ລິ້ງ ສຳຫລັບເຂົ້າຫາ

ແຂວງຈໍາປາສັກ ຈະສ້າງຕັ້ງ ເຂດເສດຖະກິດ ພິເສດ 3 ແຫ່ງ

  • ຊົງຣິດ ໂພນເງິນ

ດ່ານກວດຄົນເຂົ້າເມືອງ ຢູ່ເຂດວັງເຕົ່າ ເມືອງໂພນທອງ ແຂວງ ຈໍາປາສັກ ທີ່ຈະຖືກສ້າງຕັ້ງ ເປັນເຂດເສດຖະກິດພິເສດ ແຫ່ງນຶ່ງ
ທາງ​ການ​ແຂວງຈໍາປາ​ສັກ ວາງ​ແຜນການ​ຈະ​ສ້າງ​ຕັ້ງ​ເຂດ​ເສດ
ຖະກິດ​ພິ​ເສດ ​3 ​ແຫ່ງ ​ແຕ່​ການ​ດໍາ​ເນີນ​ງານ​ໃນ​ລະຍະ​ທີ່​ຜ່ານ​ມາ​
ຍັງ​ຊັກ​ຊ້າ ​ເນື່ອງຈາກ​ປະສົບ​ບັນຫາ​ຂາດແຄນ​ດ້ານ​ເງິນ​ລົງທຶນ.


ທ່ານ ສອນ​ໄຊ ສີ​ພັນ​ດອນ ​ເຈົ້າ​ແຂວງ​ແລະ​ເລຂາ​ພັກ​ແຂວງ​ຈໍາປາ​ສັກ ຖະ​ແຫຼ​ງຢືນຢັນ ວ່າ​ທາງ​ການ​ແຂວງ​ຈໍາປາ​ສັກ ​ໄດ້​ວາງ​ແຜນການ​ ທີ່​ຈະ​ສ້າງ​ຕັ້ງ​ ເຂດ​ເສດຖະກິດ​ພິ​ເສດ​ຂຶ້ນມາ 3 ​ແຫ່ງ​ຄື​ເຂດ​ເສດຖະກິດ​ພິ​ເສດ ຄອນ​ພະ​ເພັງ ​ເຂດ​ເສດຖະກິດ​ພິ​ເສດ​ວັງ​ເຕົ່າ ​ແລະ​ເຂ​ດ​ເສດຖະກິດ​ປາກ​ຊ່ອງ. ​

ໂດຍໃນ​ລະຍະ​ທີ່​ຜ່ານ​ມາ ກໍ​ໄດ້​ມີ​ການ​ລົງ​ນາມ​ໃນ​ບັນທຶກ​ຄວາມ​ເຂົ້າ​ໃຈ ຮ່ວມ​ກັບ​ບໍລິສັດ​ເອກ​ກະ​ຊົນ​ລາວ ​ແລະ​ຕ່າງ​ຊາດ​ໄປ​ແລ້ວ 2 ​ແຫ່ງ ກໍ​ຄື​ເຂດ​ເສດຖະກິດ​ພິ​ເສດ ຄອນ​ພະ​ເພັງ ທີ່​ເປັນ​ການ​ລົງ​ນາມ​ຮ່ວມ​ກັບ​ວິ​ສາ​ຫະກິດ​ຮຸ້ນ​ສ່ວນ​ພາກ​ໃຕ້​ຂອງ​ເອກ​ກະ​ຊົນ​ລາວ ​ແລະ​ເຂດ​ເສດຖະກິດ​ພິ​ເສດ​ວັງ​ເຕົ່າ ທີ່​ໄດ້​ລົງ​ນາມ​ຮ່ວມ​ກັບ​ບໍລິສັດ​ເອກ​ກະ​ຊົນ​ຈາກ​ປະ​ເທດ ຣັດ​ເຊຍ ຫາກ​ແຕ່​ວ່າການ​ດໍາ​ເນີນ​ງານ​ກໍ​ຍັງ​ບໍ່​ມີ​ຄວາມ​ຄືບ​ໜ້າ​ເນື່ອງ​ຈາກ​ບັນຫາ​ດ້ານ​ເງິນ​ທຶນ ດັ່ງ​ທີ່ ທ່ານ​ສອນ​ໄຊ ​ໄດ້​ໃຫ້ການ​ຢືນຢັນ​ວ່າ:

ທ່ານ ສອນໄຊ ສີພັນດອນ ເຈົ້າແຂວງ ຈໍາປາສັກ
ທ່ານ ສອນໄຊ ສີພັນດອນ ເຈົ້າແຂວງ ຈໍາປາສັກ

“ມັນ​ກະ​ຍາກ​ເລຶ່ອງ​ແຫຼ່ງລົງທຶນທີ່​ຈະ​ມາ​ເຮັດ​ນີ້​ຫຼະ ນັບ​ທັງ
ເລຶ່ອງການ​ສໍາ​ຫຼວດ ວາງ​ແຜນ​ລະອຽດ ທຸກ​ອັນ​ມັນ​ຕ້ອງ​
ໄດ້​ໃຊ້​ງົບປະມານ ​ແລ້ວ​ມາ​ເບິ່ງ​ບໍລິສັດພາຍ​ໃນ​ຂອງ​ເຮົາ​
ນີ້ ການ​ພັດທະນາ​ເຂດ​ເສດຖະກິດ​ພິ​ເສດນີ້ ມັນ​ກະ​ຍາກ​
ແນ່​ໜ້ອຍ​ນຶ່ງ ບໍ່​ຄື​ຕ່າງປະ​ເທດ​ເຂົາ​ເຈົ້າມີ​ທຶນ​ມີ​ຮອນ ​ໂດຍ​
ສະ​ເພາະ​ແມ່ນ​ບໍລິ ສັດ​ມາ​ຈາກ​ປະ​ເທດ​ຈີນ ທີ່​ເຂົາເຈົ້າມີ​
ເງື່ອນ​ໄຂ​ພັດທະນາຄື​ຢູ່​ບໍ່​ເຕັນ ຢູ່​ດອກ​ງີ້ວ​ຄໍາບໍ່ ອັນ​ນີ້​ເຂົາ​
ເຈົ້າກະ​ມີ​ທຶນ ພ້ອມ​ມາ​ເຮັດ​ແທ້.”


ກ່ອນ​ໜ້າ​ນີ້ ທ່ານ​ສົມ​ສະຫວາດ ​ເລັ່ງສະ​ຫວັດ ຮອງ​ນາຍົກລັດຖະ
ມົນຕີ ຜູ້​ຊີ້​ນໍາ​ວຽກ​ງານ​ດ້ານ ​ເສດຖະກິດ​ຂອງ​ລັດຖະບານ​ລາວ ​ແລະ​ປະທານ​ຄະນະ​ກໍາ ມະການ​ຄຸ້ມ​ຄອງ​ ເຂດ​ເສດຖະກິດ​ພິເສດສະ​ເພາະ​ແຫ່ງ​ຊາດ ​ໄດ້​ໃຫ້ການ​ຢືນຢັນ​ກັບ VOA ວ່າ ລັດຖະບານ​ລາວ​ກໍາລັງ​ທົບ​ທວນ ​ແຜນການ​ພັດທະນາ ​ແລະ​ການ​ສ້າງ​ເຂດ​ເສດຖະກິດ​ພິ​ເສດ ສະ​ເພາະ​ຢ່າງຮອບ​ຄອບ​ອີກ​ເທື່ອໃໝ່.

​ໂດຍສາ​ເຫດ​ທີ່​ເຮັດ​ໃຫ້​ຕ້ອງ​ມີ​ການ​ທົບ​ທວນ​ແຜນການ​ດັ່ງ​ກ່າວ ກໍ​ຍ້ອນ​ວ່າການ​ຄຸ້ມ​ຄອງ​ເຂດ ​ເສດຖະກິດ​ພິ​ເສດ ​ແລະ​ເຂດ​ເສດຖະກິດ​ສະ​ເພາະ​ທີ່​ມີ​ຢູ່​ທັງ​ໝົດ 10 ​ແຫ່ງ​ໃນ​ປັດ ຈຸບັນ​ນີ້ ​ໄດ້ ດໍາ​ເນີນ​ໄປ​ພາຍ​ໃຕ້​ສະພາວະ​ທີ່​ຍັງ​ບໍ່​ມີ​ຄວາມ​ຊັດ​ເຈນ​ໃນ​ບາງ​ດ້ານ ຈຶ່ງ​ເຮັດ​ໃຫ້​ມີ​ບັນຫາ​ຍໍ່​ທໍ້​ເກີດ ຂຶ້ນຢູ່​ໃນ​ບາງ​ເຂດ ຕົວຢ່າງ​ຄື​ການ​ທີ່​ໄດ້ອະນຸຍາດ​ໃຫ້​ມີ​ບ່ອນ​ກາສິ​ໂນ​ຢູ່​ໃນ​ເຂດ​ເສດຖະກິດ​ພິ​ເສດ​ບໍ່​ເຕັນ​ແດນ​ງາມ ທີ່​ຕັ້ງ​ຢູ່​ທີ່​ຊາຍ​ແດນ​ຈີນ ກັບ​ລາວ ​ໃນ​ເຂດແຂວງ​ຫຼວງ​ນໍ້າ​ທາ​ນັ້ນ ກໍ​ປາກົດ​ວ່າ​ມີ​ບັນຫາ​ອາດຊະຍາ​ກໍາ​ຫຼາຍ​ຂຶ້ນນັບ​ມື້ ຊຶ່ງ​ກໍ​ເປັນສາ​ເຫດ​ທີ່​ເຮັດ​ໃຫ້​ທາງ​ການ​ລາວ​ຕ້ອງ ສັ່ງ​ປິດ​ບ່ອນ​ກາສິ​ໂນ​ດັ່ງກ່າວ​ນັບ​ເປັນ​ເວລາ ກວ່າ 1 ປີ​ມາ​ແລ້ວ.

ຍີ່​ງ​ໄປ​ກວ່າ​ນັ້ນ ຈາກ​ບັນຫາ ດັ່ງກ່າວ​ຍັງ​ເຮັດ​ໃຫ້​ທາງ​ການ​ລາວ ​ໄດ້​ຕັດສິນ​ໃຈ​ທີ່​ຈະ​ບໍ່​ອະ ນຸຍາດ​ໃຫ້​ມີ​ບ່ອນ​ກາສິ​ໂນ​ຢູ່​ໃນ​ເຂດ​ເສດຖະກິດພິ​ເສດ ທີ່​ຈະ​ສ້າງ​ຕັ້ງ​ຂຶ້ນ​ໃໝ່​ໃນ​ລະຍະ​ຕໍ່​ໄປ​ອີ​ກດ້ວຍ ​ໂດຍ​ຈະ​ອະນຸຍາດ​ໃຫ້​ມີ​ບ່ອນກາສິ​ໂນ​ໄດ້​ສະ​ເພາະ​ເຂດ​ທີ່​ມີຢູ່​ແລ້ວ​ເທົ່ານັ້ນ

​ໃນ​ປັດຈຸບັນ ທາງການ​ລາວ​ໄດ້​ສ້າງ​ຕັ້ງ​ເຂດ​ເສດຖະກິດ​ພິ​ເສດ ​ແລະ​ເຂດ​ເສດຖະກິດ​ສະ​ເພາະ ​ແລ້ວ 10 ​ແຫ່ງ ຈາກ​ແຜ​ນການ​ທີ່​ຈະ​ສ້າງ​ຕັ້ງ​ໃຫ້​ໄດ້​ບໍ່​ໜ້ອຍ​ກວ່າ 20 ​ແຫ່ງ​ພາຍ​ໃນ​ປີ 2015 ​ໂດຍ​ເຂດ​ທໍາ​ອິດ​ນັ້ນ ກໍ​ແມ່ນ​ເຂດ​ເສດຖະກິດ​ພິ​ເສດ​ສະຫວັນ-​ເຊ​ໂນ ​ໃນ​ແຂວງ​ສະຫວັນ​ນະ​ເຂດ ທີ່​ສ້າງ​ຕັ້ງ​ຂຶ້ນ​ໃນ​ປີ 2003 ຕິດຕາມ​ດ້ວຍ​ເຂດ​ເສດຖະກິດ​ພິ​ເສດ​ບໍ່​ເຕັນ​ແດນ​ງາມ​ຢູ່ແຂວງ​ຫຼວງ ນໍ້າ​ທາ ທີ່​ສ້າງ​ຕັ້ງ​ຂຶ້ນ​ໃນ​ປີ​ດຽວ​ກັນ ​ແຕ່​ທີ່​ຖື​ວ່​າ​ໄດ້​ມີ​ການ​ພັດທະນາ​ຢ່າງໄວວາ​ທີ່​ສຸດ ກໍ​ແມ່ນ ​ເຂດ​ເສດຖະກິດ​ພິ​ເສດ​ສາມ​ຫຼ່ຽມຄໍາ ທີ່​ເມືອງ​ຕົ້ນ​ເຜີ້ງ ​ແຂວງ​ບໍ່​ແກ້ວ.

ສ່ວນ​ນະຄອນ​ວຽງ​ຈັນ​ນັ້ນ ກໍ​ຖື​ເປັນ​ເຂດ​ທີ່​ມີ​ການ​ສ້າງ​ຕັ້ງ​ເຂດ​ເສດຖະກິດ​ພິ​ເສດ​ ແລະ​ເຂດ​ເສ​ດຖະກິດສະ​ເພາະ​ຫຼາຍ​ທີ່​ສຸດ ​ໂດຍ​ມີ​ຢູ່​ເຖິງ 5 ​ເຂດ​ດ້ວຍ​ກັນ ​ແລະ​ໃນ​ຈໍານວນ​ນີ້ ກໍ​ມີ​ຢູ່ 4 ພື້ນ​ທີ່ ດ້ວຍ​ກັນ​ທີ່​ເປັນ​ການ​ຍົກ​ລະດັບ​ຈາກ​ເຂດ​ພັດທະນາ​ທົ່ວ​ໄປ ຊຶ່ງ​ກໍ​ຄື​ເສດ​ນິຄົມ​ອຸດສາຫະກໍາ​ແລະ​ການ​ຄ້າ​ວຽງ​ຈັນ-​ໂນນ​ທອງ ເຂດ​ເສດຖະກິດ​ສະ​ເພາະ​ດົງໂພ​ສີ ​ເຂດ​ເສດຖະກິດ​ສະ​ເພາະ​ລ່ອງ ​ແຖງ-ວຽງ​ຈັນ ​ແລະ​ເຂດ​ພັດທະນາ​ກວມ​ລວມ ​ໄຊ​ເສດ​ຖາ ສ່ວນ​ເຂດ​ທີ່ 5 ນັ້ນ​ເປັນ​ເຂດ​ທີ່​ສ້າງ ຕັ້ງ​ຂຶ້ນ​ໃໝ່ ກໍ​ຄື​ເຂດ​ເສດຖະກິດ​ສະ​ເພາະ​ບຶງ​ທາດຫຼວງ.

​ແຕ່​ຢ່າງ​ໃດ​ກໍ​ຕາມ ທ່ານ​ສົມ​ສະຫວາດ ກໍ​ຍອມຮັບ​ວ່າການ​ພັດທະນາ​ເຂດ​ເສດຖະກິດ​ພິ​ເສດ ສ່ວນ​ໃຫຍ່​ກໍ​ຍັງ​ຊັກ​ຊ້າ​ຫຼາຍ ​ໂດຍ​ສະ​ເພາະ​ເຂດ​ເສ​ຖະກິດພິ​ເສດ​ສະຫວັນ-​ເຊ​ໂນ ທີ່​ສ້າງຕັ້ງ​ຂຶ້ນ​ໃນ​ປີ 2003 ​ແຕ່​ກໍ​ຍັງ​ມີ​ການ​ພັດທະນາ​ທີ່​ຊັກຊ້າ​ຫຼາຍ ຫາກ​ທຽບ​ກັບ​ເຂ​ດ​ເສດຖະກິດ​ພິ​ເສດ​ສາມຫຼ່ຽມ​ຄໍາ ທີ່​ລົງທຶນ 100% ​ໂດຍ​ກຸ່ມ​ບໍລິສັດ​ດອກ​ງີ້ວ​ຄໍາ​ ຈາກ​ຈີນ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG