ຖ້ຽວບິນທັງໝົດທີ່ອອກເດີນທາງຈາກສະໜາມບິນຮົງກົງ ໄດ້ຖືກຍົກເລີກເປັນມື້ທີສອງ
ລຽນຕິດ ໃນວັນອັງຄານມື້ນີ້ ຫລັງຈາກພວກປະທ້ວງ ເພື່ອປະຊາທິປະໄຕ ໄດ້ເຂົ້າຍຶດ
ອາຄານບໍລິການຜູ້ໂດຍສານ ຂອງສະໜາມບິນດັ່ງກ່າວ.
ການຕັດສິນໃຈຂອງເຈົ້າໜ້າທີ່ມີຂຶ້ນບໍ່ເທົ່າໃດນາທີຫລັງຈາກໄດ້ໂຈະການຈອງຕົວຂອງຜູ້ໂດຍສານທັງໝົດ ຫຼັງຈາກພວກປະທ້ວງຂັດຂວາງບໍ່ໃຫ້ຜູ້ໂດຍສານເຂົ້າໄປໃນປະຕູຂຶ້ນເຮືອບິນ ແລະແນະນຳໃຫ້ປະຊາຊົນ ບໍ່ໃຫ້ໄປສະໜາມບິນ.
ສະໜາມບິນໄດ້ດີ້ນຮົນເພື່ອຈະກັບຄືນເຂົ້າສູ່ສະພາບປົກກະຕິຫຼັງຈາກໄດ້ເປີດຄືນ ລຸນຫຼັງທີ່ມີການຍົກເລີກຖ້ຽວບິນທັງເຂົ້າແລະອອກຫຼາຍຮ້ອຍຖ້ຽວ ຍ້ອນການນັ່ງປະທ້ວງທີ່ຄ້າຍຄືກັນນີ້. ພວກເດີນທາງທີ່ໂກດແຄ້ນບາງຄົນ ຊຶ່ງຟ້າວທີ່ຈະອອກຈາກຮົງກົງໄປ ໄດ້ໂຕ້ຖຽງຢ່າງເຜັດຮ້ອນກັບພວກປະທ້ວງ ໃນຂະນະທີ່ພວກເດີນຂະບວນ ໃນວັນອັງຄານມື້ນີ້ ໄດ້ບຸກເຂົ້າໄປໃນຫໍບໍລິການຜູ້ໂດຍສານ ໂດຍຜ່ານແຖວພວກປະທ້ວງປົນເຂົ້າໄປກັບຜູ້ໂດຍສານ.
ການປິດທີ່ບໍ່ເຄີຍມີມາກ່ອນ ຂອງສະໜາມບິນນາໆຊາດຮົງກົງ ໃນວັນຈັນວານນີ້ ແມ່ນຂະຫຍາຍມາຈາກການປະທ້ວງຢູ່ຕາມຖະໜົນຫົນທາງ ທີ່ໄດ້ແກ່ຍາວຢູ່ໃນ ປົກຄອງຂອງຈີນດັ່ງກ່າວ ມາໄດ້ 2 ເດືອນແລ້ວ. ພວກປະທ້ວງຫຼາຍສິບຄົນ ແມ່ນໄດ້ຮັບບາດເຈັບໃນວັນຈັນວານນີ້ ຫຼັງຈາກພວກຕຳຫຼວດປາບຈະລາຈົນໄດ້ຍິງລະເບີດນ້ຳຕາແລະລູກປືນຢາງເຂົ້າໃສ່ພວກປະທ້ວງ ທີ່ໄດ້ຕັນຖະໜົນຫົນທາງ ແລະໄດ້ທ້າທາຍຄຳສັ່ງຂອງພວກຕຳຫຼວດ ໃຫ້ແຍກຍ້າຍກັນໄປ.
ຫົວໜ້າສິດທິມະນຸດສະຫະປະຊາຊາດ ທ່ານນາງມີແຊລ ບາເຊີແລັດ ໄດ້ອອກຖະແຫຼງການສະບັບນຶ່ງ ຮຽກຮ້ອງໃຫ້ເຈົ້າໜ້າທີ່ຮົງກົງ ໃຊ້ຄວາມຢັບຢັ້ງ ແລະສືບສວນເບິ່ງເຫດການ ທີ່ຍິງລະເບີດນ້ຳຕາເຂົ້າໃສ່ພວກປະທ້ວງ.
ລັດຖະບານ ໄດ້ນັບຈຳນວນພວກທີ່ໄດ້ຮັບບາດເຈັບມີ 54 ຄົນ ຊຶ່ງຮວມທັງ 2 ຄົນ ທີ່ຍັງຮັກສາຢູ່ໃນໂຮງພະຍາບານ ທີ່ມີອາການສາຫັດ ໃນວັນຈັນວານນີ້ນັ້ນແລະອີກ 28 ຄົນ ທີ່ຍັງຢູ່ໃນລາຍຊື່ທີ່ມີອາການໄຄຂຶ້ນແລ້ວ ອີງຕາມເຈົ້າໜ້າທີ່ຂອງໂຮງພະຍາບານ.
ພວກເດີນຂະບວນໄດ້ເລີ້ມທຳການປະທ້ວງ ເພື່ອຊອກຫາຊ່ອງທາງຈະຍຸຕິຮ່າງກົດໝາຍທີ່ຈະອະນຸຍາດໃຫ້ສົ່ງພວກທີ່ຕ້ອງສົງໄສຊາວຮົງກົງ ໄປດຳເນີນຄະດີຢູ່ບ່ອນອື່ນ ຮວມທັງຈີນແຜ່ນດິນໃຫຍ່. ພວກປະທ້ວງທັງຫຼາຍ ໃນເວລານີ້ແມ່ນຮຽກຮ້ອງໃຫ້ມີການລົງຄະແນນສຽງໂດຍກົງ ສຳລັບຜູ້ນຳຄົນຕໍ່ໄປ ໃນການປ່ອນ ບັດທີ່ເສລີ, ແລະຍຸດຕິທຳ ແລະກໍສືບສວນຢ່າງເປັນອິດສະຫຼະ ຕໍ່ພວກຕຳຫຼວດທີ່ຖືກກ່າວຫາວ່າ ປະຕິບັດແບບໂຫດຮ້າຍປ່າເຖື່ອນນັ້ນ.
ທ່ານນາງແຄຣີ ແລມ ຜູ້ນຳຂອງຮົງກົງທີ່ກຳລັງດີ້ນຮົນຕໍ່ສູ້ເພື່ອຮັກສາຕຳແໜ່ງໄວ້ນັ້ນ ໄດ້ປົກປ້ອງການເອົາບາດກ້າວຂອງພວກຕຳຫຼວດ ໃນກອງປະຊຸມຖະແຫຼງຂ່າວໃນວັນອັງຄານມື້ນີ້ ໂດຍກ່າວວ່າ ພວກເຂົາເຈົ້າຕ້ອງໄດ້ “ຕັດສິນໃຈດຽວນັ້ນ” ພາຍໃຕ້ “ສະຖານນະການທີ່ຫຍຸ້ງຍາກທີ່ສຸດ.” ທ່ານນາງແລມກ່າວວ່າ ທ່ານນາງຈະແກ້ໄຂກ່ຽວກັບຄວາມຮຽກຮ້ອງຕ້ອງການຂອງພວກປະຫຼັງຈາກຄວາມຮຸນແຮງໄດ້ຍຸຕິແລ້ວ ແລະສະຖານະການທີ່ວຸ້ນວາຍ ທີ່ພວກເຮົາເຫັນ ຢູ່ ໃນປັດຈຸບັນນີ້ ອາດຈະເບົາບາງລົງ.
ບັນດາເຈົ້າໜ້າທີ່ໃນນະຄອນປັກກິງ ໃນວັນຈັນວານນີ້ ໄດ້ເອີ້ນພວກປະທ້ວງວ່າ “ພວກກໍ່ການຮ້າຍ.”
