ສະຫະລັດໄດ້ວາງມາດຕະການລົງໂທດຕໍ່ບໍລິສັດທີ່ເປັນສາຂາຂອງບໍລິສັດ ນ້ຳມັນໂຣສເນັຟ (Rosneft Oil) ທີ່ຄວບຄຸມໂດຍລັດຖະບານຣັດເຊຍທີ່ໃຫ້ການຊ່ວຍເຫລືອທາງການເງິນແກ່ລະບອບການປົກຄອງຂອງທ່ານນີໂຄລັສ ມາດູໂຣ (Nicolas Maduro) ໃນເວເນຊູເອລານັ້ນ.
ບໍລິສັດ Trading International S.A. ຫລື TNK, ຊຶ່ງເປັນສາຂານຶ່ງຂອງບໍລິສັດນ້ຳມັນໂຣສເນັຟ (Rosneft) ທີ່ຕັ້ງຢູ່ໃນປະເທດສະວິດເຊີແລນທີ່ດຳເນີນ ທຸລະກິດຢູ່ໃນຂະແໜງນ້ຳມັນໃນເສດຖະກິດຂອງເວເນຊູເອລາ ແມ່ນມີສ່ວນກ່ຽວພັນໂດຍກົງກັບການດຳເນີນຄວາມພະຍາຍາມ ເພື່ອຊ່ວຍບໍລິສັດການຄ້າ Rosneft Trading S.A. ຫລື RTSA ໃຫ້ຫລີກລ້ຽງຈາກການລົງໂທດຂອງສະຫະລັດ, ອີງຕາມຄຳເວົ້າຂອງລັດຖະບານສະຫະລັດໃນວັນພະຫັດວານນີ້.
"ບໍລິສັດ TNK Trading International S.A. ກໍແມ່ນສາຂາຂອງບໍລິສັດໂຣສເນັຟ (Rosneft) ອີກສາຂານຶ່ງ ທີ່ເປັນນາຍໜ້າໃຫ້ແກ່ການຂາຍ ແລະຂົນສົ່ງນ້ຳມັນດິບໃຫ້ແກ່ເວເນຊູເອລາ," ນັ້ນຄືຄຳເວົ້າຂອງທ່ານສຕິບເຟັນ ມນຸດຈິນ (Steven Mnuchin), ລັດຖະມົນຕີກະຊວງການເງິນ ທີ່ກ່າວຢູ່ໃນຖະແຫລງການສະບັບນຶ່ງ. ທ່ານກ່າວຕໍ່ໄປວ່າ "ລັດຖະບານທ່ານທຣຳ ຍັງມຸ້ງໝັ້ນຕໍ່ການເລັງເປົ້າໝາຍໃສ່ພວກທີ່ໃຫ້ການສະໜັບສະໜຸນແກ່ການຂູດຮີດນ້ຳມັນທີ່ເປັນຊັບສິນຂອງເວເນຊູເອລາຂອງລະບອບການປົກຄອງທີ່ສໍ້ລາດບັງຫລວງນັ້ນ.”
ບໍລິສັດ TNK ໄດ້ຊື້ນ້ຳມັນດິບເກືອບຮອດ 14 ລ້ານຖັງ ຈາກບໍລິສັດ Petroleos de Venezuela ຫລື PdVSA ພຽງແຕ່ໃນເດືອນມັງກອນ 2020 ເທົ່ານັ້ນ, ອີງຕາມຄຳເວົ້າຂອງລັດຖະບານສະຫະລັດ.
ມາດຕະການທີ່ມີຕໍ່ບໍລິສັດ TNK ແມ່ນປະຕິບັດຕາມການລົງໂທດຂອງສະຫະລັດຕໍ່ບໍລິສັດ Rosneft Trading S.A. ໃນວັນທີ 18 ກຸມພາ, 2020 ຢູ່ການກ່າວອ້າງທີ່ຄ້າຍຄືກັນນີ້.
"ປະຊາຊົນເວເນຊູເອລາ, ປະທານາທິບໍດີໄລຍະຂ້າມຜ່ານ ຮວນ ກວາອີໂດ (Juan Guaido) ແລະສະພາແຫ່ງຊາດ ທີ່ໄດ້ຮັບການເລືອກຕັ້ງແບບມີປະຊາທິປະໄຕ ຕ້ອງໄດ້ສືບຕໍ່ໃຫ້ການສະໜັບສະໜຸນແກ່ບັນດາປະເທດທີ່ເປັນຄູ່ພາຄີໃນສາກົນຂອງພວກເຮົາ," ນັ້ນຄືຄຳເວົ້າຂອງທ່ານ ໄມຄ໌ ພອມພຽວ (Mike Pompeo) ລັດຖະມົນຕີກະຊວງການຕ່າງປະເທດສະຫະລັດ ທີ່ກ່າວຢູ່ໃນຖະແຫລງການສະບັບນຶ່ງ. ທ່ານກ່າວອີກວ່າ "ພວກເຮົາຮຽກຮ້ອງໃຫ້ປະຊາຄົມສາກົນພາກັນໃຊ້ ການກົດດັນແຮງຂຶ້ນ ຕໍ່ທ່ານ ມາດູໂຣ ກັບອະດີດລະບອບການປົກຄອງທີ່ສໍ້ລາດບັງຫລວງຂອງທ່ານ ຮ່ວມກັບພວກເຮົາເພື່ອໃຫ້ທ່ານສະລະການກຳອຳນາດທີ່ບໍ່ຊອບທຳຂອງຕົນໃນເວເນຊູເອລາ."
ໃນເດືອນມັງກອນ 2019, ສະຫະລັດໄດ້ຮັບຮູ້ວ່າ ທ່ານ ກວາອີໂດ (Guaido) ເປັນປະທານາທິບໍດີ ໃນໄລຍະຂ້າມຜ່ານທີ່ຖືກຕ້ອງຊອບທຳຂອງປະເທດທີ່ເປັນສະມາຊິກອົງການ OPEC ແຫ່ງນັ້ນ ແລະນັບແຕ່ນັ້ນມາປະເທດດັ່ງກ່າວກໍໄດ້ເພີ້ມການກົດດັນທາງເສດຖະກິດ ແລະການທູດຂອງຕົນເພື່ອໂຄ່ນລົ້ມລະບອບປົກຄອງຂອງທ່ານມາດູໂຣ.
ປະມານ 60 ປະເທດ ທີ່ຮັບຮູ້ຜູ້ນຳຝ່າຍຄ້ານລັດຖະບານ, ທ່ານຮວນ ກວາອີໂດ ໃນປີກາຍນີ້ ວ່າເປັນຜູ້ນຳທີ່ຖືກຕ້ອງຊອບທຳຂອງເວເນຊູເອລາ ແລະຖືວ່າທ່ານ ມາດູໂຣບໍ່ຖືກຕ້ອງຊອບທຳ.
