ເບິ່ງວີດີໂອລາຍງານພາສາລາວ:
ທ່ານ ຊີ ຈິ້ນຜິງ ແມ່ນບໍ່ໄດ້ເປັນທີ່ຮູ້ຈັກຫລາຍປານໃດຢູ່ໃນຕ່າງປະເທດ ຈົນຕົກມາເຖິງປີ
ຜ່ານມານີ້ ເວລາທ່ານປາກົດຕົວໃຫ້ເຫັນໃນລະດັບສູງ ພ້ອມກັບແຂກຢ້ຽມຢາມທີ່ສໍາຄັນໆ
ຫລາຍໆຄົນ.
ບິດາຂອງທ່ານຊີ ຈິ້ນຜິງ ເຄີຍເປັນນັກການເມືອງທີ່ມີຊື່ສຽງ ຊຶ່ງເຮັດໃຫ້ຮອງປະທານຈີນ
ຄົນນີ້ ມີຖານະເປັນອັນທີ່ຊາວຈີນພາກັນເອີ້ນວ່າ ເຈົ້າຊາຍນ້ອຍ. ຫລາຍໆຄົນໃນປະເທດ
ຄອມມີວນີສຈີນ ມັກມອງພວກເຈົ້າຊາຍນ້ອຍເຫລົ່ານີ້ແບບບໍ່ຄ່ອຍດີປານໃດ ຖືວ່າເປັນ
ພວກຊັ້ນສູງຫົວສູງ. ທ່ານຫວັງ ຈຽນເຫວິຍ ອາຈານສອນວິຊາດ້ານນະໂຍບາຍສາທາລະ
ນະທີ່ມະຫາວິທະຍາໄລມາເກົ໊າ ເວົ້າກັບວີໂອເອ ຜ່ານລະບົບ Skype ທາງອິນເທີເນັດວ່າ
ແຕ່ທ່ານ ຊີ ຈິ້ນຜິງ ນັ້ນ ເຄີຍມີປະສົບປະການອັນຕໍ່າຕ້ອຍ ທີ່ເຮັດໃຫ້ທ່ານມີຄວາມແຕກ
ຕ່າງໄປຈາກຄົນອື່ນໆ. ທ່ານຫວັງ ກ່າວຕື່ມວ່າ:
“ບິດາຂອງທ່ານສີ ຖືກກວດລ້າງປາບປາມໃນລະຫວ່າງການປະຕິວັດວັດທ
ນະທໍາ ແລະດ້ວຍເຫດນີ້ ທ່ານ ຊີ ຈຶ່ງໄດ້ຮັບຄວາມເດືອດຮ້ອນເຊັ່ນກັນ ແລະ
ຕ້ອງໄດ້ຍ້າຍໜີໄປຢູ່ໃນຊົນນະບົດ.”
ທ່ານ ຊີ ຖືກສົ່ງໄປຢູ່ບ້ານ Liangjiahe ແຂວງ Shaanxi ເວລາມີ ອາຍຸໄດ້ 15 ປີ.
ຮູບຂອງທ່ານ ຊີ ທີ່ມີຊື່ສຽງໃນເວລານີ້ ມີຫ້ອຍຢູ່ຕາມຝາເຮືອນຂອງທ່ານ Shi
Chunyang ເລຂາພັກປະຈໍາໝູ່ບ້ານ.
ນາຍ Shi Yudong ຊາວບ້ານໆ Liangjiahe ຮູ້ຈັກທ່ານສີ ໃນເວລານັ້ນແລະເວົ້າວ່າ
ທ່ານ ສີ ເປັນຄົນມີບຸກຄະລິກທີ່ໜ້າປະທັບໃຈ. ລາວເວົ້າວ່າ:
“ຂ້ອຍມີຄວາມຮູ້ສຶກວ່າ ເນຶ່ອງຈາກວ່າ ທ່ານສີໄດ້ໄຕ່ເຕົ້າຂຶ້ນມາຈາກຊົນນະ
ບົດ ທ່ານກໍຄົງຈະຮູ້ບາງສິ່ງບາງຢ່າງກ່ຽວກັບການສໍ້ລາດບັງຫລວງ. ສະນັ້ນ
ກໍຫວັງກັນວ່າ ທ່ານຈະເຮັດແນວໃດແນວນຶ່ງກ່ຽວກັບບັນຫານີ້.”
ທ່ານ ຊີໄດ້ເຂົ້າຮັບໃຊ້ໃນກອງທັບ ແລະຕໍ່ມາໄດ້ເປັນເຈົ້າແຂວງໆຟູຈຽນ ທີ່ຕັ້ງຢູ່ໃນຈີນ
ແຜ່ນດິນໃຫຍ່ ຄົນລະຟາກນໍ້າກັບ ເກາະໄຕ້ຫວັນ.
ປະສົບການເຫລົ່ານັ້ນໄດ້ປູທາງໃຫ້ທ່ານກ້າວຂຶ້ນມາວົງການການເມືອງຢ່າງລາບລື່ນດີ ແລະ
ເຮັດໃຫ້ທ່ານມີຊື່ສຽງຢູ່ພາຍໃນປະເທດ. ທ່ານ Xiong Zhiyong ອາຈານສອນວິຊາການ
ທູດ ປະຈໍາວິທະຍາໄລກິດຈະການຕ່າງປະເທດຂອງປັກກິ່ງ ກ່າວວ່າ ເຖິງແມ່ນວ່າ ການກ້າວ
ຂຶ້ນມາສູ່ຕໍາແໜ່ງປະທານປະເທດຂອງທ່ານຊີໄດ້ຮັບການຄໍ້າປະກັນໄວ້ແລ້ວກໍຕາມ ແຕ່ເລື່ອງ
ທີ່ວ່າທ່ານຈະສືບຕໍ່ໄດ້ຮັບຄວາມນິຍົມຊົມຊອບ ຕໍ່ໄປຫລືບໍ່ນັ້ນ ແມ່ນບໍ່ມີຫຍັງຄໍ້າປະກັນໄດ້.
ທ່ານ Xiong Zhiyong ເວົ້າວ່າ:
“ມັນບໍ່ສໍາຄັນເລີຍວ່າ ໃຜຈະມັກຫລືບໍ່ມັກເພິ່ນ. ທຸກໆຄົນກໍຮູ້ຢູ່ແລ້ວວ່າທ່ານ ຊີ
ຈິນຜິງ ຈະໄດ້ເປັນປະທານປະເທດຈີນຄົນຕໍ່ໄປ. ແຕ່ ໃນເລຶ່ອງທີ່ວ່າປະຊາຊົນ
ມັກນະໂຍບາຍຕ່າງໆຂອງເພິ່ນຫລືບໍ່ນັ້ນ ມັນໄວເກີນໄປທີ່ຈະ ເວົ້າໄດ້.”
ທ່ານ ຊີ ເຄີຍໄດ້ສະແດງຄວາມເຫັນແບບດຽວກັນກັບພວກຜູ້ນໍາຈີນຄົນອື່ນໆ ໃນການເວົ້າ
ເຖິງຄວາມປາດຖະໜາຂອງພວກເຂົາເຈົ້າ ທີ່ຢາກມີການຮ່ວມມືອັນໃກ້ຊິດກັບສະຫະລັດ. ໃນ
ເດືອນມັງກອນຜ່ານມານີ້ ທ່ານຊີ ໄດ້ເວົ້າເຖິງບັນຫາສໍາຄັນຫລາຍປະການຂອງໂລກ ທີ່ທັງ
ສອງປະເທດກໍາລັງປະຕິບັດງານຮ່ວມກັນ ເພື່ອຫາທາງແກ້ໄຂນັ້ນ ຊຶ່ງທ່ານເວົ້າວ່າ:
“ພວກເຮົາໄດ້ມີການໂອ້ລົມສົນທະນາກັນຢ່າງໃກ້ຊິດ ກ່ຽວກັບວິກິດການ
ການເງິນຂອງລະຫວ່າງຊາດ ສະພາວະດິນຟ້າອາກາດປ່ຽນແປງ ບັນຫາ
ແຫລມເກົາຫລີ ແລະໂຄງການນີວເຄລຍຂອງອິຣ່ານ. ເວລານີ້ ຄວາມຮ່ວມ
ມືແລະການປະສານງານກັນ ລະຫວ່າງຈີນແລະສະຫະລັດ ແຮ່ງມີບົດ
ບາດອັນສໍາຄັນຂຶ້ນກວ່າເກົ່າ ໃນການສົ່ງເສີມສັນຕິພາບ ສະຖຽນລະພາບ
ແລະຄວາມຈະເຣີນຮຸ່ງເຮືອງຂອງໂລກ.”
ເຖິງແມ່ນວ່າ ການຢ້ຽມຢາມຂອງທ່ານ ຊີ ຄັ້ງນີ້ ເປັນການເນັ້ນຍໍ້າເຖິງຄວາມຮ່ວມມືກັນ
ທີ່ກ່າວມານັ້ນກໍຕາມ ແຕ່ກໍຍັງມີຫລາຍຈຸດທີ່ບໍ່ເຫັນພ້ອມກັນຢ່າງຮຸນແຮງຢູ່ ຊຶ່ງໂຮມທັງ
ການກ່າວຫາຂອງສະຫະລັດ ທີ່ວ່າຈີນທໍາການປາບປາມ ຢູ່ໃນຂົງເຂດຕ່າງໆຂອງຊົນ
ເຜົ່າທິເບດນັ້ນ ພ້ອມກັບການ ປະເຊີນໜ້າກັນ ກ່ຽວກັບເລື່ອງຊີເຣຍ ແລະນະໂຍບາຍ
ໃນດ້ານການຄ້າແລະເງິນຕາຂອງຈີນນັ້ນ.
ເບິ່ງລາຍງານພາສາອັງກິດ:
