ໃນທົດສະວັດຜ່ານມານີ້ ຍຸດທະສາດຂອງອິນໂດເນເຊຍ ໃນການຕໍ່ສູ້ກັບພວກກໍ່ການຮ້າຍ ຜ່ານການປະຕິບັດງານຂອງຕຳຫຼວດ ແລະການດຳເນີນຄະດີດ້ານອາຍາ ໂດຍບໍ່ໃຊ້ວິທີການທະຫານນັ້ນ ໄດ້ ຍັບຍັ້ງໄພຂົ່ມຂູ່ຈາກພວກກໍ່ການຮ້າຍໃນທ້ອງຖິ່ນໄວ້ໄດ້ ຢ່າງສຳເລັດຜົນ. ແຕ່ວ່າເວລານີ້ ກຳລັງມີຄວາມເປັນຫ່ວງກັງວົນຫລາຍຂຶ້ນນັບມື້ ວ່າ ການໂຜ່ໂຕຂຶ້ນມາຂອງກຸ່ມລັດອິສລາມ ໃນຊີເຣຍແລະອີຣັກ ອາດ ສາມາດເຮັດໃຫ້ຂະບວນການຫົວຮຸນແຮງ ຮື້ຟື້ນຄືນມາອີກໄດ້ ໃນປະເທດທີ່ມີປະຊາຊົນມຸສລິມຫຼາຍທີ່ສຸດໃນໂລກນັ້ນ. Brian Padden ຜູ້ສື່ຂ່າວວີໂອເອ ທີ່ຈາກາຕາ ມີລາຍງານເລື້ອງນີ້ ຊຶ່ງສິງຈະນຳມາສະເໜີທ່ານ.
ເບິ່ງວີດີໂອພາສາລາວ ກ່ຽວກັບລາຍງານນີ້:
ທີ່ໂຮງຮຽນກິນນອນ al-Hikam ນອກນະຄອນຫຼວງຈາກາຕ້າ ພວກຊາຍໜຸ່ມອິນໂດເນເຊຍ ກຳລັງຮຽນຮູ້ ເລື້ອງການຕໍ່ຕ້ານຫຼັກອຸດົມການອິສລາມຫົວຮຸນແຮງ ຜ່ານການສຶກສາແນວຄິດອິສລາມຫົວປານກາງ.
ທ່ານ Arif Zamhari ຫົວໜ້າໂຄງການນີ້ ທີ່ໄດ້ຮັບທຶນຈາກລັດຖະບານນັ້ນ ກ່າວວ່າ ພວກນັກສຶກສາດ້ານສາສະໜາທີ່ໄດ້ຮັບການເຝິກ ອົບຮົມໃໝ່ໆເຫລົ່ານີ້ ຈະຖືກສົ່ງອອກໄປກ່າວຄຳປາໄສໃນໂບດອິສລາມຢູ່ທົ່ວປະເທດ.
ທ່ານ Arif Zamhari ກ່າວວ່າ “ຢູ່ທີ່ນີ້ ພວກເຮົາເຜີຍແຜ່ເຊື້ອໄວຣັສ ຂອງສາສະໜາອິສລາມທີ່ສັນຕິ ໄປຍັງປະຊາຄົມຂອງພວກເຮົາ. ທ່ານກໍຮູ້ຕົ່ວ ບັນຫາຢູ່ທີ່ນີ້ ກໍຄື
ສຽງທີ່ດັງທີ່ສຸດນັ້ນແມ່ນມາຈາກພວກຫົວຮຸນແຮງ. ພວກກຸ່ມຫົວນິຍົມແນວທາງປານກາງຂອງພວກເຮົາ ແມ່ນບໍ່ເວົ້າຫຍັງອອກມາຈັກເທື່ອ.”
ການໂຈມຕີກໍ່ການຮ້າຍຄັ້ງຮ້າຍແຮງ ເທື່ອຫຼ້າສຸດໃນອິນໂດເນເຊຍ ແມ່ນການວາງລະເບີດ
ໃສ່ສອງໂຮງແຮມ ໃນນະຄອນຫຼວງຈາກາຕ້າ ເມື່ອປີ 2009 ຊຶ່ງເປັນຂີດໝາຍແຫ່ງການຍຸດຕິລົງຂອງການວາງແຜນໂຈມຕີທີ່ອັນຕະລາຍເຖິງຕາຍ ຂອງກຸ່ມ Jemaah Islamiya ແລະພວກກຸ່ມຫົວຮຸນແຮງອື່ນໆ ໃນເຂດເອເຊຍຕາເວັນອອກສຽງໃຕ້ ທີ່ມີສາຍພົວພັນກັບເຄືອຂ່າຍ ອາລ ກາອິດາ ນັ້ນ.
ໃນອິນໂດເນເຊຍ ລັດຖະບານສາມາດຍັບຍັ້ງການຂົ່ມຂູ່ຂອງພວກກໍ່ການຮ້າຍໄວ້ໄດ້ ໂດຍ
ທຳການຈັບກຸມ ບໍ່ແມ່ນສັງຫານພວກຜູ້ນຳຂອງກຸ່ມກໍ່ການຮ້າຍ ເຊັ່ນນາຍ Abu Bakar Bashir ນັກບວດມຸສລິມ ເປັນຕົ້ນ. ແລະການດຳເນີນຄະດີພວກເຂົາ ໄດ້ຊ່ອຍຫັນປ່ຽນຄວາມຄິດເຫັນຂອງປະຊາຊົນ ທີ່ມີຕໍ່ພວກຫົວຮຸນແຮງຕ່າງໆນັ້ນ.
ແຕ່ການຂົ່ມຂູ່ຂອງພວກກໍ່ການຮ້າຍ ໄດ້ໂຜ່ໂຕຄືນມາອີກໃນປີນີ້ ຜ່ານທາງອິນເຕີແນັດ ຢູ່ໃນ
ວີດີໂອທີ່ສະແດງໃຫ້ເຫັນ ຊາຍອິນໂດເນເຊຍຄົນໜຶ່ງທີ່ເປັນນັກຕໍ່ສູ້ຂອງກຸ່ມລັດອິສລາມໃນ
ຊີເຣຍ ກ່າວຊຸກຍູ້ພວກຊາວມຸສລິມ ໃຫ້ພາກັນລຸກຮືຂຶ້ນຕໍ່ຕ້ານລັດຖະບານໃນນະຄອນຈາ
ກາຕ້າ.
ທ່ານນາງ Sidney Jones ທີ່ສະຖາບັນວິເຄາະນະໂຍບາຍການຂັດແຍ້ງ ທີີ່ນະຄອນຈາກາ
ຕ້າ ກ່າວວ່າ ວີດີໂອດັ່ງກ່າວ ໄດ້ເປັນການຕັກເຕືອນອັນນຶ່ງ.
ທ່ານນາງ Sidney Jones ກ່າວວ່າ “ເປັນເທື່ອທຳອິດ ທີ່ຊາວອິນໂດເນເຊຍມອງເຫັນ
ລັດອິສລາມ ວ່າເປັນການທ້າທາຍຕໍ່ອະທິປະໄຕຂອງອິນໂດເນເຊຍ. ນັ້ນແຫລະທີ່ພາໃຫ້ເກີດປະຕິກິລິຍາຂຶ້ນມາ. ມັນບໍ່ແມ່ນວ່າ ກຸ່ມລັດອິສລາມກາຍມາເປັນອັນຕະລາຍ
ຫລາຍຂຶ້ນ ໃນທັນທີທັນໃດ.”
ຕັ້ງແຕ່ນັ້ນມາ ຕຳຫຼວດໄດ້ຈັບກຸມພວກສະໜັບສະໜຸນກຸ່ມລັດອິສລາມ ຈຳນວນນຶ່ງ ແລະອາດຈະດຳເນີນຄະດີພວກເຂົາ ໃນຖານໃຫ້ການ ຊ່ອຍເຫຼືອແກ່ການກະບົດຢູ່ໃນປະເທດທີ່ເປັນມິດກັບອິນໂດເນເຊຍ. ແລະເຈົ້າໜ້າທີ່ອາດຈະຖອນໜັງສືຜ່ານແດນ ຈາກຊາວອິນໂດເນເຊຍ ປະມານ 150 ຄົນ ທີ່ໄດ້ໄປເຂົ້າຮ່ວມກັບກຸ່ມລັດອິສລາມໃນຊີເຣຍນັ້ນ.
ເຖິງແມ່ນມີຄວາມເປັນຫ່ວງໃນບັນດາກຸ່ມປົກປ້ອງສິດທິມະນຸດບາງກຸ່ມ ກ່ຽວກັບການໃຊ້ວິທີການແບບໜັກມືຂອງຕຳຫຼວດ ໂດຍບໍ່ມີການກຳກັບເບິ່ງນຳຂອງພົນລະເຮືອນເລີຍນັ້ນ ແຕ່
ອິນໂດເນເຊຍກໍຍຶດໝັ້ນຕາມຍຸດທະສາດ ຕໍ່ຕ້ານການກໍ່ການຮ້າຍຂອງຕົນຕໍ່ໄປ.
ຄະນະນຳພາມຸສລິມຫົວປານກາງບາງຄົນ ສະໜັບສະໜຸນໃຫ້ຫ້າມເງິນທຶນສຳຫລັບການສຶກສາດ້ານສາສະໜາ ຈາກບັນດາກຸ່ມຕ່າງປະເທດ ໂດຍສະເພາະມາຈາກອີຣ່ານແລະຊາ
ອູດີອາເຣເບຍນັ້ນ ແຕ່ວ່າການເກືອດຫ້າມດັ່ງກ່າວ ຈະຮວມທັງພວກອົງການເຜີຍແຜ່ສາສະ
ໜາຄຣິສຕຽນນຳເຊັ່ນກັນ.
ທ່ານນາງ Sidney Jones ກ່າວວ່າ ພວກມຸສລິມອິນໂດເນເຊຍ ໃນຈຳນວນຫລາຍຂຶ້ນ ພາກັນໃຊ້ສື່ສັງຄົມ ສະແດງຄວາມເຫັນຕໍ່ຕ້ານຄວາມຮຸນແຮງຈັດ ທີ່ພວກລັດອິສລາມໄດ້
ປະຕິບັດມານັ້ນ.
ທ່ານນາງ Sidney Jones ກ່າວວ່າ “ ສິ່ງນຶ່ງໃນຫລາຍໆສິ່ງທີ່ໜ້າສົນໃຈ ກ່ຽວກັບ
ການໂຜ່ໂຕຂຶ້ນມາຂອງກຸ່ມລັດອິສລາມ ກໍແມ່ນວ່າ ຊາວມຸສລິມຫົວປານກາງມີ
ຄວາມຢ້ານກົວແລະກຽດຊັງພວກເຂົາຫລາຍ ຢູ່ໃນອິນໂດເນເຊຍ.”
ໄພຂົ່ມຂູ່ໃໝ່ນີ້ ໄດ້ເຕືອນຄວາມຊົງຈຳຂອງຊາວອິນໂດເນເຊຍຫຼາຍໆຄົນວ່າ ເຖິງແມ່ນບໍ່ມີການໂຈມຕີຄັ້ງຮ້າຍແຮງເກີດມາໄດ້ເກືອບ 5 ປີແລ້ວກໍຕາມ ແຕ່ສົງຄາມຕໍ່ຕ້ານການກໍ່ການຮ້າຍຂອງພວກເຂົາເຈົ້າເອງ ກໍຍັງບໍ່ທັນຍຸດຕິລົງເທື່ອ.
