ເຈົ້າໜ້າທີ່ຍາມຝັ່ງຂອງຈີນ ໄດ້ປະທະກັນກັບສະມາຊິກສະພາຍີ່ປຸ່ນກ່ຽວກັບເຂດນ່ານນ້ຳທີ່ທັງສອງປະເທດອ້າງເອົາກຳມະສິດ ຢູ່ໃນທະເລຈີນຕາເວັນອອກ, ສະຖານທູດຈີນປະຈຳນະຄອນຫຼວງໂຕກຽວ ແລະ ສື່ມວນຊົນຂອງຍີ່ປຸ່ນກ່າວໃນວັນອາທິດວານນີ້ ເຊິ່ງຖືເປັນຂໍ້ພິພາດທາງທະເລຄັ້ງຫຼ້າສຸດ ທີ່ກ່ຽວຂ້ອງກັບ ຈີນ ແລະບັນດາປະເທດເພື່ອນບ້ານຂອງຕົນ, ອີງຕາມລາຍງານຂອງອົງການຂ່າວ Reuters.
ສະຖານທູດກ່າວໃນຖະແຫຼງການສະບັບນຶ່ງວ່າ ກໍາປັ່ນຂອງຈີນໄດ້ໃຊ້ມາດຕະການບັງຄັບໃຊ້ກົດໝາຍທີ່ບໍ່ໄດ້ຖືກລະບຸຢ່າງຈະແຈ້ງ, ໂດຍກ່າວຕື່ມວ່າ ຕົນໄດ້ຍື່ນຄຳຮ້ອງຢ່າງໜັກແໜ້ນໃນສິ່ງທີ່ຕົນຮ້ອງວ່າ “ການລະເມີດ ແລະການເກາະຜິດ” ໂດຍ ຍີ່ປຸ່ນ ໃກ້ກັບເກາະດອນນ້ອຍໆທີ່ບໍ່ມີຄົນອາໄສຢູ່ ເຊິ່ງປັກກິ່ງຮ້ອງວ່າເກາະ ດຽວຢູ (Diaoyu) ແລະໂຕກຽວຮ້ອງວ່າ ເກາະ ເຊັນກາກຸ (Senkaku).
ກຸ່ມຂອງຍີ່ປຸ່ນ, ເຊິ່ງມີອະດີດລັດຖະມົນຕີປ້ອງກັນປະເທດ ທ່ານໂຕໂມມິ ອິນາດະ (Tomomi Inada), ກຳລັງປະຕິບັດພາລະກິດກວດກາທີ່ຈັດຂຶ້ນໂດຍເມືອງ ອິຊິກາກິ (Ishigaki) ໃນແຂວງ ໂອກິນາວາ (Okinawa), ອີງຕາມສະຖານທູດຈີນ ແລະສະຖານີໂທລະພາບ NHK ຂອງຍີ່ປຸ່ນ.
ຍີ່ປຸ່ນ ແລະ ຈີນ ໄດ້ປະເຊີນໜ້າກັນຊ້ຳແລ້ວຊ້ຳອີກ ຢູ່ອ້ອມຮອບບໍລິເວນໝູ່ເກາະທີ່ປົກຄອງໂດຍຍີ່ປຸ່ນ. ຈີນ ຍັງໄດ້ເພີ້ມທະວີການເກາະຜິດກັບກອງທັບເຮືອຟີລິບປິນໃນບໍລິເວນທີ່ມີຂໍ້ພິພາດກັນຢູ່ຂົງເຂດທະເລຈີນໃຕ້, ເຊິ່ງການອ້າງເອົາກຳມະສິດທາງທະເລຢ່າງກວ້າງຂວາງຂອງປັກກິ່ງ ໄດ້ສ້າງຄວາມຂັດແຍ້ງກັບຫຼາຍໆປະເທດ ໃນຂົງເຂດເອເຊຍຕາເວັນອອກສຽງໃຕ້ເຫຼົ່ານັ້ນ.
ສະຖານີໂທລະພາບ NHK ຂອງຍີ່ປຸ່ນ ກ່າວວ່າ ກຸ່ມຂອງ ທ່ານ ອິນາດະ ໄດ້ໃຊ້ເວລາສາມຊົ່ວໂມງໃກ້ກັບຫມູ່ເກາະດັ່ງກ່າວ ໃນວັນເສົາແລ້ວນີ້, ໂດຍໃຊ້ເຮືອບິນບໍ່ມີຄົນຂັບ ຫຼື ໂດຣນ ເພື່ອສຳຫຼວດເບິ່ງພື້ນທີ່ດັ່ງກ່າວ, ແລະກໍາປັ່ນຍາມຝັ່ງຂອງຍີ່ປຸ່ນ ໄດ້ພະຍາຍາມສະກັດກັ້ນໜ່ວຍຍາມຝັ່ງຂອງຈີນ ອອກໄປ.
ຟໍຣັມສະແດງຄວາມຄິດເຫັນ