ບັນດາຜູ້ລົງຄະແນນສຽງໃນອະດີດສະຫະພາບ ໂຊວຽດ, ປະເທດສາທາລະນະລັດ
ຈໍເຈຍ ໄດ້ພາກັນໄປສະຖານທີ່ປ່ອນບັດໃນວັນອາທິດມື້ນີ້ ເພື່ອໃຊ້ສິດຂອງເຂົາເຈົ້າ
ໃນການເລືອກເອົາປະທານາທິບໍດີ.
ຜູ້ລົງແຂ່ງຂັນ 25 ຄົນແມ່ນກຳລັງແຂ່ງຂັນກັນເອົາຕຳແໜ່ງດັ່ງກ່າວ. ຖ້າບໍ່ມີຄົນໃດ
ໄດ້ຮັບຄະແນນຫຼາຍກວ່າ 50 ເປີເຊັນເພື່ອຊະນະການໄດ້ເປັນປະທານາທິບໍດີນັ້ນ, ກໍ
ຈະມີການປ່ອນບັດຂັ້ນຊີ້ຂາດ ລະຫວ່າງຜູ້ລົງແຂ່ງຂັນທີ່ໄດ້ຄະແນນສູງສຸດສອງຄົນ
ເຊິ່ງຈະຖືກຈັດຂຶ້ນບໍ່ໃຫ້ກາຍວັນທີ 1 ທັນວາ.
ປະເທດທີ່ຕັ້ງຢູ່ໃກ້ກັບທະເລດຳນັ້ນ ແມ່ນກຳລັງຫັນປ່ຽນເປັນລັດຖະບານທີ່ມີຮູບແບບ
ສະພາແຫ່ງຊາດ. ການລົງຄະແນນສຽງໃນວັນອາທິດມື້ນີ້ ແລະ ອາດເປັນໄປໄດ້ວ່າ
ຈະມີການແຂ່ງຂັນຂັ້ນຊີ້ຂາດນັ້ນ ຈະເປັນຄັ້ງສຸດທ້າຍ ທີ່ປະຊາຊົນ ຈໍເຈຍ ຈະໄດ້ລົງ
ຄະແນນສຽງໂດຍກົງ ເພື່ອເລືອກເອົາປະທານາທິບໍດີ.
ປະທານາທິບໍດີຂອງ ຈໍເຈຍ ຄົນຕໍ່ໄປຈະຖືກເລືອກເອົາໃນປີ 2024 ໂດຍສະມາຊິກ
ຂອງຄະນະກຳມະການເລືອກຕັ້ງ 300 ຄົນ, ພ້ອມກັບ ນາຍົກລັດຖະມົນຕີຈະກາຍ
ເປັນນັກການເມືອງທີ່ມີອຳນາດຫຼາຍທີ່ສຸດ.
ການເລືອກຕັ້ງຂອງວັນອາທິດມື້ນີ້ ໄດ້ຖືກພິຈາລະນາວ່າ ເປັນການແຂ່ງຂັນລະຫວ່າງ
ຜູ້ສະໝັກສາມຄົນຄື ທ່ານ ຊາໂລມ ຊູຣາບິສວິລີ (Salome Surabishbili), ທ່ານ
ກຣິໂກລ ວາຊັດເຊ (Grigol Vashadze) ແລະ ທ່ານ ເດວິດ ບາຄຣັດເຊ (David Bakradze). ທັງສາມທ່ານເຄີຍເປັນລັດຖະມົນຕີການຕ່າງປະເທດ ໃນລະຫວ່າງ
ການປົກຄອງຂອງອະດີດປະທານາທິບໍດີ ທ່ານ ມິເຄລ ຊາຄາສວິລີ ທີ່ຕອນນີ້ອາໄສຢູ່
ຕ່າງປະເທດ.
