ໃນເວລາພຽງບໍ່ເທົ່າໃດປີ ຈີນໄດ້ໄຕ່ເຕົ້າຈາກການເປັນຜູ້ໄດ້ຮັບການຊ່ວຍເຫລືອລາຍໃຫຍ່ທີ່ສຸດປະເທດນຶ່ງ ຂື້ນມາເປັນ ປະເທດທີ່ໃຫ້ເງິນກູ້ຢືມ ແລະຜູ້ໃຫ້ບໍລິຈາກດ້ານການຊ່ວຍເຫລືອກ່ຽວກັບການພັດທະນາລາຍໃຫຍ່ທີ່ສຸດປະເທດນຶ່ງ.
ຈາກສະຖິຕິທີ່ລວບລວມໂດຍໜັງສືພິມ Financial Times ສະແດງໃຫ້ເຫັນວ່າ ໃນປີ 2009 ແລະ ປີ 2010 ຜ່ານມານີ້ ທະນາຄານພັດທະນາ ແລະທະນາຄານສົ່ງອອກ-ສົ່ງເຂົ້າຂອງຈີນ ຕົກລົງໃຫ້ເງິນກູ້ຢືມແກ່ຫລາຍໆລັດຖະບານແລະບໍລິສັດຕ່າງໆເປັນຈໍານວນເງິນທັງໝົດ 110 ພັນລ້ານໂດລາ ໃນປະເທດທີ່ກໍາລັງພັດທະນາ.
ຈໍານວນເງິນໃຫ້ຢືມດັ່ງກ່າວນີ້ແມ່ນຫລາຍກວ່າ 100 ພັນລ້ານໂດ ຊຶ່ງເປັນຈຳນວນທີ່ສູງເປັນປະວັດການ ທີ່ພະແນກ ການຕ່າງໆຂອງທະນາຄານໂລກໄດ້ໃຫ້ກູ້ຢືມໄປໃນລະຫວ່າງ ໄລຍະເກືອບປານໆກັນ ເພື່ອຮັບມືກັບວິກິດການການເງິນຂອງໂລກນັ້ນ.
ຂໍ້ຕົກລົງຕ່າງໆຂອງຈີນ ແມ່ນມີໂຮມທັງເງິນກູ້ຢືມກ້ອນໃຫຍ່ ກ່ຽວກັບສັນຍານໍ້າມັນເຊື້ອໄຟກັບ ປະເທດບຣາຊິລ ຣັດເຊຍ ແລະ ເວເນຊູເອລາ ພ້ອມທັງໂຄງການກໍ່ສ້າງໂຄງລ່າງພື້ນຖານ ຕ່າງໆ ໃນປະເທດ ອາເຈັນຕິນາ ເບລາຣູສ ການາ ແລະໂມຊໍາບີກ.
ທ່ານ Yukon Huang ອະດີດຜູ້ອໍານວຍການທະນາຄານໂລກປະຈໍາປະ ເທດຈີນ ກ່າວວ່າ
"ເງິນກູ້ຢືມບາງສ່ວນແມ່ນຊ່ອຍພັດທະນາການເຂົ້າເຖິງຊັບພະຍາກອນທຳມະຊາດ
ແລະການຂຸດບໍ່ແຮ່ ນໍ້າມັນແລະແຫຼ່ງພະລັງງານ ແລະແມ່ນກະທັງໃນບາງກໍລະນີ ທີ່ດິນສຳລັບການກະເສດແລະຄວາມອາດສາມາດໃນການຜະລິດ ຊຶ່ງທັງໝົດນີ້ ແມ່ນມີຄວາມຈຳເປັນທີ່ສຸດສຳລັບຈີນ ຍ້ອນຈີນເປັນປະເທດ ທີ່ຂາດເຂີນຊັບຍາ
ກອນທຳມະຊາດເຫຼົ່ານີ້."
ປັດຈຸບັນນີ້ ທ່ານ ຮວງ ທໍາງານຢູ່ກັບ ອົງການຄົ້ນຄວ້າ Carnegie Endowment for International Peace ທີ່ນະຄອນຫລວງວໍຊິງຕັນ ດີຊີ ຊຶ່ງທ່ານຮວງ ກ່າວຕໍ່ໄປວ່າ ເວລານີ້ ຈີນກໍາລັງເພີ່ມທະວີການນໍາໃຊ້ຊັບສິນດ້ານການເງິນຈໍານວນມະຫາສານທີ່ໜ້າຢ້ານກົວນັ້ນ ເພື່ອເສີມຂະ ຫຍາຍຜົນປະໂຫຍດຕ່າງໆ ຂອງຕົນເອງ ເຊັ່ນການຂະຫຍາຍການສົ່ງອອກຂອງຕົນ ແລະຊຸກຍູ້ໃຫ້ນາໆຊາດໃຊ້ເງິນຕາຂອງຈີນຫຼາຍຂຶ້ນຢູ່ໃນທົ່ວໂລກ ໃນເມື່ອວ່າເງິນກູ້ຢືມບາງກ້ອນນັ້ນ ບາງສ່ວນແລ້ວແມ່ນໃຫ້ເປັນເງິນຢວນ ແຕ່ທ່ານຮວງກ່າວຕື່ມວ່າ ເລຶ່ອງນີ້ບໍ່ແມ່ນເປັນສິ່ງທີ່ຜິດປົກກະຕິແຕ່ຢ່າງໃດ.
"ເງິນກູ້ຢືມຂອງຍີ່ປຸ່ນແມ່ນໃຫ້ການສະໜັບສະໜຸນຕໍ່ເປົ້າໝາຍຂອງຍີ່ປຸ່ນ ສ່ວນ
ເງິນກູ້ຢືມຂອງສະຫະລັດ ກໍໃຫ້ການສະໜັບສະໜຸນຕໍ່ເປົ້າໝາຍຂອງສະຫະລັດ ແລະສຳລັບເງິນກູ້ຢືມເຫຼົ່ານີ້ ແມ່ນໃຫ້ການສະໜັບສະນຸນຕໍ່ເປົ້າໝາຍຂອງຈີນ."
ທ່ານ ເຊິ່ນ ຈຽງກວາງ ຫົວໜ້ານັກເສດຖະກິດສາດປະຈໍາບໍລິສັດຫລັກຊັບ Mizuho Securities Asia ກ່າວວ່າ ອໍານາດເສດຖະກິດຂອງຈີນແມ່ນໄດ້ເຕີບໂຕຂຶ້ນຫຼາຍ ແລະປະເທດຈີນໄດ້ກ້າວເຂົ້າສູ່ໃນອັນທີ່ທ່ານ ເອີ້ນວ່າ “ເວທີໃໝ່” ທີ່ຈີນສາມາດຂະຫຍາຍການມີໜ້າຂອງຕົນຢູ່ໃນຕ່າງປະເທດໄດ້ ຢ່າງສະບາຍໆ ຊຶ່ງທ່ານ ເຊິ່ນ ກ່າວຊີ້ແຈງຕື່ມວ່າ:
"ຂ້າພະເຈົ້າຄິດວ່າ ສິ່ງທີ່ຈີນກຳລັງດຳເນີນຢູ່ໃນເວລານີ້ ແມ່ນບໍ່ຕ່າງຫຍັງກັນກັບ
ບັນດາປະເທດທີ່ມີເສດຖະກິດຈະເລີນກ້າວໜ້າອື່ນໆ ກໍຄືສິ່ງທີ່ປະເທດເຫຼົ່ານັ້ນໄດ້ດຳເນີນຕະຫຼອດມາຢູ່ໃນຕ່າງປະເທດ ດັ່ງນັ້ນ ການຊ່ອຍເຫຼືອທັງໝົດທີ່ໃຫ້
ແກ່ບັນດາປະເທດທີ່ກຳລັງພັດທະນານັ້ນ ກໍແມ່ນພົວພັນອຳນາດໃນການຊັກຈູງ
ຫຼື Soft Power ນຳດ້ວຍ ດ້ວຍເຫດນີ້ຂ້າພະເຈົ້າຈຶ່ງຄິດວ່າ ຈີນກໍພຽງແຕ່ດຳ
ເນີນການໃນສິ່ງທີ່ມີການປະຕິບັດກັນມາ ຢ່າງເປັນປົກກະຕິທຳມະດາຢູ່ແລ້ວ."
ໜັງສືພິມ Financial Times ເວົ້າວ່າ ທະນາຄານຈີນສອງແຫ່ງ ແມ່ນວາງເງຶ່ອນໄຂຕ່າງໆ
ທີ່ດີກວ່າທະນາຄານໂລກ ແລະຜູ້ໃຫ້ເງິນກູ້ຢືມລາຍອື່ນໆ ໂດຍສະເພາະແມ່ນຂໍ້ຕົກລົງຕ່າງໆ
ທີ່ລັດຖະບານປັກກິ່ງໃຫ້ການສະໜັບສະໜຸນຢ່າງແຂງຂັນນັ້ນ. ນອກນີ້ແລ້ວ ເງິນກູ້ຢືມຂອງ
ຈີນຍັງມີເງື່ອນໄຂເງື່ອນໄຂກ່ຽວກັບຄວາມໂປ່ງໃສຕ່າງໆ ບໍ່ເຄັ່່ງຄັດທໍ່ກັບທະນາຄານໂລກຫຼື ທະນາຄານອື່ນໆ.
ໃນຖະແຫລງຂ່າວບັ້ນນຶ່ງເມື່ອໄວໆມານີ້ ທ່ານ ຮົງ ເລ ໂຄສົກກະຊວງຕ່າງປະເທດຂອງຈີນຖືກຊັກຖາມວ່າ ຈີນໃນເວລານີ້ກໍາລັງແຂ່ງຂັນກັບທະນາຄານໂລກຫລືບໍ່ ແຕ່ໂຄສົກຮົງ ເລ ບໍ່ໄດ້ຕອບຄໍາຖາມໂດຍກົງ ແຕ່ ກໍເວົ້າວ່າ ຈີນຍັງຈະສືບຕໍ່ໃຫ້ການຊ່ວຍເຫລືອດ້ານການ ພັດທະນາແກ່ປະເທດຕ່າງໆ ຢູ່ຕໍ່ໄປ.
// ສຽງພາສາຈີນ //
ໂຄສົກຮົງ ເລ ກ່າວວ່າ ໃນຂະນະທີ່ຈີນຍັງສືບຕໍ່ພັດທະນາປະເທດຂອງຕົນໄປຢູ່ນັ້ນ ຈີນກໍຍັງຈະສືບຕໍ່ໃຫ້ການຊ່ວຍເຫລືອດ້ານການພັດທະນາແກ່ປະເທດອື່ນໆຢູ່ຕໍ່ໄປ ຊຶ່ງທ່ານເວົ້າວ່າ ມັນຄືຜົນສະທ້ອນອັນໜັກແໜ້ນ ໃນການປະ ກອບສ່ວນຂອງຈີນຕໍ່ສັນຕິພາບໂລກ.
ຢ່າງໃດກໍຕາມ ຄວາມພະຍາຍາມໃນການໃຫ້ຄວາມຊ່ວຍເຫລືອຂອງຈີນດັ່ງກ່າວນີ້ ໄດ້ຖືກ
ຕໍາໜິຕິຕຽນໂດຍບັນດາອົງການປົກປ້ອງສິດທິມະນຸດ ແລະອົງການພັດທະນາ ຕະຫຼອດ
ທັງອົງການຈັດຕັ້ງອື່ນໆຢູ່ໃນທົ່ວໂລກ. ນັກເຄຶ່ອນໄຫວດ້ານສິດທິມະນຸດບາງຄົນກ່າວວ່າ
ຂໍ້ຕົກລົງເລຶ່ອງການຄ້າ ແລະການຊ່ວຍເຫລືອຂອງຈີນ ໂດຍສະເພາະຢູ່ໃນຂົງເຂດອາຟຣິ
ການັ້ນ ແມ່ນຊ່ວຍສົ່ງເສີມພວກລັດຖະບານຊົ່ວຮ້າຍທັງຫລາຍ ແລະສ້າງຜົນປະໂຫຍດໃຫ້
ແກ່ປະຊາຊົນທຳມະດາສາມັນ ແຕ່ພຽງໜ້ອຍດຽວເທົ່ານັ້ນ. ພວກຊ່ຽວຊານດ້ານການພັດ
ທະນາບາງຄົນເວົ້າວ່າ ປົກກະຕິແລ້ວເງິນກູ້ຢືມແລະເງິນຊ່ອຍເຫຼືອລ້າຂອງຈີນນັ້ນ ມັກຈະ
ບໍ່ມີການຕິດຕາມຊິ້ງຊອມເບິ່ງ ກໍາກັບບັນຊີລາຍຈ່າຍໃດໆຢ່າງແຈ່ມແຈ້ງ ເພື່ອປ້ອງກັນບໍ່
ໃຫ້ມີການສໍ້ລາດບັງຫລວງ ຫລືບໍ່ ກໍຊ່ວຍລົດຄວາມທຸກຈົນ ພຽງແຕ່ໜ້ອຍດຽວເທົ່ານັ້ນ.
ທະນາຄານໂລກໄດ້ປະຕິເສດບໍ່ຍອມໃຫ້ສໍາພາດກ່ຽວກັບລາຍງານທີ່ວ່ານີ້ ແຕ່ກໍໄດ້ສົ່ງຖະ
ແຫລງຂ່າວໃຫ້ສະບັບນຶ່ງທີ່ເວົ້າວ່າ “ເວລານີ້ ທະນາຄານໂລກກໍາລັງດຳເນີນງານຢ່າງໃກ້ຊິດ
ກັບຈີນຫລາຍຂື້ນ ຊຶ່ງທາງທະນາຄານໂລກເອງ ກໍມີຄວາມຍິນດີນຳການເປັນພາຄີທີ່ສໍາຄັນ
ແລະພວມມີການເຕີບໂຕ ດັ່ງກ່າວນີ້.
