ປະທານາທິບໍດີ ສະຫະລັດ ໂຈ ໄບເດັນ ໄດ້ກ່າວໃນວັນຈັນວານນີ້ ວ່າ ທ່ານຈະ “ບໍ່ຂໍໂທດໃດໆ” ຫຼັງຈາກທີ່ທ່ານໄດ້ໃຫ້ຄຳເຫັນເມື່ອມໍ່ໆມານີ້ ທີ່ວ່າ ປະທາ ນາທິບໍດີຂອງຣັດເຊຍ ວລາດີເມຍ ປູຕິນ “ບໍ່ສາມາດກຳອຳນາດໄດ້ຕໍ່ໄປ” ໂດຍເນັ້ນຢ້ຳວ່າ ທ່ານໄດ້ “ສະແດງຄວາມຮູ້ສຶກສະເທືອນໃຈທາງດ້ານສິນທຳ” ແລະແທ້ຈິງແລ້ວ ບໍ່ໄດ້ຮຽກຮ້ອງໃຫ້ປ່ຽນລະບອບການປົກຄອງຢູ່ໃນມົສກູ.
“ພວກຄົນຄືແບບນີ້ ບໍ່ຄວນປົກຄອງປະເທດໃດໆ ແຕ່ພວກເຂົາກໍໄດ້ປົກຄອງ. ຄວາມຈິງພວກເຂົາກໍໄດ້ປົກຄອງ ກໍບໍ່ໝາຍຄວາມວ່າ ຂ້າພະເຈົ້າບໍ່ສະມາດສະແດງຄວາມຮູ້ສຶກບໍ່ພໍໃຈຂອງຂ້າພະເຈົ້າກ່ຽວກັບມັນ” ທ່ານໄບເດັນ ໄດ້ກ່າວຕໍ່ບັນດານັກຂ່າວ ຢູ່ທີ່ທຳນຽບຂາວໃນວັນຈັນວານນີ້.
ທ່ານເວົ້າອີກວ່າ “ຂ້າພະເຈົ້າບໍ່ໄດ້ເວົ້າເຖິງການປ່ຽນນະໂຍບາຍເລີຍ.”
ຄຳເວົ້າທີ່ບໍ່ໄດ້ຖືກຂຽນເປັນລາຍລັກອັກສອນຂອງທ່ານປະທານາທິບໍດີ ກ່ຽວກັບທ່ານປູຕິນ ໃນຂະນະທີ່ກ່າວຖະແຫລງຕໍ່ພວກອົບພະຍົບຊາວຢູເຄຣນ ແລະບັນດາອາສາສະໝັກນາໆຊາດຢູ່ໃນປະເທດໂປແລນ ເມື່ອວັນເສົາແລ້ວນີ້ ໄດ້ກໍ່ໃຫ້ເກີດເລື້ອງຖົກຖຽງກັນໃນສະຫະລັດ ແລະໄດ້ເຮັດໃຫ້ບັນດາພັນທະມິດບາງສ່ວນໃນຢູໂຣບຕາເວັນຕົກ ຮູ້ສຶກແປກໃຈ.
“ສິ່ງສຸດທ້າຍ ທີ່ຂ້າພະເຈົ້າຢາກເຮັດ ແມ່ນການເຂົ້າຮ່ວມສົງຄາມທາງພາກພື້ນດິນ ຫຼືສົງຄາມນິວເຄລຍ ກັບຣັດເຊຍ” ທ່ານໄບເດັນ ໄດ້ກ່າວໄປ ໃນຂະນະທີ່ປະຕິເສດຕໍ່ແນວຄິດທີ່ວ່າ ຄວາມເຫັນຂອງທ່ານນັ້ນ ອາດເຮັດໃຫ້ຄວາມເຄັ່ງຕຶງກ່ຽວກັບສົງຄາມໃນຢູເຄຣນ ຈະທະວີຄວາມຮ້າຍແຮງຂຶ້ນຕື່ມອີກ.
ໃນຂະນະດຽວກັນ ພວກທະຫານຂອງຣັດເຊຍ ໄດ້ຢຸດເຊົາການເຄື່ອນກຳລັງທາງພາກພື້ນດິນໄປຍັງນະຄອນຫຼວງກີຢິບຂອງຢູເຄຣນ ຊຶ່ງປາກົດວ່າ ພວກເຂົາໄດ້ຫັນໄປເພັ່ງເລັງໃສ່ຂົງເຂດໃນພາກຕາເວັນອອກຂອງຢູເຄຣນ ອີງຕາມເຈົ້າໜ້າທີ່ອະວຸໂສທ່ານນຶ່ງຈາກກະຊວງປ້ອງກັນປະເທດສະຫະລັດ.
“ເປັນທີ່ຈະແຈ້ງແລ້ວວ່າ ພວກເຂົາບໍ່ໄດ້ເຄື່ອນກຳລັງເຂົ້າໄປກີຢິບອີກຕໍ່ໄປ” ນັ້ນແມ່ນຄຳເວົ້າຂອງເຈົ້າໜ້າທີ່ດັ່ງກ່າວ ຜູ້ທີ່ໄດ້ແຈ້ງໃຫ້ບັນດານັກຂ່າວຊາບກ່ຽວກັບຄວາມເປັນມາໃນວັນຈັນວານນີ້. ທ່ານກ່າວອີກວ່າ “ສິ່ງທີ່ພວກເຮົາກຳລັງເຫັນຢູ່ນີ້ ກໍແມ່ນການສືບຕໍ່ກຳນົດບູລິມະສິດຄືນໃໝ່ໃສ່ເຂດດອນບັສ.”
ການຫັນປ່ຽນດ້ານການທະຫານຂອງມົສກູ ປາກົດວ່າຈະເປັນຄວາມພະຍາຍາມຕັດກອງກຳລັງຂອງຢູເຄຣນ ໃນຂົງເຂດພາກຕາເວັນອອກນັ້ນ ອອກຈາກພູມິພາກ ອີງຕາມເຈົ້າໜ້າທີ່ດັ່ງກ່າວ ຊຶ່ງທ່ານກ່າວຕື່ມວ່າ ການເຄື່ອນໄຫວນີ້ “ອາດເປັນຄວາມພະຍາຍາມຂອງຣັດເຊຍ ເພື່ອທີ່ຈະໄດ້ຮັບອຳນາດການຕໍ່ລອງ” ໃນການເຈລະຈາສັນຕິພາບ ກັບບັນດາຜູ້ຕາງໜ້າຂອງຢູເຄຣນ ທີ່ກຳລັງພະຍາຍາມຈະຍຸຕິສົງຄາມ.
