ທຸກໆປີ ໃນເດືອນຕຸລານີ້ ສະຫະລັດຈະເປີດໂຄງການແຈກວິຊ່າ
ເຂົ້າເມືອງ ໃຫ້ຄົນຕ່າງດ້າວຈາກຫລາຍສິບປະເທດ ເພື່ອຮັບເອົາ
ເຂົ້າມາຢູ່ໃນປະເທດນີ້ ຈຳນວນ 5 ໝື່ນຄົນ ຜ່ານການຈົກສະ
ຫລາກທາງຄອມພິວເຕີ. ດາຣາມີລາຍລະອຽດກ່ຽວກັບເລື້ອງນີ້
ມາສະເໜີທ່ານ ຈາກລາຍງານ As It Is ຂອງວີໂອເອ ພະແນກ
ຮຽນພາສາອັງກິດ.
ໂຄງການແຈກວິຊ່າເຂົ້າເມືອງ ເພື່ອໃຫ້ຫລາກຫລາຍຊົນຊາດໄດ້ເຂົ້າມາຢູ່ໃນປະເທດ ຂອງລັດຖະບານສະຫະລັດ ຫລື Diversity Immigrant Visa Program ໄຂຂຶ້ນເມື່ອວັນທີ 1 ຕຸລາເດືອນນີ້. ໂຄງການນີ້ ເປັນທີ່ຮູ້ຈັກແກ່ຄົນຫລາຍລ້ານຄົນຢູ່ໃນທົ່ວໂລກ ໃນຊື່ວ່າ ໂຄງການ ຈົກສະຫລາກ ເອົາບັດຂຽວ ຫລື "green card lottery."
"Green card" ຫລື ບັດຂຽວ ຄືຊື່ທີ່ບໍ່ແມ່ນທາງການຂອງເອກະສານ ອັນນຶ່ງຂອງສະຫະລັດ ທີ່ບຸກຄົນຜູ້ຖືບັດນັ້ນ ສາມາດໃຊ້ເພື່ອສະແດງໃຫ້ຮູ້ວ່າ ຕົນເປັນຄົນຕ່າງດ້າວທີ່ໄດ້ເຂົ້າມາຢູ່ໃນສະຫະລັດຢ່າງຖືກຕ້ອງຕາມກົດໝາຍ. ນອກນັ້ນ ບັດນີ້ຍັງມອບໃຫ້ພວກຄົນ ທີ່ສະຫະລັດສະເໜີໃຫ້ ລີ້ໄພ ຢູ່ໃນປະເທດ ຫລືໃຫ້ການປົກປ້ອງຄຸ້ມຄອງໃນຖານະເປັນອົບພະຍົບ. ແລະບັດຂຽວ ອາດຈະມອບໃຫ້ບຸກຄົນ ທີ່ມີສະມາຊິກຄອບຄົວເປັນພົນລະເມືອງສະຫະລັດ ໄດ້ຄືກັນ. ເອກະສານນີ້ ບໍ່ແມ່ນ ຫລັກຖານຂອງການເປັນພົນລະເມືອງ. ແຕ່ມັນໝາຍຄວາມວ່າ ຜູ້ທີ່ມີບັດນີ້ ສາມາດດຳລົງຊີວິດ ແລະເຮັດວຽກ ຢູ່ໃນສະຫະລັດໄດ້. ຜູ້ທີ່ໄດ້ຮັບບັດຂຽວ ກໍສາມາດຮ້ອງຂໍບັດຂຽວໃຫ້ ພັນລະຍາ ສາມີ ແລະລູກໆໄດ້. ພົນລະເມືອງຕ່າງປະເທດ ທີ່ມີບໍລິສັດສະເໜີວຽກໃຫ້ເຮັດຢູ່ໃນສະຫະລັດ ກໍສາມາດຮ້ອງຂໍເອົາບັດຂຽວໄດ້ຄືກັນ. ໃນກໍລະນີຈັ່ງຊັ້ນ ນາຍຈ້າງຂອງຜູ້ກ່ຽວ ກໍຈະເປັນ “ຜູ້ອຸບປະຖໍາ” ລາວ.
ລັດຖະສະພາສະຫະລັດໄດ້ອະນຸມັດໃຫ້ ດຳເນີນໂຄງການວິຊ່ານີ້ ໃນປີ 1990 ເພື່ອເປັນ
ຫົນທາງນຶ່ງໃນການເພີ້ມຈຳນວນ ຊາວຕ່າງດ້າວທີ່ເຂົ້າມາຢູ່ ໃນປະເທດນີ້. ພວກທີ່ໄດ້ຮັບບັດຂຽວ ແມ່ນຖືກ ສຸ່ມ ເລືອກເອົາ ໂດຍຜ່ານການຈົກສະຫລາກ ທາງຄອມພິວເຕີ. ໂປຣແກຣມຄອມພິວເຕີອັນນີ້ ເລືອກເອົາຜູ້ຄົນ ໂດຍບໍ່ຮູ້ວ່າເຂົາເຈົ້າແມ່ນໃຜ.
ຟັງລາຍງານ ພາສາອັງກິດຊ້າໆ:
ໂຄງການນີ້ມອບບັດຂຽວ ໃນຈຳນວນ 50,000 ບັດໃນແຕ່ລະປີ ໃຫ້ແກ່ພົນລະເມືອງຂອງຫລາຍປະເທດ ທີ່ບໍ່ມີຄົນເຂົ້າມາຢູ່ໃນສະຫະລັດຫລາຍ. ປີນີ້ ກໍຄືປີກາຍນີ້ ໂຄງການ visa lottery ບໍ່ໄດ້ສະເໜີໃຫ້ຜູ້ຄົນຈາກ 19 ປະເທດ. ເຫດຜົນກໍຄືວ່າ ປະເທດເຫລົ່ານັ້ນ ມີພົນ
ລະເມືອງ ເຂົ້າມາຢູ່ໃນສະຫະລັດ ຫລາຍກ່ວາ 50,000 ຄົນ ໃນໄລຍະ 5 ປີຜ່ານມາ. ພວກ 19 ປະເທດນີ້ ມີຮວມທັງ ບຣາຊີລ ຈີນແຜ່ນດິນໃຫຍ່ ເຮຕີ ອິນເດຍ ເມັກຊິໂກ ໄນຈີເຣຍ ແລະປາກິສຖານ. ຟີລິບປິນ ເກົາຫລີໃຕ້ ກັບຫວຽດນາມ ກໍຮວມຢູ່ໃນບັນຊີນີ້ ຄືກັນ. ກະຊວງການຕ່າງປະເທດກ່າວວ່າ ສະຫະລັດມີຄົນຈາກຂົງເຂດເຫລົ່ານີ້ ເຂົ້າມາອາໄສຢູ່ ຫລາຍແລ້ວ.
ແນວໃດກໍຕາມ ບຸກຄົນນຶ່ງສາມາດສະມັກເອົາວີຊ່າ ພາຍໃຕ້ໂຄງການນີ້ໄດ້ ຖ້າຫາກວ່າຜູ້ກ່ຽວເກີດຢູ່ໃນປະເທດໃດນຶ່ງ ໃນບັນດາ 19 ປະເທດນີ້ ແຕ່ວ່າພໍ່ແລະແມ່ ບໍ່ໄດ້ເກີດແລະກໍບໍ່ໄດ້ອາໄສຢູ່ໃນປະເທດນັ້ນຢ່າງ ຖືກຕ້ອງຕາມກົດໝາຍ. ແລະສາມາດສະມັກໄດ້ເຊັ່ນກັນ ຖ້າວ່າ ສາມີຫລືພັນລະຍາ ເກີດຢູ່ໃນປະເທດນຶ່ງທີ່ພົນລະເມືອງໄດ້ຮັບອະນຸຍາດ ໃຫ້ສະມັກ.
ກະຊວງການຕ່າງປະເທດກ່າວວ່າ ຜູ້ທີ່ມີສິດສະມັກໄດ້ ຈະຕ້ອງ “ມີ ເງື່ອນໄຂ ຖືກຕ້ອງຕາມຄວາມຕ້ອງການຫລາຍໆຢ່າງ ທີ່ງ່າຍໆ ແຕ່ ເຂ້ມງວດ” ຂອງໂຄງການນີ້. ຕົວຢ່າງ ຜູ້ສະມັກຈະຕ້ອງຮຽນຈົບມັດ ທະຍົມສົມບູນ ຫລືບໍ່ກໍຕ້ອງມີປະສົບການດ້ານເຮັດວຽກມາແລ້ວ ຢ່າງນ້ອຍ 2 ປີ ໃນໄລຍະ 5 ປີຫລັງ ໃນວຽກງານທີ່ຕ້ອງໄດ້ຜ່ານການເຝິກອົບຮົມ ຢ່າງນ້ອຍ 2 ປີ.
ກະຊວງຕ່າງປະເທດເຕືອນວ່າ ຜູ້ທີ່ໄດ້ຮັບວີຊ່າ ຍັງຈະຕ້ອງມີເງື່ອນໄຂ ຖືກຕ້ອງຕາມຄວາມຕ້ອງການທັງໝົດ ຂອງກົດໝາຍສະຫະລັດ. ທາງກະຊວງກ່າວວ່າ ຄວາມຕ້ອງການເຫລົ່ານັ້ນອາດເພີ້ມລະດັບການສືບ ສວນ ແລະເວລາທີ່ຕ້ອງໃຊ້ໃນການອອກວີຊ່າ ໂດຍສະເພາະໃນກໍລະນີ ທີ່ຜູ້ກ່ຽວມາຈາກ “ພວກປະເທດທີ່ຖືກລະບຸວ່າ ເປັນລັດທີ່ອຸບປະຖຳການກໍ່ການຮ້າຍ.”
ການເຂົ້າຮ່ວມໃນໂຄງການ diversity visa lottery ນີ້ ບໍ່ເສຍເງິນ ແຕ່ວ່າຜູ້ທີ່ຖືກຄັດເລືອກ ຈະຕ້ອງເສຍຄ່າວີຊ່າແລະຄ່າໃຊ້ຈ່າຍອື່ນໆທີ່ກ່ຽວຂ້ອງ. ມີບາງຄົນທີ່ຈ້າງຄົນອື່ນໃຫ້ຊ່ວຍເຮັດໃບສະມັກ ແຕ່ກະຊວງຕ່າງປະເທດ ບໍ່ເຫັນດີນຳ. ທາງກະຊວງກ່າວວ່າ “ເຮົາຂໍຊຸກຍູ້ໃຫ້ທ່ານປະກອບເອກະສານເອງ ໂດຍບໍ່ຕ້ອງມີທີ່ປຶກສາດ້ານວີຊ່າ ຫລືບຸກຄົນອື່ນໃດ ທີ່ສະເໜີໃຫ້ການຊ່ວຍເຫລືອ.”
ຄອມພິວເຕີຈະເລືອກເອົາ ຫລາຍກ່ວາ 50,000 ຊື່ ພາຍໃນເດືອນ ພຶດສະພາ 2015. ບາດແລ້ວ ຜູ້ທີ່ຖືກເລືອກຈະໄດ້ພົບກັບພະນັກງານ ກະຊວງຕ່າງປະເທດ ເພື່ອຕອບຄຳຖາມ. ຕໍ່ໄປ ຄອມພິວເຕີຈະ ລະບຸຊື່ 50,000 ຄົນ ຈາກຈຳນວນຜູ້ທີ່ໄດ້ພົບກັບເຈົ້າໜ້າທີ່ກະຊວງ. ຈະບໍ່ມີປະເທດໃດໄດ້ຮັບວີຊ່າ ຫລາຍກ່ວາ 7 ສ່ວນຮ້ອຍຂອງຈຳນວນທັງໝົດ ທີ່ໂຄງການມອບໃຫ້ໃນແຕ່ລະປີ.
ຄວາມເປັນໄປໄດ້ໃນການຈົກສະຫລາກໄດ້ນັ້ນ ບໍ່ຄ່ອຍສູງ ເພາະວ່າມີ ຫລາຍລ້ານຄົນສະມັກໃນທຸກໆປີ. ມີ 15 ລ້ານຄົນສະມັກ ໃນປີ 2010.
ຜູ້ຈົກສະຫລາກໄດ້ ມີສິດເອົາຜົວ ຫລືເມຍ ແລະລູກທີ່ຍັງບໍ່ແຕ່ງງານ ອາຍຸຕ່ຳກ່ວາ 21 ປີ ເຂົ້າມາຢູ່ນຳໄດ້. ແຕ່ວ່າ ກ່ອນຈະໄດ້ຮັບອະນຸ ຍາດໃຫ້ເດີນທາງມາຍັງສະຫະລັດນັ້ນ ເຂົາເຈົ້າຕ້ອງພິສູດໃຫ້ເຫັນກ່ອນ ວ່າ ເຂົາເຈົ້າມີເງິນພຽງພໍທີ່ຈະລ້ຽງດູຕົນເອງໄດ້ ຫລືບໍ່ກໍຕ້ອງສະແດງໃຫ້ເຫັນວ່າ ມີຄົນທີ່ອາໄສຢູ່ໃນສະຫະລັດຢ່າງຖືກຕ້ອງຕາມກົດໝາຍ ຈະສະໜັບສະໜຸນເຂົາເຈົ້າທາງການເງິນ. ລັດຖະບານສະຫະລັດຈະບໍ່ຈ່າຍ ຄ່າເດີນທາງມາສະຫະ
ລັດໃຫ້ ທັງຈະບໍ່ຊ່ວຍເຂົາເຈົ້າຊອກຫາເຮືອນຢູ່ ຫລືວຽກການເຮັດ ແລະຈະບໍ່ໃຫ້ການດູແລຮັກສາສຸຂະພາບ.
ໂຄງການຈົກສະຫລາກເອົາວີຊ່ານີ້ ຈະອັດລົງໃນວັນທີ 3 ເດືອນພະຈິກ. ໃບສະມັກທຸກໃບຕ້ອງສົ່ງໄປທາງອອນໄລນ໌. ຄຳຮ້ອງທີ່ຂຽນເອົາ ຈະຖືກປະຕິເສດ. ຜູ້ສະມັກຈະຕ້ອງໃຫ້ຂໍ້ມູນຫລາຍໆຢ່າງ ຮວມທັງ ວັນເດືອນປີເກີດ ແລະບ່ອນເກີດ. ຜູ້ທີ່ຈົກສະຫລາກໄດ້ ຈະ ບໍ່ ໄດ້ຮັບ ຈົດໝາຍ ອີເມລ ຫລືໂທລະສັບ ແຈ້ງໃຫ້ຮູ້. ຊື່ຂອງຜູ້ຖືກເລືອກ ຈະປະກາດອອກ ທາງເວັບໄຊ້ຂອງກະຊວງຕ່າງປະເທດ ໃນລະຫວ່າງວັນທີ 5 ເດືອນພຶດສະພາ 2015 ຫາວັນທີ 30 ເດືອນມິຖຸນາ 2016.
ກະຊວງຕ່າງປະເທດໄດ້ຂຽນເອກະສານ ຍາວ 18 ໜ້າອອກມາ ເພື່ອອະທິບາຍໂຄງການວີຊ່ານີ້. ໃນເອກະສານນັ້ນ ມີກົດລະບຽບທີ່ຜູ້ສະມັກຈະຕ້ອງປະຕິບັດ ແລະມີບັນຊີຄຳຖາມ ທີ່ຖາມກັນຢູ່ເລື້ອຍໆ ແລະມີລາຍຊື່ຂອງພວກປະເທດ ທີ່ພົນລະເມືອງບໍ່ມີສິດສະມັກຂໍວີຊ່າໃນໂຄງ ການນີ້ ພ້ອມກັບຊື່ຂອງພວກປະເທດທີ່ພົນລະເມືອງສາມາດສະມັກໄດ້ ຊຶ່ງຮວມທັງປະເທດລາວນຳ.
ເວັບໄຊ້ຂອງວີໂອເອພະແນກຮຽນພາສາອັງກິດ learningenglish.voanews.com ມີລິ້ງຄ໌ເຊື່ອມຕໍ່ໃສ່ເອກະສານນີ້ ທີ່ທ່ານສາມາດເຂົ້າໄປອ່ານໄດ້ ຫລືທ່ານສາມາດເຂົ້າໄປສະມັກໄດ້ໂດຍກົງ ທີ່ເວັບໄຊ້ຂອງກະຊວງຕ່າງປະເທດສະຫະລັດ:
https://www.dvlottery.state.gov/
ໂຄງການ Diversity visa lottery ຫລື green card lottery ທີ່ເປີດໃຫ້ສະມັກປີນີ້ ແມ່ນສຳຫລັບເຂົ້າມາຢູ່ໃນສະຫະລັດ ໃນປີ 2016.
ຄຳສັບທີ່ຄວນຮູ້ ໃນລາຍງານນີ້:
lottery - ສະຫລາກກິນແບ່ງ ຈົກສະຫລາກ
asylum - ລີ້ໄພ
immigrant - ຄົນທີ່ເຂົ້າໄປອາໄສ ຢູ່ໃນປະເທດ
random - ສຸ່ມເລືອກ
identify - ລະບຸຕົໃ ຫລື ບົ່ງຊື່
Now it’s your turn to use these Words in This Story. In the comments section, write a sentence using one of these words and we will provide feedback on your use of vocabulary and grammar.
