ການປ່ຽນແປງຜູ້ນຳຄັ້ງທຳອິດຂອງກຳປູເຈຍໃນເກືອບ 4 ທົດສະວັດ ເຮັດໃຫ້ສະຫະລັດມີໂອກາດ ໃນການຟື້ນຟູການພົວພັນກັບ ພະນົມເປັນ ຄືນໃໝ່, ນັກວິເຄາະ ແລະນັກຊ່ຽວຊານກ່າວຕໍ່ VOA ພາກພາສາຂະເໜນ ຫລັງຈາກການຢ້ຽມຢາມເມື່ອບໍ່ດົນມານີ້ຂອງນັກການທູດອາເມຣິກັນ.
ແນວໃດກໍຕາມ, ພວກເຂົາຍັງກ່າວໃນການໃຫ້ສຳພາດ ເມື່ອມໍ່ໆມານີ້ວ່າ ການທີ່ກຳປູເຈຍຖອຍຫ່າງອອກຈາກປະຊາທິປະໄຕ, ພ້ອມກັບການກ່າວອ້າງວ່າ ຈີນກຳລັງຈັດຕັ້ງກຳລັງທະຫານແຕ່ພຽງຜູ້ດຽວ ຢູ່ທີ່ຖານທັບເຮືອຫຼັກຂອງກຳປູເຈຍ, ຍັງສືບຕໍ່ເປັນອຸປະສັກທີ່ສຳຄັນ ຕໍ່ສາຍພົວພັນທີ່ມີຄວາມອົບອຸ່ນ.
ທ່ານ ເຊບາສຕຽນ ສແຕຣນຈີໂອ (Sebastian Strangio), ເປັນຜູ້ຂຽນເລື້ອງ "ທ່ານ ຮຸນ ເຊນ ຂອງກໍາປູເຈຍ," ກ່າວວ່າ ບາງສຽງໃນແວດວົງນະໂຍບາຍການຕ່າງປະເທດຂອງສະຫະລັດ ກຳລັງຕັ້ງຄໍາຖາມກ່ຽວກັບປະສິດທິພາບຂອງນະໂຍບາຍກໍາປູເຈຍໂດຍທົ່ວໄປຂອງວໍຊິງຕັນ ແມ່ນແຕ່ກ່ອນທີ່ອະດີດນາຍົກລັດຖະມົນຕີ ຮຸນ ເຊນ ຈະມອບອຳນາດໃຫ້ລູກຊາຍຂອງທ່ານ, ນາຍົກລັດຖະມົນຕີ ຮຸນ ມາເນດ, ໃນເດືອນສິງຫາ ເຊິ່ງເປັນການສິ້ນສຸດການປົກຄອງ 38 ປີຂອງຜູ້ເປັນພໍ່ຂອງທ່ານ.
“ມີການສົນທະນາກັນໃນບັນດາຜູ້ທີ່ໃຫ້ຄວາມສົນໃຈຕໍ່ເຂດເອເຊຍຕາເວັນອອກສ່ຽງໃຕ້ ວ່າ ທ່າທີ່ທາງສິນທຳຂອງນະໂຍບາຍອາເມຣິກາ ທີ່ມີຕໍ່ກຳປູເຈຍ ນັບຕັ້ງແຕ່ຕົ້ນຊຸມປີ 90 ນັ້ນ ແມ່ນລົ້ມແຫຼວໃນການບັນລຸເປົ້າໝາຍຂອງຕົນ, ໃນຂະນະດຽວກັນ ກໍເປີດຊ່ອງຫວ່າງໃຫ້ຈີນກ້າວເຂົ້າມາ ໃນຖານະຜູ້ມີບຸນຄຸນ ແລະຜູ້ອຸປະຖຳຂອງ ທ່ານ ຮຸນ ເຊນ, ແລະຈຳເປັນຕ້ອງມີການປ່່ຽນແປງຈຸດເນັ້ນໜັກບາງຢ່າງ,” ທ່ານກ່າວໃນລະຫວ່າງການໃຫ້ສໍາພາດກັບວີໂອເອ ພາສາຂະເໜນ ໃນວັນທີ 28 ມີນາທີ່ຜ່ານມາ.
ທ່ານ ສແຕຣນຈີໂອ (Strangio) ບັນຍາຍເຖິງຄວາມເຄັ່ງຕຶງລະຫວ່າງບັນດານັກວິຈານທ່ານຮຸນ ເຊນ ທີ່ຢູ່ແຖວໜ້າ ໃນລັດຖະສະພາ ຜູ້ທີ່ຕ້ອງການໃຫ້ສິດທິມະນຸດ ແລະ ປະຊາທິປະໄຕ ເປັນນະໂຍບາຍຫຼັກຂອງນະໂຍບາຍກຳປູເຈຍ, ແລະ ບຸກຄົນສຳຄັນ ໃນກະຊວງການຕ່າງປະເທດ ທີ່ເຕັມໃຈຈະເສຍສະຫຼະຫຼັກການ ເພື່ອໃຫ້ມີອິດທິພົນຫຼາຍຂຶ້ນໃນພະນົມເປັນ.
ຟໍຣັມສະແດງຄວາມຄິດເຫັນ