ສະຫະລັດຈະສະແດງຄວາມມຸ້ງໝັ້ນຂອງຕົນ ຕໍ່ທະວີບອາຟຣິກາດ້ວຍການໃຫ້ ຄຳໝັ້ນສັນຍາວ່າຈະໃຫ້ເງິນຊ່ວຍເຫລືອ 55 ຕື້ໂດລາ, ນັ້ນຄືຄຳເວົ້າຂອງທີ່ປຶກ ສາດ້ານຄວາມໝັ້ນຄົງແຫ່ງຊາດ, ທ່ານເຈກ ຊູລີວານ ກ່າວໃນວັນຈັນວານນີ້ ໃນມື້ກ່ອນເປີດກອງປະຊຸມສຸດຍອດ 3 ມື້ຂອງຄະນະຜູ້ແທນ ຂັ້ນສູງຈາກທະວີບອາຟຣິກາ 50 ທ່ນທີ່ນະຄອນຫຼວງວໍຊິງຕັນ.
ທ່ານຊູລີວານ ກ່າວວ່າ “ສະຫະລັດໃຫ້ຄຳໝັ້ນສັນຍາວ່າ ຈະໃຫ້ເງິນຊ່ວຍເຫລືອ 55 ຕື້ໂດລາແກ່ທະວີບອາຟຣິກາໃນໄລຍະສາມປີຂ້າງໜ້າ ໃນທົ່ວຂະແໜງການທີ່ກວ້າງຂວາງ, ເພື່ອແກ້ໄຂບັນຫາທ້າທາຍທີ່ສຳຄັນ ໃນຍຸກສະໄໝຂອງພວກເຮົາ. "ຄໍາຫມັ້ນສັນຍາເຫຼົ່ານີ້ແມ່ນຢູ່ບົນພື້ນຖານການນໍາພາອັນຍາວນານຂອງ ສະຫະລັດ ແລະການເປັນຄູ່ຮ່ວມມືໃນການພັດທະນາ, ການເຕີບໂຕທາງດ້ານ ເສດຖະກິດ, ສຸຂະພາບແລະຄວາມໝັ້ນຄົງໃນອາຟຣິກາ."
ທ່ານກ່າວວ່າ "ພວກເຮົາຈະໃຫ້ລາຍລະອຽດກ່ຽວກັບໂຄງການເຫຼົ່ານັ້ນແກ່ທ່ານ" ໃນຂະນະທີ່ກອງປະຊຸມສຸດຍອດດຳເນີນໄປ.
ໃນການຕອບຄຳຖາມຂອງວີໂອເອນັ້ນ, ທ່ານຊູລີວານເນັ້ນໜັກວ່າເງິນຈຳນວນ ນີ້ ບໍ່ໄດ້ມີເງື່ອນໄຂວ່າໃຫ້ບັນດາປະເທດໃນອາຟຣິກາປະນາມຣັດເຊຍ ໃນການ ບຸກລຸກຢູເຄຣນ. ໃນເດືອນມີນາ, ບໍ່ດົນຫລັງຈາກການບຸກໂຈມຕີໄດ້ເລີ້ມຂຶ້ນ, 17 ປະເທດໃນອາຟຣິກາໄດ້ງົດອອກສຽງໃນການລົງຄະແນນສຽງກ່າວປະນາມ ຣັດເຊຍຢູ່ອົງການສະຫະປະຊາຊາດ.
"ພວກເຮົາບໍ່ໄດ້ເອົາປືນຈີ້ໃສ່ຫົວໃຜ," ນັ້ນຄືຄຳຕອບຂອງທ່ານຊູລີວານ ໂດຍກ່າວຕື່ມວ່າ "ພວກເຮົາຈະໃຫ້ເຫດຜົນໃນກໍລະນີນີ້ ດ້ວຍຄວາມດີໃຈຢາກຊ່ວຍ ແລະ ໃຊ້ຄວາມອົດທົນກັບທຸກປະເທດໃນໂລກວ່າ ເຂົາເຈົ້າຄວນອອກປາກອອກສຽງ ຕ້ານການລະເມີດຢ່າງຈະແຈ້ງຕໍ່ກົດບັດສະຫະປະຊາຊາດ. ພວກເຮົາບໍ່ໄດ້ວາງເງື່ອນໄຂ ຈາກທັດສະນະຂອງກອງປະຊຸມສຸດຍອດນີ້ກ່ຽວກັບການ ຕັດສິນໃຈອັນນັ້ນ."
ແຕ່ອົງການເຝົ້າລະວັງເລື້ອງສໍ້ລາດບັງຫຼວງກ່າວວ່າ ຄໍາຫມັ້ນສັນຍາທີ່ມີເງິນໂດ ລາ ກ້ອນໃຫຍ່ເຫຼົ່ານີ້ ແມ່ນໜ້ອຍທີ່ສຸດ ເມື່ອທຽບໃສ່ເງິນທີ່ຄາດຄະເນວ່າມີປະມານ 88 ຕື້ໂດລາ ທີ່ຮົ່ວໄຫຼອອກຈາກທະວີບໃນແຕ່ລະປີ ໃນກະແສໝູນວຽນ ການເງິນທີ່ຜິດກົດຫມາຍ - ໂດຍຜ່ານການຊື້ອະສັງຫາລິມະສັບ, ການລົງທຶນ ນອກຝັ່ງ ຫຼື ບໍລິສັດປອມທີ່ບໍ່ເປີດເຜີຍຊື່.
ທ່ານອຽນ ແກຣີ (Ian Gary), ຜູ້ອຳນວຍການຝ່າຍບໍລິຫານ ຂອງແນວໂຮມ ຮັບຜິດຊອບທາງດ້ານການເງິນ ແລະຄວາມໂປ່ງໃສຂອງບໍລິສັດກ່າວວ່າ "ຖ້າ ທ່ານເບິ່ງຕົວເລກເມື່ອມໍ່ໆມານີ້, ການຊ່ວຍເຫຼືອຂອງລັດຖະບານສະຫະລັດ ຕໍ່ເຂດໃຕ້ທະເລຊາຍຊາຮາຣາ ຂອງອາຟຣິກາ ມີການປ່ຽນແປງຂຶ້ນລົງ ຢູ່ໃນລະ ຫວ່າງ 6.5 ຫາ 7.5 ຕື້ໂດລາຕໍ່ປີ."
