ດ້ວຍຄຳສັນຍາ ກ່ຽວກັບ “ການທູດ ທີ່ແຂງຂັນ” ແລະ ປະຕິຍານທີ່ຈະບໍ່ສະແຫວງຫາ“ ສົງຄາມເຢັນຄັ້ງໃໝ່ນັ້ນ,” ປະທານາທິບໍດີ ສະຫະລັດ ທ່ານ ໂຈ ໄບເດັນ ໄດ້ໃຊ້ຄຳປາໄສຄັ້ງທຳອິດຂອງທ່ານ ຕໍ່ກອງປະຊຸມສະມັດຊາໃຫຍ່ ສະຫະປະຊາຊາດ ໃນວັນອັງຄານວານນີ້ເພື່ອຜັກດັນລະບຽບແຜນການໂລກາພິວັດ, ໂດຍເວົ້າວ່າ “ອຳນາດທາງທະຫານຂອງ ສະຫະລັດ ຕ້ອງເປັນເຄື່ອງມືອັນສຸດ ທ້າຍຂອງພວກເຮົາ, ບໍ່ແມ່ນທຳອິດ.”
ທ່ານ ໄບເດັນ ໄດ້ໃຊ້ຄຳປາໄສຍາວເຄິ່ງຊົ່ວໂມງ ເພື່ອຜັກດັນການດຳເນີນການຫົວກ້າວໜ້າຕໍ່ເຊື້ອໄວຣັສ COVID-19 ແລະສະພາບອາກາດປ່ຽນແປງ. ໃນວັນພຸດມື້ນີ້, ທ່ານຈະຈັດກອງປະຊຸມສຸດຍອດຢາວັກຊີນ COVID-19 ທາງອອນໄລນ໌ ກັບບັນດາຜູ້ນຳໂລກອື່ນໆ.
ໃນວັນອັງຄານວານນີ້, ທ່ານໄດ້ເວົ້າ ກ່ຽວກັບ ສິ່ງທ້າທາຍຫຼາຍຢ່າງທີ່ກຳລັງປະເຊີນກັບສະມາຊິກສະມັດຊາໃຫຍ່ສະຫະປະຊາຊາດ 193 ປະເທດ.
ທ່ານປະທານາທິບໍດີ, ຜູ້ທີ່ໄດ້ກຳໜ້າທີ່ຂອງທ່ານເປັນຄັ້ງທຳອິດໃນຖານະເປັນປະມຸກລັດຢືນຢູ່ຕໍ່ໜ້າເວທີຫີນອ່ອນສີຂຽວທີ່ພິເສດຂອງອົງການສະຫະປະຊາຊາດໄດ້ກ່າວວ່າ, “ນີ້ແມ່ນທາງເລືອກທີ່ຊັດເຈນ ແລະ ຮີບດ່ວນທີ່ພວກເຮົາປະເຊີນຢູ່ທີ່ນີ້ ໃນຕອນເລີ່ມຕົ້ນຂອງສິ່ງທີ່ຕ້ອງເປັນທົດສະວັດທີ່ຊີ້ຂາດສຳລັບໂລກຂອງພວກເຮົາ, ທົດສະວັດທີ່ແທ້ຈິງແລ້ວຈະພິຈາລະນາອະນາຄົດຂອງພວກເຮົາ. ໃນຖານະເປັນປະຊາຄົມໂລກ, ພວກເຮົາໄດ້ຖືກທ້າທາຍໂດຍຄວາມຮີບດ່ວນ ແລະ ວິກິດການທີ່ກຳລັງຈະເກີດຂຶ້ນ ໃນນັ້ນມີໂອກາດຕ່າງໆທີ່ໃຫຍ່ໂຕ ຖ້າພວກເຮົາສາມາດລວບລວມຄວາມມຸ່ງໝັ້ນ ແລະ ຄວາມຕັ້ງໃຈເພື່ອຍຶດເອົາໂອກາດພວກນີ້.”
ໂດຍປາສະຈາກການກ່າວເຖິງຄູ່ປໍລະປັກທີ່ໃຫຍ່ທີ່ສຸດຂອງປະເທດດ້ວຍຊື່ຂອງປະເທດຈີນນັ້ນ, ທ່ານໄບເດັນ ຍັງໄດ້ປະຕິຍານວ່າ ທ່ານຈະບໍ່ຊອກຫາທາງທີ່ຈະເຮັດໃຫ້ຄວາມຂັດແຍ້ງຮຸນແຮງຂຶ້ນ. ໃນຕອນຕົ້ນຂອງຄຳປາໄສຂອງທ່ານ ຕໍ່ກອງປະຊຸມສະມັດຊາໃຫຍ່ນັ້ນ, ເລຂາທິການໃຫຍ່ ສະຫະປະຊາຊາດ ທ່ານ ແອນໂຕນີໂອ ກູເຕເຣັສ ໄດ້ກ່າວວ່າ ມັນຈະ “ເປັນໄປບໍ່ໄດ້ທີ່ຈະແກ້ໄຂສິ່ງທ້າທາຍທີ່ໃຫຍ່ຫຼວງດ້ານເສດຖະກິດ ແລະ ການພັດທະນາ ໃນຂະນະທີ່ສອງເສດຖະກິດໃຫຍ່ທີ່ສຸດໃນໂລກ ແມ່ນຂັດແຍ້ງກັນ.”
ທ່ານ ໄບເດັນ ໄດ້ກ່າວວ່າ “ພວກເຮົາຈະບໍ່ສະແຫວງຫາ, ຂ້າພະເຈົ້າຈະເວົ້າອີກເທື່ອນຶ່ງ ພວກເຮົາຈະບໍ່ສະແຫວງຫາສົງຄາມເຢັນຄັ້ງໃໝ່ ຫຼື ໂລກຖືກແບ່ງແຍກເປັນກຸ່ມທີ່ແຂງກະດ້າງ. ສະຫະລັດ ແມ່ນພ້ອມແລ້ວທີ່ຈະເຮັດວຽກກັບປະເທດໃດທີ່ລຸກຂຶ້ນເພື່ອດຳເນີນການຊອກຫາຂໍ້ແກ້ໄຂທີ່ສັນຕິຕໍ່ສິ່ງທ້າທາຍຮ່ວມກັນ, ແມ່ນກະທັ້ງທີ່ພວກເຮົາມີຄວາມບໍ່ເຫັນພ້ອມທີ່ຮຸນແຮງໃນຂົງເຂດອື່ນໆກໍ ຕາມ, ເພາະວ່າພວກເຮົາທຸກຄົນຈະທຸກທໍລະມານກັບຜົນທີ່ຕາມມາຈາກຄວາມລົ້ມແຫຼວຂອງພວກເຮົາ ຖ້າພວກເຮົາບໍ່ຮ່ວມມືກັນແກ້ໄຂໄພຂົ່ມຂູ່ອັນຮີບດ່ວນຄື COVID-19, ສະພາບອາກາດປ່ຽນ ແປງ ຫຼື ໄພຂົ່ມຂູ່ທີ່ມີມາຕະຫຼອດ ເຊັ່ນການແຜ່ຜາຍຂອງອາວຸດນິວເຄລຍ.
