ກຸ່ມປົກປ້ອງສິດທິມະນຸດ Human Rights Watch ກ່າວວ່າ
ການຂາດກົດໝາຍແຮງງານທີ່ເຂັ້ມງວດໃນກຳປູເຈຍ ແມ່ນໄດ້
ອະນຸຍາດໃຫ້ ໂຮງງານຕັດຫຍິບຕ່າງໆ ຮວມທັງຫລາຍໆ
ໂຮງງານທີ່ສະໜອງເສື້ອຜ້າ ຍີ່ຫໍ້ດີໆຂອງປະເທດຕາເວັນຕົກ
ເອົາລັດເອົາບຽບພວກຄົນງານ ທີ່ອ່ອນແອນັ້ນ.
ໃນລາຍງານທີ່ພິມເຜີຍແຜ່ໃນວັນພະຫັດມື້ນີ້ ກຸ່ມປົກປ້ອງສິດທິ
ມະນຸດ ທີ່ມີສຳນັກນັກງານຢູ່ນະຄອນນິວຢ໊ອກ ໄດ້ຈົດບັນທຶກ
“ແບບແຜນການລະເມີດສິດທິໃນດ້ານແຮງງານ ຢ່າງຕໍ່ເນື່ອງ
ແລະສະໝ່ຳສະເໝີ” ຊຶ່ງຮວມທັງມີການບັງຄັບໃຫ້ເຮັດວຽກເກີນເວລາ ການກີດກັນເລື້ອງການຕັ້ງຄັນຂອງພວກແຮງງານແມ່ຍິງ ແລະການຕໍ່ຕ້ານກຳມະບານແຮງງານ.
ອຸດສາຫະກຳຕັດຫຍິບ ແມ່ນເປັນພາກສ່ວນທີ່ສຳຄັນຂອງເສດຖະກິດກຳປູເຈຍ ຊຶ່ງເປັນນຶ່ງ
ໃນບັນດາປະເທດທີ່ທຸກຍາກທີ່ສຸດໃນໂລກ. ອຸດສາຫະກຳດັ່ງກ່າວ ໄດ້ວ່າຈ້າງປະມານ 700 ພັນຄົນ ໃນປະເທດທີ່ມີປະຊາກອນ 15 ລ້ານ ຄົນ.
ກຳປູເຈຍ ໄດ້ປະເຊີນກັບຄວາມບໍ່ສະຫງົບຂອງພວກແຮງງານແລະພວກເຈົ້າໜ້າທີ່ໄດ້ປາບ ປາມທັບມ້າງການປະທ້ວງ ທີ່ມີເປົ້າໝາຍຮຽກຮ້ອງ ໃຫ້ຂຶ້ນເງິນຄ່າຈ້າງແຮງງານຂັ້ນຕ່ຳສຸດ
ສຳຫຼັບພວກແຮງງານຕັດຫຍິບ.
ອີງຕາມກຸ່ມປົກປ້ອງສິດທິມະນຸດ Human Rights Watch ແລ້ວ ກຳປູເຈຍໄດ້ອອກກົດ ໝາຍແຮງງານທີ່ເຂັ້ມແຂງໃນປີ 1997 ແຕ່ວ່າ ການບັງຄັບໃຊ້ ແມ່ນຍັງຂີ້ຮ້າຍຫຼາຍ ຊຶ່ງສ່ວນໃຫຍ່ແລ້ວ ລາຍງານເວົ້າວ່າ ແມ່ນເປັນຍ້ອນການກວດກາ ທີ່ບໍ່ມີປະສິດທິພາບຂອງ ລັດຖະບານ.
ອິງຕາມການສຶກສານັ້ນ ການສໍ້ລາດບັງຫຼວງ ຄືເຫດຜົນສຳຄັນ ທີ່ເຮັດໃຫ້ຄະນະກວດກາ
ບໍ່ໄດ້ຮັບຄວາມເຊື່ອຖື.
