ລິ້ງ ສຳຫລັບເຂົ້າຫາ

ວັນອັງຄານ, ໒໗ ກຸມພາ ໒໐໒໔

ແຜນທີ່ຂອງປັກກິ່ງ ເຮັດໃຫ້ເກີດຄວາມໂກດເຄືອງ ຂອງປະເທດໃກ້ຄຽງ ດ້ວຍການອ້າງເອົາກໍາມະສິດຕໍ່ດິນແດນແບບໜ້າຕາເສີຍ


ເດັກ​ຍິງ​ອິນ​ເດຍ​ ຢືນ​ຖື​ທຸງ​ຊາດ ທີ່​​ບູມ​ລາ ເຂດ​ອາ​ຣຸນ​ນະ​ຈາ​ລປ​ຣະ​ເດັ​ສ ຊາຍ​ແດນ​ອິນ​ເດຍຕິດ​ກັບ​ຈີນ ເມື່​ອ ​ວັນ​ທີ 21 ຕຸ​ລາ 2012. ອິນ​ເດຍ​​ປ​ະ​ທ້ວງ​ ແຜນ​ທີ່​ໃໝ່​ຂອງ​ຈີນ ທີ່​ອ້າງ​ເອົາ​ກຳ​ມະ​ສິດ​ ຕໍ່​ດິນ​ແດນ​ອິນ​ເດຍ ກ່ອນກອງ​ປະ​ຊຸມ​ສຸດຍອດ​ກຸ່ມ​ຈີ 20 ທີ່​ນິວ​ເດ​ລີ. (Anupam Nath/AP)
ເດັກ​ຍິງ​ອິນ​ເດຍ​ ຢືນ​ຖື​ທຸງ​ຊາດ ທີ່​​ບູມ​ລາ ເຂດ​ອາ​ຣຸນ​ນະ​ຈາ​ລປ​ຣະ​ເດັ​ສ ຊາຍ​ແດນ​ອິນ​ເດຍຕິດ​ກັບ​ຈີນ ເມື່​ອ ​ວັນ​ທີ 21 ຕຸ​ລາ 2012. ອິນ​ເດຍ​​ປ​ະ​ທ້ວງ​ ແຜນ​ທີ່​ໃໝ່​ຂອງ​ຈີນ ທີ່​ອ້າງ​ເອົາ​ກຳ​ມະ​ສິດ​ ຕໍ່​ດິນ​ແດນ​ອິນ​ເດຍ ກ່ອນກອງ​ປະ​ຊຸມ​ສຸດຍອດ​ກຸ່ມ​ຈີ 20 ທີ່​ນິວ​ເດ​ລີ. (Anupam Nath/AP)
ຫວັງ ເຫວິນ​ບິນ

ຫວັງ ເຫວິນ​ບິນ

​ໂຄ​ສົກ​ກະ​ຊວງ​ການ​ຕ່າງ​ປະ​ເທດ​ຈີນ

“[ການ​ເປີດ​ເຜີຍ​ແຜນ​ທີ່] ແມ່ນ​ການ​ປະ​ຕິ​ບັດການແບບ​ປົກ​ກະ​ຕິ​ ໃນ​ການ​ໃຊ້​ອະ​ທິ​ປະ​ໄຕ​ຂອງ​ຈີນ ທີ່ສອດຄ່ອງກັບກົດ​ໝາຍ. ພວກ​ເຮົາ​ຫວັງ​ວ່າ​ ຝ່າຍ​ຕ່າງໆ​ທີ່​ກ່ຽວ​ຂ້ອງ​ ຈະສາ​ມາດ​ເບິ່ງບັນຫາແບບບໍ່ລໍາອຽງ​ ​ແລະ​ສະ​ຫງົບຈິດສະຫງົບໃຈໄວ້, ​ແລະ​ຫຼີກ​ລ້ຽງ​ການ​ຕີ​ຄວາມ​ໝາຍບັນ​ຫາຫລາຍຈົນເກີນໄປ.”

ພາ​ໃຫ້​ສັງ​ຄົມ​ເຂົ້າ​ໃຈ​ຜິດ

ໃນວັນ​ທີ 28 ສິງຫາຜ່ານມາ​ ປັກ​ກິ່ງ​ໄດ້ນຳ​ອອກ​ເຜີຍ​ແຜ່​ ແຜນ​ທີ່​ມາດຕະຖານ​ສະບັບ​ປີ 2023 ຊຶ່ງ​ໄດ້​ເຮັດ​ໃຫ້​ເກີດ​ການຮ້ອງໂຮຄັດຄ້ານ ໄປ​ທົ່ວຂົງເຂດ​ເອເຊຍ​ໃຕ້​ ແລະ​ເອເຊຍ​ຕາ​ເວັນ​ອອກສຽງ​ໃຕ້.

ອິນ​ເດຍ, ມາ​ເລ​ເຊຍ​ ແລະ​ຟີ​ລິບ​ປິນ​ລ້ວນ​ແຕ່​ໄດ້​ຍື່ນ​ການ​ປະ​ທ້ວງ​ທາງ​ການ​ທູດ​ກ່ຽວ​ກັບ​ອັນ​ທີ່​ຈີນ​ເວົ້າ​ວ່າ ​ການລວມເອົາ​ດິນ​ແດນຂອງຈີນ ​ຫຼື​ເຂດ​ທະ​ເລ​ຂອງ​ຕົນ​ຢູ່​ພາຍໃນ​ຊາຍ​ແດນ​ຂອງ​ຈີນ.

ໂຄສົກ​ກະຊວງ​ການ​ຕ່າງປະ​ເທດ​ຈີນ ທ່ານຫວັງ ເຫວິນບິນ (Wang Wenbin) ກ່າວ​ວ່າ ຄວາມ​ ສົນລະວົນ ​ກ່ຽວ​ກັບ​ການ​ເປີດ​ເຜີຍ​ແຜນ​ທີ່​ດັ່ງກ່າວ ​ເປັນ​ຄວາມວຸ້ນວາຍທີ່ບໍ່​ມີເລື້ອງຫຍັງ​ເລີຍ.

“[ການ​ເປີດ​ເຜີຍ​ແຜນ​ທີ່] ແມ່ນ​ການ​ປະ​ຕິ​ບັດການແບບ​ປົກ​ກະ​ຕິ​ ໃນ​ການ​ໃຊ້​ອະ​ທິ​ປະ​ໄຕ​ຂອງ​ຈີນ ທີ່ສອດຄ່ອງກັບກົດ​ໝາຍ. ພວກ​ເຮົາ​ຫວັງ​ວ່າ​ ຝ່າຍ​ຕ່າງໆ​ທີ່​ກ່ຽວ​ຂ້ອງ​ ຈະສາ​ມາດ​ເບິ່ງບັນຫາແບບບໍ່ລໍາອຽງ​ ​ແລະ​ສະ​ຫງົບຈິດສະຫງົບໃຈໄວ້, ​ແລະ​ຫຼີກ​ລ້ຽງ​ການ​ຕີ​ຄວາມ​ໝາຍບັນ​ຫາຫລາຍຈົນເກີນໄປ.”

ນັ້ນ​ແມ່ນ​ພາ​ໃຫ້​ສັງ​ຄົມ​ເຂົ້າ​ໃຈ​ຜິດ

ແຜນ​ທີ່​ນັ້ນສະ​ແດງ​ໃຫ້​ເຫັນ​ສອງ​ເຂດ​ຊາຍ​ແດນພູ​ຫິ​ມາ​ໄລ​ອັນກ້ວາງ​ໃຫຍ່ ​ທີ່​ອິນ​ເດຍ ​ແລະ​ຈີນ​ຂັດ​ແຍ່ງ​ກັນນັ້ນ ວ່າ​ເປັນ​ດິນ​ແດນ​ຂອງ​ຈີນ. ມັກແມ່ນເຂດອັກໄສ ຈີນ - ເຊິ່ງແມ່ນເຂດຕາເວັນອອກສຸດ ຂອງແຄວ້ນແຄສເມຍ ແລະສ່ວນໃຫຍ່ແມ່ນຄວບຄຸມໂດຍຈີນ - ແລະເຂດອາຣຸນາຈາລ ປຣະເດັ​ສ - ຊຶ່ງເປັນລັດໃນພາກຕາເວັນອອກສຽງເຫນືອຂອງອິນເດຍ ທີ່ນິວເດລີຄວບຄຸມເນື້ອທີ່ສ່ວນໃຫຍ່ ແຕ່ປັກກິ່ງອ້າງວ່າ ເປັນສ່ວນນຶ່ງຂອງທິເບດ.

ຈີນ​ ໄດ້​ຍຶດ​ເອົາ​ທິ​ເບ​ດ​ເຂົ້າມາຢູ່ໃນການ​ຄວບ​ຄຸມຂອງຕົນ​ໃນ​ປີ 1950 ແລະ​ກໍໄດ້ຜະໜວກ​ເອົາທິ​ເບດເປັນຂອງຕົນ​ໃນ​ປີ 1951.

ສະຫະລັດ ຮັບຮູ້ວ່າ ເຂດອາຣຸນາຈາລ ປຣະເດັ​ສ ເປັນສ່ວນນຶ່ງຂອງອິນເດຍ.

ກະ​ຊວງ​ການ​ຕ່າງ​ປະ​ເທດ​ອິນ​ເດຍ​ ກ່າວ​ວ່າ ​ຕົນ​ “ໄດ້​ສະ​ແດງ​ການ​ປະ​ທ້ວງ​ຢ່າງແຮງ​ຜ່ານ​ຊ່ອງ​ທາງ​ການ​ທູດ​ກັບ​ຝ່າຍ​ຈີນ”​ ກ່ຽວ​ກັບ​ແຜນ​ທີ່ນັ້ນ ​ໂດຍ​ກ່າວ​ຕື່ມ​ວ່າ “ການເອົາບາດກ້າວດັ່ງ​ກ່າວ​ຂອງ​ຝ່າຍ​ຈີນ​ ມີ​ແຕ່ຈະ​ເຮັດ​ໃຫ້​ການ​ຕອບຄຳ​ຖາມ​ກ່ຽວ​ກັບ​ເຂດ​ຊາຍ​ແດນ ​ສັບສົນເທົ່ານັ້ນ.”

ອິນ​ເດຍ ແລະ ຈີນ ໄດ້ຕົກຢູ່ໃນສະພາບບໍ່ໄປບໍ່ມາ ໃນເລື້ອງຂັດ​ແຍ່ງ​ທາງ​ຊາຍ​ແດນ​ທີ່​ແກ່ຍາວ​ມາໄດ້ຫຼາຍ​ທົດ​ສະ​ວັດ ຢູ່ລຽບ​ຕາມ​ອັນ​ທີ່​ເອີ້ນ​ວ່າ ເສັ້ນ​ການ​ຄວບ​ຄຸມ​ຕົວ​ຈິງ ຊຶ່ງເປັນ​ເສັ້ນ​ແບ່ງ​ເຂດແດນ​ທີ່​ຄາດຄະເນວ່າ ມີ​ປະມານ 3,500 ກິ​ໂລ​ແມັດ ​ລະ​ຫວ່າງ​ອາ​ນາ​ເຂດ​ທີ່​ຄວບ​ຄຸມ​ໂດຍ​ອິນ​ເດຍ ແລະ​ອາ​ນາ​ເຂດ​ຄວບ​ຄຸມໂດຍຈີນ ​ທີ່​ຖືກ​ແຕ້ມ​ອອກ​ມາ ​ຫຼັງ​ສົງ​ຄາມ​ປີ 1962.

ຫຼັງ​ຈາກ​ຄວາມ​ຮຸນ​ແຮງ ໄດ້ລະເບີດຂຶ້ນເປັນໄລຍະສັ້ນໆ ​ໃນ​ປີ 2020 ທີ່ສົ່ງ​ຜົນ​ໃຫ້​ມີການ​ລາຍ​ງານ​ການ​ເສຍ​ຊີ​ວິດ​ຄັ້ງ​ທຳ​ອິດ​ຢູ່ລຽບຕາມ​ເສັ້ນ​ການ​ຄວບ​ຄຸມ​ຕົວ​ຈິງ ​ນັບ​ແຕ່​ປີ 1975 ເປັນຕົ້ນມານັ້ນ, ຄວາມ​ເຄັ່ງ​ຕຶງກໍ​ໄດ້​ເກີດ​ຂຶ້ນ​ເປັນບາງຄັ້ງຄາວ​. ການ​ປະ​ທະ​ກັນ​ທີ່​ບໍ່​ເຖິງຂັ້ນ ຮຸນແຮງ​ ເກີດຂຶ້ນ​ອີກ​ຄັ້ງນຶ່ງ​ ໃນ​ເດືອນ​ທັນ​ວາ, 2022.

ໃນຊຸມປີມໍ່ໆມານີ້, ຈີນໄດ້ສ້າງບ່ອນຕັ້ງຖິ່ນຖານຂອງປະຊາຊົນຢູ່ໃນດິນແດນ ທີ່ອິນເດຍອ້າງເອົາກໍາມະສິດຢູ່ໃນຂົງເຂດນັ້ນ, ລວມທັງຢູ່ໃນອາຣຸນາຈາລ ປຣະເດັ​ສ, ອີງຕາມບົດລາຍງານຂອງທໍານຽບຫ້າແຈ ປີ 2021 ຕໍ່ລັດຖະສະພາສະຫະລັດ.

ເລື້ອງທີ່​ແຈ່ມແຈ້ງຂຶ້ນກວ່ານັ້ນ​ ຢູ່​ໃນ​ສາຍຕາ​ຂອງ​ກົດໝາຍ​ສາກົນ ກໍ​ແມ່ນ​ການ​ອ້າງ​ເອົາ​ເຂດ​ນໍ້າແດນດິນທີ່​ຈີນ​ ໄດ້​ໝາຍເອົາ​ໃນ​ແຜນ​ທີ່​ໂດຍ​ໃຊ້ການເສັ້ນ 10 ຂີດ ທີ່ກວມ​ເອົາເກືອບໝົດເຂດ​ທະ​ເລ​ຈີນ​ໃຕ້ ​ແລະ​ໄຕ້​ຫວັນ​.

ຂີດ​ຕ່າງໆ ​ກວມ​ເອົາ​ເຂດ​ທະ​ເລ​ທີ່​ຕົກ​ຢູ່​ໃນ ​ເຂດ​ເສດຖະກິດ​ສະເພາະ ຫລື EEZ ຂອງ​ຫວຽດນາມ, ຟີ​ລິບ​ປິນ, ມາ​ເລ​ເຊຍ, ບຣູ​ນາຍ ​ແລະ ອິນ​ໂດ​ເນ​ເຊຍ.

ເດີ່ນ​ບິນ​ທີ່​ສ້າງ​ໂດຍ​ຈີນ ສາ​ມາດ​ແນມ​ເຫັນ​ຢູ່​ທາງ​ຂ້າງ​ສິ່ງ​ກໍ່​ສ້າງ​ແລະ​ຕຶກ​ອາ​ຄານ ທີ່​ເກາະ​ທຽມ Mischief Reef ໃນ​ທະ​ເລ​ຈີນ​ໃຕ້ ເມື່ອ​ວັນ​ທີ 20 ມີ​ນາ 2022. (Aaron Favila/AP)
ເດີ່ນ​ບິນ​ທີ່​ສ້າງ​ໂດຍ​ຈີນ ສາ​ມາດ​ແນມ​ເຫັນ​ຢູ່​ທາງ​ຂ້າງ​ສິ່ງ​ກໍ່​ສ້າງ​ແລະ​ຕຶກ​ອາ​ຄານ ທີ່​ເກາະ​ທຽມ Mischief Reef ໃນ​ທະ​ເລ​ຈີນ​ໃຕ້ ເມື່ອ​ວັນ​ທີ 20 ມີ​ນາ 2022. (Aaron Favila/AP)

ສົນທິສັນຍາ​ຂອງ​ສະຫະ​ປະຊາ​ຊາດ ​ກ່ຽວ​ກັບ​ກົດໝາຍ​ວ່າ​ດ້ວຍ​ທະ​ເລ ​(The U.N. Convention on the Law of the Sea) ທີ່​ຈີນ​ໃຫ້​ສັດຕະຍາບັນ​ໃນ​ປີ 1996 ​ໄດ້​ຮັບ​ຮູ້​ວ່າ ເຂດ EEZ ​ເປັນ​ເຂດ​ທະ​ເລ​ຍາວ 370 ກິ​ໂລ​ແມັດ ນັບ​ຈາກ​ຝັ່ງ​ທະ​ເລ​ຂອງປະເທດນຶ່ງ​.

ໃນ​ປີ 2009, ຈີນ​ໄດ້​ອ້າງ​ເອົາກໍາມະສິດ​ເຂດ​ທະ​ເລ​ຈີນ​ໃຕ້ ແລະບ່ອນທີ່ເປັນດິນ​ໃນ​ທະເລ ນັ້ນເກືອບໝົດ.

ຟີ​ລິບ​ປິນ​ໄດ້​ທ້າ​ທາຍ​ຕໍ່​ການ​ອ້າງເອົາກໍາມະສິດຂອງ​ຈີນ ​ຢູ່​ສານ​ຕັດສິນຊີ້​ຂາດ​ສາ​ກົນ​ຢ່າງ​ຖາ​ວອນ, ແລະ​ໃນ​ປີ 2016 ສານ​ໄດ້​ພົບວ່າ ເກັນດີເປັນ​ສ່ວນ​ໃຫຍ່ກັບ​ຟີ​ລິບ​ປິນ. ຈີນ​ໄດ້​ປະຕິ​ເສດ​ຕໍ່​ຄໍາຕັດສິນ​ດັ່ງກ່າວ ​ແລະ​ສືບ​ຕໍ່​ການເເຄື່ອນໄຫວ​ແບບ​ຮຸກ​ຮານ​ຕໍ່​ຟີ​ລິບ​ປິນ.

ໃນວັນ​ທີ 5 ສິງຫາ​ນີ້, ກອງ​ທະຫານຍາມ​ຝັ່ງ​ທະ​ເລ​ຂອງຈີນ​ ໄດ້​ໃຊ້​ທໍ່ສີດນໍ້າຂະນາດ​ໃຫຍ່​ ສີດ​ໃສ່ກຳ​ປັ່ນຂອງ​ຟີ​ລິບ​ປິນ ເພື່ອໃຫ້ມັນຢຸດການສົ່ງ​ເຄື່ອງຂອງໄປ​ໃຫ້​ກຳ​ປັ່ນ​ລຳ​ນຶ່ງ​ທີ່​ຈອດ​ຢູ່ຫາດ​ ໂທມັສ ທີ​ສອງ ​ຢູ່​ໝູ່​ເກາະສແພຣດລີ ທີ່​ນອນ​ຢູ່ພາຍໃນຂອບ​ເຂດ EEZ ຂອງ​ຟີ​ລິບ​ປິນ.

ກຳ​ປັ່ນ​ໜ່ວຍ​ຍາມ​ຝັ່ງ​ຈີນ ໃຊ້​ທໍ່​ສີດ​ນ້ຳ​ຂະ​ໜາດ​ໃຫຍ່ ສີດ​ເຂົ້າ​ໃສ່​ກຳ​ປັ່ນ​ໜ່ວຍ​ຍາມ​ຝັ່ງ​ຟີ​ລິບ​ປ​ິນ ໃກ້​ເກາະ​ຫາດ Second Thomas Shoal ເມື່ອ​ວັນ​ທີ 5 ສິງ​ຫາ (Philippine Coast Guard via AP)
ກຳ​ປັ່ນ​ໜ່ວຍ​ຍາມ​ຝັ່ງ​ຈີນ ໃຊ້​ທໍ່​ສີດ​ນ້ຳ​ຂະ​ໜາດ​ໃຫຍ່ ສີດ​ເຂົ້າ​ໃສ່​ກຳ​ປັ່ນ​ໜ່ວຍ​ຍາມ​ຝັ່ງ​ຟີ​ລິບ​ປ​ິນ ໃກ້​ເກາະ​ຫາດ Second Thomas Shoal ເມື່ອ​ວັນ​ທີ 5 ສິງ​ຫາ (Philippine Coast Guard via AP)

ມັນ​ບໍ່​ແມ່ນ​ເທື່ອ​ທຳ​ອິດ ​ທີ່ ​ຈີນ​ໃຊ້​ກຳລັງ​ ເພື່ອ​ຢຸດ​ກຳ​ປັ່ນ​ຟີ​ລິບ​ປິນບໍ່ໃຫ້​ເຂົ້າ​ໃກ້ເກາະ​ຫາດນັ້ນໄດ້.

ການອ້າງເອົາກໍາມະສິດທີ່ເຮັດເປັນແຜນທີ່ດັ່ງກ່າວ ຍັງລວມມີພາກສ່ວນຕ່າງໆຂອງເຂດ EEZ ຂອງມາເລເຊຍ ໃກ້ກັບລັດ​ຊາຣາວັກ ແລະ ຊາບາ ຊຶ່ງເປັນລັດຂອງມາເລເຊຍຢູ່ເທິງເກາະບໍ​ນຽ​ວ ແລະບຣູນາຍ ຊຶ່ງນອນຢູ່ໃນລັດຊາຣາວັກ ແລະມີຊາຍແດນຕິດກັນທີ່ມີຄວາມຍາວ 161 ກິໂລແມັດ ລຽບຕາມທະເລຈີນໃຕ້.

ເຊັ່ນດຽວກັນກັບ​ຟີ​ລິບ​ປິນ ມາ​ເລ​ເຊຍຍື່ນ​ການ​ປະ​ທ້ວງ​ທາງ​ການ​ທູດ​ກ່ຽວ​ກັບ​ແຜນ​ທີ່​ຂອງ​ຈີນ.

ລັດ​ຖະ​ມົນ​ຕີ​ການ​ຕ່າງ​ປະ​ເທດອິນ​ໂດ​ເນ​ເຊຍ, ທ່ານເຣດໂນ ມາຊຸດີ ກ່າວ​ວ່າ ເສັ້ນຂີດ ແລະ ການ​ອ້າງ​ເອົາ​ເຂດ​ດິນ​ແດນ​ຕ້ອງ​ສອດ​ຄ່ອງ​ກັບ​ສົນ​ທິ​ສັນ​ຍາ​ຂອງ​ສະ​ຫະ​ປະ​ຊາ​ຊາດວ່າດ້ວຍກົດໝາຍ​ທະ​ເລ.

ຫວຽດນາມ ກ່າວ​ວ່າ ຕົນ “ຄັດຄ້ານ​ຢ່າງ​ເດັດດ່ຽວ​ ຕໍ່​ການ​ອ້າງເອົາກໍາມສິດ​ຂອງ​ຈີນ​ໃນ​ທະ​ເລ​ຈີນ​ໃຕ້​ໂດຍ​ອີງ​ຕາມ​ເສັ້ນທີ່ເປັນ​ຈຸດໆນັ້ນ.”

ໄຕ້​ຫວັນ ຊຶ່ງ​ເປັນ​ເກາະປົກຄອງ​ຕົນ​ເອງ​ທີ່​ຈີນແຜ່ນດິນ​ໃຫຍ່​ປົກຄອງ​ດ້ວຍພັກ​ຄອມ​ມິ​ວນິສຖື​ວ່າ ​ເປັນ​ແຂວງນຶ່ງ​ທີ່ແຍກອອກໄປນັ້ນ ກໍ​ໄດ້​ປະຕິ​ເສດ​ການອ້າງເອົາກໍາມະສິດ​ຂອງ​ປັກ​ກິ່ງ ເຊັ່ນກັນ.

“[ໄຕ້ຫວັນ] ບໍ່ແມ່ນສ່ວນນຶ່ງຂອງສາທາລະນະລັດປະຊາຊົນຈີນແນ່ນອນ, ນັ້ນຄືຄໍາເວົ້າຂອງ ໂຄສົກກະຊວງການຕ່າງປະເທດໄຕ້ຫວັນ, ທ່ານແຈັຟ ລີວ.

“ບໍ່​ວ່າ​ລັດຖະບານ​ຈີນ​ຈະ​ບິດ​ເບືອນ​ທ່າ​ທີຂອງຕົນ​ກ່ຽວ​ກັບ​ອະທິປະ​ໄຕ​ຂອງ​ໄຕ້​ຫວັນ​ແບບ​ໃດກໍຕາມ ແຕ່ມັນກໍ​ບໍ່​ສາມາດ​ປ່ຽນ​ແປງ​ຂໍ້ເທັດຈິງແທ້ໆ​ ຂອງ​ການເປັນ​ຢູ່​ຂອງ​ປະ​ເທດ​ພວກ​ເຮົາ​ໄດ້,” ນັ້ນຄືຄໍາເວົ້າທີ່ທ່ານ ​ກ່າວ​ຕໍ່​ກອງ​ປະຊຸມຖະ​ແຫຼງ​ຂ່າວ​.

ແຜນທີ່ດັ່ງກ່າວຍັງປາກົດສະແດງໃຫ້ເຫັນວ່າ ຈີນມີການຄວບຄຸມຢ່າງຄົບຖ້ວນຕໍ່ເກາະ ບອລຊອຍ ອັສຊຸຣີອິສກີ ຊຶ່ງຕັ້ງຢູ່ຈຸດຄົບກັນຂອງແມ່ນໍ້າອາເມີ ແລະອັສຊຸຣີ ຢູ່ໃນເຂດຊາຍແດນລະຫວ່າງເຂດຕາເວັນອອກໄກຂອງຣັດເຊຍ ແລະພາກຕາເວັນອອກສຽງເຫນືອຂອງຈີນ.

ໃນ​ປີ 2008, ຈີນ​ ແລະຣັດ​ເຊຍ​ໄດ້​ຕົກລົງ​ແບ່ງເກາະ​ດັ່ງກ່າວ ​ຫຼັງ​ຈາກມີ​ການ​ຂັດ​ແຍ້​ງກັນ​ມາ​ເປັນ​ເວລາ​ດົນ​ນານ.

ໜັງສືພິມ RBC ຂອງຣັດ​ເຊຍ ກ່າວ​ວ່າ ຕົນ​ໄດ້​ສົ່ງ​ຄຳ​ຮ້ອງໄປ​ຍັງ​ກະຊວງ​ການ​ຕ່າງປະ​ເທດຣັດ​ເຊຍ ​ເພື່ອ​ຂໍ​ຄຳ​ເຫັນ​ກ່ຽວ​ກັບ​ແຜນ​ທີ່​ດັ່ງກ່າວແຕ່​ຍັງ​ບໍ່​ທັນ​ໄດ້​ຮັບ​ຄຳ​ຕອບ​ໃນ​ເວລາທີ່​ພິມ​ຈຳໜ່າຍໜັງສືພິມນັ້ນຢູ່.

ປັກ​ກິ່ງ​ ແລະຣັດ​ເຊຍ ​ປະກາດ ​ການ​ຮ່ວມ​ມື "ແບບບໍ່​ມີ​ຂອບ​ເຂດ" ​ໃນບໍ່ເທົ່າໃດ​ອາທິດ​ກ່ອນ​ທີ່ ຣັດ​ເຊຍ​ຈະ​ບຸກລຸກຢູ​ເຄຣນ ​ແລະ​ການ​ສະໜັບສະໜູນ​ຂອງ​ຈີນ​ຖືກ ​ຖື​ວ່າ​ ມີຄວາມສຳຄັນຫລາຍ ທີ່ສຸດ​ຕໍ່​ຄວາມ​ພະຍາຍາມໃນການເຮັດ​ສົງຄາມ​ນັ້ນ.

ທ່ານມາກ ແຄັດ, ສາດສະດາຈານສອນຢູ່ໂຮງຮຽນນະໂຍບາຍ ແລະລັດຖະສາດຊາຂອງມະຫາວິທະຍາໄລຈອຣຈ໌ ເມສັນ ກ່າວຕໍ່ວາລະສານ Newsweek ວ່າ ປະທານາທິບໍດີຣັດເຊຍ, ທ່ານວລາດິເມຍ ປູຕິນ "ບໍ່ຢູ່ໃນຖານະທີ່ຈະເວົ້າຄວາມບໍ່ພໍໃຈອອກມາດັງໆ" ກ່ຽວກັບແຜນທີ່ດັັ່ງກ່າວໄດ້ ຍ້ອນການເພິ່ງພາທາງເສດຖະກິດຂອງຣັດເຊຍຕໍ່ຈີນ ຫຼັງຈາກການລົງໂທດຂອງຕາເວັນຕົກ ຍ້ອນສົງຄາມຂອງມົສກູ ເຮັດໃນຢູເຄຣນ.

ການ​ອ້າງ​ເອົາກໍາມະສິດທີ່ຂີດຢູ່​ແຜນ​ທີ່​ຂອງ​ຈີນ ​ໄດ້​ດຳ​ເນີນ​ໄປ ລຸນຫລັງກອງ​ປະ​ຊຸມ​ສຸດຍອດ BRICS (ບ​ຣາ​ຊິນ, ຣັດ​ເຊຍ, ອິນ​ເດຍ, ຈີນ ແລະ​ອາ​ຟ​ຣິ​ກາ​ໃຕ້) ທີ່​ຈັດ​ຂຶ້ນ​ຢູ່​ນະ​ຄອນໂຈແຮນແນັສເບີກ, ປະ​ເທດ​ອາ​ຟ​ຣິ​ກາ​ໃຕ້ ໃນ​ເດືອນ​ແລ້ວ​ນີ້. ປັກ​ກິ່ງ​ຫວັງ​ວ່າ​ຈະ​ນຳ​ໃຊ້ BRICS ​ເປັນນໍ້າໜັກຖ່ວງໃຫ້ມີຄວາມກໍ້າເກິ່ງ​ກັນ ກັບ​ຝ່າຍ​ຕາ​ເວັນ​ຕົກ.

ນອກນັ້ນ ​ມັນ​ຍັງ​ເກີດ​ຂຶ້ນ​ກ່ອນ​ກອງ​ປະຊຸມ​ສຸດ​ຍອດ​ຂອງກຸ່ມ 20 ປະ​ເທດ​ທີ່​ນະຄອນຫຼວງ​ນິວ​ເດ​ລີ​ຂອງ​ອິນ​ເດຍ ທີ່ກໍານົດ​ຈະ​ຈັດ​ຂຶ້ນ​ໃນ​ວັນ​ທີ 9 ຫາ​ວັນ​ທີ 10 ກັນຍາ​ນີ້ ຊຶ່ງຄາດ​ວ່າ ຜູ້ນໍາຈີນ, ທ່ານສີ ຈິ້ນຜິງ ​ຈະເຂົ້າຮ່ວມນໍາ ແລະ​ ​ກອງ​ປະຊຸມ​ສຸດ​ຍອດ​ຂອງກຸ່ມ​ປະ​ເທດ​ເອເຊຍ​ຕາ​ເວັນ​ອອກ​ສຽງ​ໃຕ້ (ອາ​ຊຽນ) ທີ່​ຈັດ​ຂຶ້ນ​ຢູ່​ນະຄອນຫຼວງ​ຈາ​ກາ​ຕາ​ຂອງ​ອິນ​ໂດ​ເນ​ເຊຍໃນວັນທີ 5-7 ກັນຍາ.

ທີ່​ມາ ພະ​ແນກ Polygraph ຂອງວີ​ໂອ​ເອ

XS
SM
MD
LG