງ lab ໄດ້ພົບເຫັນ
ຮ່ອງຮອຍແກສ chlorine ຈາກບ່ອນທີ່ຖືກໂຈມຕີນັ້ນ.
ພວກຊາວເຄີດ ກ່າວວ່າ ຫ້ອງ lab ທີ່ວ່ານີ້ ແມ່ນຢູ່ໃນປະເທດນຶ່ງທີ່ເປັນພາຄີຮ່ວມຢູ່ນຳກຸ່ມປະສົມພາຍໃຕ້ການນຳພາຂອງສະຫະລັດ ທີ່ທຳການຕໍ່ສູ້ຕ້ານກຸ່ມລັດອິສລາມ ແຕ່ພວກເຂົາເຈົ້າບໍ່ໄດ້ລະບຸຊື່ປະເທດ ຫຼືຫ້ອງ lab ໃຫ້ຮູ້.
ອີງຕາມຖະແຫຼງການສະບັບດັ່ງກ່າວ ກໍແມ່ນວ່າ ການວາງລະເບີດສະຫລະຊີບ ໃນວັນທີ
23 ມັງກອນຜ່ານມາ ໄດ້ເກີດຂຶ້ນໃນຖະໜົນສາຍນຶ່ງ ລະຫວ່າງເມືອງ Mosul ທີ່ຢູ່ພາຍໃຕ້ການຄວບຄຸມຂອງກຸ່ມລັດອິສລາມ ແລະຊາຍແດນຂອງຊີເຣຍ.
ໄດ້ມີການສົງໄສມາກ່ອນແລ້ວວ່າ ກຸ່ມລັດອິສລາມໄດ້ໃຊ້ແກສ chlorine ໃນການໂຈມ
ຕີຂອງພວກເຂົາຄັ້ງກ່ອນໆ ຢູ່ໃນອີຣັກ ແລະໃນຊີເຣຍນັ້ນ.
ການກ່າວຫາໃນວັນເສົາວານນີ້ ໂດຍລັດຖະບານເຄີດ ບໍ່ສາມາດພິສູດໄດ້ຈາກແຫລ່ງ
ຂ່າວທີ່ເປັນອິດສະລະ.
ການກ່າວຫານີ້ມີຂຶ້ນໃນຂະນະທີ່ກຳລັງຂອງອີຣັກ ແລະພວກສະມາຊິກຂອງທະຫານ
ບ້ານນິກາຍ Shi’ite ທີ່ໄດ້ຮັບການໜຸນຫຼັງຈາກອິຣ່ານຫຼາຍພັນຄົນ ຢຸດພັກຊົ່ວຄາວ
ເປັນມື້ທີສອງ. ໃນການບຸກລຸກຂອງພວກເຂົາເຈົ້າ ເພື່ອຍຶດເອົາເມືອງ Tikrit ຈາກກຸ່ມ
ລັດອິສລາມນັ້ນ. ພວກມືປືນດັກຍິງຂອງກຸ່ມລັດອິສລາມ ລະເບີດຕາມແຄມທາງ ແລະ
ການວາງ ກັບດັກຕ່າງໆ ໄດ້ເຮັດການບຸກລຸກຊ້າລົງ ຊຶ່ງໄດ້ປະສົບຜົນສຳເລັດມາແລ້ວ
ໃນການຍຶດເອົາຫຼາຍຂົງເຂດຄືນ.
ມີລາຍງານວ່າ ພວກຜູ້ບັນຊາການທະຫານ ກຳລັງວາງຍຸດທະສາດຂອງເຂົາເຈົ້າເພື່ອ
ເຂົ້າຄວບຄຸມບັ້ນສຸດທ້າຍໃນເມືອງດັ່ງກ່າວ.
