ພວກຜູ້ນຳຂອງສະຫະພາບຢູໂຣບຫຼືອີຢູູ ໃນວັນພຸດມື້ນີ້ກຳລັງເພັ່ງເລັງໃສ່ການແບ່ງປັນ ພາລະກິດໃນອະນາຄົນໂດຍປາສະຈາກອັງກິດ ໃນຂະນະທີ່ພວກທ່ານມ້ວນທ້າຍກອງປະຊຸມສຸດຍອດ ທີ່ນະຄອນ Brussels ຫລັງຈາກອັງກິດລົງຄະແນນສຽງເພື່ອຖອນໂຕອອກຈາກກຸ່ມດັ່ງກ່າວ.
ພວກທ່ານໄດ້ຮຽກຮ້ອງໃຫ້ອັງກິດ ຖອນໂຕໂດຍໄວ ແລະບໍ່ຄາດວ່າ ຈະໄດ້ຮັບຜົນປະ ໂຫຍດໃດໆຂອງປະເທດສະມາຊິກ ໂດຍທີ່ບໍ່ໄດ້ເສຍຄ່າໃຊ້ຈ່າຍຊ່ວຍ.
ກອງປະຊຸມສຸດຍອດໃນຄັ້ງນີ້ ມີທ່າທາງວ່າຈະເປັນເທື່ອສຸດທ້າຍສຳລັບນາຍົກລັດຖະ ມົນຕີອັງກິດ ທ່ານ David Cameron ທີ່ຈະລາອອກຫຼັງຈາກລັດຖະບານຂອງທ່ານບໍ່ສາມາດຊັກຊວນໃຫ້ບັນດາຜູ້ມີສິດປ່ອນບັດເລືອກເອົາການເປັນສະມາຊິກຕໍ່ໄປໃນສະ ຫະພາບຢູໂຣບ. ໃນການຖະແຫລງ ຫຼັງຈາກການເຈລະຈາກັນແລ້ວທ່ານກ່າວວ່າ ເຖິງແມ່ນໄດ້ມີຄວາມເສຍໃຈແລະເສົ້າໂສກ ການປະຊຸມຂອງຜູ້ນຳ 28 ປະເທດໄດ້ດຳເນີນ ໄປແບບສ້າງສັນ.
ອັງກິດຄວນຊອກຫາ ແລະຢູໂຣບກໍຄວນຊອກຫາ ຄວາມສຳພັນທີ່ໃກ້ຊິດທີ່ສຸດໃນຂະ ນະທີ່ອັງກິດຖອນໂຕອອກຈາກສະຫະພາບຢູໂຣບ. ຄວາມສຳພັນທີ່ໃກ້ຊິດ ໃນເລື້ອງ ການຄ້າ ການຮ່ວມມື ແລະຄວາມໝັ້ນຄົງ.
ແຕ່ພວກຜູ້ນຳອື່ນໆເຊັ່ນປະທານາທິບໍດີຝຣັ່ງທ່ານ Francois Hollande ສົ່ງສັນຍານ ວ່າອັງກິດບໍ່ຄວນຄາດຫວັງທີ່ຈະໄດ້ຮັບການປະຕິບັດຕໍ່ແບບພິເສດໃດໆ ເວລາອັງກິດຖອນໂຕໄປແລ້ວ ຮວມທັງການເຂົ້າຫາຕະຫລາດນຶ່ງດຽວ ຂອງຢູໂຣບນຳດ້ວຍ. ທ່ານ Hollande ກ່າວວ່າ ດ້ວຍເຫດດັ່ງກ່າວນີ້ ອັງກິດຈະຕ້ອງຍອມຮັບ ການເຄື່ອນໄຫວໄປ ມາຢ່າງເສລີຂອງຜູ້ຄົນຊຶ່ງເປັນການຄັດຄ້ານຂອງພວກທີ່ປຸກລະດົມໃຫ້ອັງກິດຖອນໂຕ.
ນາຍົກລັດຖະມົນຕີເຢຍຣະມັນ ທ່ານນາງ Angela Merkel ທີ່ໄດ້ເຕືອນອັງກິດເຊັ່ນ ດຽວກັນວ່າ ອັງກິດຈະບໍ່ໄດ້ຮັບສິດພິເສດໃດໆທີ່ມາຈາກການເປັນສະມາຊິກຂອງສະ ຫະພາບຢູໂຣບໂດຍປາສະຈາກການມີພັນທະນັ້ນ.
ການປ່ອນບັດຖອນໂຕຂອງອັງກິດ ນັບແຕ່ນັ້ນມາໄດ້ກໍ່ໃຫ້ເກີດຄວາມວຸ້ນວາຍຢູ່ໃນຕະ ຫລາດການເງິນຂອງໂລກແລະມີຄວາມຢ້ານກົວຈະມີຜົນກະທົບໃນໄລຍະຍາວຕໍ່ການເຕີບໂຕ. ປະທານທະນາຄານກາງ ຂອງຢູໂຣບ ທ່ານ Mario Draghi ກ່າວໃນວັນອັງ ຄານວານນີ້ວ່າ ທະນາຄານກາງຂອງປະເທດຕ່າງໆຄວນພະຍາຍາມເຮັດນະໂຍບາຍ ການເງິນແບບໃດກັນ ເພື່ອຫລຸດຜ່ອນໃນອັນທີ່ ທ່ານເອີ້ນວ່າ ຜົນກະທົບທີ່ພາໃຫ້ເກີດຄວາມບໍ່ທຸ່ນທ່ຽງນັ້ນ.
