ມີລາຍງານວ່າ ໄດ້ຍິນສຽງລະເບີດແຕກແລະສຽງປືນດັງຂຶ້ນຢູ່ໃນ
ນະຄອນຫຼວງຂອງບູຣຸນດີ ໜຶ່ງມື້ຫຼັງຈາກນາຍພົນອະວຸໂສທ່ານນຶ່ງ
ໄດ້ພະຍາຍາມກໍ່ການລັດຖະປະຫານຂຶ້ນ ໃນຂະນະທີ່ປະທານາ
ທິບໍດີກຳລັງໄປຕ່າງປະເທດ.
ຍັງບໍ່ທັນເປັນທີ່ແຈ້ງຂາວເທື່ອວ່າ ແມ່ນໃຜແທ້ເປັນຜູ້ຄວມຄຸມ
ປະເທດຢູ່ໃນປະຈຸບັນນີ້ ໃນຂະນະການປະທ້ວງທາງການເມືອງ
ໃນທຸກໆມື້ ທີ່ນະຄອນຫຼວງ Bujumbura ປາກົດວ່າ ເປີດໂອກາດ
ໃຫ້ເກີດປະທະກັນລະຫວ່າງບັນດາກຸ່ມການເມືອງຕ່າງໆ.
ນັກຂ່າວ VOA ທ່ານ Gabe Joselow ໃນນະຄອນຫຼວງ
Bujumbura ບ່ອນທີ່ທ່ານ ໄດ້ກ່າວວ່າ ທ່ານໄດ້ຍິນສຽງປືນດັງ
ຢູ່ຕະຫຼອດ ຢ່າງຕໍ່ເນື່ອງ ດັງມາຈາກສຳນັກງານໃຫຍ່ຂອງພັກ
CNDD-FDD ຊຶ່ງປົກຄອງປະເທດ ຢູ່ໃນຂະນະນີ້. ຕຳຫຼວດ
ແມ່ນອອກປະຕິບັດງານ ເຝົ້າຍາມຕາມທ້ອງຖະໜົນໃນເຂດ
ດັ່ງກ່າວ. ຜູ້ຄົນໃນທ້ອງຖິ່ນກ່າວວ່າ ຕຳຫຼວດແມ່ນອອກຄົ້ນຫາ
ພວກທີ່ຄາດວ່າ ອາດຈະເປັນພວກທີ່ສະໜັບສະໜຸນຕໍ່ການ
ພະຍາຍາມກໍ່ລັດຖະ ປະຫານຂຶ້ນນັ້ນ.
ທ່ານ Joselow ໄດ້ກ່າວວ່າ “ສະຖານະການແມ່ນຕຶງຄຽດຫຼາຍຢູ່ໃນຂະນະນີ້ ມັນບໍ່ແນ່ຊັດວ່າ ແມ່ນຜູ້ໃດແທ້ເປັນຝ່າຍຄວບຄຸມ ພວກທະຫານຍັງຢູ່ໂຮມກັນເປັນກ້ອນເປັນກຸ່ມ
ຫຼື ວ່າປະທະກັນເອງ.”
ນາຍພົນ ປະກາດ ເຮັດລັດຖະປະຫານ ຢູ່ ບູຣຸນດີ
ປະທານາທິບໍດີບູຣຸນດີ ທ່ານ Pierre Nkurunziza ຂຽນລົງທາງ Twitter ໃນວັນພະຫັດມື້ນີ້ ຊຶ່ງໄດ້ຮຽກຮ້ອງໃຫ້ຢູ່ໃນຄວາມສະງົບ ໂດຍກ່າວວ່າ ສະຖານະການແມ່ນຢູ່ພາຍໃຕ້ການຄວບຄຸມແລ້ວ. ປະທານາທິບໍດີຢູ່ໃສແທ້ ໃນເວລານີ້ ຍັງບໍ່ເປັນທີ່ຈະແຈ້ງເທື່ອ ອົງ ການ ຂ່າວຝຣັ່ງລາຍງານວ່າ ທ່ານຢູ່ໃນສະຖານທີ່ ບໍ່ສາມາດບອກໄດ້ ທີ່ເມືອງ Dar es Salaam ໃນ Tanzania ບ່ອນທີ່ທ່ານເຂົ້າຮ່ວມກອງປະຊຸມໃນຂົງເຂດກ່ຽວກັບການຮັບມືກັບສະຖາ ນະການທາງການເມືອງຂອງບູຣຸນດີ ໃນວັນພຸດວານນີ້.
ໃນຂະນະທີ່ປະທານາທິບໍດີຢູ່ນອກປະເທດນັ້ນ ອະດີດຜູ້ບັນຊາການໜ່ວຍສືບລັບ ນາຍພົນ Godefroid Niyombare ໄດ້ໃຊ້ສະຖານີວິທະຍຸທ້ອງຖິ່ນ ປະກາດການກໍ່ລັດຖະປະຫານຂຶ້ນ. ທ່ານໄດ້ກ່າວວ່າ ທ່ານຈະປະກອບຄະນະກຳມະການນຶ່ງຂຶ້ນ ຊຶ່ງຈະ “ຟື້ນຟູຄວາມສາມັກຄີແລະຄວາມເປັນເອກກະພາບແຫ່ງຊາດ.”
ຜູ້ບັນຊາ ການກອງທັບ ນາຍພົນ Prime Niyongabo ໄດ້ກ່າວວ່າ
ການກໍ່ລັດຖະປະຫານ ໄດ້ຍຸຕິລົງແລ້ວ ແຕ່ວ່າ ພວກທີ່ສະໜັບ
ສະໜຸນການກໍ່ລັດຖະປະຫານນັ້ນ ປະຕິເສດຕໍ່ລາຍງານທີ່ວ່ານີ້.
ເລຂາທິການໃຫຍ່ອົງການສະຫະປະຊາ ຊາດ ທ່ານ Ban Ki-
moon ໄດ້ຮຽກຮ້ອງຕໍ່ຊາວບູຣຸນດີ ໃຫ້ຢູ່ໃນຄວາມສະງົບ ແລະໃຊ້
ຄວາມຢັບຢັ້ງ ໂດຍໃຫ້ຂໍ້ສັງເກດວ່າ ປະເທດຊາດ ໄດ້ປະສົບກັບ
ຄວາມເສຍຫາຍຮ້າຍແຮງຈາກ 13 ປີຂອງສົງຄາມການເມືອງ
ທີ່ໄດ້ສິ້ນສຸດລົງໃນປີ 2006 ນັ້ນ.
ສະມາຊິກ ຂອງສະພາຄວາມ ໝັ້ນຄົງອົງການສະຫະປະຊາຊາດ
ຈະຈັດໃຫ້ມີກອງປະຊຸມສຸກເສີນຂຶ້ນ ໃນວັນພະຫັດມື້ນີ້ ກ່ຽວກັບ
ວິກິດການດັ່ງກ່າວ ໂດຍການນຳສະເໜີທາງວີດີໂອ ຈາກທູດພິເສດຂອງອົງການສະຫະປະຊາຊາດ ໃນຂົງເຂດ.
