ກຸ່ມບໍລິສັດຈາກຈີນ ທີ່ລົງທຶນໃນເຂດເສດຖະກິດສະເພາະ
ສາມຫລ່ຽມຄຳ ໄດ້ດັດແກ້ສັນຍາສຳປະທານ ໂດຍທາງການ
ລາວ ອະນຸຍາດໃຫ້ຂະຫຍາຍພື້ນທີ່ ຈາກ 827 ເຮັກຕາ ເປັນ
3,000 ເຮັກຕາ.
ການລົງນາມໃນສັນຍາສຳປະທານສະບັບດັດແກ້ໃໝ່ ຂອງເຂດເສດຖະກິດສະເພາະ
ສາມຫລ່ຽມຄຳ ໄດ້ມີຂຶ້ນຢ່າງເປັນທາງການ ເມື່ອບໍ່ນານມານີ້ ຢູ່ທີ່ນະຄອນຫລວງວຽງຈັນ
ໂດຍເປັນການລົງນາມຮ່ວມກັນ ລະຫວ່າງທ່ານສົມດີ ດວງດີ ລັດຖະມົນຕີວ່າການ
ກະຊວງແຜນການ ແລະການລົງທຶນ ກັບທ່ານເຈົ້າ ເຫວີ່ຍ ປະທານກຸ່ມບໍລິສັດ Kings
Roman International ຈຳກັດຈາກຈີນ ໂດຍມີ ທ່ານສົມສະຫວາດ ເລັ່ງສະຫວັດ
ຮອງນາຍົກລັດຖະມົນຕີ ຜູ້ຊີ້ນຳຂົງເຂດເສດຖະກິດການຜະລິດ ແລະການຈະລາຈອນ
ໃນຖານະປະທານຄະນະກຳມະການແຫ່ງຊາດ ເພື່ອຄຸ້ມຄອງເຂດເສດຖະກິດພິເສດແລະ ເຂດເສດຖະກິດສະເພາະນັ້ນ ເປັນສັກຂີພະຍານ.
ໂດຍສັນຍາສຳປະທານສະບັບດັດແກ້ໃໝ່ນີ້ ໄດ້ມີການຂະຫຍາຍພື້ນທີ່ໃນເຂດສຳປະທານ ເພີ້ມຂຶ້ນຈາກ 827 ເຮັກຕາເປັນທັງໝົດ 3,000 ເຮັກຕາ ກໍຄືເພີ້ມຂຶ້ນຈາກເດີມເຖິງ 2,173 ເຮັກຕາ ທີ່ຈະຮອງຮັບໂຄງການພັດທະນາຕ່າງໆ ຈຳນວນທັງໝົດ 14 ໂຄງການ ເຊັ່ນໂຄງການກໍ່ສ້າງສະໜາມບິນສາກົນ ສະໜາມກອຟ໌ ໂຄງການພັດທະນາແຫລ່ງທ່ອງທ່ຽວຢູ່ດອນຊາວ ການພັດທະນາເຂດທີ່ເຊື່ອມຕໍ່ເມືອງເກົ່າສຸວັນນະໂຄມຄຳ ແລະໂຄງການອື່ນໆ ດ້ວຍເງິນລົງທຶນລວມເຖິງ 1,000 ລ້ານດອນລາ ຫຼື 8,000 ຕື້ກີບ.
ການພັດທະນາເຂດເສດຖະກິດສະເພາະສາມຫລ່ຽມຄຳເປັນການຮ່ວມທຶນ ລະຫວ່າງ
ບໍລິສັດຈາກຈີນ ກັບທາງການລາວໃນສັດສ່ວນ 80 ເປີເຊັນ ແລະ 20 ເປີເຊັນ ຫາກແຕ່
ສຳຫລັບພື້ນທີ່ສຳປະທານ ທີ່ເພີ້ມຂຶ້ນຕາມການດັດແກ້ສັນຍາໃນຄັ້ງນີ້ ໃຫ້ຖືເປັນສັນຍາ
ສະເພາະແຍກຕ່າງຫາກ ທີ່ຢູ່ບົນພື້ນຖານການຮັບປະກັນສິດທິ ແລະຜົນປະໂຫຍດຂອງ
ປະຊາຊົນລາວ ລັດຖະບານລາວ ແລະຜູ້ລົງທຶນຢ່າງຍຸດຕິທຳ.
ນອກຈາກນັ້ນ ການດັດແກ້ສັນຍາສຳປະທານໃນຄັ້ງນີ້ ກໍຍັງໄດ້
ມີການຈັດຕັ້ງຄະນະບໍລິຫານ ທີ່ປະກອບດ້ວຍຜູ້ຕ່າງໜ້າຂອງ
ຝ່າຍລັດຖະບານລາວ ກັບຝ່າຍຜູ້ລົງທຶນຂຶ້ນມາຮ່ວມກັນຮັບຜິດ
ຊອບການບໍລິຫານ ແລະການຄຸ້ມຄອງໂຄງການທີ່ມີຄວາມ
ຄ່ອງໂຕ ມີຄວາມໂປ່ງໄສທີ່ສາມາດກວດສອບໄດ້ ແລະແບ່ງ
ຄວາມຮັບຜິດຊອບ ໃນຂອບເຂດສິດທິ ແລະພາລະບົດບາດ
ຢ່າງຊັດເຈນອີກດ້ວຍ.
ແຕ່ຢ່າງໃດກໍຕາມ ມີລາຍງານກ່ອນໜ້ານີ້ວ່າ ກຸ່ມບໍລິສັດຈາກ
ຈີນໄດ້ໃຫ້ການຢືນຢັນ ຕໍ່ຄະນະລັດຖະບານລາວ ຢ່າງເປັນ
ທາງການແລ້ວວ່າ ຂະບໍ່ເປັນຜູ້ລົງທຶນ 100 ເປີເຊັນ ໃນການກໍ່ສ້າງສະໜາມບິນນາໆຊາດຢູ່ໃນເຂດເສດຖະກິດສະເພາະສາມຫລ່ຽມຄຳ ແຕ່ຈະຂໍເປັນຜູ້ຮ່ວມລົງທຶນ ໃນສັດສ່ວນບໍ່ເກີນ 30 ເປີເຊັນ ຂອງມູນຄ່າການລົງທຶນທັງໝົດເທົ່ານັ້ນ.
ໂດຍພ້ອມກັບການຢືນຢັນດັ່ງກ່າວນີ້ ກຸ່ມບໍລິສັດຈາກຈີນຍັງໄດ້ສະເໜີໃຫ້ລັດຖະບານລາວ ເປັນຝ່າຍທີ່ຈະຕ້ອງລົງທຶນໃນສັດສ່ວນບໍ່ຕ່ຳກວ່າ 70 ເປີເຊັນ ໃນໂຄງການ ທີ່ຈະຕ້ອງລົງທຶນລວມເຖິງ 500 ລ້ານດອນລາ ແລະຖ້າຫາກວ່າ ລັດຖະບານລາວ ບໍ່ມີເງິນທຶນ ທາງກຸ່ມບໍລິສັດຈາກຈີນ ກໍພ້ອມຈະໃຫ້ການສະໜັບສະໜຸນ ເງິນທຶນກູ້ຢືມລະຍະຍາວ ໃນມູນຄ່າລວມບໍ່ເກີນ 350 ລ້ານດອນລາຕໍ່ໄປ.
ທັງນີ້ ໂດຍມີຄວາມເປັນໄປໄດ້ສູງ ທີ່ທາງການລາວຈະຍິນຍອມຕາມເງື່ອນໄຂດັ່ງກ່າວ
ຂອງກຸ່ມບໍລິສັດຈາກຈີນ ເພາະລັດຖະບານລາວຖືກສະຖາບັນການເງິນຕ່າງຊາດຈຳກັດ
ການກູ້ຢືມ ເນື່ອງຈາກມີໜີ້ຕ່າງປະເທດເກີນກວ່າ 45 ເປີເຊັນ ຂອງຍອດຜະລິດຕະພັນ
ລວມພາຍໃນແລ້ວ ດັ່ງທີ່ເຈົ້າໜ້າທີ່ຂັ້ນສູງຂອງລາວ ໄດ້ຊີ້ແຈງວ່າ:
“ຍັງມີສິ່ງທ້າທາຍ ແລະຂໍ້ຫຍຸ້ງຍາກຫຼາຍ ອັນທາງດ້ານການລົງທຶນ ສະພາບແວດ
ລ້ອມການດຳເນີນທຸລະກິດ ແລະການລົງທຶນຢູ່ໃນລາວນີ້ ຍັງຢູ່ໃນລະດັບຕ່ຳ ຖ້າ
ທຽບໃສ່ປະເທດອື່ນໆໃນໂລກ ບັນຫາທີ່ຕົ້ນຕໍທີ່ໄດ້ສະແດງຈາກນັກທຸລະກິດອັນ
ດັບທີໜຶ່ງ ແມ່ນບັນຫາໃນການເລີ້ມຕົ້ນທຸລະກິດ ແລະຄວາມຫຍຸ້ງຍາກໃນການ
ເຈາະຫາແຫລ່ງທຶນ.”
ທາງດ້ານນັກການທະນາຄານຕ່າງຊາດໃນລາວ ໄດ້ໃຫ້ທັດສະນະວ່າ ກ່ານສະເໜີເງື່ອນ
ໄຂດັ່ງກ່າວນີ້ ນັບເປັນຄວາມສະຫລາດຂອງກຸ່ມບໍລິສັດຈາກຈີນ ທີ່ສວຍໃຊ້ໂອກາດ ທີ່
ລັດຖະບານລາວ ກຳລັງຕົກຢູ່ໃນສະພາບການ ຂາດເຂີນງົບປະມານນັ້ນ ມາເປັນຂໍ້ໄດ້
ປຽບໃນການຕໍ່ລອງທາງທຸລະກິດ ທັງໆທີ່ສະໜາມບິນ ທີ່ມີແຜນການຈະກໍ່ສ້າງດັ່ງກ່າວນີ້
ຖືເປັນຜົນປະໂຫຍດໂດຍກົງ ຂອງກຸ່ມບໍລິສັດຈາກຈີນ ເພາະວ່າຄົນທີ່ຈະໃຊ້ບໍລິການ
ສະໜາມບິນ ກໍຄືຊາວຕ່າງຊາດ ທີ່ເດີນທາງມາທ່ອງທ່ຽວ ແລະຫລິ້ນການພະນັນ ຢູ່ໃນ
ເຂດເສດຖະກິດສະເພາະສາມຫລ່ຽມຄຳ ທີ່ລົງທຶນໂດຍກຸ່ມບໍລິສັດຈາກຈີນນັ້ນເອງ.
