ປະຊາຊົນລາວໃນເຂດຊົນນະບົດ ຍັງມີຊີວິດການເປັນຢູ່ທີ່ຍາກຈົນຢ່າງຍິ່ງ ແລະເສຍຊີວິດຈຳນວນຫຼາຍກວ່າ 13,300 ຄົນໃນແຕ່ລະປີຍ້ອນຄວາມທຸກຢາກ ແລະ ຂາດການບໍຣິການດ້ານສາທາລະນະສຸກທີ່ດີ.
ເຈົ້າຫນ້າທີ່ຂັ້ນສູງໃນກອງທຶນ
ຫຼຸດຜ່ອນບັນຫາທຸກຍາກແຫ່ງຊາດເປີດເຜີຍວ່າ ພາຍໃຕ້ສະພາວະບັນຫາວິກິດການເສດຖະກິດທີ່ຍັງບໍ່ສາມາດແກ້ໄຂໃຫ້ດີຂື້ນໄດ້ນັ້ນເມື່ອສົມທົບດ້ວຍໄພນໍ້າຖ້ວມທີ່ສົ່ງຜົນກະທົບຕໍ່ປະຊາຊົນລາວ 50,889 ຄອບຄົວໃນພື້ນທີ່ 1,337 ບ້ານ ຂອງ 125 ເມືອງ, ແລະເນື້ອທີ່ການຜະລິດກະສິກໍາຫຼາຍກວ່າ 30,000 ເຮັກຕາ ໄດ້ຮັບຄວາມເສຍຫາຍຢ່າງຫຼວງຫຼາຍ ກໍຄືປັດໃຈສໍາຄັນທີ່ເຮັດໃຫ້ປະຊາຊົນລາວຕ້ອງປະສົບກັບຄວາມຍາກຈົນເພີ້ມສູງຂຶ້ນຢ່າງຫຼີກລ່ຽງບໍ່ໄດ້ ໂດຍສະເພາະຢູ່ທີ່ເຂດຊົນນະບົດທີ່ຍັງປະກົດວ່າມີປະຊາຊົນຈໍານວນຫຼາຍທີ່ພົ້ນຈາກຄວາມທຸກຍາກໄປແລ້ວນັ້ນ ໄດ້ກັບຄືນສູ່ຄວາມທຸກຍາກອີກເທື່ອໃໝ່, ດັ່ງທີ່ເຈົ້າໜ້າທີ່ຂັ້ນສູງຂອງລາວໄດ້ໃຫ້ການຢືນຢັນວ່າ:
“ຫຼັງຈາກການຕິດຕາມກວດກາຢູ່ທ້ອງຖິ່ນ, ພວກຂ້າພະເຈົ້າພົບວ່າ ຄອບຄົວທີ່ຜ່ານເກນພົ້ນທຸກຈຳນວນບໍ່ໜ້ອຍມີທ່າອຽງທີ່ຈະກັບຄືນສູ່ຄວາມທຸກຍາກອີກເທື່ອໃໝ່ ສາເຫດຕົ້ນຕໍກໍແມ່ນຍ້ອນລາຍໄດ້ຂອງຄອບຄົວມັນບໍ່ໄດ້ມາຈາກຖານລາຍຮັບທີ່ໝັ້ນຄົງ ມັນເປັນຖານລາຍຮັບທີ່ບັງເອີນເປັນສ່ວນໃຫຍ່ ແລ້ວກະມີໂອກາດ ແລະມີຄວາມສ່ຽງສູງທີ່ຈະກັບຄືນສູ່ຄວາມທຸກຍາກຄືເກົ່າ ມັນຈະແຕກຕ່າງກັບຄອບຄົວທີ່ພົ້ນທຸກແລ້ວ ແຕ່ວ່າ ມີຖານການຜະລິດທີ່ຫມັ້ນຄົງ ລະແມ່ນຄອບຄົວໃດມີການປູກຢາງພາລາ 1,000 ຫາ 1,500 ຕົ້ນ. ນີ້ ກໍຖືວ່າ ເປັນຄອບຄົວທີ່ສາມາດແກ້ໄຂຄວາມທຸກຍາກໄດ້ແບບຍືນຍົງແທ້ໆ.”
ໃນປີ 2023, ໃນທົ່ວປະເທດລາວມີຄອບຄົວທີ່ພົ້ນທຸກທັ້ງໝົດ 1,260,083 ຄອບຄົວ ກວມເອົາ 83.13 ເປີເຊັນ ຂອງຄອບຄົວທັງໝົດ, ແລະ ຍັງມີ 208,231 ຄອບຄົວ ທີ່ຍັງບໍ່ທັນພົ້ນຈາກຄວາມທຸກຍາກ ກວມເອົາ 16.87 ເປີເຊັນ. ໃນນັ້ນ ມີບ້ານທີ່ພົ້ນທຸກ 5,855 ບ້ານ ກວມເອົາ 69,69 ເປີເຊັນ ແລະບ້ານທີ່ບໍ່ພົ້ນທຸກຍັງເຫຼືອ 2,547 ບ້ານ ກວມເອົາ 30,31 ເປີເຊັນຂອງຈໍານວນບ້ານທັງຫມົດໃນປະເທດ, ຫຼາຍກວ່ານັ້ນ ບັນຫາວິກິດການເສດຖະກິດການເງິນໃນລາວຍັງໄດ້ເຮັດໃຫ້ມີການຍົກຍ້າຍທີ່ຍູ່ອາໄສ ແລະທີ່ທຳກິນເປັນຈຳນວນຫຼາຍ ແລະ ໃນຂະນະດຽວກັນ ດ້ວຍຊີວິດການເປັນຢູ່ທີ່ທຸກຍາກຍ່າງຢິ່ງຂຶ້ນ ທັງຍັງບໍ່ໄດ້ຮັບການບໍລິການສາທາລະນະສຸກທີ່ດີອີກ ກໍຍັງເຮັດໃຫ້ມີການເສີຍຊີວິດຍ້ອນການເຈັບປ່ວຍຈຳນວນຫຼາຍກວ່າ 13,300 ຄົນໃນແຕ່ລະປີ, ດັ່ງເຈົ້າໜ້າທີ່ໃນກະຊວງສາທາຣະນະສຸກໄດ້ໃຫ້ການຢືນຢັນວ່າ:
“ໃນປີ 2023, ສັງລວມໄດ້ຈຳນວນພົນລະເມືອງຂອງ ສປປ.ລາວ ທັງໝົດ 7,257,000 ກວ່າຄົນ, ຍິງ 3,617,000 ກວ່າຄົນ, ໄດ້ຈົດທະບຽນ ແລະ ໄດ້ອອກໃບຢັ້ງຢືນການເກີດ 62,057 ຄົນ, ຍິງ 30,867 ຄົນ, ເສຍຊີວິດ 13,362 ຄົນ, ຍິງ 5,532 ຄົນ, ສັງລວມການຍົກຍ້າຍຂອງພົນລະເມືອງຈຳນວນ 12,712 ຄົນ , ຍິງ 6.215 ຄົນ, ແລະແກ້ໄຂການຍົກຍ້າຍທີ່ບໍ່ຖືກຕ້ອງຂອງພົນລະເມືອງຫວຽດນາມທີ່ຕັ້ງຖິ່ນຖານລຽບຕາມຊາຍແດນທາງຝັ່ງລາວ.”
ສ່ວນທ່ານ ຄຳແພງ ໄຊສົມແພງ, ເຈົ້າແຂວງໆ ຫົວພັນ ຖະແຫຼງວ່າ ການພັດທະນາທາງເສດຖະກິດ-ສັງຄົມ ຢູ່ແຂວງຫົວພັນມີຄວາມຄືບໜ້າຢ່າງຊັກຊ້າ ຍ້ອນວ່າມີຂໍ້ຈຳກັດທາງດ້ານທຶນຮອນ, ບຸກຄະລາກອນ, ວິຊາການ ແລະ ທີ່ຕັ້ງພູມສາດທີ່ພື້ນທີ່ສ່ວນຫຼາຍແມ່ນເຂດພູດອຍ. ສະນັ້ນ, ຈິ່ງເປັນອຸປະສັກຕໍ່ການຜະລິດກະສິກຳ ແລະ ການພັດທະນາໂຄງການພື້ນຖານຕ່າງໆ ຈຶ່ງໄດ້ສົ່ງຜົນກະທົບຕໍ່ການພັດທະນາເພື່ອຍົກລະດັບຄຸນນະພາບຊີວິດການເປັນຢູ່ຂອງປະຊາຊົນໃນແຂວງແບບຫຼີກລ້ຽງບໍ່ໄດ້ ເຫັນໄດ້ຈາກລວມຍອດຜະລິດຕະພັນພາຍໃນ (GDP) ທີ່ສາມາດຄິດໄລ່ເປັນລາຍຮັບສະເລ່ຍຂອງປະຊາຊົນໃນແຂວງຫົວພັນໄດ້ພຽງແຕ່ 900 ໂດລາຕໍ່ຄົນຕໍ່ປີເທ່ານັ້ນໃນປັດຈຸບັນນີ້.
ລາຍໄດ້ສະເລ່ຍຂອງປະຊາຊົນລາວໃນແຂວງຫົວພັນດັງກ່າວນີ້ ແມ່ນຕໍ່າກວ່າລາຍໄດ້ສະເລ່ຍຂອງປະຊາຊົນລາວໃນເຂດນະຄອນຫຼວງວຽງຈັນເຖິງ 2.5 ເທົ່າ, ແຕ່ວ່າ ຍ້ອນວິກິດການທາງເສດຖະກິດ ແລະສະພາວະທີ່ຄ່າເງິນກີບຕົກຕໍ່າລົງຢ່າງໜັກໜ່ວງ ຈຶ່ງໄດ້ສົ່ງຜົນກະທົບຢ່າງໜັກໜ່ວງ ແລະເຮັດໃຫ້ລາຍໄດ້ສະເລ່ຍຂອງປະຊາຊົນລາວໃນເຂດນະຄອນຫຼວງວຽງຈັນຫຼຸດລົງຈາກ 64 ລ້ານກວ່າກີບໃນປີ 2023 ເຫຼືອພຽງ 48 ລ້ານກວ່າກີບຕໍ່ຄົນ, ຫຼື 1,920 ໂດລາ ຕາມອັດຕາແລກປ່ຽນໂຕຈິງ ແລະ ເຖິງແມ່ນເສດຖະກິດຂອງນະຄອນຫຼວງວຽງຈັນ ຂະຫຍາຍຕົວ 5.7 ເປີເຊັນ ກໍຕາມ ແຕ່ວ່າ ດ້ວຍການທີ່ຄ່າເງິນກີບໄດ້ຫຼຸດລົງໄປຢ່າງຫຼວງຫຼາຍ ຈຶ່ງເຮັດໃຫ້ລາຍໄດ້ສະເລ່ຍຂອງປະຊາຊົນລາວໃນເຂດນະຄອນຫຼວງວຽງຈັນຫຼຸດລົງຫຼາຍກວ່າ 3.3 ເທົ່າ ທຽບໃສ່ປີ 2022 ອີກດ້ວຍ.
ຟໍຣັມສະແດງຄວາມຄິດເຫັນ