ສະມາຄົມປ້ອງກັນໂຣກຫົວໃຈອາເມຣິກັນ ແລະສາທາລະນະລັດ
ປະຊາຊົນຈີນ ໄດ້ຮັບຮອງເອົາຢ່າງເປັນທາງການ ເມື່ອໄວໆມານີ້
ການເປັນພາຄີຮ່ວມກັນ ທີ່ໄດ້ໃຊ້ໃນການເຈລະຈາຕໍ່ລອງມາ
ເປັນເວລາຫຼາຍປີແລ້ວນັ້ນ. ຜູ້ສື່ຂ່າວວີໂອເອ Carol Pearson
ລາຍງານເລື້ອງຂອງການເປັນພາຄີດັ່ງກ່າວ ທີ່ອາດເປັນຜົນດີ
ໃນການປັບປຸງຄວາມຮູ້ ກ່ຽວກັບເລື້ອງໂຣກຫົວໃຈ ແລະໂຣກ
ລົມສາລະບາດ ເຊິ່ງຈະເປັນປະໂຫຍດໃຫ້ແກ່ໂລກທັງມວນ.
ໄຊຈະເລີນສຸກ ຈະນຳເອົາເລື້ອງນີ້ ມາສະເໜີທ່ານ ໃນອັນດັບ
ຕໍ່ໄປ.
ທ່ານ Jin Xiaoming ແມ່ນຜູ້ອຳນວຍການ ກ່ຽວກັບການຮ່ວມມືນາໆຊາດ ປະຈຳກະຊວງ
ວິທະຍາສາດແລະເທັກໂນໂລຈີຂອງຈີນ.
ພິທີລົງນາມ ໃນຂໍ້ຕົກລົງ ຢູ່ທີ່ວໍຊິງຕັນ ລະຫວ່າງ ສະມາຄົມປ້ອງກັນໂຣກຫົວໃຈອາເມຣິກັນ
ແລະ ສາທາລະນະລັດ ປະຊາຊົນຈີນ ຖືເປັນຂັ້ນຕອນສຸດທ້າຍຂອງຂໍ້ຕົກລົງ.
ຂໍ້ຕົກລົງດັ່ງກ່າວ ຈະສະໜອງ ການເຝິກອົບຮົມ ໃນການຊ່ອຍໃຫ້ຜູ້ ທີ່ເປັນຫົວໃຈວາຍ
ຟື້ນຊີບຄືນ ຫຼື cardiopulmonary resuscitation ທີ່ເອີ້ນຫຍໍ້ວ່າ CPR ໂດຍທີ່ຜູ້ຄົນ ທົ່ວໄປ ກໍສາມາດປະຕິບັດໄດ້. ສະມາ ຄົມປ້ອງກັນໂຣກຫົວໃຈ ອາເມຣິກັນ ກ່າວວ່າ ການ
ຊ່ວຍເຫຼືອດ້ວຍວິທີໃຫ້ CPR ໃນທັນທີ ແກ່ຜູ້ເປັນຫົວໃຈວາຍນີ້ ສາມາດເຮັດໃຫ້ໂອກາດ
ທີ່ຈະລອດຊີວິດໄດ້ ເພີ້ມຂຶ້ນເປັນ 2 ຫາ 3 ເທົ່າ. ຖ້າປາດສະຈາກ ການຊ່ວຍເຫຼືອດ້ວຍ
ການໃຫ້ CPR ແລ້ວ ໂອກາດທີ່ຈະເສຍຊີວິດ ເພີ້ມຂຶ້ນ 10 ເປີເຊັນ ໃນແຕ່ລະນາທີ
ທີ່ຜ່ານໄປ.
ຂໍ້ຕົກລົງສະບັບນີ້ ຍັງສະໜອງໃຫ້ມີການແລກປ່ຽນ ບັນດານາຍແພດ, ນັກຊ່ຽວຊານດ້ານ
ສາທາລະນະສຸກ ແລະ ນັກວິທະຍາສາດ ເພື່ອເຮັດ ວຽກຄຽງບ່າຄຽງໄຫລ່ ກັບຄູ່ຕຳແໜ່ງ
ຢູ່ໃນທັງ ສະຫະລັດ ແລະ ຈີນ. ຜົນທີ່ໄດ້ຮັບ ແມ່ນຄາດກັນວ່າ ຈະເສີມຂະຫຍາຍ ຄວາມຮູ້
ທາງວິທະຍາສາດ ກ່ຽວກັບໂຣກຫົວໃຈ ແລະເສັ້ນເລືອດຕັນ ທີ່ສາມາດແບ່ງປັນ ໃຫ້ແກ່
ບັນດາພະນັກງານ ສາທາລະນະສຸກ ໃນທົ່ວໂລກ.
ທ່ານ Douglas Boyle ຈາກສະມາຄົມປ້ອງກັນໂຣກຫົວໃຈ ອາເມຣິກັນ ກ່າວຖະແຫລງ
ກ່ຽວກັບ ການແລກປ່ຽນນີ້ ຢູ່ໃນພິທີ ລົງນາມໃນຂໍ້ຕົກລົງດັ່ງກ່າວ.
ທ່ານ Boyle ເວົ້າວ່າ “ພວກເຮົາ ເຊື່ອວ່າ ຖ້າມີຄວາມພ້ອມພຽງກັນ ພວກເຮົາ
ສາມາດປ່ຽນ ສິ່ງເຫຼົ່ານັ້ນໄດ້ ໂດຍການສ້າງໂລກ ທີ່ມີແຕ່ການຊ່ວຍເຫຼືອ ຮັກສາ
ຊີວິດ, ໂລກບ່ອນທີ່ໝົດທຸກຄົນ ສາມາດດຳລົງຊີວິດ ດ້ວຍສຸຂະພາບທີ່ດີຂຶ້ນ ແລະ
ມີຊີວິດທີ່ຍືນຍາວ.”
ໂຣກຫົວໃຈ ແລະ ເສັ້ນເລືອດຕັນ ເປັນສາເຫດອັນດັບໜຶ່ງ ທີ່ເຮັດໃຫ້ມີການເສຍຊີວິດ
ໃນທົ່ວໂລກ. ສາມສ່ວນສີ່ຂອງການເສຍຊີວິດເຫຼົ່ານີ້ ແມ່ນເກີດຂຶ້ນຢູ່ໃນພວກປະເທດ ທີ່ມີ
ປະຊາຊົນທີ່ມີລາຍໄດ້ຕ່ຳ ແລະ ປານກາງ ແລະ ການສຶກສາຄົ້ນຄວ້າສະແດງໃຫ້ເຫັນວ່າ
ຈຳນວນຕົວເລກຂອງຜູ້ເສຍຊີວິດ ແມ່ນຄາດກັນວ່າ ຈະເພີ້ມສູງຂຶ້ນເລື້ອຍໆ. ອັນນັ້ນ
ສ່ວນໃຫຍ່ ເປັນຍ້ອນການປ່ຽນແປງ ໃນການດຳລົງຊີວິດຂອງປະຊາຊົນ.
ນາຍແພດ Sidney Smith Jr. ຊ່ຽວຊານດ້ານໂຣກຫົວໃຈ ເວົ້າວ່າ “ພວກເຂົາເຈົ້າ ກິນ
ອາຫານ ໄວທັນໃຈ. ພວກເຂົາເຈົ້າອອກກຳລັງກາຍ ໜ້ອຍລົງ. ພວກເຂົາເຈົ້າ
ສູບຢາ. ແລະ ໄດ້ມີການປ່ຽນແປງດ້ານ ການດຳລົງຊີວິດຢ່າງແທ້ຈິງ ຊຶ່ງກ່ອນໜ້າ
ນີ້ ແມ່ນວ່າ ມີສຸຂະພາບຂ້ອນຂ້າງດີ ແລະ ໄດ້ຮັບການປົກປ້ອງສ່ວນໃດສ່ວນໜຶ່ງ
ຈາກປັດໄຈ ທີ່ເປັນຄວາມສຽງນັ້ນ.”
ນາຍແພດ Sidney Smith, Jr. ເຄີຍເປັນອະດີດ ປະທານສະຫະ ພັນປ້ອງກັນໂຣກຫົວໃຈ
ຂອງໂລກ ຫຼື World Heart Federation. ທ່ານກ່າວວ່າ ບັນດານາຍແພດ ສາມາດຮັກສາ
ປິ່ນປົວ ໂຣກຫົວໃຈ ແລະເສັ້ນເລືອດຕັນ ດ້ວຍຢາ ເພື່ອແກ້ໄຂ ຄວາມດັນຂອງເລືອດສູງ
ແລະ ໄຂມັນສູງ ແລະ ບັນຫາອື່ນໆອີກ ແຕ່ບັນດານາຍແພດໂຣກຫົວໃຈ ສ່ວນໃຫຍ່ ຄືກັບ
ນາຍແພດ Gordon Tomaselli ກ່າວວ່າ ເຮົາສາມາດແກ້ໄຂໄດ້ຫຼາຍກວ່ານີ້ອີກ.
ນາຍແພດ Gordon Tomaselli ຈາກໂຮງໝໍ Johns Hopkins ພະແນກຢາ ເວົ້າວ່າ
“ພວກເຮົາ ເຮັດວຽກທີ່ສຳຄັນ ໃນອັນທີ່ເອີ້ນວ່າ ‘ການປ້ອງກັນອັນດັບສອງ’ ແລະ
ຮັກສາປິ່ນປົວ ໂຣກຫົວໃຈ ໃນເມື່ອມັນໄດ້ເກີດຂຶ້ນແລ້ວ. ພວກເຮົາ ຈະທຳງານໄດ້
ດີຫຼາຍຂຶ້ນ ກວ່ານີ້ອີກ ມັນຈະມີປະສິດທິພາບຫຼາຍຂຶ້ນອີກ ຖ້າພວກເຮົາ ປ້ອງກັນ
ໂຣກຫົວໃຈໄດ້ ຕັ້ງແຕ່ຕົ້ນໆ.”
ໂຣກຫົວໃຈ ສ່ວນໃຫຍ່ແລ້ວ ແມ່ນປ້ອງກັນໄດ້ທັງໝົດ. ເພາະສະນັ້ນ ການສຶກສາອົບຮົມ ໃຫ້ສາທາລະນະຊົນຮູ້ ກ່ຽວກັບຜົນປະໂຫຍດຕ່າງໆ ຂອງການອອກກຳລັງກາຍ ຫຼັງຈາກກິນອາຫານອີ່ມແລ້ວ ແລະ ບໍ່ສູບຢາ ແມ່ນເປັນສິ່ງທີ່ສຳຄັນ ໃນການປ້ອງກັນນັ້ນ ເຊັ່ນດຽວກັນກັບ ຄວາມພະຍາຍາມ ທີ່ຈະຫລຸດຜ່ອນ ອັນຕະລາຍຕ່າງໆ ຈາກສະພາບແວດລ້ອມ ຄືມົນລະພິດໃນອາກາດ. ສ່ວນທີ່ເຫຼືອນັ້ນ ແມ່ນການຮຽນຮູ້ກ່ຽວກັບເລື້ອງຫົວໃຈ ແລະ ລະບົບການທຳງານຂອງມັນ, ວິທີເຮັດແນວໃດ ໃຫ້ມັນທຳງານຢ່າງສະດວກສະບາຍ ແລະ ວິທີຊ່ວຍເຫຼືອ ໃນເວລາທີ່ມັນບໍ່ທຳງານ.
