ອົງການນິລະໂທດກຳສາກົນ ກ່າວວ່າ ສະຖະນະພາບສຳລັບສິດ ທິມະນຸດທົ່ວໂລກ ໄດ້ຊຸດໂຊມລົງໃນປີ 2015 ພ້ອມກັບລະບົບ ຕ່າງໆທີ່ໄດ້ອອກແບບມາເພື່ອປົກປ້ອງການມີສິດທິພື້ນຖານນັ້ນ ກໍໄດ້ຖືກໂຈມຕີໂດຍຫຼາຍລັດຖະບານ. ການປະເມີນຜົນໄດ້ເກີດ ຂຶ້ນໃນບົດລາຍງານປະຈຳປີຂອງອົງການນິລະໂທດ ກຳສາກົນ, ໃນຂະນະທີ່ນັກຂ່າວວີໂອເອ Henry Ridgwell ລາຍງານຈາກ ນະຄອນຫຼວງ ລອນດອນ. ພຸດທະສອນ ຈະນຳເອົາລາຍລະອຽດ ມາສະເໜີທ່ານ.
ອົງການນິລະໂທດກຳສາກົນ ກ່າວວ່າ ສົງຄາມກາງເມືອງທີ່ໂຫດຮ້າຍຢູ່ໃນ ຊີເຣຍ ຍັງຄົງເປັນ ວິກິດການທີ່ສຸກເສີນທີ່ສຸດຢູ່.
ທ່ານນາງ Tirana Hassan ຈາກອົງການນິລະໂທດກຳສາກົນ ເມື່ອບໍ່ດົນມານີ້ໄດ້ເດີນທາງ ໄປຢ້ຽມຢາມເຂດຊາຍແດນ ເທີກີ ທີ່ຕິດກັບ ຊີເຣຍ ທີ່ເມືອງ Kilis ບ່ອນທີ່ຊາວອົບພະຍົບບໍ່ມີ ທີ່ຢູ່ອາໄສກຸ່ມໃໝ່ 58,000 ຄົນ ໄດ້ເຕົ້າໂຮມກັນເພື່ອລໍຖ້າຂ້າມເຂດຊາຍແດນເຂົ້າປະເທດ ເທີກີ.
ທ່ານນາງ Tirana Hassan ກ່າວວ່າ “ໂດຍພື້ນຖານແລ້ວແມ່ນຜູ້ທີ່ໄດ້ຫຼົບໜີຈາກການໂຈມ ຕີທາງອາກາດຂອງ ກອງກຳລັງ ຣັດເຊຍ ແລະ ຊີເຣຍ ຢ່າງບໍ່ມີຄວາມປານີ ແລະ ພວກເຮົາ ໄດ້ບັນທຶກຫຼາຍກໍລະນີຂອງການໂຈມຕີທາງອາກາດຕໍ່ໂຮງຮຽນ, ຕໍ່ໂຮງໝໍ, ແລະ ຕໍ່ບ້ານ ເຮືອນຂອງພົນລະເຮືອນ. ຣັດເຊຍ ແລະ ຊີເຣຍ ແມ່ນກຳລັງເພັ່ງເລັງໃສ່ພົນລະເຮືອນ ແລະ ເປົ້າໝາຍທາງພົນລະເຮືອນ ແລະວ່າແນ່ນອນທີ່ສຸດ ແມ່ນການກໍ່ອາຊະຍາກຳສົງຄາມ.”
ປະເທດ ເທີກີ ໄດ້ປະຕິເສດທີ່ຈະເປີດດ່ານຊາຍແດນຂອງພວກເຂົາເຈົ້າ. ປະເທດດັ່ງກ່າວໄດ້ ຮັບເອົາອົບພະຍົບຈະນວນຫຼາຍກວ່າ 1 ລ້ານ 5 ແສນກວ່າຄົນແລ້ວ. ອົງການນິລະໂທດກຳ ສາກົນກ່າວວ່າ ທະວີບ ຢູໂຣບ ຕ້ອງດຳເນີນການເພີ່ມເຕີມ.
ທ່ານນາງ Tirana Hassan ກ່າວວ່າ “ຢູໂຣບ ໂດຍພື້ນຖານແລ້ວໄດ້ພະຍາຍາມທີ່ຈະເຮັດ ໃຫ້ປະເທດ ເທີກີ ເປັນທີ່ຄຸ້ມກັນເຂດຊາຍແດນຂອງພວກເຂົາເຈົ້າ, ແລະ ມັນກໍບໍ່ໄດ້ຜົນ. ຄົນຜູ້ທີ່ຢູ່ເຂດຊາຍແດນ ເທີກີ ໃນຕອນນີ້ ໝົດຫວັງຢ່າງແຮງ ແລະ ພວກເຂົາເຈົ້າກໍກຳລັງ ຊອກຫາເສັ້ນທາງ ທີ່ນຳໃຊ້ໃນການລັກລອບຂົນສົ່ງທີ່ຜິດກົດໝາຍ. ແລະ ພວກເຮົາກໍ ໄດ້ບັນທຶກຫຼາຍກໍລະນີ ບ່ອນທີ່ທະຫານຍາມເຂດຊາຍແດນ ເທີກີ ໄດ້ຍິງປືນໃສ່ພວກອົບ ພະຍົບ.”
ວິກິດການໃນປະເທດ ຊີເຣຍ ແມ່ນເກີດຂຶ້ນຢູ່ຖ້າມກາງສະຖານະການດ້ານສິດທິມະນຸດທີ່ ພວມຊຸດໂຊມລົງຢູ້ໃນທົ່ວໂລກ, ອີງຕາມການລາຍງານຫຼ້າສຸດຂອງອົງການນິລະໂທດກຳສາ ກົນ.
ທ້າວ Salil Shetty ເລຂາທິການໃຫຍ່ອົງການ ນິລະໂທດກຳສາກົນກ່າວວ່າ “ສະພາຄວາມ ໝັ້ນຄົງ ສະຫະປະຊາຊາດ ແລະ ອົງການທີ່ເອີິ້ນວ່າ ປະຊາຄົມນານາຊາດໄດ້ສືບຕໍ່ທີ່ຈະ ສັງເກດເບິ່ງຢ່າງໄຮ້ຄວາມ ຫວັງ ໃນຂະນະທີ່ ຊີເຣຍ ໄດ້ປະເຊີນໜ້າກັບການພັງລະລາຍ ຢ່າງສົມບູນ. ແຕ່ວ່າມັນບໍ່ມີພຽງແຕ່ປະເທດ ຊີເຣຍ ເທົ່ານັ້ນ. ອີຣັກ, ເຢເມນ, ລີເບຍ, ບູຣຸນ ດີ, ເກົາຫຼີເໜືອ ທັງໝົດທີ່ກ່າວມານີ້ແມ່ນຕົກຢູ່ໃນສະຖານະພາບທີ່ບໍ່ໝັ້ນຄົງເຊັ່ນກັນ.”
ຫົວໜ້າອົງການນິລະໂທດກຳສາກົນໄດ້ສືບຕໍ່ຕັກເຕືອນວ່າ ລະບົບຕ່າງໆທີ່ໄດ້ຖືກອອກແບບ ມາເພື່ອປົກປ້ອງສິດທິມະນຸດ ແມ່ນກຳລັງຖືກ ໂຈມຕີ.
ທ່ານ Salil Shetty ກ່າວວ່າ “ບັນດາປະເທດທີ່ໄດ້ລົງນາມໃນສົນທິສັນຍາອົບພະຍົບແມ່ນ ກຳລັງເຍາະເຍີ້ຍມັນຢ່າງໜ້າບໍ່ອາຍ ໃສ່ໜ້າຂອງອົບພະຍົບຫຼາຍລ້ານຄົນທີ່ກຳລັງຫຼົບໜີ ຈາກສົງຄາມ ແລະ ການບຽດບຽນ. ຫຼາຍປະເທດໃນທະວີບ ອາຟຣິກາ ໄດ້ຮ່ວມກັນ, ໂດຍ ຂົ່ມຂູ່ທີ່ຈະຍ່າງອອກຈາກສານອາຍາສາກົນ. ຢູ່ໃນລະດັບພາກພື້ນ, ລະບົບຄຸ້ມຄອງສິດທິ ມະນຸດຂອງທະວີບ ຢູໂຣບ ແມ່ນກຳລັງຕົກຢູ່ພາຍໃຕ້ໄພຂົ່ມຂູ່.”
ລາຍງານຂອງອົງການນິລະໂທດກຳສາກົນໄດ້ກ່າວເນັ້ນເຖິງຄວາມສຳເລັດ ບາງຢ່າງໃນປີ 2015 ລວມທັງການປ່ອຍຕົວນັກຂ່າວ Al Jazeera 3 ຄົນທີ່ໄດ້ຖືກກັກຂັງໃນປະເທດ ອີຈິບ, ແລະ ການເປີດການສືບສວນສອບສວນຂອງສານຍຸດຕິທຳສາກົນ ກ່ຽວກັບ ສະຖານະການ ໃນເຂດຝັ່ງຕາເວັນຕົກຂອງແມ່ນ້ຳ ຈໍແດັນ ຫຼື West Bank ແລະ ໃນເຂດ Gaza.
