ຫຼາຍອາທິດຫຼັງຈາກລັດຖະບານທະຫານຂອງມຽນມາໄດ້ປະກາດການເກນທະຫານທົ່ວປະເທດນັ້ນ, ແມ່ຍິງໄວໜຸ່ມສອງຄົນຈາກພາກສ່ວນທີ່ຫ່າງໄກສອກຫຼີກຂອງປະເທດ ທີ່ຕັ້ງຢູ່ເອເຊຍຕາເວັນອອກສຽງໃຕ້ດັ່ງກ່າວ ໄດ້ມຸ່ງໜ້າໄປປ່າດົງເພື່ອຈັບອາວຸດຕໍ່ສູ້ກັບລັດຖະບານທະຫານ.
ສຳລັບຜູ້ຊາຍສອງຄົນອາຍຸສາມສິບປີກວ່າ ໃນສອງເມືອງທີ່ໃຫຍ່ທີ່ສຸດຂອງມຽນມານັ້ນ, ໄພຂົ່ມຂູ່ຂອງການເກນທະຫານຫຼັງຈາກການຮຽກຕົວເມື່ອເດືອນກຸມພາທີ່ຜ່ານມາ ໄດ້ເຮັດໃຫ້ເຂົາເຈົ້າປ່ຽນແປງຊີວິດຂອງພວກເຂົາ ແລະ ຫຼົບໜີໄປປະເທດ ໄທ ທີ່ຢູ່ໃກ້ຄຽງ.
ການຕັດສິນໃຈໂດຍສີ່ຄົນທີ່ວ່ານີ້ ທີ່ຈະເປັນກະບົດ ຫຼື ຫຼົບໜີໄດ້ສະແດງໃຫ້ເຫັນຄວາມວຸ້ນວາຍໃນ ມຽນມາ ໃນຂະນະທີ່ການຕໍ່ຕ້ານທະຫານ ເພີ້ມຍິ່ງຂຶ້ນໄດ້ສ້າງສິ່ງທ້າທາຍທີ່ໃຫຍ່ທີ່ສຸດໃຫ້ລັດຖະບານທະຫານ ນັບຕັ້ງແຕ່ພວກເຂົາໄດ້ຍຶດອຳນາດໃນການກໍ່ລັດຖະປະຫານ ເມື່ອປີ 2021.
ໃນການບັງຄັບໃຊ້ກົດໝາຍປີ 2010, ລັດຖະບານທະຫານ ໄດ້ກ່າວໃນເດືອນກຸມພາທີ່ຜ່ານມາວ່າ ຜູ້ຊາຍທຸກຄົນອາຍຸ 18 ຫາ 35 ປີ ແລະ ແມ່ຍິງ 18 ຫາ 27 ປີຕ້ອງຮັບໃຊ້ຊາດເປັນເວລາເຖິງ 2 ປີ, ໃນຂະນະທີ່ພວກຜູ້ຊ່ຽວຊານ ເຊັ່ນແພດໝໍ ອາຍຸເຖິງ 45 ປີ ຕ້ອງໄດ້ຮັບໃຊ້ຊາດເປັນເວລາ 3 ປີ.
ນັ້ນກໍໝາຍຄວາມວ່າ 14 ລ້ານຄົນ, ເຊິ່ງແມ່ນ 27 ເປີເຊັນຂອງປະຊາກອນ, ແມ່ນຈະຕ້ອງຖືກເກນເປັນທະຫານ, ອີງຕາມການກ່າວຂອງລັດຖະບານທະຫານ, ໂດຍເກນປະມານ 60,000 ຄົນຕໍ່ປີ. ການຄາດຄະເນຂະໜາດໃນປັດຈຸບັນຂອງກອງກຳລັງຕິດອາວຸດ, ກຸ່ມກະບົດ ຫຼື ຈຳນວນປະຊາທີ່ກຳລັງພະຍາຍາມຫຼີກລ່ຽງການເກນທະຫານນັ້ນ ອາດຈະບໍ່ຊັດເຈນ.
ລັດຖະບານແມ່ນກຳລັງຕອບໂຕ້ຕໍ່ການໂຈມຕີຂອງພວກກະບົດທີ່ໄດ້ດຳເນີນຂຶ້ນ ໃນເດືອນຕຸລາປີກາຍນີ້ ທີ່ໄດ້ກາຍເປັນໄພຂົ່ມຂູ່ທີ່ໃຫຍ່ທີ່ສຸດ ຕໍ່ລະບອບການປົກຄອງດັ່ງກ່າວ ນັບຕັ້ງແຕ່ການກໍ່ລັດຖະປະຫານທີ່ໄດ້ໂຄ່ນລົ້ມລັດຖະບານທີ່ນຳພາໂດຍພົນລະເຮືອນຜູ້ທີ່ໄດ້ຮັບລາງວັນໂນແບລ໌ ທ່ານນາງ ອອງ ຊານ ຊູ ຈີ.
ຟໍຣັມສະແດງຄວາມຄິດເຫັນ