ລິ້ງ ສຳຫລັບເຂົ້າຫາ

ວັນອັງຄານ, ໒໘ ພຶດສະພາ ໒໐໒໔

ຢາວັກຊິນ ກັນໄຂ້ຫວັດ ສາມາດ ປ້ອງກັນ ໂຣກຫົວໃຈວາຍ (ວີດີໂອ)


ນາງໝໍກຳລັງຊັກຢາວັກຊິນກັນໄຂ້ຫວັດ ໃຫ້ເດັກຄົນນຶ່ງ
ທີ່ຄລີນິກແຫ່ງນຶ່ງ ໃນນະຄອນ Boston, ລັດ Massachusetts, ວັນທີ 12 ມັງກອນ 2013.
ນາງໝໍກຳລັງຊັກຢາວັກຊິນກັນໄຂ້ຫວັດ ໃຫ້ເດັກຄົນນຶ່ງ ທີ່ຄລີນິກແຫ່ງນຶ່ງ ໃນນະຄອນ Boston, ລັດ Massachusetts, ວັນທີ 12 ມັງກອນ 2013.
ລະດູ​ໂຣກ​ໄຂ້ຫວັດ ຫາ​ກໍ​ເລີ້ມ​ໃນ​ຊີກ​ໂລກ​ເໜືອ ​ແລະ​ບັນດາ​
ນາຍ​ແພດ​ກຳລັງຊັກ​ຊວນ​ໃຫ້​ຜູ້ໃດ​ກໍ​ຕາມ ທີ່​ມີ​ອາຍຸ​ສູງ​ກວ່າ
6 ເດືອນ​ຂຶ້ນ​ໄປ ພາກັນ​ໄປ​ສັກ​ຢາ​ກັນ​ໂຣກໄຂ້ຫວັດ. ​ແຕ່​ການ
​ສຶກສາ​ຄັ້ງ​ໃໝ່ສະ​ເໜີ​ແນະ​ໃຫ້​ຮູ້ວ່າ ຢາ​ວັກ​ຊິນ​ດັ່ງກ່າວບໍ່​ພຽງ​
ແຕ່​ກຳ​ຈັດ​ປັດ​ເປົ່າ​ໂຣກ​ໄຂ້ຫວັດ​ເທົ່າ​ນັ້ນ ​ແຕ່​ອາດ​ຈະມີຜົນ​
ດີ​ອື່ນໆ​ສຳລັບ​ສຸຂະພາບເຊັ່ນ​ກັນ. ສິງ​ມີ​ລາຍ​ງານ​ເລື້ອງ​ນີ້
ຈາກ​ຜູ້​ສື່​ຂ່າວ​ວີ​ໂອ​ເອ​ມາສະ​ເໜີ​ທ່ານ​.



ເບິ່ງວີດີໂອ ພາສາອັງກິດ ກ່ຽວກັບລາຍງານນີ້:



ບັນດາ​ນັກ​ຊ່ຽວຊານ​ດ້ານ​ການ​ແພດ​ກ່າວ​ວ່າ ບໍ່​ມີ​ຫຍັງ​ສັງຫານ​ປະຊາຊົນ​ຫຼາຍເທົ່າ​ກັບ​ໂຣກ​ໄຂ້ຫວັດ. ພວກ​ຄົນ​ປ່ວຍ​ທີ່​ເປັນ​ໂຣກຫົວ​ໃຈ ​ເຊັ່ນນາງ Loreen Naylor ໂດຍ​ສະ​ເພາະ​ ແມ່ນ
ຕົກຢູ່​ໃນ​ອັນຕະລາຍ​ຫລື​ເຈັບ​ປວດໄດ້​ງ່າຍໆ. ດ້ວຍ​ເຫດ​ນີ້​ນາງ​ຈຶ່ງ​ສັກ​ຢາ​ກັນໂຣກໄຂ້ຫວັດ
​ໃນ​ທຸກໆ​ປີ ຊຶ່ງ​ນາງ Loreen Naylor ​ເວົ້າດັ່ງ​ນີ້:

“ຂ້ອຍ​ຄຶດ​ວ່າ ມັນ​ສຳຄັນ​ຫຼາຍ ມັນ​ເປັນ​ຊ່ອງ​ທາງ​ນຶ່ງ​ເພື່ອ​ຄວບ​ຄຸມ​ດູ​ແລ​ສຸຂະພາບ​
ຂອງຂ້ອຍ​ເອງ ​ແລະເຮັດ​ໃຫ້ໝັ້ນ​ໃຈ​ວ່າ ຂ້ອຍຈະບໍ່ເປັນຫວັດ."


ບັນດາ​ນາຍ​ແພດ​ກ່າວ​ວ່າ ພວກ​ຄົນປ່ວຍໂຣກຫົວ​ໃຈ ທີ່​ເປັນຫວັດ ​ປາກົດ​ວ່າ​ມີ​ການ​ສ່ຽງ
ໄພ​ສູງ ທີ່​ຈະ​ເປັນ​ໂຣກຫົວ​ໃຈ​ວາຍ ຫົວ​ໃຈ​ບໍ່​ທຳ​ງານ ຫຼື​ເປັນລົມ​ສາລະບາດ.

ບັນດາ​ນັກ​ຄົ້ນຄວ້າເຊື່ອ​ວ່າ ​ໃນ​ຂະນະ​ທີ່​ຮ່າງກາຍ​ຂອງ​ພວກ​ເຮົາ​ຕໍ່ສູ້​ກັບ​ໂຣກດັ່ງກ່າວທີ່
ເສັ້ນເລືອດແດງທີ່ໃຄ່ບວມ​ແລະ​ອັກ​ເສບ ຈະ​ເກີດ​ຄວາມບໍ່​ທຸ່ນ​ທ່ຽງຫຼາຍ​ຂຶ້ນ ​ແລະ​ອາດເປັນ
​ກ້ອນຕັນ​ເສັ້ນ​ເລືອດ​ກໍ​ເປັນ​ໄດ້. ​ແຕ່​ປາກົດ​ວ່າ ຢາ​ວັກ​ຊິນ​ປ້ອງ​ກັນ​ໄຂ້ຫວັດນີ້ອາດຊ່ອຍ​ປ້ອງ​
ກັນ​ພວກ​ຜູ້​ຄົນ​ທີ່​ມີ​ສຸຂະພາບ​ດີ​ ຈາກ​ໂຣກຫົວ​ໃຈ​ວາຍ​ ແລະ​ລົມ​ສາລະ​ບາດ​ໄດ້.

ທ່ານໝໍ Jacob Udell ທີ່​ມະຫາວິທະຍາ​ໄລ​ Women’s College Hospital ຢູ່ນະຄອນ
​ໂຕຣອນ​ໂຕ ປະ​ເທດ​ກາ​ນາ​ດາ​ ວິ​ເຄາະຂໍ້​ມູນຈາກ​ການ​ສຶກສາ​ຄົ້ນຄວ້າ​ມາ​ກ່ອນ ທີ່ພົວພັນ​
ກັບ​ຄົນ​ປ່ວຍ ຈຳນວນ​ເກືອບ 7 ພັນ​ຄົນ ​ເວົ້າ​ວ່າ :

“​ເວົ້າ​ລວມ​ແລ້ວ ການ​ສ່ຽງ​ໄດ້​ລົດ​ລົງ​ປະມານ 33 ​ເປີ​ເຊັນ​ໃນ​ການ​ເປັນ​ໂຣກຫົວ​ໃຈ​
ວາຍ ເປັນ​ລົມ​ສາລະ​ບາດ ​ແລະ​ໂຣກຮ້າຍ​ແຮງ​ຕ່າງໆ​ ກ່ຽວ​ກັບຫົວ​ໃຈ​ໃນ​ບັນດາ​
ພວກ​ທີ່ໄດ້​ສັກ​ຢາ​ປ້ອງ​ກັນໂຣກ​ໄຂ້ຫວັດ ​ເມື່ອ​ສົມ​ທຽບ​ໃສ່​ກັບຄົນປ່ວຍ​ທີ່​ໄດ້​ຮັບ​ຢາ
ປອມ ຫຼື​ພຽງ​ແຕ່​ກັບ​ພວກ​ທີ່​ໄດ້​ຮັບການ ຮັກສາ​ຂັ້ນ​ມາດຕະຖານ​ທຳ​ມະ​ດາເທົ່າ​ນັ້ນ.’’


ສຳລັບ​ພວກ​ຜູ້​ຄົນ​ທີ່​ຫາ​ກໍ​ເປັນ​ໂຣກຫົວ​ໃຈ​ວາຍ ການ​ທີ່​ໄດ້​ສັກຢາ​ວັກ​ຊິນ​ກັນ​ໂຣກໄຂ້ຫວັດ
ຈະຕັດ​ການ​ສ່ຽງ​ທີ່​ຈະ​ເປັນ​ໂຣກຫົວ​ໃຈ​ວາຍລົງ​ 50 ​ເປີ​ເຊັນ. ດັ່ງນີ້​ Dr.Udell ຈຶ່ງ​ເວົ້າວ່າ
ການ​ສັກ​ຢາ​ວັກ​ຊິນ​ດັ່ງກ່າວ ຈຶ່ງ​ເປັນ​ເລື້ອງ​ທີ່​ບໍ່​ຕ້ອງ​ຄຶດ​ຫຍັງຫຼາຍ ​ແລະກ່າວຕໍ່ໄປ​ວ່າ:

“ຂ້າພະ​ເຈົ້າ​ຂໍ​ຊັກ​ຊວນ​ຜູ້​ໃດ​ກໍ​ຕາມ ​ທີ່​ມີ​ຄວາມ​ສົງ​ໄສ​ກ່ຽວ​ກັບການສັກຢາ​ວັກ​ຊິນ
ດ້ວຍ​ສາ​ເຫດ​ໃດ​ກໍ​ຕາມນັ້ນ ​ແມ່ນ​ໃຫ້ມີທັດສະນະວ່າ​ ຈະ​ມີ​ຄວາມ​ສາມາດໄດ້​ຮັບ
​ຜົນປະ​ໂຫຍດທາງ​ດ້ານ​ຫົວ​ໃຈ​.”


ດຣ​.ຢູ​ແດນ ກ່າວ​ວ່າ ທ່ານ​ຢາກ​ໃຫ້​ມີ​ການ​ທົດ​ລອງ​ຂະໜາດ​ໃຫຍ່​ຕື່ມ​ໃໝ່ ​ເພື່ອ​ຢາກ​ເຫັນ​ວ່າ
ທ່ານ​ຈະ​ໄດ້​ຮັບ​ຜົນ​ແບບ​ດຽວ​ກັນ​ຫຼື​ບໍ. ຜົນ​ການ​ສຶກສາ​ຄົ້ນຄວ້າ​ຂອງ​ທ່ານ​ຫວ່າງບໍ່ດົນຜ່ານ
​ມາ​ນີ້ ​ໄດ້​ຖືກ​ພິມ​ເຜີຍ​ແຜ່​ໃນວາລະສານຂອງ ​ສະມາຄົມ​ການ​ແພດ​ອາ​ເມຣິກັນ ຫຼື Journal
of the American Medical Association.
XS
SM
MD
LG