ລິ້ງ ສຳຫລັບເຂົ້າຫາ

ວັນອາທິດ, ໑໙ ພຶດສະພາ ໒໐໒໔

ກຸ່ມເຄຶ່ອນໄຫວ FBR ນໍາເອົາ ອາສາສະມັກ ເຂົ້າໄປຊ່ວຍເຫຼືອ ໃນລັດ Kachin (ວີດີໂອ)


ພວກອົບພະຍົບເຜົ່າ Kachin ທີ່ຫຼົບໜີການສູ້ລົບ ໃນມຽນມາ ໄປສູ່ໄທ (20 ມິຖຸນາ 2011)
ພວກອົບພະຍົບເຜົ່າ Kachin ທີ່ຫຼົບໜີການສູ້ລົບ ໃນມຽນມາ ໄປສູ່ໄທ (20 ມິຖຸນາ 2011)
ຢູ່​ໃນ​ມຽນມາ ຄວາມ​ສາມາດ​ໃນ​ການ​ໄດ້​ຮັບ​ການ​ຮັກສາ​ສຸຂະພາບ
ຂອງ​ປະຊາຊົນ​ທົ່ວ​ໄປນັ້ນ ຖື​ວ່າຢູ່​ໃນ​ລະດັບ​ຕໍ່າ​ທີ່​ສຸດ​ປະ​ເທດ​ນຶ່ງ
​ໃນ​ໂລກ. ສະຖານະ​ການ​ດັ່ງກ່າວ​ນີ້ ແມ່ນ​ຮ້າຍ​ແຮງ​ເປັນ​ພິ​ເສດ ​ຢູ່
​ໃນ​ລັດ​ກະ​ຈິນ ບ່ອນ​ທີ່​ພວກກຸ່ມ​ກະບົດ​ຊົນ​ເຜົ່າ​ໄດ້​ທໍາ​ການ​ສູ້​ລົບ​ກັບ
​ລັດຖະບານ​ມຽນມາ ໃນ​ໄລຍະ​ນຶ່ງ​ປີຜ່ານມານີ້.

ກຸ່ມ​ໃຫ້ການ​ຊ່ວຍ​ເຫຼືອ​ຕ່າງ​ໆເຊັ່ນ ກຸ່ມ​ສິ້ງ​ຊອມ​ສິດທິ​ມະນຸດ Human Rights Watch ​ໄດ້ຕັກ​ເຕືອນ​ວ່າ ສະຖານະ​ການ​ດັ່ງກ່າວ​ນີ້​ກໍາລັງຄືບ​ຄານ​ ໃກ້ຈະ​ເຖິງ​ຂັ້ນ​ວິ​ກິດ​ການ​ສຸຂະພາບ​ຢູ່​ແລ້ວ ຈຶ່ງ​ບໍ່​ໜ້າ​ແປກ​ໃຈເລີຍ​ ທີ່ຄວາມ​ຕ້ອງການພະນັກງານ​ການ​ຊ່ວຍ​ເຫຼືອ​ເພີ່ມ​ຕື່ມນັ້ນ​ ແມ່ນ​ຈໍາ​ເປັນ​ທີ່​ສຸດ​ໃນ​ຂະນະ​ນີ້.

ກຸ່ມ​ເຄື່ອນ​ໄຫວ​ ເຣນ​ເຈີ້ມຽນມາເສລີ The Free Burma Rangers ຫຼື ​ເອີ້​ນຫຍໍ້​ວ່າ FBR ​ຖືກຈັດ​ຕັ້ງ​ຂຶ້ນ​ມາໃນ​ປີ 1997 ​ເພື່ອ​ຊ່ວຍ​ເຫຼືອ​ແລະ​ໃຫ້​ການເຝິກອົບລົມ​ທີ​ມງານຊົນ​ເຜົ່າ​ບັນ​ເທົາ​ທຸກ ຢູ່​ໃນ​ເຂດ​ທີ່​ເກີດ​ເສິກ​ສົງຄາມ ຂອງ​ມຽນມາ.

​ແລະເວລາ​ນີ້ ກໍ​ມີອາສາ​ສະ​ໜັກ​ຫຼາຍ​ຄົນຈາກກຸ່ມ​ FBR ​ມາ​ເຄື່ອນ​ໄຫວ​ໃຫ້ການ​ຊ່ວຍ​ເຫລືອ ຢູ່ລັດ​ກະ​ຊິນ ​ເຊ່ນ​ທ້າວ Alia ຊົນ​ເຜົ່າ​ກະຫຼ່ຽງ.​

​ ນາຍ ​ເອ​ເລຍ​ກ່າວ​ວ່າ: “ໃນ​ຖານະ​ກຸ່ມ FBR ນີ້ ພວກ​ເຮົາ​ຢາກ​ສະໜັບ ສະໜຸນ​ແລະເຝິກອົບ​ລົມ ປະຊາຊົນ​ຊາວ​ກະຈິນ ​ໃນ​ທຸກໆ​ດ້ານທີ່​ພວກ​ເຮົາ​ ຮູ້​ມາແລ້ວ ​ແລະ​ພວກ​ເຮົາ​ຢາກບອກ​ໃຫ້​ໂລກ​ຮູ້​ກ່ຽວ​ກັບ​ຄວາມ​ລະ​ກໍາ​ລໍາ​ບາກ​ຂອງ​ຊາວ​ກະ​ຈິນ ​ແລະ​ສະພາບ​ຊີວິດ​ຄວາມ​ເປັນ​ຢູ່ຂອງ​ພວກ​ເຂົາ​ເຈົ້າ ​ແລະ​ບັນຫາ​ຕ່າງໆ​ທີ່​ພວກເຂົາ​ເຈົ້າປະ​ເຊີນ​ຢູ່​ໃນ​ເວລາ​ນີ້ ວ່າມັນ​ເປັນ​ຢ່າງ​ໃດ.

​ເພື່ອ​ຊ່ວຍພວກ​ທີ່​ມາ​ຮັບ​ການ​ອົບ​ລົມທັງຫຼາຍ ຕຽມ​ຕົວຮັບ​ມື​ກັບ​ສິ່ງ​ທ້າ​ທາຍ​ນານາປະການ ຂອງ​ການປະຕິບັດ​ງານຢູ່​ໃນ​ເຂດ​ສູ້​ລົບກັນນັ້ນ ການ​ຝຶກ​ຝົນ ຂອງ​ພວກ​ອາສາ​ສະໝັກ​ ມັກ​ຈະຜັກ​ດັນ​ເຂົາ​ເຈົ້າ ​ໄປ​ຈົນ​ສຸດ​ຂີດ​.

​ແຕ່​ເລຶ່ອງນີ້ ມັນ​ບໍ່​ແມ່ນ​ເປັນເກ​ມ ຫຼື​ພາລະກິດ ຂອງສະ​ເພາະແຕ່​ພວກ​ຜູ້​ຊາຍ​ເທົ່າ​ນັ້ນ.

ແມ່ຍິງ​ຊາວ​ກະ​ຈິນ​ກຸ່ມ​ນຶ່ງ ​ກໍຍັງຂໍເຂົ້າມາ​ຮ່ວມນໍາ ​ໂດຍ​ຫວັງທີ່ຈະ​ຊ່ວຍ​ບັນທຶກ​ເກັບ​ກໍາ​ເຫດການ​ກະທໍາ​ຮຸນ​ແຮງ​ຕ່າງໆ ຕໍ່ປະຊາຊົນ​ພົນລະ​ເຮືອນ ຕາມ​ທີ່​ມີ​ລາຍ​ງານ​ຂ່າວ​ນັ້ນ. ນາງ Archa Lupa ກໍ​ເປັນ​ຜູ້​ນຶ່ງໃນ​ຈໍານວນ​ອາສາ​ສະມັກ​ແມ່ຍິງ​ກະ​ຈິນ. ນາງ​ກ່າວ​ວ່າ:

“ມັນ​ສໍາຄັນ​ທີ່​ສຸດ ທີ່​ຕ້ອງ​ເອົາ​ຄວາມ​ເປັນ​ຈິງແທ້ໃຫ້​ໄດ້. ມີ​ຂ່າວ​ລື​ກັນຫລາຍ ຢ່າງຕ່າງໆ​ນາໆ ບໍ່​ຮູ້​ວ່າ​ຂ່າວ​ລືໃດ​ຜິດຖືກກັນ​ແທ້ ດັ່ງນັ້ນຂ້ອຍ​ຢາກຮຽນ​ຮູ້ ຫຼາຍ​ຂຶ້ນ​ກ່ຽວ​ກັບ​ວິທີ​ສະໜອງ​ລາຍ​ງານຂ່າວ​ທີ່​ທ່ຽງ​ກົງນັ້ນ​ຫຼະ ທີ່​ດົນໃຈ​ໃຫ້​ຂ້ອຍ​ຢາກ​ຮຽນ​ຮູ້​ຫຼາຍ​ຂຶ້ນ.”

ສໍາລັບ​ພວກ​ຊາວ​ໜຸ່ມ​ນ້ອຍຊົນເຜົ່າ​ກະ​ຈິນແລ້ວ ການ​ຂັດ​ແຍ້​ງສູ້​ລົບ​ກັນ​ນີ້ ​ແມ່ນ​ໄດ້ກະ​ທົບ​ກະ​ເທືອ​ນຕໍ່​ຈິດ​ໃຈ​ຂອງ​ເຂົາ​ເຈົ້າຢ່າງ​ສຸ​ດ​ແສນ. ເພື່ອ​ຊ່ວຍພວກ​ເຂົາ​ເຈົ້າຮັບມື​ກັບ​ຄວາ​ມຫົດ​ຫູ່​ໃຈ​ນີ້ ກຸ່ມເຣນ​ເຈີ້ມຽນມາ​ເສລີ ຈຶ່ງ​ໄດ້​ ຕັ້ງໂຄງການ​ ທີ່​ຊື່ວ່າ the Good Life Club ຫຼື​ ສະ​ໂມ​ສອນ​ຊີວິດ​ທີ່​ຜາ​ສຸກ ຂຶ້ນມາ​ ຊຶ່ງ​ເປັນ​ໂຄ​ງການ​ນຶ່ງ ທີ່ອາສາ​ສະໝັກ Nor Thaung ​ເວົ້າວ່າ ​ພະຍາຍາມຈະ​ວຍ​ເຮັດ​ໃຫ້ຈິດ​ໃຈ​ຂອງ​ພວກ​ເດັກນ້ອຍ​ເຫຼົ່າ​ນັ້ນ​ ​ຜ່ອງ​ໃສ​ມີ​ຊີວິດ​ຊີວາຂຶ້ນ.

“ພວກ​ເດັກນ້ອຍ​ຫຼາຍໆ​ຄົນ​ມີ​ຄວາມ​ຢ້ານ​ກົວ​ ເວລາ​ພວກ​ເຂົາ​ເຈົ້າຕົກ​ຢູ່​ໃນ​ລະຫວ່າງ​ກາງການ​ສູ້​ລົບ​ກັນ ​ແລະ​ເຮັດ​ໃຫ້​ພວກ​ເຂົາ​​ເຈົ້າສະດຸ້ງ​ຕົກ​ໃຈ​ຫຼາຍ​ທີ່​ສຸດ. ​ໃນ​ຄວາມ​ຮູ້ສຶກ​ຂອງ​ພວກ​ເຂົາ​ເຈົ້າ​ແລ້ວ ພວກ​ເຂົາ​ເຈົ້າທໍ້​ແທ້​ໃຈ ​ແລະ​ຄວາມ​ນຶກຄິດ​ເຖິງ​ອະນາຄົດ​ ເຮັດ​ໃຫ້​ພວກ​ເຂົາ​ເຈົ້າຫົດ​ຫູ່​ໃຈ ຂ້ອຍ​ຢາກ​ຊ່ວຍລະບາຍ​ຄວາມ​ອຸກ​ອັ່ງຂອງ​ພວກ​ເຂົາ​ເຈົ້າ ​ແລະ​ເຮັດ​ໃຫ້​ເຂົາ​ເຈົ້າ ຮູ້ສຶກ​ດີ​ຂຶ້ນ.”

ຄະນະ​ອາສາ​ສະໝັກ​ໃໝ່​ລຸ້ນນີ້ ກໍາ​ລັງກຽມ​ທີ່​ຈະ​ອອກ​ໄປ​ປະຕິບັດ​ງານຊ່ວຍ​ເຫລືອ ໃນ​ຊ່ວງ​ເວລາທີ່​ຮ່ອງຮອຍ​ໃດໆ​ຂອງ​ສັນຍາ​ຢຸດ​ຍິງ​ໃນ​ການຂັດ​ແຍ້ງ ລະຫວ່າງພວກ​ຊົນ​ເຜົ່າ​ ຍັງຢູ່​ຫ່າງ​ໄກຫລາຍ​ນັ້ນ.

XS
SM
MD
LG