ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ມີການຄົ້ນພົບຢາໃໝ່ ສຳຫລັບປົວ ໂຣກຕັບອັກເສບຊ້ຳເຮື້ອ ແຕ່ລາຄາຍັງແພງຫລາຍ (ວີດີໂອ ພາສາລາວ)


ແພດຍິງກຳລັງສັກຢາ ວັກຊີນ ຕໍ່ຕ້ານພະຍາດຕັບອັກເສບ ໃຫ້ແກ່ເດັກນ້ອຍຄົນນຶ່ງ ເປັນການປ້ອງກັນໂຣກ ຢູ່ໃນເມືອງ Constitucion ປະເທດ Chile.
ແພດຍິງກຳລັງສັກຢາ ວັກຊີນ ຕໍ່ຕ້ານພະຍາດຕັບອັກເສບ ໃຫ້ແກ່ເດັກນ້ອຍຄົນນຶ່ງ ເປັນການປ້ອງກັນໂຣກ ຢູ່ໃນເມືອງ Constitucion ປະເທດ Chile.

ອົງການ​ອະນາ​ໄມ​ໂລກ ຫຼື ​WHO ລາຍ​ງານ​ວ່າ ​ໂຣ​ກ​ຕັບ​ອັກ​ເສບ
ທີ່​ເກີດ​ຈາກ​ເຊື້ອ​ໄວຣັສສະ​ເພາະ​ ຊຶ່ງເອົາ​ຊີວິດຄົນ ​ເກືອບ 1 ລ້ານ
5 ​ແສນ​ຄົນ​ໃນ​ປີ​ນຶ່ງໆ​ນັ້ນ ອາດສາ​ມາດ​ກຳຈັດ​ໄດ້. ​ໃນ​ຄຳ​ຖະ​ແຫຼງ​
ເນື່ອງ​ໃນ​ວັນ ພະຍາດ​ຕັບ​ອັກ​ເສບ​ໂລກ ຫຼື World Hepatitis
Day ກົງ​ກັບ​ວັນ​ທີ 28 ກໍລະກົດ​ທີ່​ຜ່ານ​ມາ​ນີ້ WHO ກ່າວ​ວ່າ ການ
​ດຳ​ເນີນຄວາມ​ພະຍາຍາມ ທຳການທົດ​ລອງ​ຢ່າງ​ຂຸ້ນຂ້ຽວ​ຂຶ້ນ
ພ້ອມກັນ​ກັບການ​ປ້ອງ​ກັນ ​ແລະປິ່ນ​ປົວ ​ແມ່ນ​ສຳ​ຄັນຕໍ່ການ​ຮັບ​ມື​
ກັບ​ໂຣ​ກ​ນີ້ ຊຶ່ງ​ຮວມຢູ່​ໃນ​ຈຳພວກ​ພະຍາດ​ ທີ່​ອັນຕະລາຍ​ ທີ່​ສຸດ​
ຂອງໂລກ. ຜູ້​ສື່​ຂ່າວວີ​ໂອ​ເອ Lisa Schlein ມີ​ລາຍ​ງານ​ຈາກ​ສຳ
ນັກງານ​ໃຫຍ່​ຂອງອົງການ​ອະນາ​ໄມ​ໂລກ ຊຶ່ງ ​ໄຊ​ຈະ​ເລີ​ນສຸກ ຈະ​
ນຳມາສະ​ເໜີ​ທ່ານໃນ​ອັນ​ດັບ​ຕໍ່​ໄປ.

ໂຣກ​ຕັບ​ອັກ​ເສບ ຫຼື hepatitis ຖື​ວ່າເປັນ​ພະຍາດ​ທີ່ພະຍາດ​ທີ່​ຖືກ​ຫຼົງ ລືມ​ເປັນສ່ວນ​ໃຫຍ່. ມັນ​ອາດ​ຈະເປັນ​ເລື້ອງ​ ທີ່ໜ້າ​ແປກ​ໃຈ ​ເພາະວ່າ​ ໂຣກທີ່ອັນຕະລາຍ​ ແລະ​ ຕິດ​ແປດ​ກັນ​ໄດ້ ງ່າຍ​ໂຣກນີ້ ທີ່​ມີ​ຫຼາຍປະ​ເພດ ​ແລະ​ ແຕ່ລະ​ປະ​ເພດ​ ມີ​ຊື່​ເປັນຕົວອັກສອນປະ​ເພດ ເຊັ່ນ ຕັບອັກ​ເສບ A B C D ​ແລະ E ນັ້ນ ​ໄດ້ເອົາ​ຊີວິດ​ຜູ້​ຄົນ​ ເປັນ​ຈຳນວນ ​ຫຼວງຫຼາຍ ເກືອບ​ເທົ່າກັນກັບ​ໂຣກ HIV/AIDS. ພະຍາດ​ຕັບ​ອັກ​ເສບ B ​ແລະ C ເປັນ​ທີ່​ຮູ້ຈັກ​ກັນ​ດີ​ສຸດ ​ແລະ ຢ້ານກົວກັນຫຼາຍ ​ເພາະວ່າ​ພວກ​ມັນ​ເຮັດ​ໃຫ້ເປັນ​ໂຣກຕັບ​ແຂງຊ້ຳ​ເຮື້ອ ​ແລະ ກາຍ​ເປັນມະ​ເຮັງໄດ້ ​ໂດຍ​ສ່ວນຫຼາຍ ມັກ​ຈະ​ນຳ​ໄປ​ສູ່​ການ​ເສຍ​ຊີວິດ.

ພະຍາດຕັບອັກເສບ B ​ແມ່ນ​ຕິດ​ແປດຈາກແມ່ຜູ້ທີ່​ເປັນ​ໂຣກນີ້ ໄປຫາລູກເກີດໃໝ່​ໄດ້ ຫຼືຕິດ
​ແປດ​ຈາກ​ຄົນ​ນຶ່ງ​ໄປ​ຫາ​ອີກ​ຄົນ​ນຶ່ງ ຜ່ານການສຳຜັດກັບເລືອດທີ່ມີເຊື້ອພະຍາດນີ້ຢູ່​ແລ້ວ
ແລະ ການມີເພດສຳພັນ ໂດຍບໍ່ປ້ອງກັນຕົນ​ເອງ. ພວກຕິດຢາເສບຕິດ ທີ່ໃຊ້ເຂັມສັກຢາ
ເສບຕິດ​ໃສ່ນັ້ນ ແມ່ນເປັນພວກ ທີ່ມີຄວາມສ່ຽງສູງທີ່ສຸດ ຕໍ່​ການ​ຕິດພະຍາດ​ຕັບອັກເສບ
ປະ​ເພດ C ​ເພາະວ່າມັນແຜ່ຜາຍອອກ​ໄປ ຜ່ານ​ການ​ໃຊ້ເຂັມ ທີ່ບໍ່ປອດໄພ ຮ່ວມກັນ.

ທ່ານ Samuel So ​ເປັນໝໍຜ່າຕັດປ່ຽນຕັບ ຢູ່ມະຫາວິທະຍາໄລ ສະແຕນ​ເຝີດ ຫຼື Stanford University ໃນສະຫະລັດ. ທ່ານກ່າວ ວ່າ ການປ້ອງກັນ ແມ່ນເປັນວິທີຮັກສາ ທີ່ດີທີ່ສຸດ ສຳຫຼັບໂຣກມະເຮັງຕັບ ​ເພາະວ່າ​ ມັນ​ບໍ່ມີການປິ່ນປົວດ້ວຍ​ເຄມີບຳບັດອັນ​ໃດ ​ທີ່ໃຊ້​ໄດ້ຜົນ ກັບພະຍາດນີ້ ຊຶ່ງ​ເປັນສາ​ເຫດ​ອັນ​ດັບສອງ ຂອງການເສຍຊີວິດຍ້ອນໂຣກມະເຮັງ ຫຼັງຈາກ ພະຍາດມະເຮັງໃນປອດ.

​ແຕ່ເຖິງຈະເປັນແນວນັ້ນກໍຕາມ ດອກເຕີ້ ໂສ ກ່າວວ່າ ​ເຮົາສາມາດ ເອົາຊະນະ ພະຍາດຕິດ
ແປດຕັບອັກເສບນີ້ໄດ້ ຊຶ່ງ​ເປັນຄຳເຫັນ ທີ່​ໄດ້ຮັບ​ການຢືນຢັນໂດຍບັນດາລັດຖະມົນຕີວ່າ ການ ກະຊວງສາທາລະ​ນະ​ສຸກ ຜູ້ທີ່ໄດ້ເຂົ້າຮ່ວມກອງປະຊຸມອະນາ​ໄມໂລກ ຫຼື World Health Assembly ປະຈຳປີນີ້. ດອກເຕີ້ ໂສ ໄດ້ຮຽກຮ້ອງ​ໃຫ້ປະເທດທັງ ຫຼາຍ ຈົ່ງ​ເພີ້ມ ທະວີກິດຈະກຳຕ່າງໆຂຶ້ນ ນະບັດນີ້ ເພື່ອກຳຈັດພວກພະຍາດ ທີ່ອັນຕະລາຍເຖິງແກ່ຄວາມ ຕາຍເຫຼົ່ານີ້.

ດອກເຕີ້ ໂສ ເວົ້າວ່າ “ພວກເຮົາມີຢາວັກຊີນ ທີ່ມີປະສິດທິພາບຫຼາຍ ສຳຫລັບ 30 ປີ
ຕໍ່ໄປ ເພື່ອປ້ອງກັນພາລະ​ແບກ​ຫາບໃນອະນາຄົດຂອງ ພະຍາດຕັບອັກເສບ B
​ເພື່ອ​ບໍ່​ໃຫ້​ມັນ​ກາຍ​ມາ​ເປັນ​ໂຣກຕັບ​ອັກ​ເສບ​ຊ້ຳ​ເຮື້ອ ແລະເປັນຕັບແຂງໃນ​ເວລາຕໍ່
ໄປ ແລະ ໃນທີ່ສຸດ ກໍ​ເປັນມະເຮັງ ຕັບ…ນອກຈາກນັ້ນແລ້ວ ດຽວນີ້ ກໍຍັງມີຢາ
ຫຼາຍໆຢ່າງ ທີ່​ໄດ້ຜົນ​ຫຼາຍ ​ໃນການຮັກສາພະຍາດຕັບອັກເສບ B ທີ່ຊ້ຳເຮື້ອ ຊຶ່ງ
ມັນເປັນຢາທີ່ກິນ ມື້ລະເມັດແບບງ່າຍໆ ແລະຄືກັນກັບ HIV ​ເຮົາສາມາດ ປ້ອງກັນ
ການຂະຫຍາຍຕົວຂອງພະຍາດ ໄປ​ເປັນຕັບແຂງແລະມະເຮັງໃນຕັບໄດ້.”

ອົງການອະນາໄມໂລກ ຫຼື WHO ລາຍງານວ່າ ມີຄົນ ຈຳນວນຫຼາຍກວ່າ 500 ລ້ານຄົນໃນ
ທົ່ວໂລກ ທີ່ດຳລົງຊີວິດຢູ່ກັບ ພະຍາດຕັບອັກເສບຊ້ຳເຮື້ອທີ່ຕິດແປດກັນໄດ້ງ່າຍນັ້ນ. ປະ
ມານ 2 ສ່ວນ 3 ຂອງ ການເສຍຊີວິດໃນທົ່ວໂລກ ແມ່ນເກີດຢູ່ພາກພື້ນເອເຊຍ. ເຊື້ອໄວຣັສ
ຂອງພະຍາດຕັບ​ອັກ​ເສບ​ນີ້ ຍັງແຜ່ລາມໂດຍທົ່ວໄປບັນດາປະເທດໃນ ອາຟຣິກາ.

ພວກຄົນສ່ວນຫຼາຍທີ່​ມີ​ພະຍາດຕັບອັກເສບ ບໍ່ຮູ້ວ່າຕົນໄດ້ຕິດພະຍາດ ນີ້​ແລ້ວ. ອາການ ຕ່າງໆ ໂດຍທົ່ວໄປ​ແລ້ວ ຈະເກີດຂຶ້ນຫຼາຍສິບ​ປີຕໍ່ມາ ຫຼັງຈາກພະຍາດຕັບ ອັນຮ້າຍແຮງນີ້
ໄດ້ກໍ່​ຕົວຂຶ້ນມາແລ້ວ. ດ້ວຍເຫດນີ້ WHO ຈຶ່ງຊຸກຍູ້ບັນດາລັດຖະບານ ໃຫ້ລົງທຶນໃສ່ມາດ
ຕະການປ້ອງກັນ ຕ່າງໆ ທີ່ມີປະສິດທິພາບ.

ຢ່າງໃດກໍຕາມ ຫົວໜ້າໂຄງການພະຍາດຕັບອັກເສບ​ໃນ​ທົ່ວ​ໂລກ ຂອງ WHO ທ່ານ Stefan Wiktor ກ່າວວ່າ ພວກຄົນເຫຼົ່ານັ້ນ ມີເຫດຜົນ ທີ່ຈະເບິ່ງໂລກໃນແງ່ດີ​ໄດ້ ​ເພາະວ່າ​ກຳລັງມີການ​ທຳຄວາມກ້າວໜ້າ ຢ່າງໃຫຍ່ຫລວງ ໃນດ້ານວິທີການປິ່ນປົວແບບໃໝ່ໆ.

ທ່ານ Wiktor ເວົ້າວ່າ “ສ່ວນ​ໃຫຍ່​ຂອງຄວາມຕື່ນເຕັ້ນ ທີ່ມີ​ຂຶ້ນ​ເມື່ືອ ບໍ່ດົນມານີ້ ​ກ່ຽວ​
ກັບພະຍາດຕັບອັກເສບນັ້ນ ແມ່ນຍ້ອນການປະຕິວັດ​ໃນ​ດ້ານວິທີການຮັກສາ ​ໂຣກ
ຕັບອັກເສບປະ​ເພດ C. ພວກເຮົາມີຢາ ໃໝ່ໆ ຈຳນວນນຶ່ງ ທີ່ໄດ້ຮັບການອະນຸມັດ​
ໃຫ້​ໃຊ້​ແລ້ວ ຫຼືມີອີກຫຼາຍທີ່ ກຳລັງຈະໄດ້ຮັບການອະນຸມັດເຊັ່ນກັນ ຊຶ່ງເວົ້າແທ້​ໆ
ແລ້ວ ​ແມ່ນເປັນການປະຕິວັດ​ ໃນວິທີການ ທີ່ພວກເຮົາຮັກສາ​ ໂຣກຕັບອັກເສບນີ້.
ຄືມັນຕັດລະຍະ​ເວລາ ການຮັກສາ ລົງມາ​ເຫຼືອພຽງແຕ່ 12 ອາທິດເທົ່ານັ້ນ ແລະ
ອາດຈະ​ໃຊ້​ເວລາສັ້ນກ່ວາ​ນັ້ນ ອີກກໍ​ໄດ້ ໃນອະນາຄົດ. ​ແລະ​ກໍ​ບໍ່​ຕ້ອງ​ໄດ້ສັກຢາ
ອີກແລ້ວ. ພວກຢາເຫຼົ່ານີ້ ປອດໄພ ແລະຮັກສາເກືອບ ໝົດທຸກຄົນໄດ້ ຄືຮັກ​ສາ​ໃຫ້​
ເຊົາ​ໄດ້​ເຖິງ 90 ຫາ 95 ສ່ວນຮ້ອຍຂອງ ພວກ​ຄົນ​ທີ່​ເປັນ​ໂຣກນີ້.”

ແຕ່ບັນຫາແມ່ນເງິນ. ພວກຄົນເຈັບໃນສະຫະລັດ ຕ້ອງຈ່າຍເງິນ​ເປັນ ຈຳນວນ 84,000 ດອລລ່າ ສຳຫລັບການ​ຮັກສາ​ດ້ວຍ​ການ​ກິນ​ຢາ​ນີ້ ​ເປັນ​ເວລາ 12 ອາທິດ. ທ່ານ Wiktor ເຫັນພ້ອມນຳ ທີ່ວ່າ ລາຄານີ້​ແມ່ນ​ແພງ​ເກີນ​ກ່ວາ​ທີ່​ຈະ​ຈ່າຍ​ໄດ້ ສຳ​ຫຼັບຄົນສ່ວນຫຼາຍ ໃນ
ໂລກນີ້ ໂດຍສະເພາະຢູ່ໃນບັນດາປະເທດ ພວມພັດທະນາ. ​ແຕ່ທ່ານກ່າວວ່າ ທ່ານຄາດວ່າ
ລາຄາຈະຫຼຸດລົງມາຢ່າງໄວວາ.

ທ່ານ Wiktor ໃຫ້ຂໍ້ສັງເກດວ່າ ພຽງ​ເມື່ອເດືອນມິຖຸນາ​ຜ່ານ​ມານີ້ ປະ​ເທດອີຈິບ ໄດ້ເຈລະຈາ​
ເຮັດຂໍ້ຕົກລົງ ກັບບໍລິສັດຜູ້ຜະລິດຢາໃໝ່ນີ້ ເພື່ອຮັບເອົາຢາມາ ໃນລາຄາພຽງ 900 ດອລລ່າ
ຕໍ່ການ​ຮັກສາ ຄົນເຈັບຜູ້ນຶ່ງ ​ເປັນ​ເວລາ 12 ອາທິດນັ້ນ. ຢາ​ໃໝ່​ທີ່​ວ່າ​ນີ້ ຊື່ຢາ​ ​ໂຊ​ຟົສບູ​ເວ​ຍ
(sofosbuvir) ຜະລິດ​ໂດ​ຍບໍລິສັດ ກິລ​ລີ​ແອດ (Gilead).

ເບິ່ງວີດີໂອ ພາສາລາວ ກ່ຽວກັບການທົດລອງໃຊ້ ຢາ sofosbuvir:

XS
SM
MD
LG