ລາຍງານຂອງອົງການສະຫະປະຊາຊາດ ໄດ້ກ່າວຫາມຽນມາວ່າ ໄດ້ໃຊ້ກົດໝາຍຫຼາຍ
ສະບັບ ເພື່ອຂັດຂວາງບໍ່ໃຫ້ພວກນັກຂ່າວອິດສະຫຼະ ເຮັດໜ້າທີ່ຂອງພວກເຂົາເຈົ້າໄດ້.
ລີຊາ ສະໄລນ໌ ຈະນໍາເອົາການເປີດເຜີຍລາຍງານດັ່ງກ່າວ ໂດຍສະພາສິດທິມະນຸດສະ
ຫະປະຊາຊາດ ຈາກນະຄອນເຈນີວາ ຊຶ່ງໄພສານ ມີລາຍລະອຽດ ກ່ຽວກັບເລື້ອງນີ້ ມາ
ສະເໜີທ່ານ.
ລາຍງານສະບັບນີ້ ໄດ້ອ້າງການຕັດສິນໂທດນັກຂ່າວ ຂອງອົງການຂ່າວ ຣອຍເຕີ້ 2 ຄົນ ທີ່ໄດ້ລາຍງານກ່ຽວກັບການສັງຫານໝູ່ຊາວໂຣຮິງຢາໂດຍພວກທະຫານໃນຂະນະທີ່ມີ
ຕົວຢ່າງຂອງການສະແດງຄວາມໂກດແຄ້ນ ຢ່າງເປັນການສະເພາະ ກ່ຽວກັບການຮາວີ
ລົບກວນ ຕໍ່ສື່ມວນຊົນຢູ່ໃນປະເທດມຽນມາ.
ລາຍງານດັ່ງກ່າວນີ້ ແມ່ນໃຫ້ລາຍລະອຽດ ກ່ຽວກັບຫຼາຍໆກໍລະນີ ຂອງການຈັບກຸມຄຸມ
ຂັງ ແລະການຟ້ອງຮ້ອງດຳເນີນຄະດີຕໍ່ພວກນັກຂ່າວໃນຂໍ້ຫາທີ່ເສກສັນປັ້ນແຕ່ງຂຶ້ນມາ
ຢູ່ໃນທົ່ວປະເທດ ຮວມທັງຢູ່ ທີ່ລັດກະຊິ່ນ ລັດສານ ແລະລັດຣາໄຄນ໌. ລາຍງານເວົ້າວ່າ ກົດໝາຍທີ່ບໍ່ຈະແຈ້ງຈຳນວນນຶ່ງ ໄດ້ຖືກນຳມາໃຊ້ຢູ່ໃນປະເທດມຽນມາ ເພື່ອເຂົ້າຄວບ
ຄຸມພວກນັກຂ່າວ ທີ່ເປັນອິດສະຫຼະ ແລະ ຂັດຂວາງພວກເຂົາເຈົ້າ ບໍ່ໃຫ້ລາຍງານຂ່າວ ກ່ຽວກັບບັນຫາສຳຄັນຕ່າງໆ.
ໂຄສົກຂອງອົງການສິດທິມະນຸດ ສະຫະປະຊາຊາດ ທ່ານນາງຣາວີນາ ແຊມດາຊານີ
(Ravina Shamdasani) ກ່າວຕໍ່ວີໂອເອວ່າ ຜູ້ຄົນມີຄວາມຫວັງຢ່າງແຮງກ້າວ່າ ອິດ
ສະຫຼະພາບດ້ານການຂ່າວ ແລະສິດເສລີິພາບໃນການສະແດງຄວາມຄິດຄວາມເຫັນ ໂດຍທົ່ວໄປແລ້ວຈະດີຂຶ້ນ ເວລາລັດຖະບານພົນລະເຮືອນຂອງທ່ານນາງອອງຊານ ຊູ
ຈີ ເຂົ້າກຳອຳນາດໃນປີ 2015.
ທ່ານນາງແຊມດາຊານີກ່າວວ່າ ແນວໃດກໍຕາມ ເວລານີ້ ມີຄວາມຮູ້ສຶກກັນໄປໃນທາງ
ທີ່ບໍ່ດີວ່າ ສິ່ງດັ່ງກ່າວນີ້ ບໍ່ໄດ້ເກີດຂຶ້ນ ແລະກໍບໍ່ມີທ່າທາງວ່າ ມັນຈະເກີດຂຶ້ນ...ມັນເປັນ
ການຍາກທີ່ຈະຮູ້ໄດ້ວ່າຄຳສັ່ງນັ້ນມາຈາກໃສ ມັນເປັນນະໂຍບາຍຫຼືເປັນພຽງຂັ້ນຕອນ
ກ່ຽວກັບມາດຕະຖານ ໃນການປະຕິບັດງານ ຂອງພວກເຈົ້າໜ້າຫຼາຍໆຄົນ ດັ່ງນັ້ນ ຈຶ່ງ
ເປັນການຍາກ ທີ່ຈະຮູ້ໄດ້ວ່າ ມັນແມ່ນພວກທະຫານ ຫຼືລັດຖະບານພົນລະເຮືອນກັນ
ແທ້ ທີ່ເປັນຜູ້ຈັດຕັ້ງປະຕິບັດນະໂຍບາຍກົດຂີ່ພວກນັກຂ່າວ.
ອົງການນັກຂ່າວບໍ່ມີພົມແດນ ລາຍງານວ່າ ມີນັກຂ່າວ ປະມານ 20 ຄົນ ໄດ້ຖືກຟ້ອງ
ຮ້ອງ ດຳເນີນຄະດີ ຢູ່ປະເທດມຽນມາ ໃນປີ 2017 ຜ່ານມານີ້. ແຕ່ທ່ານນາງແຊມດາ
ຊານີ ກ່າວວ່າ ຈຳນວນດັ່ງກ່າວແມ່ນບໍ່ໄດ້ຮວມທັງກໍລະນີສ່ວນຕົວ ທີ່ເລີ້ມດ້ວຍຂໍ້ຫາ ໃສ່ຮ້າຍປ້າຍສີທາງອາຍາຕ່າງໆ.
ທ່ານນາງແຊມດາຊານີເວົ້າວ່າ ການນຳໃຊ້ກົດໝາຍແລະສານໂດຍລັດຖະບານແລະ
ພວກທະຫານ ເພື່ອກົດຂີ່ພວກນັກຂ່າວອິດສະຫຼະນັ້ນ ໄດ້ກໍ່ໃຫ້ເກີດຄວາມຫຍຸ້ງຍາກ
ສັບສົນຕໍ່ສື່ມວນຊົນ. ທ່ານນາງເວົ້າວ່າ ມັນໄດ້ບັງຄັບໃຫ້ພວກນັກຂ່າວຕ້ອງໄດ້ເລືອກ
ເອົາ ລະຫວ່າງການກວດກາຕົນເອງແລະການສ່ຽງຕໍ່ການຖືກຟ້ອງຮ້ອງດຳເນີນຄະດີ.
