ຈາກອັຟການິສຖານ ໄປຫາ ໂບລີເວຍ ບັນດາແມ່ຍິງພາກັນ
ທ້າທາຍການຂົ່ມຂູ່ຕໍ່ຊີວິດຂອງເຂົາເຈົ້າ ແລະຕໍ່ສູ້ເພື່ອສິດທິ
ຂອງປະຊາຊົນຂອງເຂົາເຈົ້າ ໂດຍພາກັນປົກປ້ອງຄວາມສະ
ເໝີພາບທາງເພດ ເສລີພາບໃນການສະແດງອອກ ແລະສິດ
ທິຂັ້ນພື້ນຖານຂອງມະນຸດ. ນັກຂ່າວວີໂອເອ Sharon Behn
ມີລາຍງານກ່ຽວກັບແມ່ຍິງບາງຄົນ ໃນຈຳນວນ 10 ຄົນ ທີ່ໄດ້
ຮັບລາງວັນWomen of Courage Award ຫລືແມ່ຍິງແຫ່ງ
ຄວາມກ້າຫານຂອງກະຊວງການຕ່າງປະເທດສະຫະລັດ
ປະຈຳປີນີ້ ຊຶ່ງດາຣາຈະນຳເອົາລາຍລະອຽດ ມາສະເໜີທ່ານ.
ລາງວັນ Women of Courage Award ຫລື ແມ່ຍິງແຫ່ງຄວາມກ້າຫານ ຂອງລັດຖະບານສະຫະລັດ ແມ່ນໃຫ້ການຮັບຮູ້ແກ່ພວກແມ່ຍິງ ທີ່ໄດ້ສະແດງໃຫ້ເຫັນເຖິງຄວາມພິລາດອາດຫານເປັນພິເສດ ໃນຂະນະທີ່ຕໍ່ສູ້ເພື່ອສັນຕິພາບແລະຄວາມຍຸດຕິທຳ ແມ່ນແຕ່ພາຍໃຕ້ການຂົ່ມຂູ່ຂອງຄວາມຮຸນແຮງຫລືອັນຕະລາຍຕໍ່ຮ່າງກາຍ ແລະຄວາມຕາຍ. ກະຊວງການຕ່າງປະເທດສະຫະລັດມອບລາງວັນນີ້ ໃຫ້ທຸກໆປີເພື່ອສະເຫລີມສະຫລອງ ວັນແມ່ຍິງສາກົນ ຊຶ່ງຕົກຖືກວັນທີ 8 ມີນາ.
ຈາກເຂດແນວໜ້າຂອງສົງຄາມໃນປະເທດຊີເຣຍ ໄປຫາທ້ອງຖະໜົນຂອງປະເທດມຽນ
ມາ ແລະເຂົ້າໄປຮອດພາກຕາເວັນຕົກສຽງເໜືອຂອງປາກິສຖານ ແມ່ຍິງພວກນີ້ແມ່ນໄດ້
ພາກັນຕໍ່ສູ້ເພື່ອໃຫ້ມີການປ່ຽນແປງ.
Majd Chourbaji ຈາກຊີເຣຍ ໄດ້ຖືກທຳລະມານຢູ່ໃນຄຸກຂອງປະທານາທິບໍດີ Bashar
al-Assad. ບັດນີ້ ນາງຕໍ່ສູ້ເພື່ອສິດທິຂອງພວກນັກໂທດ ອິງຕາມຮອງລັດຖະມົນຕີຕ່າງ
ປະເທດ Heather Higginbottom ຜູ້ປະກາດມອບລາງວັນ.
ຮອງລັດຖະມົນຕີ Heather Higginbottom ກ່າວວ່າ “ຍ້ອນການຢືນຢັດ
ສູ້ຊົນຂອງນາງ ໃນການຕໍ່ສູ້ເພື່ອສິດທິຂອງພວກນັກໂທດການເມືອງ
ແລະຄວາມພະຍາຍາມຂອງນາງ ເພື່ອເຮັດໃຫ້ແນ່ໃຈວ່າບັນດາແມ່ຍິງ
ຊີເຣຍໄດ້ຖືກຮວມເອົາເຂົ້າ ໃນການແກ້ໄຂບັນຫາຂັດແຍ້ງຕ່າງໆຢ່າງ
ມີຄວາມໝາຍນັ້ນ ພວກເຮົາຈຶ່ງໃຫ້ກຽດທ່ານນາງ Majd Chourbaji
ໃນຖານະເປັນ ແມ່ຍິງແຫ່ງຄວາມກ້າຫານ."
ທ່ານນາງ Chourbaji ກ່າວວ່າ ພວກນັກໂທດໃນຄຸກຊີເຣຍຖືກສາດນ້ຳກົດໃສ່. ແມ່ຍິງກໍ
ຖືກຂົ່ມຂຶນສຳເລົາ. ຫລາຍໆຄົນໄດ້ເສຍຊີວິດ. ລາວເວົ້າວ່າ ລາວຍັງໄດ້ຍິນສຽງຮ້ອງກິ້ດ
ຂອງພວກເຂົາເຈົ້າ ຢູ່ໃນໃຈຂອງລາວຢູ່.
ທ່ານນາງ Chourbaji ເວົ້າວ່າ “ຜ່ານລາງວັນອັນນີ້ ຂ້າພະເຈົ້າຫວັງວ່າ
ຂ້າພະເຈົ້າຈະສາມາດຖ່າຍທອດ ສຽງຂອງຂອງພວກນັກໂທດຊີເຣຍ
ແລະພວກອົບພະຍົບຊີເຣຍ ອອກມາໃຫ້ຄົນອື່ນໄດ້ຍິນແລະຮູ້ຈັກ. ມັນ
ມີຄວາມມິດງຽບບໍ່ເອົາຫົວຊາໃນລະດັບສາກົນ ຕໍ່ການຕໍ່ສູ້ຂອງພວກ
ນັກໂທດເຫລົ່ານັ້ນ. ເຂົາເຈົ້າເປັນພວກທີ່ຖືກຫລົງລືມ.”
May Sabe Phyu ຕໍ່ສູ້ເພື່ອສິດທິຂອງແມ່ຍິງ ໃນປະເທດມຽນມາ. ລາວເວົ້າວ່າ ຢູ່ໃນ
ປະເທດຂອງລາວ ມີໜ້ອຍຄົນທີ່ຈະຍອມຮັບວ່າມີການຈຳແນກກີດກັນທາງເພດ.
ທ່ານນາງ May Sabe Phyu ເວົ້າວ່າ “ຖ້າທ່ານຍອມຮັບເອົາໃນສິ່ງທີ່
ຜູ້ຄົນຢາກໃຫ້ທ່ານຍອມຮັບເອົາ ຊີວິດຂອງທ່ານກໍຈະບໍ່ມີວັນປ່ຽນແປງ
ໄປເລີຍ. ຖ້າທ່ານຢາກເຫັນການປ່ຽນແປງ ທ່ານກໍຈະຕ້ອງໄດ້ລຸກຂຶ້ນຢືນ
ແລະສົ່ງສຽງຂອງທ່ານອອກມາດັງໆ ເພື່ອໃຫ້ການປ່ຽນແປງນັ້ນມີຂຶ້ນ.”
ຢູ່ໃນເຂດຮ່ອມພູ SWAT ໃນພາກຕາເວັນຕົກສຽງເໜືອຂອງປາກິສຖານ ບ່ອນທີ່ພວກ
ຕາລີບານຍັງເຄື່ອນໄຫວປະຕິບັດການຢູ່ ແລະສາວນ້ອຍ Malala Yousufzai ໄດ້ຖືກ
ຍິງນັ້ນ Tabassum Adnan ກໍກຳລັງນຳພາການຕໍ່ສູ້ທີ່ຄ້າຍຄືກັນນັ້ນ.
ທ່ານນາງ Adnan ກ່າວວ່າ ພວກແມ່ຍິງຕ້ອງເວົ້າອອກມາເພື່ອສິດທິຂອງຕົນເອງ ເຖິງ
ແມ່ນຈະປະເຊີນໜ້າກັບໄພຂົ່ມຂູ່ກໍຕາມ.
ທ່ານນາງ Adnan ເວົ້າວ່າ “ຂ້າພະເຈົ້າຢາກໃຫ້ບັນດາແມ່ຍິງປາກິສຖານ
ກຳຈັດຖິ້ມຄວາມຢ້ານກົວທີ່ພວກເຂົາເຈົ້າມີຢູ່. ພວກເຂົາເຈົ້າຈຳເປັນຕ້ອງ
ເວົ້າອອກມາດັງໆ. ເມື່ອໃດທີ່ແມ່ຍິງປາກິສຖານເວົ້າອອກມາດັງໆ ຍົກລະ
ດັບສຽງຂອງເຂົາເຈົ້າຂຶ້ນດັງໆແລ້ວ ພວກເຮົາກໍຈະແນ່ໃຈໄດ້ວ່າ ຮ່ວມກັນ
ພວກເຮົາຈະບັນລຸເປົ້າໝາຍ ທີ່ພວກເຮົາຈຳເປັນຕ້ອງ ບັນລຸໃຫ້ໄດ້ນັ້ນ.”
ນັກຂ່າວໜັງສືພິມ Nadia Sharmeen ທີ່ຖືກທຸບຕີຈົນເກືອບຕາຍ ຍ້ອນໄດ້ລາຍງານ
ຂ່າວກ່ຽວກັບການໂຮມຊຸມນຸມ ຂອງພວກນັບຖືສາສະໜາອິສລາມຢ່າງຮຸນແຮງເຄັ່ງຄັດ
ນັ້ນ ໄດ້ກ່າວຕາງໜ້າພວກແມ່ຍິງທັງໝົດ ທີ່ໄດ້ຮັບລາງວັນ.
ທ່ານນາງ Nadia Sharmeen ກ່າວວ່າ “ລາງວັນນີ້ເຕືອນໃຫ້ພວກເຮົາຈື່
ຈຳວ່າ ພວກເຮົາຍັງມີອີກຫລາຍສິ່ງຫລາຍຢ່າງທີ່ຈະຕ້ອງໄດ້ເຮັດ ເພື່ອ
ສັງຄົມຂອງພວກເຮົາ ເພື່ອສັນຕິພາບຂອງໂລກ ແລະແນ່ນອນ ເພື່ອສົ່ງ
ເສີມສິດທິຂອງແມ່ຍິງໃຫ້ກ້າວໄກໄປໜ້າ. ແລະສຳຫລັບການຕໍ່ສູ້ອັນ
ຍາວໄກທີ່ພວກເຮົາຈະຕ້ອງໄດ້ຜ່ານຜ່ານີ້ ແນ່ນອນ ລາງວັນອັນນີ້ແມ່ນ
ເປັນພຽງການເລີ້ມຕົ້ນ ບໍ່ແມ່ນການອາວະສານ.”
ສະຫະລັດ ຊຸກຍູ້ ການສຶກສາສຳຫລັບແມ່ຍິງ ເນື່ອງໃນວັນແມ່ຍິງສາກົນປີນີ້:
