​ບັນດາມະຫາ​ອໍານາດ​ໂລກ ກັບອີຣ່ານ ​ຕົກລົງຈະ ເຈລະຈາກັນອີກ ​ກ່ຽວກັບ ນິວເຄລຍຂອງອີຣ່ານ (ວີດີໂອ)

ອີຣ່ານ​ແລະ​ບັນດາ​ປະ​ເທດ​ມະຫາ​ອໍານາດ​ໂລກ ຈະ​ພົບ​ປະກັນ
ອີກ ​ໃນ 3 ອາທິດ​ຂ້າງ​ໜ້າ​ນີ້ ​ເພື່ອ​ສືບ​ຕໍ່ ອັນ​ທີ່​ທັງ​ສອງ​ຝ່າຍ​
ເອີ້ນ​ວ່າ ການ​ເຈລະຈາ “ມີ​ເນື້ອ​ຫາ​ສາລະ” ​ເພື່ອ​ຫາ​ທາງ​ແກ້​ໄຂ
ບັນຫາ​ຄວາມ​ເປັນ​ຫ່ວງຂອງ​ນາໆ​ຊາດ ກ່ຽວ​ກັບ​ໂຄງການ​ນີວ​
ເຄລຍຂອງ​ອີຣ່ານນັ້ນ.

​ໃນລະຫວ່າງ​ນີ້ ພວກ​ຊ່ຽວຊານ​ດ້ານນີວ​ເຄລຍ ​ວິ​ທະຍາ​ສາດ ​
ແລະ​ການ​ລົງ​ໂທ​ດ ກໍ​ຈະ​ພະຍາຍາມ​ແກ້​ໄຂຄວາມ​ແຕກ​ຕ່າງ
ລະຫວ່າງ​ສອງ​ຝ່າຍ ທີ່​ໄດ້ເຮັດໃຫ້ການ​ປະ​ເຊີນ​ໜ້າກັນ​ ​ຍືດ​ເຍື້ອ
ມາ​ໄດ້​ຫຼາຍ​ກວ່າ ນຶ່ງ​ທົດ​ສະ​ວັດ​ແລ້ວນັ້ນ.

ສະ​ຫະລັດ​ ຣັດ​ເຊຍ ຈີນ ຝຣັ່ງ ອັງກິດ ​ແລະ ​ເຢຍລະ​ມັນ ຕ້ອງການ​ໃຫ້ອີຣ່ານ ພິສູດໃຫ້
​ເຫັນ​ວ່າ ການພັດທະນາ​ໂຄງການ​ນີວ​ເຄລຍຂອງ​ຕົນນັ້ນບໍ່ແມ່ນເພື່ອສ້າງ​ອາວຸດນີວ​
ເຄລຍ ໃນ​ຂະນະທີ່​ທາງ​ກຸງ Tehran ພະຍາຍາມ​ ຫາທາງ​ໃຫ້​ມີການຜ່ອນ​ເບົາ​ການ​
ລົງ​ໂທດ​ຂອງນາໆ​ຊາດ​ ທີ່​ແນ​ໃສ່​ເພື່ອໃຫ້ອີຣ່ານຢຸດ​ເຊົາ​ ການ​ກັ່ນ​ທາດ​ຢຸ​ເຣ​ນຽມ ໃຫ້​ມີ
​ຄຸນ​ນະພາ​ບຜະລິ​ດອາວຸດ​ໄດ້​ນັ້ນ.

ລັດ​ຖະມົນຕີ​ການ​ຕ່າງປະ​ເທດ​ຂອງ​ອີຣ່ານ ທ່ານ Mohammed Javad Zarif ​
ໄດ້​ກ່າວ​ໃນ​ວັນ​ພຸດ​ວານ​ນີ້​ ​ຫຼັງ​ຈາກ​ການ​ເຈລະຈາມກັນ​ເປັນ​ເວລາ 2 ມື້ ທີ່​ກຸງ Geneva
ວ່າ ທ່ານ​ຫວັງ​ວ່າການເຈລະຈາ​ກັນນັ້ນ​ຈະ​ເປັນຂີດ​ໝາຍ​ການ​ເລີ່​ມຕົ້ນ ​ຂັ້ນ​ຕອນໃໝ່
ຂອງ​ອັນທີ່​ທ່ານເອີ້​ນວ່າ “ວິ​ກິດ​ການ​ທີ່​ບໍ່​ຈໍາ​ເປັນ.”

​ສ່ວນໂຄສົກ​ຂອງ​ທໍານຽບຂາວ ທ່ານ Jay Carney ​ກ່າວ​ວ່າ ການ​ໂອ້​ລົມ​ສົນທະນາ​
ໃນ​ກຸງ Geneva ນັ້ນ​ໄດ້​ສະ​ແດງ​ໃຫ້​ເຫັນ​ເຖິງ “ລະດັບ​ຂອງ​ການເອົາ​ຈິງ​ເອົາຈັງ ​
ແລະ​ເນື້ອ​ຫາທີ່​ບໍ່​ເຄີຍ​ເຫັນ​ມາ​ກ່ອນ.” ​ແຕ່​ ທ່ານກໍ​ໄດ້ເຕືອ​ນຕໍ່ການ​ຄາດ​ຫວັງ
ທີ່​ຈະ​ເຫັນຄວາມ​ກ້າວໜ້າ​ໃນ​ທັນທີ​ທັນ​ໃດ ​ໃນການ​ເຈລະຈາ​ເລື້ອງ​ນີວ​ເຄລຍນັ້ນ.
ທ່ານ​ໄດ້ເອີ່ຍ​ເຕື້ອງ​ໄປ​ເຖິງ ປະຫວັດສາດຂອງ​ການ​ບໍ່​ໄວ້​ວາງ​ໃຈ​ກັນ ລະຫວ່າງກຸງ
Tehran ​ແລະ​ຝ່າຍ​ຕາ​ເວັນ​ຕົກທີ່​ທ່ານ​ ກ່າວ​ວ່າ​ “​ມັນ​ເລິກຫລາຍ” ​ແລະ​ວ່າ
ພວກ​ນັກວິ​ໄຈ​ຂອງ​ສະຫະລັດ ​ຈະ​ສຶກສາ​ເບິ່ງລາ​ຍລະອຽດ​ຕ່າງ​ໆ​ຂອງ​ຂໍ້​ສະ​ເໜີ​
ເປັນ​ການ​ສ່ວນ​ໂຕ​ຂອງ​ຝ່າ​ຍອີຣ່ານ ​ເພື່ອຍຸຕິການ​ປະ​ເຊີນ​ໜ້າ​ກັນ​ດ້ານ​ນີວ​ເຄລຍນັ້ນ.