ບັນດານັກຊ່ຽວຊານດ້ານອະນາໄມຂອງໂລກ ໄດ້ໄປຮວມຕົວກັນ
ທີ່ນະຄອນ Cape Town ປະເທດອາຟຣິກາໃຕ້ Africa ໃນຕົ້ນ
ເດືອນນີ້ເພື່ອໂອ້ລົມກັນກ່ຽວກັບການຊອກຫາຊ່ອງທາງ ເພື່ອຍຸຕິ
ການລະບາດຂອງໂຣກປອດແຫ້ງ ຫຼື TB ທີ່ມີແຜ່ຫຼາຍກ່ອນການ
ຕິດເຊື້ອ HIV ຊຶ່ງເປັນໄວຣັສທີ່ພາໃຫ້ເປັນໂຣກ AIDS ນັ້ນ ແຕ່ວ່າ
ພວກນັກຄົ້ນຄວ້າ ໄດ້ສະແດງອອກເຖິງຂ່າວດີກ່ຽວກັບຕິດໂຣກ
ປອດແຫ້ງ ຂອງພວກຜູ້ປ່ວຍ ທີ່ມີອາຍຸນ້ອຍ ແລະ ອ່ອນເເອນັ້ນ. Anita Powell ນັກຂ່າວ VOA ມີລາຍງານ ຈາກນະຄອນ Johannesburg ຊຶ່ງວັນນະສອນຈະນຳລາຍລະອຽດ
ມາສະເໜີທ່ານໃນອັນດັບຕໍ່ໄປ.
ພວກນັກຄົ້ນຄ້ວາ ທີ່ເຂົ້າຮ່ວມກອງປະຊຸມປະຈຳປີຂອງສະຫະພັນໂລກກ່ຽວກັບສຸກຂະພາບຂອງປອດ ທີ່ນະຄອນ Cape Town ໄດ້ປະກາດເມື່ອວັນພຸດທີ3 ທັນວາຕົ້ນເດືອນນີ້ ກ່ຽວກັບການເປີດຕົວການປິ່ນປົວໂຣກປອດແຫ້ງ ແບບເປັນກັນເອງກັບພວກເດັກນ້ອຍນັ້ນວ່າ ມັນເປັນບາດກ້າວທີ່ມີຜົນຕໍ່ພວກເດັກນ້ອຍນຶ່ງລ້ານຄົນ ໃນທົ່ວໂລກ ແລະພວກເຂົາເຈົ້າ
ຫວັງວ່າ ອາດສາມາດສ້າງຄວາມກ້າວໜ້າທີ່ ສຳຄັນໃນການປິ່ນໂຣກດັ່ງກ່າວຊຶ່ງສາມາດກາຍເປັນໂຣກທີ່ຮ້າຍແຮງເຖິງຕາຍໄດ້ນັ້ນ.
Dr. Mel Spigelman ປະທານແລະຫົວໜ້າພັນທະມິດຂອງອົງການຕໍ່ຕ້ານໂຣກປອດແຫ້ງ ຫຼື TB ຊຶ່ງເປັນອົງການບໍ່ຫວັງຜົນກຳໄລນາໆຊາດໄດ້ບອກກັບ VOA ເຖິງຄວາມຄືບໜ້າທີ່ສຳຄັນນີ້ວ່າ “ນັບເປັນຄັ້ງທຳອິດ ທີ່ພວກເຮົາສາມາດຮັກສາພວກເດັກນ້ອຍຈຳນວນລ້ານຄົນ ທີ່ເປັນປອດແຫ້ງ ດ້ວຍການປຸງຢາສູດພິເສດ ທີ່ເຮັດໃຫ້ເປັນການງ່າຍສຳຫຼັບພວກເດັກນ້ອຍ
ກິນຢາທີ່ມີລົດຊາດດີ ແລະຫວັງວ່ານີ້ຈະເປັນການງ່າຍໃນການປິ່ນປົວໂຣກນີ້ ໃນໝູ່ພວກ
ເດັກນ້ອຍ.”
ທ່ານ Spigelman ກ່າວວ່າ ຈົນມາຮອດປະຈຸບັນນີ້ ພວກເດັກນ້ອຍໄດ້ກິນຢາຂອງຜູ້ໃຫຍ່ ແລ້ວນຳມາຜ່າເຄິ່ງ ຊຶ່ງກໍຖືກຄາຍຖິ້ມຢູ່ເລື້ອຍຍ້ອນລົດຂົມຂອງມັນ. ການຮັກສາດ້ວຍຢາຊະນິດໃໝ່ນີ້ ແມ່ນສາມາດລະລາຍໃນນ້ຳໄດ້ ແລະກໍຈະມີຫຼາຍລົດຊາດ ທັງໝາກ strawberry ແລະໝາກ raspberry ເປັນຕົ້ນ.
ການປິ່ນປົວຊະນິດໃໝ່ນີ້ ແມ່ນໄດ້ພັດທະນາ ດ້ວຍການຊ່ອຍເຫຼືອຈາກກຸ່ມຊ່ອຍເຫຼືອນາໆຊາດ ເຊັ່ນອົງການອະນາໄມໂລກ ແລະອົງການ USAID ທີ່ທ່ານ Spigelman ກ່າວວ່າ ເພາະວ່າບໍລິສັດຜະລິດຢາທີ່ໃຫຍ່ໆທັງຫຼາຍ ບໍ່ໄດ້ຮັບຜົນ ປະໂຫຍດທາງດ້ານການເງິນຫຍັງຫລາຍ ໃນການພັດທະນາຢາ ປິ່ນປົວໂຣກປອດແຫ້ງ ຊຶ່ງສ່ວນໃຫຍ່ ເປັນໂຣກສຳຫຼັບຄົນທຸກຈົນ.
ທ່ານ Spigelman ກ່າວວ່າ “ໂຣກປອດແຫ້ງ ນີ້ແມ່ນມີສ່ວນພົວພັນກັບສະຖານະພາບທາງສັງຄົມເສດຖະກິດ. ມັນມີການພົວພັນຢ່າງໃກ້ຊິດກັບຄວາມທຸກຍາກ ກັບການຢູ່ກັນແບບແອອັດ ແລະຂາດອາຫານທີ່ມີຄຸນຄ່າທາງໂພຊະນາການ.”
ອົງການອະນາໄມໂລກ ກ່າວວ່າ ໂຣກນີ້ ຊຶ່ງເປັນໂຣກທີ່ຕິດຕໍ່ທາງອາກາດດ້ວຍ ການຫາຍໃຈເອົາ ແລະຍັງສືບຕໍ່ເປັນໂຣກທີ່ອັນລະລາຍຮ້າຍແຮງທີ່ສຸດ -- ເຖິງແມ່ນວ່າເກືອບທຸກໆກໍລະນີ
ສາມາດປິ່ນປົວໃຫ້ຫາຍດີໄດ້. ອົງການອະນາໄມໂລກ ກ່າວວ່າ ໂຣກ TB ນີ້ ສັງຫານຜູ້ຄົນໄປແລ້ວ 1 ລ້ານ 5 ແສນ ຄົນໃນປີ 2014 ຊຶ່ງໃນນັ້ນ ມີເດັກນ້ອຍ 140 ພັນຄົນ ເປັນ
ພວກໄດ້ຮັບເຄາະ.
ທ່ານ Spigelman ໃຫ້ຂໍ້ສັງເກດວ່າ ໂຣກປອດແຫ້ງ ແມ່ນຍັງຂາດກໍລະນີຂອງຜູ້ຕິດທີ່ມີ
ຊື່ສຽງໂດ່ງດັງເພື່ອສະແດງເຖິງຄວາມຄິດເຫັນດັ່ງກ່າວທ່ານ Spigelman ໄດ້ອ້າງເຖິງ
ກໍລະນີ ຜູ້ປ່ວຍເປັນໂຣກປອດແຫ້ງ ທີ່ຂຶ້ນຊື່ລາຍນຶ່ງ ນາງ Fantine ກະສິກອນສາວ ທີ່ໄດ້
ກາຍມາເປັນໂສເພນີ ຊຶ່ງເລື້ອງນີ້ຂຽນເປັນພາສາຝຣັ່ງ ທີ່ປະ ພັນໂດຍນັກປະພັນຊື່ດັງ Victor Hugo ຂອງສັດຕະວັດທີ 19 ຊື່ວ່າ Le Miserables.
ແຕ່ວ່າ Dr. Lucica Ditiu ຜູ້ອຳນວຍການບໍລິຫານ ຂອງກຸ່ມພາຄີຕ້ານTB ທີ່ນະຄອນເຈນີວາ ກ່າວວ່າ ໂຣກ TB ນີ້ ແມ່ນເປັນໄພຂົ່ມຂູ່ແບບໃໝ່. ທ່ານນາງ ກ່າວວ່າ ໂຣກດັ່ງ
ກ່າວ ແມ່ນກຳລັງແຜ່ຂະຫຍາຍເພີ້ມຂຶ້ນ ຍ້ອນມີສາຍພັນດື້ຢາຫຼາຍຊະນິດ.
Dr. Ditiu ເວົ້າວ່າ “ໂຣກ TB ໄດ້ກັບຄືນມາຄຸກຄາມພວກເຮົາອີກແລ້ວ ແລະ ເລີ້ມລະບາດຂອງໂຣກ TB ນີ້ ແມ່ນຮ່ອງຮອຍຂອງຄວາມລົ້ມແຫລວຂອງໂລກເພາະວ່າ ໂຣກ TB ນີ້ ແມ່ນສັນຍາລັກຂອງຄວາມທຸກຍາກ ແລະຄວາມລຳບາກ ຍາກເຂັນ ແລະການຂາດທາດອາຫານ ແລະຂາດປັດໄຈຂັ້ນພື້ນຖານ ພ້ອມນີ້ ຜູ້ຄົນຍັງອາໄສຢູ່ໃນສະພາບທີ່ບໍ່ດີ ແລະການທີ່ຕ້ອງທົນທຸກ ຫຼືບໍ່ ກໍຕ້ອງຍອມທົນຢູ່ກັບສຸຂະພາບ ທີ່ຖືກຈັດໃຫ້ເປັນບູລະມິດສິດທີ່ຕ່ຳສຸດໃນຊີວິດຂອງພວກເຂົາເຈົ້າ.”
ທ່ານນາງ ຮຽກຮ້ອງໃຫ້ ບັນດາຜູ້ບໍລິຈາກນາໆຊາດ ແລະພວກຜູ້ນຳທັງຫຼາຍ ໃຫ້ພາກັນດຳ
ເນີນການແລະລົງທຶນຫຼາຍກວ່ານີ້ ເພື່ອຕໍ່ສູ້ກັບໂຣກທີ່ຮ້າຍແຮງດັ່ງກ່າວ.