ລິ້ງ ສຳຫລັບເຂົ້າຫາ

ວັນອັງຄານ, ໑໙ ມີນາ ໒໐໒໔

ຜົນການເລືອກຕັ້ງ ໃນສະຫະລັດ ຈະມີຜົນກະທົບຢ່າງໃດ ຕໍ່ເສດຖະກິດໂລກ? (ວີດີໂອ)


ລິງໂດຍກົງ

ເບິ່ງວີດີໂອລາຍງານນີ້ ເປັນພາສາອັງກິດ

​ແມ່ນ​ແຕ່ໃນຂະນະທີ່ ພາກ​ພື້ນ​ຢູ​ໂຣບກໍາລັງ​ປະ​ເຊີນ​ກັບ​ວິກິດ​ການ​ໜີ້​ສິນ ​ທີ່​ຂົ່ມຂູ່​ໄປ​ທົ່ວ​ຂົງ​ເຂດ ​ແລະ​ຈີນກໍ​ພະຍາຍາມຖ່ວງ​ການ​ເຕີບ​ໂຕ​ຂອງເສດ ຖະກິດ ທີ່​ກໍາລັງ​ຊັກ​ຊ້າ​ລົງ​ຢູ່​ໃນເວລານີ້ ​ການ​ເລືອກ​ຕັ້ງ​ຂອງ​ສະຫະລັດກໍກໍາລັງເປັນຫົວ​ຂໍ້​ຂ່າວ​ໃຫຍ່​ຢູ່​ທົ່ວໂລກ. ຄືຊາວ​ໂລກ​ຢາກ​ຮູ້​ວ່າ ຊາວ​ອະ​ເມຣິກັນຈະ​ເລືອກ​ເອົາ​ໃຜ​ເປັນ​ຜູ້​ນໍາຄົນ​ໃໝ່​ຂອງ​ພວກ​ເຂົາ​ເຈົ້າ. ຍ້ອນ​ວ່າ ຕາມທີ່ຜູ້​ສື່​ຂ່າວ​ວີ​ໂອ​ເອ Mil Arcega ລາຍງານ​ນັ້ນ ກໍແມ່ນວ່າ ຜູ້​ໃດ​ກໍ​ຕາມ​ທີ່​ຊະນະ​ການ​ເລືອກຕັ້ງໃນ​ມື້ນີ້ ແມ່ນຈະ​ຄວບ​ຄຸມກະ​ເປົ໋າ​ເງິນ​ທີ່​ໃຫຍ່​ທີ່​ສຸດ​ໃນ​ໂລກ ​ແລະ ພ້ອມ​ດຽວ​ກັນ ກໍມີ​ຄວາມ​ສາມາດ​ທີ່​ຈະ​ນໍາພາ​ເສດຖະກິດໂລກ​ໄດ້.

ຖ້າ​ຜົນ​ການ​ຢັ່ງ​ຫາງ​ສຽງ​ມະ​ຫາ​ຊົນ​ຖືກຕ້ອງ ການ​ເລືອກຕັ້ງ​ປີ 2012 ​ແມ່ນ​ຈະ​ຖືກ​ຕັດສິນ​ ໂດ​ຍຄະ​ແນນ​ສຽງ​ສໍາຄັນ​ບໍ່​ເທົ່າ​ໃດ​ສຽງ ​ຢູ່​ໃນ​ບັນດາ​ລັດ​ທີ່ມີ ການ​ແຂ່ງຂັນ​ກັນຢ່າງດຸເດືອດ​ ເພາະຜູ້ສະມັກເລືອກຕັ້ງມີຄະແນນສູສີກັນ. ​ແຕ່​ ທ່ານ Bruce Stokes ປະ​ຈໍາ​ສູນ​ກາງ​ຄົ້ນຄວ້າ Pew ກ່າວ​ວ່າ ແທນທີ່ຈະ​ພຽງ​ເປັນການ​ປ່ອນ​ບັດ​ພາຍ​ໃນ​ປະ​ເທດ​ເທົ່າ​ນັ້ນ ການ​ເລືອກ​ຕັ້ງ​ໃນ​ສະຫະລັດ​ຄັ້ງ​ນີ້ ຈະມີ​ຜົນ​ກະທົບຕໍ່​ທົ່ວ​ໂລກ​.

ທ່ານ ສະ​ໂຕ໊ກ ​ເວົ້າ​ວ່າ“ແນ່​ນອນ​ທີ່​ສຸດ ຊາວ​ອະ​ເມ​ຣິກັນກໍ​ຕ້ອງ​ພາກັນ​ອອກ​ໄປ​ປ່ອນ​ບັດໃນ​ການ​ເລືອກ​ຕັ້ງ​ຄັ້ງ​ນີ້ ​ແຕ່​ທົ່ວ​ທັງ​ໂລກ​ຈະ​ຕ້ອງ​ຮັບ​ມື ກັບ​ຜົນ​ທີ່​ຈະ​ຕາມ​ມາ.”

ສະຫະລັດ​ມີ​ຜະລິດ​ຕະພັນ​ລວມພາ​ຍ​ໃນປະເທດ ຫຼື GDP ທີ່ທຽບ​ເທົ່າກັບ​ປະມານ​ນຶ່ງ​ສ່ວນ​ສີ່​ຂອງ​ຜະລິດ​ຕະພັນ​ລວມທັງ​ໝົດ​ຂອງ​ໂລກ ຊຶ່ງ​ບໍ່​ມີ​ປະ​ເທດ​ໃດ​ທີ່​ຈະ​ມີ​ເສດຖະກິດ​ທີ່​ໃຫຍ່​ໄປ​ກວ່າ​ນີ້. ຄໍາເວົ້າທີ່ເວົ້າກັນຢູ່ເລື້ອຍໆ ໃນ​ກຸ່ມນັກ​ເສດຖະສາດ​ທັງຫຼາຍ​ນັ້ນ ກໍ​ຄື​ວ່າ​ ເວລາສະຫະລັດ​ຈາມອອກ​ມາ​ເຂດ​ອື່ນໆ​ຂອງ​ໂລກ​ກໍຈະ​ມີ​ອາການ​ເປັນ​ຫວັດ​ເປັນ​ໄຂ້​ ໄປ​ຕາມໆ​ກັນ.

Desmond Lachman ​ເປັນຊ່ຽວຊານຝ່າຍເສດຖະກິດມະຫາ​ພາກ​ປະ​ຈໍາ​ສະ​ຖາ​ບັນ​ວິ​ສາ​ ຫະກິດ​ອະ​ເມຣິກັນ ​ທີ່​ຂ້ອນຂ້າງຫົວອະນຸ​ລັກ​ນິຍົມ.

ທ່ານ​ ລັກ​ມັນ ກ່າວ​ວ່າ: “ພວກ​ເຮົາ​ໄດ້​ຮູ້​ເຫັນ​ຢ່າງ​ແຈ້ງ​ຂາວ​ແລ້ວ​ ໃນຊ່ວງ ທີ່​ເກີດ​ສະພາວະ​ເສດຖະກິດ​ຖົດຖອຍ​ຄັ້ງ​ຍິ່ງ​ໃຫຍ່ ​ໃນ​ປີ 2008-2009 ນັ້ນ ເຫດການ​ທີ່​ເກີດ​ຂຶ້ນ​ໃນລະບົບ​ການ​ທະນາຄານ​ຂອງສະຫະລັດ ໄດ້ສົ່ງຜົນກະທົບອອກ​ໄປ​ທົ່ວ​ໂລກ.”

​ໃນ​ການ​ອອກ​ໂຄສະ​ນາ​ຫາ​ສຽງ​ນັ້ນ ຜູ້​ສະ​ມັກ​ເລືອກ​ຕັ້ງ​ປະທານາທິບໍດີ​ທັງ ສອງ​ທ່ານ ​ເຫັນ​ພ້ອມ​ກັນວ່າ ​ເສດຖະກິດ​ສະຫະລັດ​ທີ່​ເຂັ້ມ​ແຂງ​ນັ້ນ​ແມ່ນ ເປັນ​ສິ່ງ​ສໍາຄັນ​ທີ່​ສຸດ​ຕໍ່​ສະຖຽນ​ລະ​ພາບ​ຂອງ​ໂລກ. ທັງ​ສອງ​ທ່ານໄດ້​ກ່າວ ຮັບປະກັນ​ແກ່ຊາວອະ​ເມຣິກັນທັງຫຼາຍ​ວ່າ ພວກ​ເຂົາ​ເຈົ້າມີແຜນການ​ທີ່​ຈະ​ກະຕຸກ​ຊຸກຍູ້​ເສດຖະກິດ​ສະຫະລັດ ຄື​ເລີ່​ມດ້ວຍ​ທ່ານ ມິຕ ຣອມນີ ຜູ້​ສະມັກ​ຈາກ​ພັກຣີພັບ​ບລິ​ກັນ ​ທີ່ສັນຍາ​ວ່າ ທ່ານ​ຈະ​ເຮັດ​ໃຫ້ເວທີ​ເສດຖະກິດຫລິ້ນຕາມ ກົດ​ເກນທີ່​ສະ​ເໝີ​ພາບກັນ ​ໂດຍ​ຈະເອົາທ່າທີ​ເຂັ້ມ​ແຂງ​ເດັດຂາດ​ກັບ​ຈີນ.

ທ່ານ ຣອມນີ ກ່າວ​ວ່າ: “ມື້​ທໍາ​ອິດ​ນັ້ນ ຂ້າພະ​ເຈົ້າ​ຈະໝາຍກາ​ຈີນ​ວ່າ ​ເປັນ​ຜູ້ປັບ​ຄ່າ​ເງິນຕາ​ຂອງ​ຕົນ​ຕາມ​ໃຈຊອບ ຊຶ່ງ​ຈະ​ອໍານວຍ​ໃຫ້​ຂ້າພະ​ເຈົ້າ​ໃນ​ຖານະ​ປະທານາ ທິບໍດີ​ ສາມາດ​ນໍາ​ໃຊ້ ຖ້າ​ເຫັນ​ວ່າ​ຈໍາ​ເປັນ ການເກັບ ພາສີ ໃນບ່ອນ​ທີ່​ຂ້າພະ​ເຈົ້າ​ເຊື່ອ​ວ່າ​ ຈີນເອົາ​ປຽບພວກ​ບໍລິສັດ​ຜູ້ຜະລິດ​ທັງຫລາຍຂອງ​ພວກ​ເຮົາ.”

​ໃນ​ການ​ດິ້ນຮົນ​ຕໍ່ສູ້​ເພື່ອ​ໃຫ້ຊະນະການເລືອກຕັ້ງ​ສະໄໝ​ທີ່​ສອງນັ້ນ ປະທາ​ນາ​ທິບໍດີ​ໂອ​ບາ​ມາ ກ່າວ​ວ່າ ມູນ​ຄ່າ​ການ​ຄ້າ​ແມ່ນ​ໄດ້​ເພີ່ມ​ຂຶ້ນຢ່າງ​ຫລວງ ຫລາຍ ພາຍ​ໃຕ້​ການ​ນໍາພາຂອງ​ທ່ານ ​ແລະເງິນຕາ​ທີ່​ໄດ້​ຖືກປັບ​ໃຫ້​ຕໍ່າລົງ ຂອງ​ຈີນ​ ກໍໄດ້​ເພີ່ມ​ຂຶ້ນ​ເຖິງ 11 ​ເປີ​ເຊັນ​ ນັບ​ຕັ້ງ​ແຕ່​ທ່ານ​ເຂົ້າດໍາລົງ​ຕໍາ​ແໜ່​ງປະທາ​ນາ​ທິບໍດີ​ເປັນ​ຕົ້ນ​ມາ. ທ່ານ​ໂອ​ບາ​ມາ ກ່າວ​ອີກ​ວ່າ ລູກກະແຈໄປສູ່​ເສດຖະກິດ​ທີ່ເຂັ້ມ​ແຂງ​ ກໍ​ຄື​ນໍາ​ເອົາ​ວຽກ​ງານການ​ຜະລິດ​ທັງຫຼາຍ​ກັບ​ຄືນ​ມາສະ​ຫະລັດ ​ແຕ່​ທ່ານ​ກ່າວ​ວ່າ ທ່ານ ມິຕ ຣອມນີ ບໍ່ແມ່ນຜູ້ເໝາະສົມ ທີ່ຈະເຮັດເຊ່ນນັ້ນ.

ທ່ານ ​ໂອ​ບາ​ມາ ກ່າວ​ວ່າ: “ຢ່າ​ລືມ​ວ່າ ທ່ານ ຣອມນີ ​ໄດ້​ມີການລົງ​ທຶນ​ຢູ່ໃນຫຼາຍ​ບໍລິສັດ ທີ່​ເປັນ​ພວກ​ບຸກ​ເບີກ​ໃນການສົ່ງ​ໜ້າ​ວຽກ​ຈາກ​ສະຫະລັດ ໄປ​ຍັງ​ຈີນ. ທ່ານ ຣອມນີ ​ທ່ານ​ຫັ້ນ​ຫຼ່ະເປັນ​ຄົນ​ສຸດ​ທ້າຍ​ທີ່ຈະ​ຈັດການ​ຢ່າງ​ເດັດຂາດ​ ກັບຈີນ.”

​ແຕ່​ຈີນ​ກໍ​ເປັນ​ພຽງເປັນສ່ວນ​ນຶ່ງຂອງ​ບັນຫາທີ່ກ້ວາງໃຫຍ່ກ່ວາ​ນັ້ນ. ວິ​ກິດ​ການ​ໜີ້​ສິນ​ຢູ່​ໃນ​ພາກ​ພື້ນ​ຢູ​ໂຣບ ​ໄດ້​ເຮັດ​ໃຫ້​ຄວາມຮຽກຮ້ອງ​ຕ້ອງການສິນຄ້າຈາກ​ສະຫະລັດ​ ຫລຸດ​ຕໍ່າລົງ ຊຶ່ງ​ທ່ານ Lachman ກ່າວ​ວ່າ ບັນຫາ​ທີ່​ກໍາລັງ​ໜັກໜ່ວງ​ຂຶ້ນ​ໄປ​ນັບ​ມື້ຢູ່ ​ໃນ​ກຸ່ມ​ 17 ປະ​ເທດ​ທີ່​ໃຊ້​ເງິນ ຕາ​ຢູ​ໂຣນັ້ນ ອາດສາມາດເຮັດ​ໃຫ້ການ​ເຕີບ​ໂຕ​ຂອງເສດຖະກິດ​ ຊັກ​ຊ້າ​ລົງ​ໄປ​ກວ່າ​ນີ້​ອີກ​ໄດ້ ຢູ່ໃນທົ່ວໂລກ. ​

ທ່ານ ລັກ​ມັນ ​ກ່າວ​ວ່າ: “ກາ​ນຄາດ​ໜາຍ​ຂອງ​ຂ້າພະ​ເຈົ້ານັ້ນ​ ກໍ​ແມ່ນ​ວ່າ ພາກ​ພື້ນ​ຢູ​ໂຣບ ທີ່​ເປັນ​ພາຄີ​ການ​ຄ້າ​ທີ່​ໃຫຍ່​ທີ່​ສຸດ​ຂອງ​ສະຫະລັດ​ນັ້ນ ​ເປັນ ​ເປັນ​ຕົວ​ທ້າ​ທາຍ ທີ່​ແທ້​ຈິງ​ຕໍ່​ສະຫະລັດ​ ໃນ​ຫຼາຍ​ປີຕໍ່ໜ້າ.”

ທ່ານ ລັກມັນ ​ກ່າວ​ອີກ​ວ່າ ທ່ານ​ຣອມນີແມ່ນສະ​ເໜີ​ ວິທີ​ການແກ້ໄຂທີ່​ດີ ສໍາລັບທຸລະ​ກິດ​ ຫຼາຍກວ່າທ່ານໂອບາມາ ​ເພື່ອ​ຊ່ວຍ​ແກ້​ໄຂ​ບັນຫາ​ອັດຕາ​ການຫວ່າງ​ງານ​ສູງແບບຊໍາ​ເຮື້ອ​ຂອງ​ປະ​ເທດ. ​ແຕ່​ທ່ານ Bruce Stokes ປະຈໍາ​ສູນ​ກາງ PEW ກ່າວ​ວ່າ ຍ້ອນ​ຄວາມ​ນິຍົມ​ຕໍ່​ທ່ານ​ໂອ​ບາ​ມາ ທີ່​ມີ​ຢູ່​ໃນຫຼາຍ​ພາກສ່ວນ​ຂອງ​ໂລກນັ້ນ ພາບ​ພົດ​ຂອງ​ສະຫະລັດ​ອາດ​ຈະບໍ່ດີ ຄືເກົ່າ ພາຍ​ໃຕ້​ການເປັນ​ປະທານາທິບໍດີ​ຂອງ​ທ່ານ​ຣອມນີ.

ທ່ານ ສະ​ໂຕ໊ກ ກ່າວ​ວ່າ: “​ເວົ້າ​ເຖິງ​ຈີນແລ້ວກໍ​ໜ້າ​ສົນ​ໃຈ​ຫຼາຍ. ຂ້າພະ​ເຈົ້າ ຄິດ​ວ່າ​ ສໍານວນໂວຫານຂອງ​ຣອມນີນັ້ນ ອາດສ້າງ​ຄວາມເສຍຫາຍໃນ​ໄລຍະ​ສັ້ນ​ຕໍ່​ພາບ​ພົດ​ອະ​ເມຣິກ ຢູ່​ໃນ​ຈີນ. ແຕ່​ຄວາມເສຍຫາຍຢ່າງ​ໃຫຍ່ ຈະແມ່ນຢູ່​ໃນພາກ​ພື້ນ​ຢູ​ໂຣບ.”

ຜົນ​ການ​ສໍາ​ຫຼວດ​ເມື່ອ​ບໍ່​ດົນ​ມາ​ນີ້ ​ໂດຍ​ສູນ​ກາງ PEW ພົບ​ວ່າ ​ຂົງ​ເຂດຢູ ​ໂຣບຕາ​ເວັນ​ຕົກ​ແມ່ນສະໜັບສະໜຸນຢ່າງ​ຖ້ວມ​ລົ້ນ ໃຫ້ທ່ານ​ໂອ​ບາ​ມາໄດ້ ເປັນປະທານາທິບໍດີອີກສະ​ໄໝ ນຶ່ງ ຄືຝຣັ່ງ 92 ​ເປີ​ເຊັນ, ​ເຢຍຣະມັນ​ 89 ​ເປີ​ເຊັນ ​ແລະອັງກິດ 73 ​ເປີ​ເຊັນ. ​ແຕ່​ວ່າ ປະທາ ນາທິບໍດີ​ໂອ​ບາ​ມາ ມີ ຄະ​ແນນ​ນິຍົມຕໍ່າ​ຫຼາຍ​ ຢູ່​ໃນ​ປະ​ເທດ​ກຣີສ ຄື​ມີຊາວກຣີສ​ພຽງ 22 ​ເປີ​ເຊັນເທົ່າ​ນັ້ນ ທີ່ເຫັນດີກັບວິທີ​ຈັດການ​ກັບ​ເສດຖະກິດ​ໂລກ​ຂອງ​ທ່ານ.

​ທ່ານ ລັກ​ມັນ ກ່າວ​ວ່າ ເຖິງແມ່ນຜູ້ໃດຈະຊະນະ​ໃນ​ການ​ເລືອກ​ຕັ້ງ​ຄັ້ງ​ນີ້ກໍ​ຕາມ ມັນກໍມີເດີມ​ພັນຫຼາຍ​ພໍ​ສົມຄວນຢູ່ ​ໂດຍ​ສະ​ເພາະ ຖ້າຫາກວ່າ​ສະພາ​ຄອງ​ແກຣສ ທີ່​ແບ່ງ​ແຍກ​ກັນ​ຢ່າງ​ຮຸນ​ແຮງ​ນັ້ນ ບໍ່​ສາມາດ​ຕົກລົງ​ກັນ​ໄດ້​ກ່ຽວ ກັບ​ການ​ຕັດ​ງົບປະມານ​ການ​ໃຊ້​ຈ່າຍລົງ​ຢ່າງຫຼວງຫລາຍ​ຂອງ​ລັດຖະບານ​ໃນ​ທ້າຍ​ປີ​ນີ້.

ທ່ານ ລັກ​ມັນ ກ່າວໃນ​ທີ່​ສຸດ​ວ່າ: “ຖ້າ​ຫາກວ່າ ມີສິ່ງ​ໃດເກີດ​ຜິດພາດ​ໄປ​ຢູ່ ​ໃນ​ສະຫະ ລັດ ແນ່ນອນ​ວ່າ​ ມັນຈະ​ສົ່ງຜົນສະທ້ອນອອກໄປ​ທົ່ວ​ໂລກ ​ໂດຍ​ສະ​ເພາະ​ໃນ​ປັດຈຸບັນ​ນີ້ ທີ່ເຂດ​ອື່ນໆ​ຂອງ​ໂລກ​ຕົກຢູ່ໃນສະພາບທີ່ບໍ່ຄ່ອຍດີ ປານໃດນັ້ນ. ສິ່ງ​ສຸດ​ທ້າຍ​ທີ່ພວກ​ເຂົາ​ເຈົ້າຕ້ອງການ​ ກໍ​ຄື​ ສະຫະລັດທີ່ຕົກ​ຢູ່​ໃນ​ສະພາບ​ທີ່ລົ້ມລຸກ​ຄຸກ​ຄານ.”

ປະຫວັດ​ສາດຊີ້​ແນະ​ວ່າ ​ໂລກ​ຈະ​ປັບ​ຕົວ​ເຂົ້າກັບໃຜ​ກໍ​ຕາມ​ທີ່​ອະ​ເມຣິກາ ​ເລືອກ​ຕັ້ງຂຶ້ນ ມາເປັນປະທານາທິບໍດີ. ​ບັນດາ​ຊ່ຽວຊານ​ກ່າວ​ວ່າ ສິ່ງ​ທີ່​ແຈ້ງ​ຂາວ ​ກໍ​ຄືວ່າ ​ຜົນ​ທີ່ອອກ​ມານັ້ນ ​ແມ່ນ​ຈະ​ຊ່ວຍ​ຫຼໍ່​ຫຼອມ​ ເສ​ດຖະກິດ​ແລະ ທ່າ​ທີ​ດ້ານ​ພູມິສາດ​ການ​ເມືອງ ​ຢູ່​ໃນ​ທົ່ວ​ໂລກ​ໃນ​ຫຼາຍໆ​ປີ​ຕໍ່ໜ້າ​.

ເບິ່ງວີດີໂອກ່ຽວກັບຄວາມເຫັນຂອງຊາວຢູໂຣບ ເລື້ອງການເລືອກຕັ້ງຢູ່ສະຫະລັດ:
Europeans Hope for Democrat Win in U.S. Election
please wait

No media source currently available

0:00 0:02:41 0:00
ລິງໂດຍກົງ
XS
SM
MD
LG