ຫຼັກຖານຕ່າງໆສະແດງໃຫ້ເຫັນໜັກແໜ້ນຂຶ້ນທຸກມື້ ວ່າໄວຣັສ
Zika ສ້າງບັນຫາຮ້າຍແຮງໃຫ້ແກ່ການກຳເໜີດຂອງພວກເດັກ
ນ້ອຍ ເວລາ ແມ່ມານຕິດເຊື້ອໄວຣັສດັ່ງກ່າວ.ນັກຂ່າວ VOA
Carol Pearson ມີລາຍງານກ່ຽວກັບຜົນຂອງການສຶກສາ
ຄົ້ນຄ້ວາໃໝ່ ທີ່ພົບເຫັນວ່າຄືຈະມີການເຊື່ອມໂຍງທາງດ້ານ
ຊີວະສາດ ລະຫວ່າງເຊື້ອໂຣກດັ່ງກ່າວ ກັບໂຣກ Microcephaly ທີ່ເປັນການເກີດບໍ່ສົມປະກອບນັ້ນ ດັ່ງວັນນະສອນ ຈະນຳລາຍ
ລະອຽດມາສະເໜີທ່ານ ໃນອັນດັບຕໍ່ໄປ.
ນີ້ແມ່ນຫ້ອງທົດລອງວິທະຍາສາດ ທີ່ສະຖາບັນ Johns Hopkins ດ້ານວິສະວະກຳກ່ຽວກັບ
ແຊລ ໃນນະຄອນ Baltimore ບ່ອນທີ່ພວກນັກວິທະຍາສາດພາກັນເຮັດວຽກຢ່າງຂຸ້ນຂ້ຽວຕະຫຼອດ 24 ຊົ່ວໂມງເປັນນຶ່ງເດືອນ ເພື່ອຊອກຄົ້ນຫາ ສາເຫດວ່າໄວຣັສ Zika ມີຜົນກະທົບ
ຕໍ່ແຊລສະໝອງຢ່າງໃດ.
ທ່ານນາງ Guo-Li Ming ຈາກສະຖາບັນການແພດ John Hopkinds ກ່າວວ່າ “ໃນການສຶກສາຄົ້ນຄ້ວາໃໝ່ນີ້ ພວກເຮົາຖາມແຕ່ພຽງຄຳຖາມງ່າຍໆ ເຊັ່ນວ່າ ມີແຊລໃດແດ່ທີ່ອ່ອນໄຫວຕໍ່ໄວຣັສ Zika?”
ນັບຕັ້ງແຕ່ປີກາຍນີ້ມາ ຕອນທີ່ໄວຣັສ Zika ໄດ້ລະບາດຂຶ້ນໃນ Brazil ໄດ້ມີເດັກນ້ອຍຫຼາຍກວ່າ 5 ພັນຄົນເກີດມາ ໂດຍມີຫົວລີບກວ່າປົກກະຕິ ແລະອາດມີການຈະເຣີນເຕີບໂຕຊ້າຢ່າງຮ້າຍແຮງກໍເປັນໄດ້ ຊຶ່ງສະພາບແບບນີ້ ເອີ້ນວ່າ Microcephaly.
ສິ່ງທີ່ຄ້າຍຄືກັນຂອງເດັກນ້ອຍພວກນີ້ ກໍແມ່ນວ່າ ໃນຊ່ວງເວລາທີ່ແມ່ຂອງເຂົາເຈົ້າຖືພາຢູ່
ນັ້ນ ແມ່ຂອງພວກເຂົາເຈົ້າຕິດໄວຣັສ Zika.
ນັບຕັ້ງແຕ່ນັ້ນມາ ພວກນັກວິທະຍາສາດທັງຫຼາຍຈຶ່ງໄດ້ພະຍາຍາມທີ່ຈະພິສູດໃຫ້ເຫັນວ່າ
ເປັນຫຍັງໄວຣັສ Zikaຈຶ່ງກະທົບແລະກະທົບແບບໃດຕໍ່ການພັດທະນາຂອງສະໝອງ ແລະຕອນທີ່ເດັກທາລົກພວມຈໍ່ເປັນໂຕຢູ່ໃນທ້ອງທີ່ມີຄວາມຫຼໍ່ແຫຼມທີ່ສຸດນັ້ນ.
ໃນສະຖາບັນການແພດ Johns Hopkins ແລະມະຫາວິທະຍາໄວຣັສຂອງລັດ Florida ພວກນັກວິໄຈໄດ້ພາກັນສັງເກດເບິ່ງເວລາເອົາໄວຣັສ Zika ໃສ່ລົງໄປໃນພາຊະນະທີ່ເພາະແຊລຊະນິດທີ່ຈະກາຍເປັນສະໝອງຂອງມະນຸດເຮົາ. ນີ້ແມ່ນ Stem cells ແລະ cells ສະໝອງຕົ້ນສະບັບທີ່ເຕີບໂຕຫຼາຍແລ້ວ. ພວກນັກວິໄຈຄົ້ນຄ້ວາ ໄດ້ພົບເຫັນວ່າ ໄວຣັສ Zika ສະແດງປະຕິກິລິຍາອອກມາເປັນສອງແບບ.
ທ່ານນາງ Ming ກ່າວວ່າ “ກ່ອນອື່ນໝົດມັນຈະໄປທຳລາຍ stem cells ສະໝອງບາງ
ຈຳນວນ ທີ່ມີໜ້າທີ່ຮັບຜິດຊອບໃນການສ້າງແຊລບາງສ່ວນຂອງສະໝອງ ແລະພ້ອມນີ້ ມັນກໍຈະໄປເຮັດໃຫ້ການຈະເຮີນເຕີບໂຕຂອງແຊລຕົ້ນສະບັບຊັກຊ້າລົງຖ້າຫາກວ່າມັນຍັງບໍ່ຕາຍເທື່ອ.”
ພວກເຂົາເຈົ້າພົບເຫັນໄວຣັສ Zika ເຮັດວຽກຮ່ວມກັບແຊລ ແລະໃຊ້ຄວາມສາມາດຂອງແຊລ ເພື່ອຜລິດແຊລໃໝ່ໃນຕົວຂອງມັນເອງ. ທ່ານນາງ Ming ກ່າວວ່າ ຍັງມີວຽກອີກຫຼາຍຢ່າງທີ່ຈຳເປັນຕ້ອງກະທຳເພື່ອພິສູດໃຫ້ເຫັນວ່າ ໄວຣັສ Zika ນັ້ນແມ່ນມີສ່ວນຮັບຜິດຊອບໂດຍກົງກັບໂຣກ Microcephaly ຫຼືບໍ່. ວຽກດັ່ງກ່າວນີ້ ແມ່ນຈະພົວພັນກັບການສຶກສາແບບຄ້າຍຄືກັນນີ້ໂດຍໃຊ້ແບບ 3 ມິຕິ ທີ່ໃກ້ຄຽງກັບວິຖີທາງ ທີ່ສະໝອງຈະເຣີນເຕີບໂຕ.
ພວກນັກວິທະຍາສາດຈາກທັງສອງມະຫາວິທະຍາໄວຣັສດັ່ງກ່າວ ໃນປະຈຸບັນນີ້ ພວມປະ
ສານງານກັນກ່ຽວກັບການວິໄຈຄົ້ນຄວ້າອັນໃໝ່ ອີກອັນນຶ່ງ.
ທ່ານນາງ Ming ກ່າວວ່າ “ມີສິ່ງນຶ່ງ ທີ່ພວກເຮົາຢາກຈະເຮັດນັ້ນ ແມ່ນການທີ່ ຢາກເຫັນ
ວ່າ ມີທາງໃດແດ່ທີ່ພວກເຮົາສາມາດກີດກັນບໍ່ໃຫ້ ໄວຣັສ Zika ເຂົ້າໄປໃນແຊລໄດ້.”
ການກີດກັນໄວຣັສ Zika ຫຼື ຫາວິທີທາງ ທີ່ຈະບໍ່ໃຫ້້ໄວຣັສ Zika ໄປທຳລາຍແຊລສະໝອງ ແມ່ນຈະເປັນການເຮັດໃຫ້ໄພຂົ່ມຂູ່ທີ່ມີຢູ່ໃນປະຈຸບັນນີ້ຫ່າງໄກອອກໄປຫຼາຍ.
