ການບຸກສັງຫານທີ່ໂຫດຮ້າຍເຂົ້າໄປໃນອິສຣາແອລຂອງກຸ່ມຮາມາສ ແລະ ການ ຕອບໂຕ້ທາງທະຫານແບບເດັດຂາດຂອງລັດຖະບານຢິວ ແມ່ນກໍາລັງຜັກດັນໃຫ້ ເກີດຄວາມເຄັ່ງຕຶງຄັ້ງໃໝ່ແກ່ຄວາມສຳພັນຂອງສະຫະລັດທີ່ມີມາແຕ່ດົນນານໃນອ່າວເປີເຊຍ, ເຊິ່ງເປັນບ່ອນທີ່ບັນດາຜູ້ນຳຢູ່ໃນພາກພື້ນ ຕ້ອງນຳທາງລະຫວ່າງ ຄວາມຄຽດແຄ້ນຂອງປະຊາຊົນຂອງຕົນ ແລະ ຄວາມຢ້ານກົວຕໍ່ຄວາມກ້າຫານ ຂອງ ອີຣ່ານ.
ນຶ່ງໃນບັນດາປະເທດຕ່າງໆເຫຼົ່ານັ້ນ, ກາຕ້າ ທີ່ກໍາລັງພົ້ນເດັ່ນຂຶ້ນໃນຖານະສໍາ ຄັນຂອງຜູ້ສ້າງສັນຕິພາບ ພ້ອມດ້ວຍຄວາມສາມາດທີ່ເປັນເອກະລັກສະເພາະ ຂອງພວກເຂົາເຈົ້າ ໃນການຫາລືກັບທຸກຝ່າຍຄື ອິສຣາແອລ, ກຸ່ມຮາມາສ ແລະ ສະຫະລັດ.
ທ່ານ ແອນເດຣຍສ໌ ຄຣຽກ (Andreas Krieg), ຜູ້ບັນຍາຍອາວຸໂສຢູ່ທີ່ໂຮງຮຽນກ່ຽວກັບການສຶກສາທາງດ້ານຄວາມປອດໄພ ທີ່ມະຫາວິທະຍາໄລຄິງລອນດອນ ກ່າວໃນການໃຫ້ສໍາພາດກັບ VOA ວ່າ "ອ່າວດັ່ງກ່າວ ແມ່ນມີບົດບາດສໍາຄັນຢູ່ໃນຄວາມຂັດແຍ້ງນີ້ ຫຼາຍກວ່າສົງຄາມແຫຼມກາຊາທີ່ຜ່ານມາ."
“ບັນດາປະເທດຢູ່ໃນຂົງເຂດອ່າວແຫ່ງນີ້ ໄດ້ເພັ່ງເລັງໃສ່ໜ່ວຍງານ ແລະເອກະ ລາດຂອງຕົນຢູ່ໃນພາກພື້ນ,” ຫຼາຍກວ່າການປະທະກັນໃນກ່ອນໜ້ານັ້ນລະຫວ່າງ ອິສຣາແອລ ແລະກຸ່ມ ຮາມາສ, ທ່ານກ່າວ. "ນີ້ຍັງຫມາຍຄວາມວ່າ ພວກເຂົາເຈົ້າກໍາລັງຊອກຫາຍຸດທະສາດທີ່ສອດຄ່ອງກັບ ສະຫະລັດ ຫນ້ອຍ ກວ່າຫຼາຍໆປີທີ່ຜ່ານມາ."
ໃນລະຫວ່າງກອງປະຊຸມສຸດຍອດສະພາການຮ່ວມມືອ່າວເປີເຊຍ ແລະ ອາຊຽນ ໃນຕົ້ນເດືອນນີ້, ບັນດາຜູ້ນຳໄດ້ອອກຖະແຫຼງການທີ່ເຄັ່ງຄັດຮ່ວມກັນ ໂດຍຮຽກຮ້ອງໃຫ້ “ທຸກຝ່າຍທີ່ມີຄວາມຂັດແຍ້ງກັນນັ້ນ ຈົ່ງປົກປ້ອງພົນລະເຮືອນ, ຫຼີກເວັ້ນການແນເປົ້າໝາຍໃສ່ພວກເຂົາເຈົ້າ ແລະ ຈົ່ງຢຶດຖືກົດໝາຍດ້ານມະນຸດ ສະທຳສາກົນ.”
