ອະດີດລັດຖະມົນຕີຕ່າງປະເທດ ອັງກິດ ທ່ານ Malcolm Rifkind ໄດ້ກ່າວວ່າ ການທີ່ລັດເຊຍໄດ້ຫ້າມບັນດານັກການເມືອງຢູໂຣບ 89 ຄົນ ແລະ ຜູ້ນຳທະຫານ ບໍ່ໃຫ້ເຂົ້າປະເທດ ໄດ້ສະແດງໃຫ້ເຫັນວ່າການລົງໂທດຂອງປະເທດຕາເວັນຕົກຕໍ່ ມັອສໂກ ຍ້ອນການຍຶດເອົາແຫຼມ Crimea ເຂົ້າເປັນດິນແດນຂອງລັດເຊຍໃນເດືອນມີນາ 2014 ນັ້ນ ແມ່ນໄດ້ຜົນ.
ທ່ານ Rifkind ໄດ້ກ່າວໃນວິທະຍຸຂອງ ອັງກິດ ໃນວັນອາທິດວານນີ້ວ່າ ເຈົ້າໜ້າທີ່ ຂອງລັດເຊຍ “ຈະບໍ່ມີປະຕິກິລິຍາຕອບໂຕ້ໃດໆນອກຈາກວ່າພວກເຂົາຈະຮູ້ສຶກເຈັບແສບຫຼາຍຕໍ່ສິ່ງທີ່ເກີດຂຶ້ນ.”
ທ່ານ Rifkind ໄດ້ກ່າວອອກມາມື້ໜຶ່ງ ຫຼັງຈາກສະຫະພາບຢູໂຣບໄດ້ອອກຖະແຫຼງການທີ່ກ່າວວ່າ ພວກຕົນໄດ້ພິຈາລະນາຂໍ້ຫ້າມໃໝ່, ເຊິ່ງໄດ້ເປີດເຜີຍອອກມາສັບປະດາແລ້ວນີ້ວ່າ “ເປັນການ ກຳນົດຂຶ້ນມາເອງໂດຍສິ້ນເຊີງ ແລະ ບໍ່ມີເຫດຜົນເນື່ອງຈາກຂາດການໃຫ້ຄວາມກະຈ່າງແຈ້ງເພີ່ມເຕີມ.”
ລາຍຊື່ຂອງລັດເຊຍ ລວມມີຜູ້ບັນຍັດກົດໝາຍຂອງຢູໂຣບຫຼາຍສິບຄົນ ແລະ ຜູ້ນຳລັດຖະບານຜູ້ທີ່ສະໜັບສະໜູນການລົງໂທດຂອງຢູໂຣບ ແລະ ສະຫະລັດ ປີກາຍນີ້ ເຊິ່ງໄດ້ວາງເປົ້າໝາຍໃສ່ການລົງໂທດ ມັອສໂກ ສຳລັບບົດບາດຂອງພວກເຂົາໃນວິກິດການທີ່ພວມເປັນໄປຢູ່ໃນ ຢູເຄຣນ.
ນອກຈາກການຫ້າມການເດີນທາງຂອງ ເຈົ້າໜ້າທີ່ຂັ້ນສູງ ແລະ ບັນດາ ນັກທຸລະກິດຂອງ ລັດເຊຍແລ້ວ, ປະທານາທິບໍດີ ສະຫະລັດ ທ່ານ Barack Obama ແລະ ບັນດາຜູ້ນຳຢູໂຣບຍັງໄດ້ວາງມາດຕະການລົງໂທດໜັກທາງດ້ານເສດຖະກິດ ຕໍ່ສະຖາບັນການເງິນທີ່ໃຫຍ່ທີ່ສຸດຂອງ ລັດເຊຍ, Sherbank ໃນເດືອນກັນຍາປີການີ້ນຳ.
