ລິ້ງ ສຳຫລັບເຂົ້າຫາ

ວັນພຸດ, 28 ກັນຍາ 2022

ໄພ​ນ້ຳ​ຖ້ວມ ຢູ່ໃນພາກຕາເວັນອອກ ຂອງອອສເຕຣເລຍ ແມ່ນ​ຮ້າຍ​ແຮງ​ເປັນ​ພິ​ເສດ


ລົດໂດຍສານຈອດຢູ່ກາງຖະໜົນ ໃນທີ່ຢູ່ອາໄສຂອງຊຸມຊົນ, ລຸນຫຼັງທີ່ມີຝົນຕົກໜັກ ແລະນໍ້າຖ້ວມຮຸນແຮງ ຢູ່ໃນເມືອງແມັກແກຣນ ຮີລ, ໃນ​ເຂດ​ຊານ​ເມືອງຂອງນະຄອນຊິດນີ, ເມື່ອວັນທີ 6 ກໍລະກົດ 2022.

ວິກິດການນໍ້າຖ້ວມຢູ່ໃນອອສເຕຣເລຍແມ່ນຍັງຄົງດໍາເນີນຢູ່ຕໍ່​ໄປໂດຍ​ມີປະຊາກອນ 85 ພັນກວ່າຄົນ ທີ່ໄດ້ຢູ່ພາຍໃຕ້ຄໍາສັ່ງ ໃຫ້ຍົກຍ້າຍ ຫຼືໄດ້ຮັບຄໍາເຕືອນອື່ນໆ. ຊຸມຊົນຕ່າງໆທົ່ວທັງລັດນິວເຊົາເວລ ຍັງຄົງຕື່ນໂຕສູງ. ຟີລ ເມີເຊີ ມີລາຍງານຈາກນະຄອນຊິດນີ, ເຊິ່ງ ທິບສຸດາ ມີລາຍລະອຽດມາສະເໜີທ່ານໃນອັນດັບຕໍ່ໄປ.

ເຮືອນຂອງປະຊາຊົນຢູ່ໃກ້ກັບນະຄອນຊິດນີຫຼາຍພັນຫຼັງ ໄດ້ຮັບຜົນກະທົບຈາກໄພນໍ້າຖ້ວມຢ່າງກວ້າງຂວາງ, ໃນປີນີ້ ບາງຄົນແມ່ນໄດ້ຮັບຜົນກະທົບເປັນເທື່ອທີສາມແລ້ວ, ສົ່ງຜົນໃຫ້ປະຊາຊົນຕ້ອງປະເຊີນກັບຄວາມບໍ່ແນ່ນອນ ໃນອະນາ ຄົດ.

ລະບົບຂອງພາຍຸທີ່ຮຸນແຮງ ທີ່ໄດ້ກະທົບໃສ່ພາກສ່ວນຕ່າງໆຂອງເມືອງໃຫຍ່ທີ່ສຸດຂອງອອສເຕຣເລຍແມ່ນເຄື່ອນໂຕອອກໄປແລ້ວ, ແຕ່ແມ່ນໍ້າຕ່າງໆ ຍັງຄົງຢູ່ໃນລະດັບທີ່ຢູ່ເໜືອຂີດອັນຕະລາຍ ອັນໄດ້ເຮັດໃຫ້ຕ້ອງມີການຍົກຍ້າຍຫຼາຍຂຶ້ນ.

ໃນບາງພື້ນທີ່ ມີລະດັບນໍ້າຝົນທີ່ສູງເຖິງ 700 ມີລີແມັດ ນັບແຕ່ມື້ວັນອາທິດເປັນ ຕົ້ນມາ. ຢູ່ບໍລິເວນເຂດຮ່ອມພູ ຮັນເຕີ (Hunter Valley) ທີ່ຢູ່ທາງທິດເໜືອຂອງນະຄອນຊິດນີ, ແມ່ນໍ້າຕ່າງໆຢູ່ໃນລະດັບທີ່ສູງທີ່ສຸດ ນັບແຕ່ພວກເຂົາເຈົ້າເຄີຍໄດ້ບັນທຶກມາແຕ່ປີ 1952.

ລັດຖະມົນຕີຄຸ້ມ​ຄອງ​ເຫດ​ການສຸກເສີນຂອງລັດນິວເຊົາເວລ ທ່ານສເຕັບ ຄຸກ (Steph Cooke) ກ່າວຢູ່ການຖະແຫຼງຂ່າວໃນມື້ວັນພຸດແລ້ວນີ້ວ່າ ສະຖານະການຍັງຄົງຢູ່ໃນຂັ້ນອັນຕະລາຍ, ເຊິ່ງທ່ານໄດ້ກ່າວວ່າ:

“ປັດຈຸບັນ ພວກເຮົາໄດ້ກ້າວເຂົ້າສູ່ມື້ທີ 5 ຂອງເຫດການສຸກເສີນຄັ້ງຫຼ້າສຸດນີ້ ແລະເຫດການສຸກເສີນດັ່ງກ່າວແມ່ນຍັງໄກຫຼາຍສໍາລັບຊຸມຊົນຕ່າງໆທົ່ວນະຄອນຊິດນີ ແລະເນື່ອງຈາກສະຖານະການຂອງສະພາບອາກາດ ຍັງຄົງເຄື່ອນທີ່ຜ່ານເຂົ້າໄປທາງທິດເໜືອຂອງຂົງເຂດຮ່ອມພູ ຮັນເຕີ, ຊາຍຝັ່ງທາງພາກກາງ ແລະທາງທິດກາງຂອງຊາຍຝັ່ງບໍລິເວນພາກເໜືອ, ດັ່ງນັ້ນ ຫຼາຍຄົນຈຶ່ງບໍ່ສາມາດນອນຫຼັບແບບເຕັມອິ່ມໄດ້ໃນຕອງກາງຄືນ.”

ກຸ່ມ​ປົກ​ປ້ອງສະພາບແວດລ້ອມກ່າວວ່າ ພາວະໂລກຮ້ອນ ໄດ້ເຮັດໃຫ້ສະຖານະການນໍ້າຖ້ວມຢູ່ໃນອອສເຕຣເລຍ ຮ້າຍແຮງຂຶ້ນນັບມື້.
ແຕ່ ສາດສະດາຈານ ແອນດີ ພິດຕ໌ແມນ (Andy Pittman), ຜູ້ອໍານວຍການສູນກາງ​ຮັບ​ມື​ກັບອາກາດຮຸນແຮງຂອງສະພາຄົ້ນຄວ້າແຫ່ງອອສເຕຣເລຍ ກ່າວຕໍ່ບໍລິສັດອອກອາກາດຂອງອອສເຕຣເລຍວ່າ ອຸນຫະພູມທີ່ຮ້ອນຂຶ້ນຍັງບໍ່ສາມາດ ເຊື່ອມຕໍ່ໄພພິບັດໃດນຶ່ງໄດ້, ເຊິ່ງ ທ່ານພິດຕ໌ແມນ ກ່າວວ່າ:

“ຄວາມສ່ຽງຂອງເຫດການຮຸນແຮງທັງຫຼາຍ ແມ່ນເພີ້ມຂຶ້ນເລື້ອຍໆ ເນື່ອງຈາກການປ່ຽນແປງທາງສະພາບອາກາດ, ເຫດການສະເພາະທີ່ພວກເຮົາໄດ້ເຫັນນັ້ນ ເກີດຈາກການປ່ຽນແປງທາງສະພາບອາກາດຫຼືບໍ່ ແມ່ນຍາກທີ່ຈະສຶກສາ ຄົ້ນ ຄວ້າໄດ້.”

ນາຍົກລັດຖະມົນຕີຂອງອອສເຕຣເລຍ ທ່ານແອນໂທນີ ອາລບານິສ ກໍາລັງລົງກວດກາເບິ່ງສະພາບນໍ້າຖ້ວມ ໂດຍກະທົບໃສ່ບາງຂົງເຂດຂອງນະຄອນຊິດນີ, ໃນຂະນະທີ່ລັດຖະບານກາງ ຮຽກຮ້ອງໃຫ້ກອງກໍາລັງທະຫານຫຼາຍຮ້ອຍຄົນເຂົ້າມາຊ່ວຍໃນ​ການທໍາຄວາມສະອາດຄັ້ງໃຫຍ່ນີ້.

ເຈົ້າໜ້າທີ່ເຕືອນວ່າ ວິກິດການນໍ້າຖ້ວມນີ້ ສາມາດຂະຫຍາຍໄປຈົນເຖິງຕົ້ນອາທິດໜ້າ.

ເຮືອບັນທຸກສິນຄ້າທີ່ຈັກ​ຕາຍ ແລະລ່ອງລອຍໄປມາຢູ່ກາງທະເລ ໄດ້ເຂົ້າໄປຈອດຢູ່ບໍລິເວນກ້ອນຫິນແລະຖິ້ມສະໝໍຈອດເຮືອຢູ່ນອກຊາຍຝັ່ງໃກ້ກັບນະຄອນຊິດນີ. ສາຍເຄໂບຂະໜາດໃຫຍ່ຂອງເຮືອລາກດຶງນຶ່ງໃນສາມລໍາໄດ້ຂາດອອກຢ່າງແຮງແລ້ວຟົ້ງໄປໃນທະເລທີ່ມີຄື້ນສູງເຖິງ 11 ແມັດ.

ເຈົ້າໜ້າທີ່ຄວາມປອດໄພທາງທະເລຂອງອອສເຕຣເລຍ ຕ້ອງການຢາກຍ້າຍ​ເຮືອ MV Portland Bay ອອກ​ໄປ​ສູ່ນ່ານນໍ້າທີ່ປອດໄພ, ແຕ່ ເນື່ອງຈາກສະຖານະການຫຍຸ້ງຍາກ ອາດຈະເຮັດໃຫ້ພາລະກິດໃນ​ການ​ປະ​ຕິ​ບັດ​ງານດັ່ງ ກ່າວນັ້ນ ຫຼ້າຊ້າອອກໄປ.

ເຊີນອ່ານບົດລາຍງານນີ້ເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG