ລິ້ງ ສຳຫລັບເຂົ້າຫາ

ວັນພຸດ, ໑໙ ມິຖຸນາ ໒໐໒໔

ຈີນ​ ກັບ 21 ປະ​ເທດ ຮ່ວມກັນ​ສ້າງ​ຕັ້ງ​ ທະນາຄານ​ພັດທະນາ ​ໂຄງ​ລ່າງ​ພື້ນຖານ​ ຂອງ​ເອ​ເຊຍ ​(ວີດີໂອ ຮຽນພາສາອັງກິດ)


ປະທານປະເທດຈີນ ທ່ານ Xi Jinping (ກາງ) ຮ່ວມກັບແຂກ ໃນພິທີລົງນາມ ການສ້າງຕັ້ງ ທະນາຄານລົງທຶນ ດ້ານໂຄງລ່າງພື້ນຖານຂອງເອເຊຍ ຢູ່ສາລາປະຊາຊົນ ໃນນະຄອນຫລວງປັກກິ່ງ, ວັນທີ 24 ຕຸລາ 2014.
ປະທານປະເທດຈີນ ທ່ານ Xi Jinping (ກາງ) ຮ່ວມກັບແຂກ ໃນພິທີລົງນາມ ການສ້າງຕັ້ງ ທະນາຄານລົງທຶນ ດ້ານໂຄງລ່າງພື້ນຖານຂອງເອເຊຍ ຢູ່ສາລາປະຊາຊົນ ໃນນະຄອນຫລວງປັກກິ່ງ, ວັນທີ 24 ຕຸລາ 2014.

ຈີນ​ກັບ​ອີກ 21 ປະ​ເທດ ​ໄດ້​ຕົກລົງ​ກັນ ທີ່​ຈະ​ສ້າງ​ຕັ້ງທະນາຄານ
​ພັດທະນາ​ໃໝ່ຂຶ້ນ​ມາ ​ເພື່ອ​ສະໜອງ​ທຶນ​ໃຫ້​ແກ່ໂຄງການ​ກໍ່ສ້າງ​
ໂຄງ​ລ່າງ​ພື້ນຖານ​ຕ່າງໆ ​ເຊັ່ນ ຖະໜົນ​ຫົນທາງ ທ່າ​ເຮືອ ​ແລະ​
ທາງ​ລົດ​ໄຟ ​ໃນ​ທົ່ວ​ຂົງ​ເຂດ​ເອ​ເຊຍ. ​ແຕ່​ສະຫະລັດ​ໄດ້​ຕິຕຽນ​ຂໍ້
​ສະ​ເໜີ​ທີ່​ຈະສ້າງ​ຕັ້ງ​ທະນາຄານ​ດັ່ງກ່າວ ​ແລະ​ສາມ​ປະ​ເທດ​ທີ່​
ຖືກເຊື້ອ​ເຊີນ​ໃຫ້​ເຂົ້າ​ຮ່ວມ ​ໄດ້​ປະຕິ​ເສດ. ດາຣາມີ​ລາຍ​ລະອຽດ
​ມາສະ​ເໜີ​ທ່ານ ຈາກ​ລາຍງານ​ຂອງ​ນັກ​ຂ່າວ​ວີ​ໂອ​ເອ Shannon
Van Sant ທີ່​ປັກ​ກິ່ງ.

ເບິ່ງວີດີໂອ ຮຽນພາສາອັງກິດ ກ່ຽວກັບລາຍງານນີ້:

ຈີນ​ແລະ​ອີກ 21 ປະ​ເທດ ​ໄດ້​ຕົກລົງ​ກັນ ທີ່​ຈະ​ສ້າງ​ຕັ້ງ​ທະນາຄານ​ພັດທະນາ​ລະຫວ່າງ​ປະ
ເທດ​ຂຶ້ນ​ມາ ທີ່ຈະ​ເອີ້ນ​ວ່າ ທະນາຄານ​ລົງທຶນ​ດ້ານ​ໂຄງ​ລ່າງ​ພື້ນຖານ​ຂອງ​ເອ​ເຊຍ ​ຫລື the
Asian Infrastructure Investment Bank ເອີ້ນຫຍໍ້ວ່າ AIIB. ພວກປະເທດ​ສະມາ
ຊິກ ​ແມ່ນ​ມີ​ຮວມທັງ ມຽນມາ ຫວຽດນາມ ສປປ ລາວ ກຳປູ​ເຈຍ ​ແລະ​ຟີ​ລິບ​ປິນ. ​ໃນ​ບັນດາ
ປະ​ເທດເອ​ເຊຍ​ໃຕ້ ກໍ​ມີ ອິນ​ເດຍ ປາ​ກິ​ສຖານ ​ບັງກະລາ​ແດ​ສ ​ແລະ​ເນ​ປາລ.

ທີ່​ປັກ​ກິ່ງ ​ໂຄສົກ​ຍິງຂອງ​ກະຊວງຕ່າງປະ​ເທດ​ຈີນ ທ່ານ​ນາງ Hua Chunying ກ່າວວ່າ
ບັນດາ​ລັດຖະມົນຕີ​ການ​ເງິນຂອງ​ພວກ​ປະ​ເທດ​ສະມາຊິກ ​ແມ່ນ​ມີ​ຄວາມກະ​ລື​ລົ້ນຢາກຈະ
​ເຫັນ​ວ່າ ທະ​ນາຄາ​ນ AIIB ຈະ​ສາມາດ​ຊ່ວຍ​ປັບປຸງ ປະ​ເທດ​ຂອງພວກ​ເຂົາ​ເຈົ້າ​ໃຫ້​ດີ​ຂຶ້ນ
ໄດ້​ແນວ​ໃດ.

ປະທານ​ປະ​ເທດ​ຈີນ ທ່ານ Xi Jinping ​ໄດ້​ພົບ​ປະ​ກັບ​ບັນດາ​ຜູ້​ແທນ​ຂອງ​ໝົດ​ທັງ 21 ປະ
ເທດ ​ແລະກ່າວ​ວ່າ ພວກ​ເຂົາ​ເຈົ້າ​ທັງໝົດ ຕ່າງ​ກໍ​ໄດ້​ສະ​ແດງ​ຄວາມ​ປາດ​ຖະໜາ ທີ່​ຈະດຳ
ເນີນການ​ພັດທະນາ​ຮ່ວມ​ກັນ. ທ່ານ Xi ​ເວົ້າ​ວ່າ ທະນາຄານ AIIB ຈະສະໜັບສະໜຸນ
ການ​ພັດທະນາ​ໃນ​ພາກ​ພື້ນ ​ແລະຈະ​ຮວມ​ເອົາ​ໝົດ​ທຸກ​ພັກ​ຝ່າຍ ​ທັງຈະ​ເປີດ​ກວ້າງ ​ແລະ
​ມີ​ຄວາ​ມ​ໂປ່​ງ​ໃສ.

ແຕ່ສາມ​ປະ​ເທດ​ບໍ່​ໄດ້​ເຂົ້າ​ຮ່ວມ​ນຳ ​ໃນ​ມື້​ເປີດ​ໂຕ​ໂຄງການ​ ​ເມື່ອ​ວັນ​ທີ 24 ​ເດືອນຕຸລານັ້ນ.
ອິນ​ໂອ​ເນ​ເຊຍ ຊຶ່ງ​ເປັນ​ປະ​ເທດ​ທີ່​ມີ​ເສດຖະກິດ​ໃຫຍ່​ທີ່​ສຸດ ໃນ​ເອ​ເຊຍ​ຕາ​ເວັນ​ອອກສຽງໃຕ້
ບໍ່​ໄດ້​ໄປ​ມີໜ້າ ​ເຊັ່ນ​ດຽວ​ກັນກັບ ອອສ​ເຕຣ​ເລຍ ​ແລະ​ເກົາຫລີ​ໃຕ້ ​ເຖິງ​ແມ່ນ​ເກົາຫລີ​ໃຕ້ໄດ້
ກ່າວວ່າ ​ບໍ່​ມີ​ເຫດຜົນ​ອັນ​ໃດ ທີ່ຈະ​ຂັດຂວາງ​ບໍ່​ໃຫ້ຕົນ​ເຂົ້າ​ຮ່ວມ​ໃນ​ທະນາຄານ​ນີ້ ຖ້າຫາກ
ວ່າ​ເງື່ອນ​ໄຂ​ບາງ​ຢ່າງ​ໄດ້​ຮັບ​ການ​ຕອບສະໜອງ.


ກະຊວງ​ການ​ຕ່າງປະ​ເທດ​ສະຫະລັດ ​ໄດ້​ຕິຕຽນ​ຂໍ້​ສະ​ເໜີ​ສ້າງ​ຕັ້ງ​ທະນາຄານ​ພັດທະນາ
ດັ່ງກ່າວຢ່າງໃຫຍ່. ​ໂຄສົກ​ຍິງ​ຂອງ​ກະຊວງ ທ່ານ​ນາງ Jen Psaki ​ກ່າວ​ວ່າ ລັດຖະມົນຕີ
ຕ່າງປະ​ເທດ John Kerry ​ ໄດ້​ກ່າວ​ໃຫ້​ເປັນ​ທີ່​ແຈ່ມ​ແຈ້ງ​ແກ່​ລັດຖະບານ​ຈີນ​ວ່າ ວໍ​ຊິງ​ຕັນ
ຍິນ​ດີ​ນຳ​ແນວ​ຄິດ ທີ່​ຈະ​ສ້າງ​ຕັ້ງທະນາຄານພັດທະນາ​ໂຄງ​ລ່າງ​ພື້ນຖານ ສຳລັບ​ຂົງ​ເຂດ
​ເອ​ເຊຍ​ນັ້ນ ​ແຕ່​ກໍໄດ້​ຊຸກຍູ້ຢ່າງ​ແຂງ​ຂັນວ່າ ທະນາຄານ​ແບບ​ນັ້ນ​ຕ້ອງຈັດ​ຕັ້ງ​ຂຶ້ນໃຫ້​ຖືກ
ຕ້ອງ​ຕາມມາດຕະຖານຂອງ​ສາກົນ ​ໃນ​ດ້ານ​ການ​ປົກຄອງ​ຫລືການ​ບໍລິຫານ​ທີ່​ດີ ​ແລະ
ດ້ານຄວາມ​ໂປ່​ງ​ໃສ ກໍ​ຄື​ການເປີດ​ກ້ວາງ. ທ່ານ​ນາງ Psaki ກ່າວ​ອີກວ່າ ສະຫະລັດ​ມີ
​ຄວາ​ມກັງວົນນຳ ລັກສະນະ​ອັນບໍ່​ແຈ້ງຂາວ​ຂອງ ​ຂໍ້​ສະ​ເໜີ​ກ່ຽວ​ກັບທະນາຄານ AIIB
ຕາມ​ທີ່​ເປັນ​ຢູ່ໃນ​ເວລາ​ນີ້.

ວໍ​ຊິງ​ຕັນຍັງ​ໄດ້​ສະ​ແດງ​ຄວາມ​ເປັນ​ຫ່ວງ​ວ່າ ທະນາຄານ​ດັ່ງກ່າວ​ຈະ​ບັ່ນ​ທອນ ຫລືຂັດແຍ້ງ
ກັນກັບ ທະນາຄານໂລກ ແລະທະນາຄານ​ພັດທະນາ​ເອເຊຍ.

ກະຊວງ​ການ​ຕ່າງປະ​ເທດ​ຈີນ ​ໄດ້​ຖະ​ແຫລ​ງຕອບ​ຕໍ່​ຄຳ​ຕິຕຽນ​ນັ້ນ ​ໂດຍ​ກ່າວ​ວ່າຈຸດປະສົງ
ຂອງ​ທະນາຄານ​ນີ້ ແມ່ນ​ເພື່ອ​ສະໝອງ​ຄວາມຕ້ອງການ​ດ້ານ​ໂຄງ​ລ່າງພື້ນຖານຂອງຂົງ​ເຂດເອເຊຍ.

​ໂຄສົກ Hua Chunying ກ່າວ​ວ່າ ປະ​ເທດ​ຈີນ​ເອົາ​ບາດກ້າວ​ດັ່ງກ່າວ​ນີ້ ກໍ​ເພື່ອ​ສົ່ງ​ເສີມ
ຄວາມ​ເປັນ​ເອກະ​ພາບຂອງ​ຂົງ​ເຂດ ​ແລະ​ວ່າ ທະນາຄານ AIIB ຈະໄປ​ເສີມ​ທະນາຄານ
ອື່ນໆ ບໍ່​ແມ່ນ​ໄປ​ບັ່ນ​ທອນ ຫລື​ບ່ອນ​ທຳລາຍ. ​ໃນ​ເລື່ອງ​ຂອງ​ຄວາມ​ໂປ່​ງ​ໃສ​ນັ້ນ ​ໂຄສົກ
Hua ກ່າວ​ວ່າ ຈີນ​ແລ​ະສະມາຊິກ​ອື່ນໆອີກ 21 ປະ​ເທດ​ນັ້ນ ຈະ​ຮ່ວມ​ມື​ກັນ​ເພື່ອ​ເຮັດ​ໃຫ້
ໂຄງ​ສ້າງ​ທາງ​ການ​ເງິນ​ຂອງ​ທະນາຄານ AIIB ​ເປີດ​ກ້ວາງ ​ແລະຮວມ​ເອົາ​ທຸກ​ພັກ​ຝ່າຍ.

​ຈີນ​ໄດ້​ສະ​ເໜີ​ໃຫ້​ຈັດ​ຕັ້ງທະນາຄານ​ນີ້​ຂຶ້ນ​ ເມື່ອ​ໜຶ່ງ​ປີ​ກ່ອນ ​ແລະ​ຄາດ​ວ່າ ທະນາຄານ​ຈະ
​ເ​ລີ້​ມ​ເປີດ​ດຳ​ເນີນ​ກິດຈະການໃນ​ປີໜ້າ. ນອກ​ນັ້ນ ທະນາຄານ​ນີ້​ຍັງ​ໄດ້​ຕື່ມ​ເຊື້ອ​ໄຟ​ໃສ່
​ຄວາມ​ເປັນ​ຫ່ວງ​ທີ່​ວ່າ ມັນ​ຈະ​ອຳນວຍ​ໃຫ້​ຈີນ​ມີ​ອິດ​ທິພົນ​ຫລາຍ​ຂຶ້ນຢູ່​ໃນ​ເອ​ເຊຍ ​ໂດຍ​ບໍ່​
ຈຳ​ເປັນ. ຈີນ​ຈະ​ເປັນ​ຜູ້​ຖື​ຫຸ້ນ​ລາຍ​ໃຫຍ່​ທີ່​ສຸດ ​ໃນ​ທະນາຄານ​ດັ່ງກ່າວ ຄື 50 ​ເປີ​ເຊັນ ​ແລະ
ຈະປະກອບສ່ວນ 50 ຕື້​ດອລລ່າ ໃສ່​ຕົ້ນ​ທຶນ.​

ບັນດາ​ຜູ້​ສະໜັບສະໜຸນ ຂໍ້​ສະ​ເໜີ​ກ່ຽວ​ກັບ​ແຜນການນີ້ ກ່າວ​ວ່າ ບໍ່​ຄືກັບ​ທະນາຄານ​ໂລກ
ແລະ​ທະນາຄານ​ພັດທະນາ​ເອ​ເຊຍ ທະນາຄາ​ນນີ້ແມ່ນຈະ​ສຸມ​ໃສ່​ໂຄງການ​ກໍ່ສ້າງ​ໂຄງ​ລ່າງ
ພື້ນຖານ​ຕ່າງໆ ​ແທນທີ່​ຈະ​ເພ່ງ​ເລັງໃສ່​ການຫລຸດຜ່ອນ​ຄວາມທຸກ​ຈົນ. ​ໃນ​ປີ 2009 ທະນາ
ຄານພັດທະນາ​ເອ​ເຊຍ ປະ​ເມີນ​ວ່າ ຂົງ​ເຂດ​ເອ​ເຊຍ​ຈະ​ຕ້ອງການ ການ​ລົງທຶນ​ໃສ່​ໂຄງ​ລ່າງ
ພື້ນຖານ ​ເຖິງ 8 ພັນ​ຕື້​ດອລລ່າ ພາຍ​ໃນ​ປີ 2020.

XS
SM
MD
LG