ລິ້ງ ສຳຫລັບເຂົ້າຫາ

ວັນພຸດ, ໒໔ ເມສາ ໒໐໒໔

2013 ເປັນປີ ທີ່ມີ ສະພາບອາກາດ ຮ້ອນເອົ້າ ແລະປັ່ນປ່ວນ ທີ່ສຸດ (ວີດີໂອ)


ເກາະນ້ອຍ Suluan ຂອງຟິລິບປິນ ທີ່ຖືກພາຍຸໄຕ້ຝຸ່ນ Haiyan ຖະຫຼົ່ມ ແລະເສຍຫາຍຢ່າງໜັກ
ເກາະນ້ອຍ Suluan ຂອງຟິລິບປິນ ທີ່ຖືກພາຍຸໄຕ້ຝຸ່ນ Haiyan ຖະຫຼົ່ມ ແລະເສຍຫາຍຢ່າງໜັກ
ປີ 2013 ຜ່ານ​ມາ​ນີ້ຖື​ວ່າ​ເປັນ​ປີ​ທີ່​ຮ້ອນ​ເອົ້າ​ທີ່​ສຸດ​ປີ​ນຶ່ງ ຍ້ອນ​
ການ​ສະ​ສົມ ຂອງ​ປະລິມານແກັສເຮືອນ​ແກ້ວ ຢູ່​ໃນ​ບັນຍາ
ກາດ ​ທີ່ສູງຢ່າງ​ເປັນ​ປະຫວັດການ. Rosanne Skirble
ຜູ້​ສື່​ຂ່າວ​ວີ​ໂອ​ເອ ມີ​ລາຍ​ລະ​ອຽດຂອງ​ເລຶ່ອງນີ້ ຊຶ່ງ​ທອງ​ປານ
ຈະ​ນໍາ​ມາສະ​ເໜີ​ທ່ານ​ ໃນ​ອັນ​ດັບ​ຕໍ່​ໄປ.


ປີ 2013 ກໍ​ເປັນ​ອີກ​ປີ​ນຶ່ງ ທີ່​ມີສະພາບ​ອາກາດ​ຮ້ອນ​ເອົ້າທີ່​ສຸດ ຄື​ເປັນ​ປີ​ທີ່​ເກີດ​ມີ​ໄຟ​ປ່າ ແລະ​ນໍ້າ​ຖ້ວມ​ທີ່ເປັນອັນຕະລາຍ​ເຖິງ​ແກ່​ຊີວິດຮ້າຍ​ແຮງ​ທີ່​ສຸດ ​ເກີດ​ຄື້ນຄວາມຮ້ອນ ​ແລະ​ຄວາມ​ແຫ້ງ​ແລ້ງ​ທີ່​ຮຸນ​ແຮງ ພ້ອມ​ກັບ​ເກີດ​ພາ​ຍຸ​ເຂດຮ້ອນ ທີ່ແຮງ​ທີ່​ສຸດ​ທີ່​ເຄີຍ​ປະ​ທະຝັ່ງ ເຊັ່ນພາຍຸ​ໄຕ້​ຝຸ່ນ Haiyan ​ໄດ້ເອົາ​ຊີວິດ​ຜູ້​ຄົນ​ໄປ 6,000 ຄົນ ​ໃນ​ຟິລິບ​ປິນ ​ແລະ​ມີ​ສີ່​ລ້ານ​ກວ່າ​ຄົນ ​ບໍ່​ມີບ້ານ​ຢູ່​ອາ​ໄສ ຊຶ່ງ​ນາງ Marilyn Dela Cruz ກໍ​ຢູ່​ໃນ​ຈໍານວນ​ນັ້ນ.

ນາງ Marilyn ​ເອົາ​ບັດ​ປະ​ຈໍາ​ຕົວ​ຂອງພໍ່​ປູ່ລາວ​ໃຫ້​ເບິ່ງ ​ແລະ​ເວົ້າ​ວ່າ: “ນີ້ຄື​ ຮູບ​ພໍ່​ປູ່ຂ້ອຍ ລາວ​ຍັງ​ຫາຍ​ສາບ​ສູນ​ຢູ່ ເທົ່າ​ທຸກ​ມື້​ນີ້ ​ແລະ​ພວກ​ເຮົາ​ກໍ​ພາກັນ ຄົ້ນຫາ​ຊາກ​ສົບ​ຢ່າງ​ບໍ່​ລົດ​ລະ ຊຶ່ງ​ພວກ​ເຮົາ​ຫວັງ​ວ່າ​ຈະ​ພົບ​ຊາກ​ສົບ​ເພິ່ນ ນີ້​ຄື​ສົ້ງຂາ​ສັ້ນ​ລູກ​ຊາຍ​ຂ້ອຍ ດຽວ​ນີ້​ເຮົາ​ມີ​ກັນ​ແຕ່​ທໍ່​ນີ້.”

​ໃນ​ຂະນະ​ການ​ສຶກສາ​ຄົ້ນຄວ້າ ຊີ້​ແນະ​ວ່າ ບັນຍາກາດ​ທີ່​ຮ້ອນ​ເອົ້າ​ຂຶ້ນນັ້ນ ​ແມ່ນ​ເຮັດ​ໃຫ້​ສະພາບ​ອາກາດປັ່ນ​ປ່ວນ​ຮ້າຍ​ແຮງ​ຂຶ້ນ​ໄປ​ອີກ. Richard Kerr ນັກ​ຂຽນ​ທີ່ມີ​ປະສົບ​ປະ ການ ສໍາ​ຫຼັບ​ວາລະສານ​ວິທະຍາສາດເວົ້າ​ວ່າ ບໍ່​ສາມາດ​ທີ່​ຈະ​ນຳ​ເອົາ​ສະພາບ​ອາ​ກາດ​ປັ່ນ​ປ່ວນ​ແຕ່​ພຽງ​ຄັ້ງດຽວ ​ໄປ​ເຊື່ອມ​ໂຍງໃສ່ການ​ປ່ຽນ​ແປງຂອງ​ອາກາດໄດ້.

ທ່ານ ​ເຄຍ ​ເວົ້າ​ວ່າ: “​ນອກ​ເໜືອໄປ​ຈາກຄື້ນຄວາມ​ຮ້ອນ ຝົນຕົກ​ໜັກ ພາຍຸ​ຝົນຕົກໜັກ ພາຍຸ​ຫິມະ​ຕົກ​ໜັກ ​ເຫຼົ່າ​ນີ້​ແລ້ວ. ບັນດານັກວິທະຍາສາດ​ຍັງ​ມີ​ຄວາມລະມັດລະວັງ​ຫຼາຍ​ທີ່​ສຸດ​ ກ່ຽວ​ກັບວ່າ ຈະ​ເອົາພາຍຸ​ໄຕ້​ຝຸ່ນ ຫຼື​ລົມ​ຫົວ ກຸດທໍ​ເນ​ໂດ ໄປ​ເຊື່ອມ​ໂຍງ​ໃສ່​ກັບ ສະພາບ​ອາກາດ​ຮ້ອນເອົ້າ​ຂອງ​ໂລກ.”

​ແຕ່​ວ່າ ​ນັກວິທະຍາສາດ​ຊັ້ນ​ນໍາ​ໜ້າ​ທັງຫຼາຍ ​ເວົ້າ​ຢ່າງ​ແນ່ນອນ ຢູ່​ໃນລາຍ ງານຄະນະ ກໍາມະການ​ຂອງ​ລັດຖະບານ ເລຶ່ອງລາຍ​ງານ​ການ​ປ​ະ​ເມີນສະ ພາບດິນ​ຟ້າ​ອາກາດ​ປ່ຽນ​ແປງ ທີ່​ນໍາ​ອອກ​ເຜີຍ​ແຜ່​ໃນ​ເດືອນ​ກັນ​ຍາ​ປີກາຍ​ນີ້ ຊຶ່ງ​ໃນ​ລາຍ​ງານ​ນັ້ນ​ໄດ້​ຢືນຢັນ​ດ້ວຍ​ຄວາມ​ໝັ້ນ​ໃຈ​ຢ່າງ​ໜັກ​ແໜ້ນ​ວ່າ ຄວາມ ຮ້ອນ​ເອົ້າ​ໂລກ​ນັ້ນ​ແມ່ນ​ມີ​ຈິງ ​ແລະ​ສ່ວນ​ໃຫຍ່ແມ່ນ​ຖິ້ມ​ໂທດ​ໃສ່​ນໍ້າມື​ຂອງ​ມະ ນຸດ​ນັ້ນ​ເອງ. ​ໃນການ​ປະກາດ​ຫຼັກ​ຖານ​ທີ່​ພົບ​ເຫັນ​ຂອງ​ກໍາມະການ​ດັ່ງກ່າວ​ທີ່​ນະຄອນຫຼວງ Stockholm ປະ​ເທດ Sweden ນັ້ນ ທ່ານ Michel Jarraud ​ເລຂາທິການ​ໃຫຍ່​ອົງການ​ພະຍາກອນ​ອາກາ​ດ​ໂລກ ​ໄດ້​ເນັ້ນ​ຢໍ້າ ເຖິງໄພ​ຂົ່ມຂູ່ໄວ້​ດັ່ງ​ນີ້:

ທ່ານ Jarraud ​ເວົ້າ​ວ່າ​: “ນັ້ນ​ມັນ​ໜ້າ​ຈະ​ເປັນ​ສິ່ງ​ຕັກ​ເຕືອນ​ ໃຫ້​ຕື່ນ​ຕົວອີກ​ປະການ​ນຶ່ງ ​ໄດ້​ວ່າ ກິດຈະ​ກໍາ​ຕ່າງໆ​ຂອງ​ມວນ​ມະນຸດ​ເຮົາ​ທຸກ​ມື້​ນີ້ ​ແມ່ນ​ຈະ​ສົ່ງ​ຜົນ​ກະ​ທົບອັນໃຫຍ່​ຫຼວງ​ທີ່​ສຸດ​ຕໍ່​ສັງ​ຄົມ ບໍ່​ແມ່ນ​ແຕ່​ຕໍ່​ພວກ​ເຮົາ ​ແຕ່​ຈະ​ມີ​ຕໍ່​ພວກ​ຄົນຫຼາຍໆ​ລຸ້ນຕໍ່​ໄປນັ້ນ​ນໍາ​ອີກ.”

ການ​ຕັກ​ເຕືອນໃຫ້​ຕື່ນ​ຕົວ ທີ່​ວ່າ​ນັ້ນ ມີ​ຂື້ນບໍ່​ດົນ​ ກ່ອນ​ກອງ​ປະຊຸມ​ປະ​ຈໍາປີ ຂອງ​ສະຫະ​ປະຊາ​ຊາດ ທີ່​ນະຄອນຫຼວງ​ Warsaw ປະ​ເທດ​ໂປ​ແລນ ບ່ອນ​ທີ່​ມີ​ຜູ້ຕາງໜ້າ​ຈາກ 192 ປະ​ເທດ ​ໄດ້​ພົບ​ປະກັນ ​ເພື່ອ​ປູ​ພື້ນຖານສໍາ ລັບ​ສົນທິສັນຍາ​ວ່າ​ດ້ວຍ​ສະພາບ​ອາກາດ​ສະບັບໃໝ່ ​ເພື່ອ​ໃຊ້ແທນ​ສະບັບທີ່ ໝົດ​ອາຍຸ​ໄປ ​ໃນ​ປີ 2012 ​ແລ້ວນັ້ນ.

ສິ່ງ​ທີ່​ເກີດ​ຈາກ​ກອງ​ປະຊຸມ​ບັ້ນ​ດັ່ງ​ກ່າວ ກໍ​ຄື​ຮ່ອງຮອຍ​ເປັນ​ໄນໆ​ພໍ​ຈະ​ບອກ​ໄດ້​ວ່າ ສົນທິ ສັນຍາ​ໂລກ​ສະບັບ​ໃໝ່​ນີ້​ຈະມີ​ລັກສະນະ​ຢ່າງ​ໃດ ​ໂດຍ​ອິງ​ຕາມທ່ານ Elliot Diringer ນັກຊ່ຽວຊານ​ດ້ານ​ນະ​ໂຍບາຍປະ​ຈໍາ​ສູນ​ກາງ​ການ​ແກ້​ໄຂບັນຫາ​ດິນ​ຟ້າ​ອາກາດ ​ແລະ​ພະລັງງານ ນັ້ນວ່າ ​ມັນ​ໜ້າ​ຈະ​ມີ ລັກສະນະ ​ໃນ​ການ​ລວມ​ເອົາ​ນະ​ໂຍບາຍ​ຕ່າງໆ​ລະດັບ​ປະ​ເທດ​ ມາ​ໂຮມ​ເຂົ້າ ​ກັນນັ້ນ​ຫຼາຍ​ກວ່າ ຊຶ່ງ​ທ່ານ Elliot ​ໄດ້​ຍົກ​ເອົາເລຶ່ອງ​ຄວາມ​ພະຍາ​ຍາມ ​ເພື່ອ​ການ​ແລກປ່ຽນ​ມົນ​ລະ​ພິດ ທີ່​ກໍາລັງ​ດໍາ​ເນີນ​ການ​ຢູ່​ໃນ​ຈີນ​ ກົດໝາຍ​ວ່າ​ດ້ວຍ​ດິນ​ຟ້າ​ອາກາດ​ສະ​ບັບ​ໃໝ່​ໃນ​ປະ​ເທດ​ແມັກ​ຊິໂກ ​ແລະ ​ແຜນ​ປະຕິບັດ​ງານ​ກ່ຽວ​ກັບ​ດິນ​ຟ້າ​ອາກາດ​ຂອງສະຫະລັດ ທີ່​ໄດ້​ປະກາດ​ອອກ​ໄປໂດຍ ປະທານາ​ທິບໍດີ ​ໂອ​ບາ​ມາ ​ໃນ​ເດືອນ​ມິຖຸນາ​ ປີ​ແລ້ວນີ້.

ທ່ານ Diringer ​ເວົ້າ​ວ່າ: “​ແນ່ນອນ​ທີ່​ສຸດ​ວ່າ ປະ​ເທດຕ່າງໆ ຫົວ​ເມືອງ ​ແລະລັດ ທັງ​ຫຼາຍ ບໍ່​ຕ້ອງ​ລໍຖ້າ​ຂໍ້​ຕົກລົງ​ຂອງ​ລະຫວ່າງ​ປະ​ເທດ ​ແລະ​ພວກ​ເຂົາ​ເຈົ້າກໍ​ບໍ່​ໜ້າ​ຈະ​ລໍຖ້າຂໍ້​ຕົກລົງ​ຂອງ​ລະຫວ່າງ​ປະ​ເທດດອກ ຂ້າພະ​ເຈົ້າ ຄິດ​ວ່າ ​ແທນ​ທີ່​ວ່າ​ຈະຕ້ອງ​ໄດ້ມາ​ລວມ ຕົວ​ກັນ ​ແລະລວມ​ເຂົ້າກັນ​ຢູ່​ໃນ​ຂໍ້ຕົກ ລົງ​ຂອງ​ລະຫວ່າງ​ປະ​ເທດ ​ແລະ​ຊຶ່ງ​ນັ້ນ ກໍ​ຕໍ່​ເມື່ອ​ວ່າ​ ເຮົາ​ເຫັນ​ມີ​ຄວາມ​ກ້າວ ໜ້າ​ຂອງ​ເລຶ່ອງນີ້ ຢູ່​ໃນ​ລະດັບ​ທ້ອງ​ຖິ່ນ ​ແລະ​ໃນ​ລະດັບ​ຊາດ​ເສຍ​ກ່ອນ ກ່ອນທີ່​ພວກ​ເຮົາ​ສາມາດຈະຮ່າງ​ຂໍ້​ຕົກລົງ​ລະຫວ່າງ​ປະ​ເທດ ​ທີ່​ເຂັ້ມ​ແຂງ​ ​ແລະ​ມີ​ເຫດ​ຜົນ​ທີ່ໜັກ​ແໜ້ນໄດ້.”

ທ່ານ Diringer ​ໃຫ້​ຄວາມ​ເຫັນ​ຕື່ມ​ວ່າ ວິທີ​ການ​ແກ້​ໄຂ​ບັນຫາ​ສະພາບ​ດິນ ຟ້າ​ອາກາດ​ປ່ຽນ​ແປງ​ນັ້ນ ຈະ​ຕ້ອງ​ມາ​ຈາກ​ທຸກໆ​ລະດັບ ​ຂອງ​ພາກ​ລັດຖະ ບານ ພາກ​ສາທາລະນະ ​ແລະ​ເອກ​ກະ​ຊົນ ​ແລະ​ຈາກ ແຕ່​ລະສ່ວນບຸ​ກຄົນ​ນຳ​ດ້ວຍ.

Climate Change Real, Human-Caused
please wait

No media source currently available

0:00 0:03:18 0:00
ລິງໂດຍກົງ
XS
SM
MD
LG