ຮອງປະທານປະເທດຈີນ ທ່ານຊິ ຈິ້ນຜິງ ກໍາລັງຢ້ຽມຢາມນະຄອນລອສແອນເຈີລິສ
ຊຶ່ງເປັນບ່ອນຢຸດແວ່ແຫ່ງສຸດທ້າຍ ຂອງການເດີນທາງມາຢ້ຽມຢາມສະຫະລັດທີ່ແນໃສ່
ເພື່ອເປັນການຢືນຢັນເຖິງຄວາມສຳພັນດ້ານເສດຖະກິດແລະວັດທະນາທໍາລະຫວ່າງ
ປະເທດທັງສອງ.
ທ່ານຊິ ໄດ້ເດີນທາງໄປເຖິງນະຄອນລອສແອນເຈີລິດ ໃນວັນພະຫັດ ແລະໄດ້ມຸ້ງໜ້າໄປ
ຍັງທ່າເຮືອຂອງນະຄອນດັ່ງກ່າວ ຊຶ່ງເປັນສູນກາງໃຫ່ຍຂອງການສົ່ງສີນຄ້າເຂົ້າອອກ
ລະຫວ່າງຈີນແລະສະຫະລັດ. ທ່ານຊິ ໄດ້ຖືກຕິດຕາມດ້ວຍຜູ້ປົກຄອງລັດຄາລີຟໍເນຍ
ທ່ານ Jerry Brown ແລະເຈົ້າຄອງນະຄອນລອສແອນເຈີລິສ ທ່ານ Antonio
Villaraigosa. ທ່ານຊິໄດ້ໄປຢ້ຽມບ່ອນເກັບສິນຄ້າຂອງບໍລິສັດຂົນສົ່ງທາງທະເລຂອງ
ຈີນ ຊຶ່ງກໍາລັງທໍາການຂະຫຍາຍເປັນການໃຫຍ່.
ທ່ານ Villaraigosa ແລະ ທ່ານ Brown ໄດ້ກ່າວເຖິງຈຸດສໍາຄັນກ່ຽວກັບຄວາມກ້າວໜ້າ
ທັນສະໄໝຂອງທ່າເຮືອທີ່ປົກປ້ອງກັນສິ່ງແວດລ້ອມວ່າ “ທ່າເຮືອທີ່ມີລະບົບປັກສຽບພະລັງ
ໄຟຟ້າໃຫ້ແກ່ເຮືອຊຶ່ງຕິດຕັ້ງຢູ່ຂ້າງບ່ອນຈອດເຮືອ” ແທນທີ່ຈະໄຊ້ນໍ້າມັນກາຊວນໃນເວລາ
ທີ່ເຮືອກໍາລັງຈອດຢູ່ນັ້ນ.
ທ່ານຊິ ຊຶ່ງຄາດວ່ວາຈະເປັນປະທານປະເທດຈີນໃນປີໜ້ານີ້ ໄດ້ກ່າວຕໍ່ຝູງຊົນທີ່ໄປຕ້ອນຮັບ
ວ່າ ທ່ານມີຄວາມປະທັບໃຈ. ທ່ານກ່າວຕື່ມອີກວ່າ ທ່າເຮືອ ແລະການເສີມຂະຫຍາຍນັ້ນ
ແມ່ນ “ພື້ນຖານອັນໜາແໜ້ນ” ຂອງການຮ່ວມມືໃນອານາຄົດທາງດ້ານເສດຖະກິດ ລະ
ຫວ່າງສອງປະເທດ.
ໃນມື້ວັນສຸກນີ້ ທ່ານຊິ ຈະໄດ້ກ່າວຢູ່ໃນກອງປະຊຸມ ສະພາເສດຖະກິດ ຈີນ-ສະຫະລັດ
ແລະເຂົ້າຮ່ວມກິດຈະການອື່ນໆທີ່ເຈາະຈົງໄສ່ດ້ານການຄ້າ ແລະການລົງທືນ. ທ່ານຊິ
ຈະໄດ້ເຂົ້າຮ່ວມກັບຮອງປະທານາທິບໍດີ ສະຫະລັດທ່ານ Joe Biden ອີກຄັ້ງນຶ່ງຊຶ່ງເປັນ
ເຈົ້າພາບຕ້ອນຮັບການມາຢ້ຽມຢາມສະຫະລັດຂອງທ່ານນັ້ນ. ທ່ານຊິຈະມ້ວນທ້າຍການ
ຢ້ຽມຢາມດ້ວຍການໄປເບິ່ງການແຂ່ງຂັນກິລາບານບ້ວງມືອາຊິບ ຄືທີມ the Los Ange-
les Lakers.
