ສະຫະລັດ ກ່າວວ່າ ຕົນມີຄວາມໝັ້ນໃຈໃນອົງການພະລັງງານປະລະມານູສາກົນ ຫຼື IAEA ໃນການກວດສອບ ເບິ່ງການກ່າວ ຫາໃນຄວາມພະຍາມຜ່ານມາ ເພື່ອສ້າງລະເບີດນິວເຄລຍຂອງ ອີຣ່ານ ຫຼັງຈາກບັນທຶກສະບັບໜຶ່ງຂອງອົງການ IAEA ໄດ້ຮົ່ວໄຫລອອກມາເຊິ່ງສະແດງໃຫ້ເຫັນວ່າ ອົງການດັ່ງກ່າວ ຈະປ່ອຍໃຫ້ ອີຣ່ານ ດຳເນີນການກວດກາໂດຍພວກເຂົາເອງ.
ອົງການຂ່າວ AP ໄດ້ກ່າວໃນວັນພຸດວານນີ້ວ່າພວກເຂົາໄດ້ເຫັນ ສິ່ງທີ່ ພວກເຂົາເອີ້ນວ່າ “ຂໍ້ຕົກລົງລັບ” ລະຫວ່າງ ອີຣ່ານ ແລະ ອົງການ IAEA ແລະ ໄດ້ລົງນາມຮັບຮອງໂດຍມະຫາອຳນາດ ໂລກ 6 ປະເທດ ທີ່ໄດ້ເຈລະຈາຂໍ້ຕົກລົງ ນິວເຄລຍກັບ ອີຣ່ານ ທີ່ ປະກອບ ດ້ວຍ ອັງກິດ, ຝຣັ່ງ, ເຢຍຣະມັນ, ຣັດເຊຍ ແລະ ສະຫະລັດ.
ອົງການຂ່າວ AP ກ່າວວ່າ ພາຍໃຕ້ຂໍ້ຕົກລົງດັ່ງກ່າວ, ອີຣ່ານ ເອງຈະສົ່ງຄະນະກວດກາ ຂອງຕົນ ພ້ອມດ້ວຍອຸປະກອນ ໄປຍັງສະຖານທີ່ນິວເຄລຍ Parchin, ບ່ອນທີ່ມີການສົງໄສວ່າ
ອີຣ່ານ ໄດ້ພະຍາຍາມທີ່ຈະ ສ້າງອາວຸດ ນິວເຄລຍ.
ອີຣ່ານ ໄດ້ປະຕິເສດຕໍ່ຂໍ້ກ່າວຫານີ້ມາໂດຍຕະຫຼອດ ແລະໄດ້ປະຕິເສດ ທີ່ຈະອະນຸຍາດໃຫ້ຄະນະກວດກາສາກົນ ເຂົ້າໄປໃນສະຖານທີ່ດັ່ງກ່າວ. ອົງການຂ່າວ AP ກ່າວວ່າ ຂໍ້ຕົກລົງໄດ້ໃຫ້ສິດທິແກ່ ອີຣ່ານ ໃນການ ບໍ່ເປີດເຜີຍຮູບພາບ ແລະ ວິດີໂອຫຼາຍພາກສ່ວນຂອງ ຄ້າຍ Parchin ທີ່ອີຣ່ານ ກ່າວວ່າ ມີຄວາມສຳຄັນທາງດ້ານທະຫານນັ້ນ.
ຂໍ້ຕົກລົງນີ້ແມ່ນປາກົດວ່າ ໃຫ້ສິດພິເສດຢ່າງເຊັດເຈນແກ່ອີຣ່ານ ແລະ ກໍບໍ່ມີປະເທດທີ່ເປັນສະມາຊິກ ຂອງອົງການ IAEA ອື່ນໆເຄີຍໄດ້ຮັບ ການຍົກເວັ້ນແບບນີ້ມາກ່ອນ.
ທີ່ນະຄອນຫຼວງ ວໍຊິງຕັນ, ໂຄສົກກະຊວງການຕ່າງປະທດສະຫະລັດ ທ່ານ John Kirby ໄດ້ກ່າວໃນວັນພຸດວານນີ້ວ່າ ທ່ານບໍ່ສາມາດໃຫ້ຄຳເຫັນໃນສິ່ງທີ່ທ່ານກ່າວວ່າແມ່ນ “ເອກະສານທີ່ຕັ້ງໃຈຮ່າງຂຶ້ນ” ໂດຍອົງການ IAEA.
ແຕ່ທ່ານກ່າວວ່າ ສະຫະລັດ ແມ່ນສະບາຍໃຈກັບການຈັດແຈງທຸກຢ່າງທີ່ອົງການ IAEA ມີກັບ ອີຣ່ານ.
