ການລ່ວງລ້ຳໂດຍເຮືອບິນສອດແນມຂອງ ຈີນ ເຂົ້າໄປໃນເຂດນ່ານຟ້າຂອງ ຍີ່ປຸ່ນ ເປັນການ “ຮຽກຮ້ອງໃຫ້ຕື່ນໂຕ” ສໍາລັບ ໂຕກຽວ ກ່ຽວກັບລັກສະນະ ຂອງການຮຸກຮານຈາກການນໍາຂອງ ຈີນ, ສະມາຊິກລັດຖະສະພາສະຫະລັດ ທ່ານ ຈອນ ມູເລນາ (John Moolenaar), ເຊິ່ງເປັນປະທານຄະນະກໍາມະ ການຂອງສະພາຕໍ່າ ໄດ້ອອກມາກ່າວໃນວັນພຸດວານນີ້.
ເຫດການທີ່ເກີດຂຶ້ນໃນວັນຈັນດັ່ງກ່າວນີ້ ກ່ຽວຂ້ອງກັບເຮືອບິນສອດແນມ Y-9 ທີ່ບິນໃກ້ກັບເກາະ ຄິວຊູ (Kyushu) ທີ່ຕັ້ງຢູ່ທາງພາກໃຕ້ຂອງປະເທດ, ໂດຍເປັນຄັ້ງທຳອິດທີ່ເຮືອບິນຂອງກອງທັບຈີນໄດ້ລ່ວງລະເມີດເຂົ້າເຂດນ່ານຟ້າຂອງ ຍີ່ປຸ່ນ, ເຊິ່ງລັດຖະບານໂຕກຽວໄດ້ກ່າວຕໍ່ລັດຖະບານປັກກິ່ງວ່າ “ເປັນທີ່ຍອມຮັບບໍ່ໄດ້ທີ່ສຸດ.”
ກະຊວງການຕ່າງປະເທດຈີນກ່າວໃນວັນອັງຄານແລ້ວນີ້ວ່າ ຕົນຍັງຄົງທໍາຄວາມ ພະຍາຍາມເຂົ້າໃຈກ່ຽວກັບສະຖານະການດັ່ງກ່າວນີ້ຢູ່.
ທ່ານ ມູເລນາ, ຜູ້ທີ່ເປັນສະມາຊິກຈາກພັກຣີພັບບລີກັນໃນສະພາຕໍ່າ, ກ່າວໃນ ການໃຫ້ສໍາພາດຢູ່ນະຄອນຫຼວງໂຕກຽວໃນວັນພຸດວານນີ້ວ່າ “ພວກເຮົາໄດ້ເຫັນ ຈີນ ມີຄວາມແຕກຕ່າງຫຼາຍໃນຊ່ວງບໍ່ເທົ່າໃດປີທີ່ຜ່ານມາ ແລະຄໍາຖາມກໍແມ່ນ ວ່າ ອັນໃດຄືວິທີທີ່ດີທີ່ສຸດທີ່ຈະຂັດຂວາງການຮຸກຮານ ແລະການດໍາເນີນກິດ ຈະກໍາທີ່ເປັນອັນຕະລາຍໃນອະນາຄົດ.
ການຢ້ຽມຢາມ ຍີ່ປຸ່ນ ຂອງທ່ານ, ເຊິ່ງລວມມີສະມາຊິກຄະນະກໍາມະການສອງ ຝ່າຍຫຼາຍກວ່າ 6 ຄົນ ທີ່ໄດ້ພິຈາລະນາກ່ຽວກັບຫົວຂໍ້ຕ່າງໆ ນັບຕັ້ງແຕ່ການ ສົ່ງອອກສານເຄມີຕົ້ນ ເຟນຕານອລ ຂອງ ຈີນ ຈົນຮອດອິດທິພົນຂອງປັກກິ່ງ ຕໍ່ທຸລະກິດຕ່າງໆຂອງສະຫະລັດ, ເຊິ່ງມີຂຶ້ນໃນຂະນະທີ່ລັດຖະບານຂອງປະ ທານາທິບໍດີ ໂຈ ໄບເດັນ ພະຍາຍາມເພື່ອຂະຫຍາຍການຈໍາກັດການສົ່ງອອກ ອຸປະກອນການຜະລິດເຊມີຄອນດັກເຕີ.
ໃນຂະນະດຽວກັນ, ຍີ່ປຸ່ນ ໄດ້ເຮັດວຽກກັບພັນທະມິດສະຫະລັດ ຂອງຕົນເພື່ອ ຈໍາກັດການຂົນສົ່ງດ້ານເທັກໂນໂລຢີດັ່ງກ່າວ, ບໍ່ຄືກັບວໍຊິງຕັນ, ພວກເຂົາເຈົ້າ ໄດ້ຫຼີກລ່ຽງການຫ້າມການຄ້າທີ່ວາງເປົ້າໝາຍໂດຍກົງຕໍ່ປະເທດເພື່ອນບ້ານ ແລະຄູ່ຄ້າທີ່ໃຫຍ່ທີ່ສຸດຂອງຕົນ.
ຟໍຣັມສະແດງຄວາມຄິດເຫັນ