ລິ້ງ ສຳຫລັບເຂົ້າຫາ

ເສດຖະກິດ ກຳລັງ ຈະເລີນຮຸ່ງເຮືອງ ໃນເຂດ ຊາຍແດນໄທ-ມຽນມາ (ວີດີໂອ ພາສາລາວ)


ໄທ​ກັບ​ມຽນມາ ກຳລັງ​ທຳ​ງານ​ຮ່ວມ​ກັນ ກ່ຽວ​ກັບ​ແຜນການ​ອັນ
​ໃຫຍ່​ໂຕ ​ເພື່ອ​ສົ່ງ​ເສີມ​ການ​ຄ້າ ​ແລະ​ດຶງ​ດູດ​ເອົາ​ທຸລະ​ກິດ​ ​ໃຫ້ໄປ
​ຕັ້ງຢູ່ເລາະ​ຕາມ​ເຂດຊາຍ​ແດນທາງບົກ​ອັນ​ຍາວລະຫວ່າງ​ກັນ​ນັ້ນ. ​
ເງິນ​ຄຳ​ທີ່​ຫລັ່ງ​ໄຫລ​ເຂົ້າ​ໄປ​ ກໍາລັງ​ຫລໍ່​ຫລອມ​ໃໝ່ ຂົງ​ເຂດ​ດັ່ງ
ກ່າວ ທີ່​ໄດ້​ປະສົບ​ກັບ​ບັນຫາຂັດ​ແຍ້​ງລະຫວ່າງຊົນ​ເຜົ່າ​ມາ​ເປັນ
​ເວລາ​ດົນນານ​. ຜູ້​ສື່​ຂ່າວ​ວີ​ໂອ​ເອ Steve Sandford ມີ​ລາຍ
​ງານ​ ມາ​ຈາກ​ເມືອງ​ແມ່​ສອດ ທາງ​ພາກ​ເໜືອ​ຂອງ​ໄທ ຕິດ​ກັບ
​ຊາຍ​ແດນມຽນມາ ຊຶ່ງ​ດາຣາຈະ​ນຳ​ມາສະ​ເໜີ​ທ່ານ.

ເບິ່ງວີດີໂອ ພາສາລາວ ກ່ຽວກັບລາຍງານນີ້

ຢູ່​ໃນ​ພາກ​ເໜືອຂອງ​ໄທ ບ່ອນ​ທີ່​ແມ່​ນ້ຳ​ເມີຍ ​ເປັນ​ຊາຍ​ແດນ​ລະຫວ່າງ​ໄທ​ກັບ​ມຽນມາ​ນັ້ນ
ບັນ​ດາ​ນັກ​ເສດຖະສາດ ປະ​ເມີນ​ວ່າ ການ​ຄ້າ​ຢູ່​ດ່ານ​ຂ້າມ​ຊາຍແດນ​ທີ່​ສຳຄັນ​ ​ແມ່​ສອດ​ນັ້ນ​
ໄດ້​ມີ​ມູນ​ຄ່າ ຫລາຍ​ກ່ວາ 1 ຕື້​ດອນ​ລ່າ ​ໃນ​ປີ​ກາຍ​ນີ້.

ດ້ວຍ​ການ​ທີ່​ເສດຖະກິດ​ຂອງ​ໄທໄດ້​ຢຸດ​ສະ​ງັກລົງ ລຸນ​ຫລັງ​ການ​ກໍ່​ລັດຖະປະຫານ​ເມື່ອ​ປີ
ກາຍ​ນີ້ ອຳນາດ​ປົກຄອງ​ທະຫານ​ໄທ​ຈຶ່ງ​ຫັນ​ມາ​ເພ່ງ​ເລັງ​ໃສ່ ການ​ຊຸກຍູ້​ສົ່ງ​ເສີມການຂະ
ຫຍາຍ​ໂຕ​ຂອງ​ເສດຖະກິດ​ ດ້ວຍ​ໂຄງການ​ພັດທະນາ​ສ້າງສາ​ຕ່າງໆ ​ແລະ​ການ​ເຮັດ​ຂໍ້​ຕົກ
ລົງໄຂເຂດການ​ຄ້າ​ເສລີ ​ເພື່ອ​ເພີ້​ມທະວີ​ການ​ຄ້າ​ຂ້າມ​ຊາຍ​ແດນ.

ຢູ່​ທີ່​ແມ່​ສອດ​ນີ້ ກຳລັງ​ມີ​ການ​ກໍ່ສ້າງ​ຂົວ​ຂ້າມ​ແມ່​ນ້ຳ​ເມີຍ​ແຫ່ງ​ທີ​ສອງ ສຳ​ຫລັບ​ການ​ສັນຈອນ
ຂອງ​ລົດ​ຂົນສົ່ງ​ຂະໜາດ​ໜັກ ຊຶ່ງ​ພວກ​ສະໜັບສະໜຸນ​ຫວັງ​ວ່າ ຈະສາມາດ​ເພີ້​ມທະວີ​ການ
ຄ້າໃນ​ເມືອງ​ນີ້​ຂຶ້ນ​ເປັນ​ສອງ​ເທົ່າ​ຕົວ ​ໂດຍ​ໄວ​.


​ໃນ​ຂະນະ​ດຽວ​ກັນ ກໍ​ກຳລັງມີ​ການ​ດຳ​ເນີນ​ຄວາມ​ພະຍາຍາມ​ ຢູ່​ໃນ​ດິນ​ແດນ​ທີ່​ເປັນກາງ
ຂອງ​ໄທ ​ເພື່ອ​ຫາ​ທາງ​ແກ້​ໄຂ​ການ​ຂັດ​ແຍ້​ງກັນ​ທີ່​ມີ​ມາ​ເປັນເວລາ​ດົນ​ນານ ລະຫວ່າງ​ພວກ
ກອງທັບ​ຂອງກຸ່ມ​ກະບົດ​ຕ່າງໆ ກັບ ກອງທັບ​ມຽນມາ​ນັ້ນ.

ຜູ້​ບັນຊາ​ການກອງ​ພົນທະຫານ​ລາບ​ທີ 4 ຂອງ​ໄທ ນາຍ​ພົນ ນົບ​ພອນ ​ເຣີງຈັນ ​ເຫັນ​ວ່າ
ການ​ລົງທຶນ ການ​ກໍ່ສ້າງ​ພື້ນຖານ​ໂຄງ​ລ່າງ ​ແລ​ະ ການ​ເຈລະຈາ ​ເປັນ​ກ້ອນ​ຫິນ​ສຳ​ຫລັບ
ຢຽບ​ ເພື່ອ​ກ້າວ​ໄປ​ສູ່​ສັນຕິ​ພາບ ອັນຖາວອນ.

ນາຍ​ພົນ ນົບ​ພອນ ​ເວົ້າ​ວ່າ “​ເສດຖະກິດ​ທີ່​ຮຸ່ງ​ເຮືອງ​ຂຶ້ນ ​ແມ່ນ​ຈະ​ສາມາດ​ຊ່ວຍ​
ແກ້​ໄຂ ບັນຫາ​ຕ່າງໆກັບ​ພວກ​ຊົນ​ເຜົ່າ​ທັງຫລາຍ. ​ນີ້ແມ່ນ​ເຄື່ອງ​ມື​ເພື່ອ​ເລັ່ງລັດ
​ການ​ເຈລະຈາ​ໃຫ້​ດຳ​ເນີນ​ໄປ​ໄວ​ຂຶ້ນ. ພວກ​ເຮົາ​ເປີດ​ເຂດ​ເສດຖະກິດພິ​ເສດ​ຂຶ້ນ ​
ເພື່ອ​ຊ່ວຍ​ໃຫ້ການ​ຄ້າ​ຂ້າມ​ຊາຍ​ແດນງ່າຍຂຶ້ນ ສຳຫລັບ​ທັງ​ສອງ​ປະ​ເທດ ​ເປີດ

ເສດຖະກິດ​ໂລກ​ເພື່ອ​ປະ​ໂຫຍ​ດ ຂອງ​ທຸກໆ​ຄົນ.”

ນອກ​ນັ້ນ​ແລ້ວ ຍັງ​ມີ​ການ​ນຳ​ໃຊ້ສິນ​ນ້ຳ​ໃຈ​ຕ່າງໆ ​ເຊັ່ນ​ການຜ່ອນຜັນ​ດ້ານພາສີ ​ແລະ​ອອກ​
ໃບ​ອະນຸຍາດ​ເຮັດ​ວຽກ​ໃຫ້​ໂດຍ​ໄວ ​ເພື່ອ​ດຶງ​ດູດ​ເອົາ​ທຸລະ​ກິດ​ໄປ​ຍັງ​ເຂດ​ຊາຍ​ແດນ.

​ແລະ​ງານ​ວາງສະ​ແດງ​ສິນ​ຄ້າ​ບັ້ນ​ໜຶ່ງ​ເມື່ອ​ໄວໆ​ມາ​ນີ້ ທີ່​ຈັດ​ຂຶ້ນ​ເພື່ອ​ສົ່ງ​ເສີມຄວາມ​ສາມາດ
ບົ່ມ​ຊ້ອນຂອງ​ບໍລິສັດ​ສົ່ງອອກ​ນັ້ນ ກໍ​ໄດ້​ດຶງ​ດູດ​ເອົາ​ຜູ້ນຳ​ທຸລະ​ກິດ​ຊົນ​ເຜົ່າ​ຫລາຍໆ​ຄົນ ​ເຊັ່ນ
Soe Thein ​ເລຂາທິການ​ ສະພາ​ການ​ຄ້າ​ລັດ​ກະຫລ່ຽງ..

ທ່ານ Soe Thein ເວົ້າ​ວ່າ “​ພວກ​ເຮົາ​ໄດ້​ຮັບ​ສັນຕິພາບ ຢູ່​ໃນ​ເຂດ​ຂອງພວກ​
ເຮົາ​ແລ້ວ ເມື່ອ​ບໍ່​ນານ​ມາ​ນີ້. ຂົງ​ເຂດ​ຂອງ​ພວກເຮົາ​ແມ່ນ​ຈະ​ເລີ້ມ​ພັດທະນາ
​ແລ້ວ​ບັດ​ນີ້ ​ເພາະວ່າ​ພວກ​ເຮົາ​ມີ​ຊັບພະຍາກອນ​ມະນຸດ ​ແລະຊັບພະຍາກອນ​
ທຳ​ມະ​ຊາດ ຢ່າງ​ພຽງພໍ​ແລ້ວ. ​ເພາະສະ​ນັ້ນ ພວກ​ເຮົາ​ຈຶ່ງ​ຈຳ​ເປັນ​ທີ່​ຈະ​ຕ້ອງ​
ດຳ​ເນີນ​ຄວາມ​ພະຍາຍາມ​ຫລາຍ​ຍິ່ງ​ຂຶ້ນ​ອີກ ​ໄປ​ສູ່ການ​ພັດທະນາ​ຂົງ​ເຂ​ດ.”

​ເຖິງ​ແມ່ນ​ໄດ້​ມີ​ການ​ລົງທຶນໃສ່​ເສດຖະກິດໃນ​ຂົງ​ເຂດກໍ​ຕາມ ​ແຕ່​ກໍ​ຍັງ​ມີອົບພະຍົບກະຫລ່ຽງ
ຫລາຍ​ກ່ວາ 1 ​ແສນ 2 ໝື່ນ​ຄົນ ທີ່​ທົນທຸກທໍລະມານ​ຢູ່ໃນ​ສູນ​ອົບ​ພະຍົບ 9 ​ແຫ່ງ ​ໃນ​ເຂດ
ຊາຍ​ແດນ ໂດຍ​ທີ່ບໍ່​ມີ​ດິນ​ດອນ​ ທີ່ຈະໃຫ້​ເຂົາ​ເຈົ້າກັບ​ຄືນ​ເມືອ​ຫາ ຢູ່​ໃນ​ມຽນມານັ້ນ​ເລີຍ.


ອົບ​ພະຍົບບາງ​ຄົນ ແມ່ນ​ໄດ້​ສູນ​ເສຍ​ດິນ​ດອນບ້ານ​ເຮືອນ​ຂອງ​ເຂົາ​ເຈົ້າ​ໄປ​ດົນ​ແລ້ວ ເຊັ່ນ
ຊາຍ​ຄົນ​ນີ້ ທີ່​ໄດ້​ຫລົບໜີ​ມາ​ຈາກ​ລັດ​ກະຫລ່ຽງ ​ເມື່ອ 30 ປີ​ມາ​ແລ້ວ ​ແລະ​ບໍ່​ຍອມ​ບອກ​ຊື່
ຂອງ​ລາວ ​ເວົ້າ​ວ່າ ລາວ​ໄດ້​ຍິນ​ຂ່າວ​ມາ​ວ່າ ກຳລັງ​ທະຫານ​ບ້ານ​ກະຫລ່ຽງ ທີ່​ບັດ​ນີ້​ເຂົ້າ​
ຮ່ວມເປັນ​ພັນທະ​ມິດ​ກັບ​ລັດຖະບານ​ແລ້ວ​ນັ້ນ ​ໄດ້​ຂາຍ​ດິນ​ດອນ​ຂອງ​ລາວ ​ໃຫ້​ນັກທຸລະ
ກິດ ມຽນມາ​ໄປ​ແລ້ວ.

ເວລາ​ນີ້ ລາວ​ສາມາດ​ກັບ​ຄືນ​ໄປ​ເບິ່ງ​ບ້ານ​ເຮືອນ​ເກົ່າ​ຂອງ​ລາວ​ໄດ້ ຈາກ​ແຜນ​ທີ່​ໃນ ​Google ເທົ່າ​ນັ້ນ.

ລາວ​ເວົ້າ​ເປັນ​ພາສາ​ກະຫລ່ຽງ​ວ່າ “ຖ້າ​ພວກ​ເຮົາ​ກັບ​ຄືນ​ເມືອ ລາຄາ​ທີ່​ດິນກໍ​ຈະ
ຕ້ອງ​ແພງ​ຂຶ້ນ ​ເພາະວ່າ​ມັນ​ຢູ່​ໃກ້​ກັບ​ຊາຍ​ແດນ ​ແລະ​ເຂດ​ພັດທະນາ​ນຳ.
ພວກ​ເຮົາ​ຄິດ​ວ່າ ພວກ​ເຮົາ​ຄົງ​ຈະ​ບໍ່​ສາມາດຊຶ້ມັນ​ຄືນ​ມາ​ໄດ້ດອກ. ສະ​ນັ້ນ
ພວກ​ເຮົາກໍ​ຕ້ອງ​ໄດ້​ຊອກ​ຫາ​ບ່ອນ​ໃໝ່​ ທີ່​ພວກ​ເຮົາ​ສາມາດ​ຢູ່​ໄດ້.”


ພ້ອມ​ກັບ​ການ​ລົງທຶນ​ໃໝ່ເຫລົ່ານັ້ນ ທຸລະ​ກິດ​ກໍ​ແມ່ນ​ຈະ​ເລີ​ນຮຸ່ງ​ເຮືອງ ສຳ​ຫລັບ​ບາງ​ຄົນ​
ຢູ່​ໃນ​ມຽນມາ ​ແຕ່​ບໍ່​ແມ່ນ​ສຳ​ຫລັບ​ໝົດ​ທຸກ​ຄົນ.

ເບິ່ງວີດີໂອ ພາສາລາວ ກ່ຽວກັບ ອົບພະຍົບມຽນມາ ໃນເຂດຊາຍແດນໄທ:


ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG